OLKETA KWESTIN WEA YOUNG PIPOL GAREM
Hao Sapos Mi Feel Boring?
Samfala pipol nating laek stap lo haos from hem rain and olketa no garem eni samting for duim and no savve go lo eni ples. Robert, wanfala young man sei: “Lo taem olsem, mi just sidaon nomoa and no savve wat for duim.”
Waswe, enitaem iu feel olsem? Sapos olsem, disfala article savve helpem iu!
Wanem iu shud savve lo hem
Wei for iusim technology maet no help.
Wei for lukluk lo Internet savve mekem taem go pas, bat hem savve stopem iu for iusim mind blo iu for creatim samting and savve mekem iu boring nomoa. Jeremy wea 21 years old hem sei: “Hem olsem iu lukluk nating lo screen nomoa and no ting abaotem eni samting.”
Wanfala young woman wea nem blo hem Elena hem agree. Hem sei: “Technology no savve helpem iu lo evri samting. Hem mekem iu no tingim real laef gogo taem iu no iusim technology, iu bae feel boring go moa!”
Hao iumi ting lo samting savve help.
Sapos iu garem staka samting for duim, hao, bae datwan mekem iu no boring? Hem depend sapos iu interest lo wanem iu duim. Olsem example, wanfala young woman wea nem blo hem Karen sei: “Skul hem boring tumas lo mi, nomata mi garem staka samting for duim lo day. Iu mas interest lo wanem iu duim mekem iu no boring.”
Waswe, iu savve? Nomata iu “no garem eni samting for duim,” datwan shud no stopem iu. Hem chance nao for iusim taem blo iu for creatim niu samting.
Taem wea iu garem hem olsem gudfala graon wea iu savve mekem olketa niufala samting for grow
Wanem iu savve duim
Trae for interest lo olketa difren samting. Mekem olketa niu fren. Start for lanem wanfala niu samting. Duim research lo olketa niu subject. Pipol wea interest lo olketa difren samting no savve feel boring taem olketa stap seleva, and pipol bae no savve tingim olketa boring tu!
Bible principle: “Yumi mas barava wakahad gudfala long evrisamting wea yumi duim.”—Eklesiastes 9:10.
“Mi just start for lanem Mandarin Chinese languis, and wei for practice evriday mekem mi luksavve mi barava misstim wei for iusim brain blo mi for lanem kaen samting olsem. Mi enjoyim tumas for garem niu project. Hem mekem mi tingting and helpem mi for iusim taem blo mi lo gudfala wei.”—Melinda.
Tingim why iu duim wanfala samting. Sapos iu ting raonem why iu duim wanfala samting, bae iu interest go moa lo datwan. Nomata olketa skul assignment bae no boring sapos iu luksavve why iu duim datwan.
Bible principle: “So, nambawan samting wea yumi save duim nao, hemi olsem, yumi . . . gohed fo hapi long olketa samting wea yumi garem.”—Eklesiastes 2:24.
“Klosap taem mi finis skul, mi study for eitfala hour each day bikos mi need for duim olketa study wea mi misstim. Hem no boring lo mi bikos mi laek for kasem goal blo mi for graduate, and datwan mekem mi no givap.”—Hannah.
Acceptim olketa samting wea iu no savve changem. Nomata olketa barava interesting samting wea iu duim bae garem samfala boring samting lo hem tu. And maet samfala taem best fren blo iu cancelim plan blo iutufala, mekem iu no garem eni samting for duim tu. No letem kaen samting olsem for mekem iu feel sorre, bat trae for garem positive tingting.
Bible principle: “Man hemi hapi, laef hemi olsem fist.”—Provebs 15:15.
“Wanfala fren talem mi for enjoyim taem wea mi stap seleva. Hem sei wanfala important samting wea evriwan shud lanem hem for balance lo haomas taem iumi stap witim olketa narawan and haomas taem iumi stap seleva.”—Ivy.