Luksavve Long Trufala God
KLOSAP full taem pipol stap long earth, olketa garem planti god. Staka tumas nao stap gogo hem hard for markem namba long haomas man and woman god nao pipol worshipim evriwea long earth—bat hem kasem planti million.
From iumi savve God hem stap, iumi savve ask, Which wan long evri god wea olketa man worshipim evriwea long earth, long bifor and distaem, hem trufala God? Long John 17:3 Bible showimaot hao wanfala trufala God nomoa stap: “Diswan nao minim laef olowe, for olketa kasem savve long iu, only trufala God, and long dat wan wea iu sendem kam, Jesus Christ.”
Wanfala Nem wea Pipol Luksavve
Hem stret for eni god wea garem fasin for mas garem nem bilong hemseleva mekem hem difren from olketa nara god wea garem nem bilong olketa seleva. Hem bae gud for datfala god garem nem wea hemseleva nao markem, winim wei wea olketa pipol nao nemem hem.
From diswan, wanfala samting wea mekem man konfius kamap. Taem planti bigfala religion givim olketa nem long olketa god bilong olketa, olketa Jew and olketa main church bilong Christendom fail for luksavve wanfala spesol nem for god wea olketa worshipim. Bat olketa go ahed for iusim olketa title olsem Lord, God, Almighty, and Father.
Insaed long pablikeson wea hem raetem Theology, David Clines raet olsem: “Samwea midolwan mek-faev and mek-tu century B.C. wanfala sorre samting happen long God: nem bilong hem lus. Barava nao, olketa Jew lusim wei for iusim nem bilong God, Yahweh, and olketa start for iusim olketa difren title taem olketa storyim Yahweh olsem: God, Lord, Nem, Holy Wan, Wan Wea Stap, and Ples tu. Nomata insaed long olketa Bible text wea olketa raetem Yahweh, olketa man wea read talemaot nem hia olsem Adonai. Bihaen lastfala taem wea temple distroe, nomata long spesol taem for worship, olketa no savve hao for talemaot datfala nem bihaen olketa stop for iusim.” Bat, no eniwan barava savve long taem wea olketa orthodox Jew stop for talemaot big nem bilong God bat iusim olketa narafala Hebrew word for God and Sovereign Lord.
Hem luk olsem, firstfala important wei for lukaotem and for luksavve long “only trufala God” hem for savve long nem bilong hem. Wei for lukaotem God nating hard nomoa, bikos nem bilong Almighty God, Creator, showaot klia long Psalm 83:18: “Mekem pipol savve hao iu, wea nem bilong iu JEHOVAH, iu nomoa most hae ovarem full earth.”—King James Version.
Jehovah or Yahweh?
From nem bilong Jehovah kamap insaed King James Version and olketa narafala Bible transleison, samfala chus for iusim nem Yahweh winim Jehovah. Wanem nem nao stret?
Olketa raetem planti oldfala copy bilong Bible long Hebrew languis. Long olketa Hebrew Scripture, nem bilong God kamap klosap 7,000 taem and olketa raetem witim fofala leta—YHWH or JHVH. Olketa kolem fofala leta hia Tetragrammaton, or Tetragram, wea kam from tufala Greek word wea minim “fofala leta.” So kwestin abaotem stretfala wei for talemaot kamap from firstfala Hebrew raeting hem garem fofala leta wea no garem olketa vowel for gaedem man wea read. So wei for talem Tetragrammaton for kamap Yahweh or Jehovah depend long wanem kaen vowel nao man wea read iusim long fofala leta hia. Distaem planti Hebrew savveman laekem Yahweh olsem trufala wei for talem.
Bat planti samting point go long Jehovah. Long wanem wei? Olketa acceptim wei for talem Jehovah long English for planti handred year nao. Olketa wea againstim wei for talem disfala nem Jehovah, shud againstim tu wei for talem disfala nem Jeremiah and Jesus. Jeremiah bae savve change long Yir·meyahʹ or Yir·meyaʹhu, firstfala wei for talemaot long Hebrew, and Jesus bae kamap Ye·shuʹaʽ (long Hebrew) or I·e·sousʹ (long Greek). Dastawe, planti Bible student, insaed long diswan tu Olketa Witness Bilong Jehovah, tingse hao planti samting point go long wei for iusim disfala main English word “Jehovah” and semkaen nem long olketa narafala languis.
Waswe, Hem Barava Important?
Samfala maet sei hao hem no barava important for iu talem nem bilong Almighty God or nomoa, and olketa satisfae for talem nem olsem God or Father taem olketa tok abaotem God. Bat, tufala toktok hia, olketa title nomoa and no nem bilong God or olketa spesol nem. Long taem bilong Bible bifor olketa iusim datfala toktok for God (ʼElo·himʹ, long Hebrew) taem olketa storyim eni god—and olketa iusim tu for heathen god bilong Philistine, Dagon. (Judges 16:23, 24) So for wanfala Hebrew talem wanfala Philistine hao hem, wanfala Hebrew, wea hem worshipim “God,” diswan bae no showimaot trufala God wea hem worshipim.
Wanfala interesting toktok insaed The Imperial Bible-Dictionary bilong 1874 hem sei: “Evriwea [Jehovah] hem nem bilong samwan wea point go long God wea laef and hem nomoa; long narasaed Elohim hem join moa witim samting wea fitim eniting, wea planti taem storyim Most Hae God, bat no evritaem . . . . Hebrew man maet sei datfala Elohim, datfala tru God, wea againstim evri giaman god; bat hem nating sei datfala Jehovah, from Jehovah hem nem bilong tru God nomoa. Planti taem hem sei God bilong mi . . . ; bat hem nating sei Jehovah bilong mi, from taem hem sei God bilong mi, hem minim Jehovah. Hem savve tok abaotem God bilong Israel, bat no abaotem Jehovah bilong Israel, from no eni nara Jehovah stap. Hem tok abaotem God wea laef, bat no abaotem Jehovah wea laef, from hem nating savve tingim Jehovah olsem hem no laef.”
Olketa Fasin Bilong Trufala God
For savve long nem bilong samwan, hem no minim iumi barava savve gud long hem. Staka long iumi savve long nem bilong olketa leader long gavman. Iumi savve long nem bilong samfala important man and woman bilong narafala kantri tu. Bat for savve long olketa nem nomoa—nomata for talem long stretfala wei—hem no minim iumi barava savve gud long datfala man or woman or barava savve gud wanem kaen man or woman nao olketa. Olsem tu, for savve long only trufala God, iumi need for trae for savve and barava laekem fasin bilong hem.
Nomata hem tru hao olketa man bae no savve lukim trufala God, long kaenfala wei hem putim record abaotem fasin bilong hem for iumi insaed long Bible. (Exodus 33:20; John 1:18) Samfala Hebrew profet lukim vision abaotem kot bilong Almighty God long heven. Wanem olketa storyim no showim nomoa bigfala honor and spesol glory and paoa bat tu peace, order, luk naes and barava gud.—Exodus 24:9-11; Isaiah 6:1; Ezekiel 1:26-28; Daniel 7:9; Revelation 4:1-3.
Jehovah God showimaot olketa naesfala fasin bilong hem wea muvim Moses, olsem hem stap long Exodus 34:6, 7: “Jehovah, Jehovah, God wea garem mercy and kaenfala fasin, slow for kros and garem bigfala loving-kaeness and truth, keepim loving-kaeness for olketa thousand, forgivim mistek and rong and sin.” Waswe, iu no agree hao wei for kasem savve abaotem olketa fasin bilong God savve pullim iumi for kam klosap long hem and mekem iumi for laek savve planti samting moa abaotem hem?
Nomata no eniwan fit for lukim Jehovah God long nambawan glory bilong hem, Bible storyim hao taem Jesus Christ stap long earth, hem barava showimaot wanem kaen man nao Dadi bilong hem long heven, Jehovah God. Wanfala taem Jesus sei: “Son no savve duim eni samting followim tingting bilong hemseleva, bat only samting wea hem lukim Father hem duim. From eni samting wea dat Wan hem duim, Son hem duim olketa samting hia long sem wei tu.”—John 5:19.
So iumi savve sure wei wea Jesus showimaot kaenfala fasin, fasin for care, kwaet fasin, naesfala feeling witim strongfala fasin for lovem raeteous fasin and heitim nogud fasin, evri fasin hia nao samting wea hem lukim long Dadi bilong hem, Jehovah God, taem hem stap witim God long heven bifor hem kamap man long earth. Dastawe, taem iumi barava kasem and savve long mining long nem bilong Jehovah, iumi barava garem evri reason for lovem and blessim datfala holy nem, for praisem and mekhae long hem and trustim hem.
For savve long only trufala God long disfala wei hem samting wea no savve kasem end, olsem Bible talemaot klia long John 17:3 long New World Translation of the Holy Scriptures. Long hia stretfala mining bilong disfala verb “for savve” hem barava helpem iumi, from hem iusim for samting wea go ahed for happen distaem and no for samting wea happen distaem nomoa. Dastawe, iumi read olsem: “Diswan nao minim laef olowe, for olketa kasem savve long iu, only trufala God, and long dat wan wea iu sendem kam, Jesus Christ.” Tru nao, for go ahed kasem savve long only trufala God, Jehovah, and long Son bilong hem, Jesus Christ, hem samting wea shud no stop.
Trufala God Showaot
Dastawe, trufala God planti taem barava difren from planti giaman god. Hem nao almighty Creator bilong universe, disfala Earth and olketa man. Hem garem wanfala nem for hemseleva wea difren evribit—Jehovah, or Yahweh. Hem no kamap part bilong wanfala Trinity. Hem God bilong love and hem wantem best samting for olketa man. And tu, hem wanfala God bilong justice, and hem bae no letem pipol for spoelem earth and mekem war and raf fasin for stap olowe.
Jehovah showimaot wei wea hem disaed strong for no just mekem earth klin from olketa nogud fasin and wei for safa bat tu hem bae mekem earth kamap paradaes for olketa wea garem honest heart for garem hapi living for olowe. (Psalm 37:10, 11, 29, 34) Almighty God putim finis Son bilong hem, Jesus, olsem King long Kingdom bilong God long heven, and klosap nao Jesus bae startim datfala niu world bilong raeteous fasin and mekem Paradaes kamap moa long earth.—Daniel 2:44; Matthew 6:9, 10.
Mifala hope hao distaem hem moa isi for iu ansarem disfala kwestin, Waswe, God hem barava stap? and for luksavve long trufala God.
[Piksa long page 23]
Jesus Christ luksavve long Jehovah olsem trufala God