Young Pipol Askem . . .

Waswe Long Wei for Mekhol Long Body?

‘Firstaem mi lukim pipol werem ring long lips and nara part long body, mi ting, “Man! Spesol moa ia.”’—Lisa.

NO LISA nomoa ting olsem. Moa and moa young pipol werem ring and stud long difren part bilong body, nomata long eyebrow, lips, and belly-button tu. Diswan hem wei for mekhol long body.a

Heather wea 16-year-old laek tumas for garem diswan. Hem sure wei for garem ring long belly-button bae luk “narawe.” Naentin-year-old Joe garem finis wanfala gold barbell stud long tongue bilong hem. And nara girl mekhol long eyebrow bilong hem bikos hem laekem samting wea “showaot klia” wea “mekem pipol seke.”

Idea for werem jewelry long body hem no niu. Long taem bilong Bible bifor, wanfala woman wea followim God, Rebekah, werem nose ring. (Genesis 24:22, 47) Taem olketa Israelite kamaot from Egypt, olketa werem earring. (Exodus 32:2) Bat iumi no savve sapos olketa mekhol long ear and nose for werem olketa jewelry hia. Bat iumi savve olketa faithful slave mekhol long ear bilong olketa for olsem saen bilong wei wea olketa loyal long masta bilong olketa. (Exodus 21:6) From bifor kam samfala nara kantri tu duim tumas disfala wei for mekhol long body. Pipol bilong Aztec and Maya mekhol long tongue bilong olketa for spiritual reason. Wei for mekhol long lip hem big yet long Africa and midolwan olketa South American Indian. Wei for pasim olketa dekoreson thru long nose hem big midolwan long olketa Melanesian and pipol bilong India and Pakistan.

Tu-thri year go nomoa, long olketa Western kantri, mekhol long body hem for ear bilong olketa woman nomoa. Bat distaem olketa teenager and young pipol, girl and boy evriwan, werem jewelry long klosap evri part bilong body wea hem fit for joinim long hem.

Why Olketa Mekhol Long Body

Staka mekhol long body from olketa tingse hem fashion—niu stael. Olketa narawan tingse diswan bae mekem olketa luk naes go moa. Tru tumas, disfala stael kamap moa big from samfala top model, sports star, and musician olketa mekhol long body. And for samfala young wan, wei for mekhol long body hem wanfala wei for showimaot olketa independent, for kasem nem for seleva, for sei olketa difren from nara man. Man for raet, John Leo, hem sei: “Wei for laek mekem dadi and mami kros and for mekem pipol seke hem luk olsem main samting wea bihaenem wei for mekhol long body.” Wei for no satisfae, no laek change, bighed, and no laek obey luk olsem hem muvim pipol for laek tok aot olsem.

Samfala mekhol long body for satisfaem bigfala need saed long mind and feeling. Olsem example, samfala young pipol garem tingting diswan bae mekem big moa wei wea olketa respectim olketa seleva. Samfala wea olketa spoelem saed long sex taem olketa pikinini duim diswan for showimaot olketa boss long body bilong olketa.

Danger Saed Long Health

Bat waswe, evrikaen wei for mekhol long body hem sef? Staka medical pipol sei samfala no sef. Wei for duim seleva hem danger tumas. And for go long wanfala wea no garem full savve hem garem danger tu. Staka no kasem gud training, olketa lane for duim from fren, magasin, or video. From diswan, maet olketa no duim followim sef wei saed long health or no minim tu olketa danger bilong wei for mekhol long body. And tu, staka long olketa no garem savve long body bilong man. Diswan hem serious from wei for mekhol long rong ples savve kosim bigfala bleeding. Wei for mekhol long nerve savve spoelem man for olowe.

Narafala serious danger hem infection. Wei for no klinim gud olketa tul savve spreadim sik olsem hepatitis, AIDS, tuberculosis, and tetanus. Nomata sapos olketa iusim klin samting, gudfala kea bihaen hem important tu. Olsem example, belly-button savve feel nogud bihaen olketa mekhol long hem from kaleko rabem evritaem. So hem savve tek kasem naen month for heal ap.

Olketa doctor sei wei for mekhol long soft bone long nose or ear hem garem moa danger winim wei for mekhol long botom part bilong ear. Wanfala niusleta from American Academy of Facial Plastic and Reconstructive Surgery hem sei: “Wei for garem planti hol for earring long top part bilong ear hem samting for barava wari abaot—olketa bigfala infection savve kosim wei for lusim full top raon part bilong ear. Olketa nose stud tu garem danger—wanfala infection long disfala area savve affectim olketa blood vessel klosap and spread go long brain.” Disfala niusleta end olsem: “Hem best for duim [mekhol long body] long botom part bilong ear nomoa.”

Olketa nara danger hem olketa scar wea luk nogud and wei wea jewelry savve affectim body. Sapos olketa ring long olketa soft area, olsem susu, kasem samting or pas long kaleko, hem isi for ples hia brek. Scar wea kamap long susu bilong wanfala young girl savve blokem hol bilong milk and sapos hem no kasem treatment, hem savve faendem hard or bae hem kanduit for susum wanfala baby long future.

American Dental Association no longtaem go nomoa talemaot warning hao wei for mekhol insaed long mouth hem danger long health. Olketa nara danger bilong wei for mekhol long mouth hem wei wea man savve choke bihaen hem swallowim jewelry, mouth kamap numb and tongue kanduit teistim kaikai, bleeding wea no savve stop, brek teeth, mouth kasem moa saliva, no savve kontrolem saliva kakam aot from mouth, kill long gum, hard for toktok, and problem for breath, baetem kaikai, and for swallowim samting. Taem wanfala young woman wea nem bilong hem Kendra hem mekhol long tongue bilong hem, hem “boela ap olsem wanfala balloon.” For mekem moa worse, man wea mekem hol iusim stud wea hem for chin, and diswan katem tongue bilong Kendra and brekem flesh long botom tu. Hem klosap lusim wei for toktok.

God teachim pipol bilong hem olketa Israelite for respectim body bilong olketa and for stap klia from wei for spoelem body bilong seleva. (Leviticus 19:28; 21:5; Deuteronomy 14:1) And nomata olketa Christian distaem no anda long Law Bilong Moses, olketa kasem yet encouragement for respectim body bilong olketa. (Romans 12:1) Waswe, hem no fitim gudfala tingting for stap klia from wei for putim health long danger? Olketa nara samting tu stap for iu mas tingim.

Wanem Message Nao Hem Showimaot?

Bible no talem stret eni komand abaotem wei for mekhol long body. Bat hem encouragem iumi for mekem iumiseleva luk naes witim “respect and stretfala tingting.” (1 Timothy 2:9) Nomata maet wanfala samting luk fitim long wan part bilong world, kwestin hem hao nao pipol long ples bilong iu bae ting long diswan. Olsem example, wan part long world maet acceptim wei for woman mekhol long ear. Bat long nara kantri or kastom, samfala bae feel nogud long diswan.

Nomata hem big tumas for man wea pipol tinghae long hem for mekhol long body and werem earring, staka Western kantri no acceptim yet wei wea man duim diswan. Wanfala reason why diswan kamap hem maet from, for longtaem nao, hem mark bilong olketa prisoner, motorbike gang, punk musician, and olketa homosexual. For staka pipol, mekhol long body hem join witim bighed wei and wei for disobey. Planti seke tumas long hem and ting long hem olsem barava nogud samting. Wanfala girl wea nem bilong hem Ashley hem sei: “Wanfala boy long class bilong mi hem mekhol long nose bilong hem. Hem tingse samting hia hem luk gud tumas. Long tingting bilong mi hem luk barava rabis!”

Dastawe iumi no sapraes taem wanfala stoa witim big nem long America garem rul hao evri wakman wea deal witim customer kanduit for werem winim wan earring long wan ear, and evri narakaen wei for mekhol long body wea pipol savve lukim hem tambu. “Iu hard for savve hao nao pipol bae ting” long wei for mekhol long body, wanfala man wea tok for company hem sei. Olketa wea givim kaonsel saed long waka for selen tu advaesem olketa boy long college wea apply for wanfala waka for “no werem eni earring or narakaen wei for mekhol long body; olketa woman shud no werem . . . nose ring.”

Olketa young Christian nao main wan for tinghevi abaotem hao pipol bae tingim olketa, insaed diswan hem long taem olketa talemaot gud nius. Olketa no laek for ‘givim eni reason for mekem man stambol, mekem no eniwan savve faendem rong long ministry bilong olketa.’ (2 Corinthians 6:3, 4) Nomata wanem tingting iu maet garem abaotem wei for mekhol long body, iu kanduit changem wei wea lukluk bilong iu talemaot tingting and living bilong iu. Wanem nao iu laek for talemaot?

Gogo, iu—and, tru nao, parents bilong iu—mas disaedem wanem iu bae duim long disfala samting. Gudfala advaes from Bible hem for “no letem world raonem iu skwisim iu for followim sheip bilong hem.” (Romans 12:2, Phillips) Tingim, iu nao bae live witim samting wea kamaot from disison bilong iu.

[Footnote]

[Piksa long page 12]

Wei for mekhol long body hem big tumas midolwan young pipol