Tingting Bilong Bible
Waswe, Hem Stret for Worshipim Jesus?
INSAED staka handred year, planti long Christendom worshipim Jesus Christ olsem hem nao Almighty God. Bat, Jesus seleva mekhae long and worshipim Jehovah God nomoa. Olsem example, taem hem kasem hevi for duim wanfala samting for worshipim Devil, Jesus hem sei: “Iu mas worshipim Jehovah, God bilong iu, and iu mas duim holy service long hem nomoa.” (Matthew 4:10) Bihaen, Jesus talem olketa disaepol bilong hem: “No kolem eniwan dadi bilong iufala long earth, from wanfala nomoa hem Dadi bilong iufala, Datwan long heven.”—Matthew 23:9.
Jesus hem minim long wanfala Samaritan woman, kaen worship wea man mas givim long God. Worship bilong olketa mas kam from spirit and truth. Tru tumas, “Dadi hem lukaotem pipol olsem for worshipim hem.” (John 4:23, 24) Yes, God nomoa shud kasem bigfala honor bilong worship. For givim worship long eni narawan or nara samting hem wei for worshipim idol, wea olketa Hebrew and Greek Scripture evriwan tok strong againstim.—Exodus 20:4, 5; Galatians 5:19, 20.
‘Bat,’ samfala maet argue and sei, ‘waswe, Bible no talem hao iumi mas worshipim Jesus tu? Waswe, Paul no sei long Hebrews 1:6: “Letem evri angel bilong God worshipim hem [Jesus]”?’ (King James Version) From wanem Bible talem abaotem wei for worshipim idol, hao nao iumi savve minim disfala scripture?
Worship Insaed Long Bible
Firstaem, iumi mas minim wanem nao Paul minim taem hem sei worship. Hem iusim datfala Greek word pro·sky·neʹo. Unger’s Bible Dictionary sei disfala word garem mining for ‘kissim hand bilong samwan for showimaot bigfala honor or respect.’ Wanfala Expository Dictionary Bilong Olketa New Testament Word, wea W. E. Vine raetem, hem sei disfala word “hem minim wanfala samting wea man duim for showimaot respect, wea maet hem long man . . . or long God.” Long taem bilong Bible, pro·sky·neʹo planti taem minim tu wei for baodaon front long samwan wea garem hae position.
Tingim parabol wea Jesus talem abaotem datfala slave wea kanduit peim bak bigfala selen long masta bilong hem. Nara wei for raetem disfala Greek word kamap long disfala parabol, and taem hem transleitim, King James Version sei hao “datfala servant foldaon, and worshipim [nara wei bilong word pro·sky·neʹo] hem [datfala king], and sei, Lord, patient witim mi, and mi bae peim iu full amount.” (Matthew 18:26; difren raeting hem bilong mifala.) Waswe, disfala man hem worshipim idol? Nomoa nao! Hem showim honor and respect nomoa wea fitim king, masta and boss bilong hem.
Kaen wei for respect olsem hem wei bilong pipol long bifor kam long taem bilong Bible. Jacob baodaon sevenfala taem taem hem meetim brata bilong hem, Esau. (Genesis 33:3) Olketa brata bilong Joseph baodaon front long hem for honorim hem from position bilong hem long Egypt. (Genesis 42:6) Olketa samting hia mekem iumi minim klia olketa samting wea happen taem olketa man wea studyim star faendem youngfala Jesus, wea olketa luksavve long hem olsem “datwan wea born wea hem king bilong olketa Jew.” Olsem hao King James Version talem long iumi, olketa “foldaon, and worshipim [pro·sky·neʹo] hem.”—Matthew 2:2, 11.
So, hem klia, disfala word pro·sky·neʹo, wea olketa transleitim “worshipim” insaed samfala Bible transleison, hem no for kaen honor wea fitim Jehovah God nomoa. Hem savve minim tu respect and honor wea man showim for pipol. For mekem no eni rong mining kamap, samfala Bible transleitim word pro·sky·neʹo long Hebrews 1:6 olsem “showim honor long hem” (New Jerusalem Bible), “honorim hem” (The Complete Bible in Modern English), “baodaon front long hem” (Twentieth Century New Testament), or “baodaon long hem” (New World Translation).
Iumi Fit for Baodaon Long Jesus
Waswe, iumi fit for baodaon long Jesus? Yes! Long leta bilong aposol Paul for olketa Hebrew, hem minim hao, olsem man wea bae “kasem evri samting,” Jesus hem “sidaon long raet saed bilong Nambawan Man long olketa haefala ples” finis. (Hebrews 1:2-4) Dastawe, “long nem bilong Jesus evri knee mas bend, olketa long heven and olketa long earth and olketa andanit long graon, and evri tongue mas talemaot Jesus Christ nao hem Lord for givim glory long God wea hem Dadi.”—Philippians 2:10, 11.
Klosap nao Christ bae barava iusim disfala haefala position and bigfala paoa bilong hem for tanem earth for kamap paradaes. Anda long lead bilong God, and from ransom sakrifaes bilong Jesus, hem bae finisim evribit sorre and pain from world for mekem olketa wea stap anda long raeteous rul bilong hem stap gud. So waswe, hem no fit for kasem honor, respect, and wei bilong man for obey long hem?—Psalm 2:12; Isaiah 9:6; Luke 23:43; Revelation 21:3, 4.
“Wanfala God wea Wantem Pipol for Worshipim Hem Nomoa”
Bat Bible showimaot klia hao worship bilong iumi —long saed bilong religion for givim honor and worship—mas go long God nomoa. Moses storyim hem olsem “wanfala God wea wantem pipol for worshipim hem nomoa.” And Bible encouragem iumi for “worshipim Diswan wea mekem heven and earth and sea and evri wata.”—Deuteronomy 4:24; Revelation 14:7.
Jesus garem barava important part insaed tru worship, hem fit for kasem honor and respect. (2 Corinthians 1:20, 21; 1 Timothy 2:5) Hem nomoa only wei wea thru long hem iumi savve kam front long Jehovah God. (John 14:6) From diswan, olketa tru Christian givim worship bilong olketa long Jehovah God nomoa, datfala Almighty Wan.