Wei for Againstim Nara Religion—Olketa Talemaot
FROM MAN WEA RAET FOR WEKAP! LONG BRITAIN
“OLKETA bishop feel sorre long ‘olketa barava nogud crime’ bilong Queen Mary,” hem nao heding bilong Catholic Herald niuspepa bilong Britain long December 11, 1998. Olketa Roman Catholic bishop bilong England and Wales luksavve hao “long nem bilong Catholic religion olketa duim olketa barava nogud samting, olsem example long olketa Protestant long taem bilong Reformation long Great Britain.” Hu nao Queen Mary? Wanem nao olketa rong samting wea hem duim mekem olketa hia talemaot sorre bilong olketa? And why nao olketa bishop bilong England and Wales chusim distaem for talemaot diswan?
Mary Tudor hem born long England wea followim Roman Catholic religion long 1516. Hem nomoa pikinini wea laef bilong Catherine bilong Aragon, firstfala waef bilong King Henry VIII, wea mami bilong Mary teachim hem for kamap wanfala strong Catholic. Dadi bilong hem wantem wanfala boy for kamap king and kasem evri samting bilong hem taem hem growap, bat Catherine no bornem wanfala boy. From pope hem nating willing for finisim marit bilong hem long Catherine, Henry duim samting seleva, wea mekem wei for Protestant Reformation savve kamap long England. Long 1533 hem maritim Anne Boleyn, fofala month bifor Archbishop bilong Canterbury, Thomas Cranmer, talemaot hao firstfala marit bilong Henry hem no stret fitim law.
From hem barava bighed againstim diswan, long year bihaen, Henry hem stap klia evribit from Roman Catholic Church and hem kamap nambawan hed bilong Church bilong England. Mary, wea pipol tingim hem olsem pikinini bilong tufala wea no marit, nating lukim mami bilong hem moa, bikos olketa forcem mami bilong hem for stap long wanfala farawe ples go kasem taem hem dae.
Protestant Againstim Nara Religion
Insaed long 13 year bihaen, samfala wea no want for luksavve long Henry olsem hed bilong church or wea still acceptim paoa bilong pope, olketa killim olketa dae. Henry hem dae long 1547 and Edward wea hem naen year and wea born long mek-thri waef bilong sixfala waef bilong Henry, and wea hem nomoa son wea born from marit wea fitim law, hem tekova long rul bilong Henry. Edward and olketa man for givim advaes long hem trae for mekem England kamap Protestant. Olketa Roman Catholic kasem persecution from olketa go ahed for followim religion bilong olketa, and olketa aotem olketa altar and image from olketa church bilong olketa.
No longtaem bihaen, olketa aotem olketa law bilong bifor wea stopem man for printim and readim Bible long English languis, and olketa church service wea olketa readim Bible long hem, olketa mas readim long English, no Latin. Bat long 1553, Edward hem dae from tuberculosis taem hem 15 year nomoa. Evriwan tingim Mary olsem wan wea fit for changem hem, so hem kamap Queen bilong England.
Catholic Againstim Nara Religion
Long firstaem pipol welkamim Mary wea hem 37 year, bat no longtaem bihaen pipol no laekem hem. Pipol wea stap anda long hem getius long Protestant wei, bat Mary disaed for mekem kantri kamap Roman Catholic moa. No longtaem bihaen, hem finisim evri law bilong Edward saed long religion. Mary askem pope for forgivim nation bilong hem. So England kamap Roman Catholic moa.
Wea for fren bak witim Rome startim moa persecution againstim olketa Protestant. Olketa tingim olketa hia olsem wanfala nogud boela wea olketa mas katemaot, nogud gogo diswan affectim full body. Planti wea no want for acceptim olketa teaching bilong Roman Catholic Church, olketa bonem olketa dae long post.
Panis for Olketa wea No Agree Witim Church
John Rogers nao first wan for dae insaed long taem wea Mary hem rul. Hem wakem wanem olketa kolem Bible bilong Matthew, wea olketa iusim olsem faondeson for King James Version. Bihaen hem givim wanfala tok wea givim warning againstim “wei bilong Catholic wea savve spoelem pipol, wei for worshipim idol, and kastom biliv,” olketa putim hem long prison for wan year, and long February 1555 olketa bonem hem dae for wei wea hem no agree witim church.
Olketa accusim John Hooper, bishop bilong Gloucester and Worcester, olsem man wea no agree witim church. Hem talemaot hao hem fitim law for olketa bigman bilong church for marit and hao pipol savve divorce sapos partner duim adultery. Hem denyim tu wei wea body bilong Christ nao stap insaed long Mass. Olketa bonem Hooper, wea safa long bigfala wei from hem tekem klosap 45 minute for hem dae. Taem olketa markem Hugh Latimar for dae long fire, wanfala Protestant preacher wea hem 70 year, hem talem samting for encouragem Nicholas Ridley, wea olketa taemap hem tu long post for bone from hem no agree witim church, taem hem sei: “No fraet long diswan Masta Ridley, and go ahed olsem wanfala man. Tuday, from kaeness bilong God wea iumi no fit for kasem, iumi bae startim wanfala fire long England wea mi sure bae no eniwan savve aotem.”
Olketa talemaot wei wea Thomas Cranmer, firstfala Archbishop bilong Canterbury anda long King Henry and King Edward, hem guilty olsem man for no agree witim church. Nomata hem talemaot finis hao hem lusim and againstim olketa biliv bilong Protestant, long last minute bifor hem dae, hem talemaot hao hem distaem go bak moa long samting hem bilivim firstaem. Hem accusim pope olsem enemy bilong Christ, and then hem putim raet hand bilong hem insaed long fire for bone firstaem, from raet hand bilong hem nao saenem pepa for sei hem lusim olketa samting hem bilivim.
Nomata winim 800 long olketa Protestant wea rich ranawe go long nara kantri and stap sef, insaed long thrifala year and naen month bihaen go kasem taem Mary hem dae, olketa bonem long post winim 277 pipol long England. Planti long olketa hia olketa wea barava konfius abaotem wanem nao olketa shud bilivim. Young pipol wea herem evritaem pipol accusim pope taem olketa growap, distaem kasem panis from olketa talem samting wea againstim hem. Olketa narawan lane for readim Bible seleva and disaedem wanem nao tingting bilong olketa seleva saed long religion.
Planti pipol barava feel nogud and fraet from wei wea dae bilong olketa man, woman, and pikinini wea olketa taemap long post and bonem hem slow and mekem olketa safa long bigfala pain. Woman wea studyim history Carolly Erickson storyim wanem nao hem happen planti taem: “Planti taem firewood wea olketa iusim for datfala fire hem still green or hem tuwet mekem hem no savve bone kwiktaem. Olketa bag gunpowder wea olketa taemap long man for mekem hem dae kwiktaem planti taem no bosta, or maet bosta and givim bigfala garekil bat no killim hem dae.” Olketa no putim kaleko insaed long mouth bilong olketa wea bae dae, wea planti taem mekem evriwan savve herem olketa singaot big and prea go kasem taem olketa dae.”
Planti pipol start for daotem religion olsem wea need for bonem pipol long post for strongim olketa teaching bilong hem. Feeling for sorre long olketa Protestant wea dae for faith hia lead go for pipol raetem olketa singsing abaotem olketa. John Fox start for raetem Book of Martyrs, wea gogo olketa man for leadim disfala change for kamap Protestant ting long hem klosap olsem Bible long wei wea hem affectim pipol. Planti wea olketa Roman Catholic taem Mary start for rul kamap Protestant bifor rul bilong hem finis.
Samting Pipol Kasem From Laef Bilong Mary
Bihaen hem kamap Queen, Mary talem hao hem bae maritim kasin bilong hem Philip, wea bae kasem rul long Spain. Hem wanfala king from nara kantri and hem wanfala barava strongfala Catholic, wea datwan nao samting wea pipol bilong England barava no wantem. From olketa againstim disfala marit, wanfala sekson bilong olketa Protestant faet for stopem diswan, bat olketa fail, and olketa panisim 100 long olketa hia long dae. Philip and Mary tufala marit long July 25, 1554, bat Philip nating kamap king. Nomata olsem, wei wea olketa no savve garem pikinini mekem Mary barava sorre, from hem wantem wanfala son wea Catholic for kasem rul bilong hem.
Bihaen hem rul for faevfala year nomoa, health bilong hem kamap nogud and hem dae taem hem 42 year. Hem barava sorre go kasem taem hem dae. Hasband bilong hem les long hem and pipol wea hem rulim heitim hem. Taem hem dae planti pipol long London holem olketa party long olketa street. Winim wei for mekem Catholic kamap big, hem mekem pipol want for kamap Protestant from wei bilong hem for ova tumas. Samting wea pipol kasem from laef bilong hem, hem kamap samting wea fitim nem wea pipol givim for hem—Bloody Mary.
Conscience wea Rong Samting Nao Muvim
Why nao Mary orderim staka pipol for dae long wei for bone witim fire? Olketa teachim hem hao olketa man wea no agree witim church, olketa againstim God, and hem ting long hem olsem responsibility bilong hem for stopem wei wea olketa savve affectim full nation. Hem lisin long conscience bilong hemseleva bat hem no tingim olketa samting wea olketa narawan fit for kasem, wea conscience bilong olketa leadim olketa for followim difren wei.
Nomata olsem, olketa Protestant semsem long wei for againstim nara religion. Anda long rul bilong Henry and Edward, olketa killim dae pipol long fire tu from olketa garem biliv wea difren saed long religion. Woman wea changem Mary for rul, Elizabeth 1, mekem law wea sapos wanfala man followim Catholic wei, hem bae guilty long wei for againstim gavman, and insaed long taem wea hem rul, olketa killim dae winim 180 English Roman Catholic man. Insaed long century wea kamap bihaen, planti handred moa pipol dae from biliv bilong olketa saed long religion.
Why Talem Sorre Distaem?
December 10, 1998, hem nao mek-50 anniversary bilong United Nations’ Universal Declaration of Human Rights. Article 18 hem luksavve long “wei wea evriwan fit for garem freedom saed long conscience and religion,” insaed long diswan, freedom for man savve changem religion bilong hem and for teachim and followim religion bilong hem. Olketa Roman Catholic bishop bilong Rome and Wales chusim mek-50 anniversary olsem “wanfala taem wea fitim for olketa Catholic for lukluk gud long conscience bilong olketa seleva long olketa samting hia” and for luksavve long olketa “barava nogud samting” wea happen, main taem nao long taem bilong Mary Tudor.
Nomata olketa hia feel sorre long olketa samting wea kamaot from wei for againstim religion 450 year bifor, waswe, eni samting hem change? Distaem, pipol no taemap pipol long post and bonem olketa, bat planti wea sei olketa Christian go ahed for rape-im and killim dae pipol bilong nara religion. Kaen wei olsem for againstim nara religion hem no mekem God hapi. Tru nao, Jesus Christ, datwan wea showimaot olketa fasin bilong God long perfect wei, talemaot: “From diswan evriwan bae savve iufala nao olketa disaepol bilong mi, sapos iufala garem love midolwan long iufala seleva.”—John 13:35.
[Piksa long page 24]
Queen Mary
[Credit Line]
From buk A Short History of the English People
[Piksa long page 25]
Olketa bonem Latimer and Ridley long post
[Credit Line]
From buk Foxe’s Book of Martyrs
[Piksa long page 25]
Cranmer mek sure raet hand bilong hem bae bone firstaem
[Credit Line]
From buk The History of England (Vol. 1)
[Credit Line long page 24]
Border: 200 Decorative Title-Page/Alexander Nesbitt/Dover Publications, Inc.