Kaikaim Vegetable!

FROM MAN WEA RAET FOR WEKAP! LONG BRAZIL

“Olketa saoa tumas.” “Olketa teist nogud.” “Mi nating kaikaim.”

HEM samfala reason why planti les for kaikaim vegetable. Waswe long iu? Iu kaikaim vegetable evriday? Wekap! duim samfala interview for faendemaot why nao samfala pipol laekem vegetable and why nao nara pipol nomoa.

Olketa wea savve kaikaim vegetable sei parents nao teachim olketa wei wea hem important for kaikaim olketa vegetable and frut. Long narasaed, planti wea no laekem vegetable no getius for kaikaim taem olketa pikinini. Bat, olketa laekem tumas kaikai wea no mas gud for body. Nomata olsem, olketa agree hao vegetable nao hem important for keepim gudfala health.

Parents, teachim pikinini bilong iufala for kaikaim vegetable! Hao? Facts for Life, wea United Nations Children’s Fund nao pablisim, givim idea hao wanfala taem long evriday, bihaen iu susum baby or feedim long botol, olketa baby wea samting olsem six month shud kaikaim vegetable wea olketa boelem, pilam, and smasem. Taem pikinini kaikaim planti difren kaen kaikai, hem bae kasem gud samting. Dr. Vagner Lapate, wanfala doctor from Brazil, hem sei nomata milk nao hem main kaikai for tufala first year bilong baby, wei for givim hem olketa nara kaikai hem “encouragem baby for savve long niufala teist.”

Insaed buk Medicina—Mitos y Verdades (Medicine—Kastom Story and Tru Samting), Carla Leonel sei iu savve start for givim lelebet orange juice, frut wea olketa smasem (olsem banana, apple, and popo), cereal, and vegetable supsup long baby nomata hem no kasem tu year yet. Bat, bikos pipol garem olketa difren kaen tingting long diswan, hem bae wise for iu go lukim doctor bilong iu.