Tingting Bilong Bible
Waswe, God Givim Message Insaed Long Dream?
OLKETA sei man for mekem niu samting, Elias Howe, kasem idea for hao for wakem sewing machine from wanfala dream. Man for raetem music Mozart talem hao hem kasem idea for planti music wea hem raetem insaed long olketa dream. Olsem tu, Friedrich August Kekule von Stradonitz, wanfala chemist talem hao hem faendemaot sheip bilong benzene molecule insaed wanfala dream. Kaen samting olsem hem happen planti taem. Insaed history, wanfala biliv bilong planti kastom hem hao olketa dream join witim spirit world. Samfala biliv hao samting wea happen taem man hem dream hem real olsem taem hem stap wekap.
Samfala part long Bible storyim olketa dream olsem wanfala important wei for kasem information—wanfala wei wea God talem samting. (Judges 7:13, 14; 1 Kings 3:5) Olsem example, God story witim Abraham, Jacob, and Joseph insaed long olketa dream. (Genesis 28:10-19; 31:10-13; 37:5-11) King bilong Babylon, Nebuchadnezzer, kasem olketa profesi dream from God. (Daniel 2:1, 28-45) So, waswe, maet diswan hem givim gudfala reason for bilivim hao nomata distaem, samfala dream nao olketa message from God?
Olketa Dream From God
Long Bible, God evritaem garem reason taem hem mekem wanfala man hem dream. Tru, planti taem man wea dream no savve minim datfala dream stretawe. Nomata olsem, planti taem “Man for Showimaot Olketa Secret” seleva nao explainim dream mekem no eni daot stap abaotem mining bilong hem. (Daniel 2:28, 29; Amos 3:7) Olketa dream wea kam from God no olabaot and hard for minim olsem olketa nara dream wea man savve garem.
Samfala taem, God iusim olketa dream for protectim olketa wea garem important part for duim insaed purpose bilong hem. Olketa wea kasem olketa dream hia no evritaem man wea servem God. Olsem example, olketa wea studyim star wea visitim Jesus taem hem smol yet, no go bak long Herod olsem hem talem olketa from hem laek for killim Jesus dae. Why? Olketa kasem warning insaed long wanfala dream. (Matthew 2:7-12) Diswan givim Joseph wea adoptim Jesus inaf taem for ranawe go long Egypt witim famili bilong hem, from hem tu kasem instruction insaed wanfala dream. Diswan sevem laef bilong young Jesus.—Matthew 2:13-15.
Planti handred year bifor, wanfala Pharaoh bilong Egypt kasem olketa dream abaotem sevenfala hed bilong grain wea healthy and sevenfala buluka wea fat, and tu, sevenfala hed bilong grain wea thin and sevenfala buluka wea bon nating. Witim help from God, Joseph talem stretfala mining bilong olketa dream hia: Sevenfala year bae kamap wea planti kaikai bae grow long Egypt and then bihaen, sevenfala year bilong hangre. Disfala savve mekem olketa long Egypt savve redyim and hipimap inaf kaikai. Diswan hem important samting for mekem laen bilong Abraham go ahed and for tekem olketa go long Egypt.—Genesis, chapter 41; 45:5-8.
King Nebuchadnezzar bilong Babylon tu kasem wanfala dream. Disfala dream storyim hao olketa world paoa wea bae barava affectim pipol bilong God bae kamap and then finis. (Daniel 2:31-43) Bihaen, hem garem nara dream abaotem wei wea hem bae kamap mentol and bihaen kamap gud moa. Disfala profesi dream fulfill long mek-tu wei wea moa big, long wei for markem taem wea Messiah Kingdom bae kamap, wea God bae iusim for fulfillim will bilong hem.—Daniel 4:10-37.
Waswe Distaem?
Tru nao, God hem story witim samfala man bifor thru long olketa dream. Bat Bible showimaot diswan happen tu-thri taem nomoa. Olketa dream no enitaem main wei for God givim message. Planti faithful servant bilong God nating kasem message from God insaed wanfala dream. Iumi savve markem wei wea God iusim olketa dream for story witim man witim wei wea Hem divaedem Red Sea. Iumi savve hem duim datwan wanfala taem nomoa, bat datwan hem no wei wea hem deal witim pipol bilong hem evri nara taem.—Exodus 14:21.
Aposol Paul talem hao long taem bilong hem spirit bilong God muvim olketa servant bilong hem long olketa spesol wei. Paul hem sei: “Long wanfala hem givim toktok bilong wisdom thru long spirit, long narawan toktok bilong savve wea fitim sem spirit, long narawan faith thru long sem spirit, long narawan olketa present bilong healing thru long datfala wanfala spirit, long narawan olketa waka wea showimaot paoa, long narawan for talem profesi, long narawan for luksavve long toktok bilong God, long narawan for story long olketa difren languis, and long narawan for talem mining bilong olketa languis.” (1 Corinthians 12:8-10) Nomata Bible no talem hao olketa kasem olketa dream from God, luk olsem samfala Christian kasem olketa dream from God olsem wanfala long olketa present bilong spirit wea fulfillim Joel 2:28.—Acts 16:9, 10.
Nomata olsem, Paul hem sei olsem abaotem olketa spesol present hia: “Bat nomata olketa present bilong wei for talem profesi stap, bae olketa no stap moa; nomata olketa languis stap, bae olketa finis; nomata savve stap, bae hem no stap moa.” (1 Corinthians 13:8) Luk olsem insaed olketa present wea bae “no stap moa” hem olketa difren kaen wei wea God givim message long man. Bihaen olketa aposol dae, God hem finis for givim olketa spesol present hia long olketa servant bilong hem.
Distaem olketa savveman still go ahed for trae minim wanem nao mekem iumi dream and sapos diswan hem helpem iumi long eni samting. Bible no talem eniting abaotem kaen samting olsem. Nomata olsem, Bible givim wanfala warning long olketa wea strong for lukaotem olketa message from God insaed long olketa dream. Long Zechariah 10:2, hem sei: “Olketa wea duim divination, . . . olketa iusles dream nomoa olketa go ahed for storyim.” And tu, God hem warn againstim wei for lukaotem olketa saen. (Deuteronomy 18:10-12) So, from olketa warning hia, olketa Christian distaem no ting olketa bae kasem kaonsel from God insaed long olketa dream. Bat, olketa ting long olketa dream olsem samting wea happen taem man sleep nomoa.