“Olketa Doctor” wea Mumuv and wea Hangre Fogud
Nomata maet disfala idea hem barava nogud long samfala, wanfala klinfala “doctor” wea fit hem kamap moa—datfala maggot. Wanfala report long The Journal of the American Medical Association (JAMA) hem talem hao olketa doctor long United Kingdom testim disfala idea long 12-fala patient wea garem boela long leg. Olketa doctor givim sixfala patient hydrogel treatment wea olketa bin iusim evritaem, and long nara sixfala olketa putim olketa maggot long boela bilong olketa.a
JAMA hem talem: “Boela bilong sixfala wea olketa doctor putim olketa maggot long hem kamap klin bihaen thrifala day nomoa.” Long olketa narawan wea kasem medicine wea olketa bin iusim evritaem “boela bilong tufala nomoa kamap klin bihaen olketa kasem treatment for wan month; nara fofala hia needim moa treatment.” British medical magasin The Lancet talem hao datfala maggot treatment “savve barava daonem taem wea man needim for treatment sapos iu markem witim olketa nara medicine” and “kost bilong hem klosap haf nomoa long kost bilong hydrogel.”
JAMA talem hao taem olketa doctor iusim maggot treatment—maet long kill wea start for rotten—olketa putim olketa young maggot wea klin long datfala kill. (Olketa doctor iusim nomoa kaen maggot wea no kaikaim meat wea no rotten.) Then olketa kavarem kill hia witim wanfala kaleko wea savve holem meat hia wea kamap olsem wata. Taem olketa maggot kaikai gogo olketa full, doctor hem aotem olketa, and putim olketa niu wan go kasem taem kill hia hem kamap klin. Bihaen datwan, blood hem savve kasem meat wea hem healthy wea help for mekem grow niu meat.
Doctor Michael Walker sei: “Kam kasem disfala taem no eni patient les for iusim olketa maggot, olketa nurse nao feel nogud, no olketa patient.” Hem no United Kingdom nomoa wea iusim maggot treatment, United States and Canada tu iusim long samfala medical clinic. Tru nao, wanfala doctor talem long The Lancet hao “namba bilong patient wea ask for disfala maggot treatment long USA hem moa hae winim namba bilong olketa doctor wea willing for givim.”
Olketa just seknomoa faendaot abaotem maggot treatment. “Olketa doctor for treatim olketa soldia, lukim hao kill bilong olketa soldia wea fulap witim olketa maggot barava heal gud winim olketa kill wea no garem eni maggot long hem. No longtaem bihaen, olketa start for iusim maggot treatment.” And distaem olketa iusim insaed planti handred hospital long United States and Europe.
[Footnote]
a Diswan hem no olsem wei wea olketa iusim olketa leech for aotem blood. Lukim The Watchtower bilong June 15, 1982, page 31.
[Piksa long page 16]
Olketa maggot long wanfala finger (barava size)
[Credit Line]
Picture copyright SMTL, http://www.smtl.co.uk/
[Olketa piksa long page 16]
Bifor
Bihaen
[Credit Line]
Photos by R. Sherman, University of California, Irvine