Police—Why Nao Iumi Needim Olketa?
LIVING bae hao sapos no police stap? For ansarem diswan, tingim samting wea happen long wanfala taon bilong Brazil, Recife, long 1997, taem 18,000 police strike and no police stap for wan million pipol long there.
The Washington Post niuspepa hem sei: “Disfala taon wea stap saedsea barava olabaot for faevfala day, namba bilong olketa wea dae from kill-kill hem thrifala taem moa big. Olketa steal from eitfala bank. Olketa gang ran wild thru long wanfala shopping center and sutsut long gun taem olketa draev long olketa area bilong rich pipol. And no eniwan followim olketa traffic law. . . . Crime hem big tumas gogo ples for keepim olketa dead body and big hospital bilong datfala kantri hem full tumas, mekem olketa mas leim pipol wea olketa sutim and busarem long floor nomoa.” Justice secretary hem sei: “Diskaen wei for brekem law hem no happen bifor.”
Long evri ples long world, nomata hem luk olsem pipol distaem followim hae standard, bigfala wicked fasin go ahed nomoa. Iumi needim protection bilong police. Hem tru, staka long iumi here abaotem wei wea samfala police savve raf, duim corruption, no kea, and iusim paoa long rong wei. Olketa samting hia happen long difren wei long olketa difren kantri. Bat iumi bae hao sapos iumi no garem eni police? Staka taem police duim olketa gudfala service. Wekap! magasin askem samfala police officer from samfala difren kantri why olketa chus for kamap police.
Wanfala Community Service
British police officer, Ivan, hem sei: “Hem mekem mi hapi for helpem pipol. Mi laekem wei wea mi savve duim olketa difren samting. Planti taem pipol no luksavve hao wei for deal witim crime hem smol part nomoa bilong waka bilong police. Big haf hem community service. Long wanfala waka day, maet mi deal witim wanfala dae wea seknomoa happen, wanfala trak accident, wanfala crime, and wanfala olo wea konfius and needim help. Hem barava naes feeling for tekem pikinini wea lus go bak long parents bilong hem or for comfortim man wea feelim bigfala hevi bihaen samwan spoelem hem saed long crime.”
Stephen hem wanfala police officer bifor long United States. Hem sei: “Wanfala police officer garem samting hem needim and taem for helpem pipol taem olketa tan go long hem witim trust for helpem olketa. Hem nao samting wea mekem mi laek kamap police officer. Mi laek for stap redy for helpem pipol and karem hevi for olketa. Mi feel olsem mi help lelebet for protectim pipol from crime. Mi arrestim winim 1,000 pipol insaed faevfala year. Bat for faendem pikinini wea lus, help faendem pipol witim sik Alzheimer’s, and for faendem olketa trak wea man stealim, evriting hia mekem man satisfae. Hem interesting tu for aftarem and kasholem olketa wea mifala laek kwestinim.”
Roberto, wanfala police officer long Bolivia, hem sei: “Mi laek helpem pipol wea insaed emergency. Taem mi young mi savve tinghae long police bikos olketa protectim pipol from danger. Taem mi just start waka olsem police officer, waka bilong mi hem for leadim olketa grup bilong police wea baeleg gardim area bilong taon wea olketa gavman office stap. Klosap evriday mifala deal witim olketa march long pablik saed long politik. Waka bilong mi hem for no letem raf fasin kamap long olketa taem hia. Mi lukim hao sapos mi kaen and balance witim olketa wea leadim diskaen march, mi savve stopem raf fasin wea savve kosim staka for garekil. Diswan mekem mi satisfae.”
Police duim staka difren kaen service. Olketa savve help for aotem puskat from tree, sevem pipol wea olketa terrorist kasholem, and deal witim pipol wea steal long bank. Nomata olsem, from taem olketa first police just kamap, pipol garem hope long olketa and fraetem olketa. Nextfala article bae lukluk long why nao olsem.
[Olketa piksa long page 2, 3]
Page 2 and 3: Directim olketa trak long Chengdu, China; police long Greece wea deal witim bigfala raoa; police long South Africa
[Credit Line]
Linda Enger/Index Stock Photography
[Piksa long page 3]
Stoa olketa steal from taem police strike long Salvador, Brazil, July 2001
[Credit Line]
Manu Dias/Agência A Tarde
[Piksa long page 4]
Stephen, U.S.A.
[Piksa long page 4]
Roberto, Bolivia