Coelacanth, Hard for Faendem
FROM MAN WEA RAET FOR WEKAP! LONG KENYA
LONG April 2001, olketa kasholem wanfala mere coelacanth (hao for talem see-la-kanth) long sea klosap long Kenya.a Long bilong datfala fish hem 1.7 meter and hevi bilong hem, hem 77 kilogram. Olketa luksavve long datfala coelacanth from tail bilong hem wea garem thrifala sekson wea raon and blue kala witim olketa white makmak.
Firstaem,olketa bilivim hao datfala coelacanth hem no stap for longtaem nao. Then, long 1938, olketa kasholem wanfala coelacanth long sea klosap long South Africa. Disfala coelacanth wea olketa faendem hem wanfala long olketa bigfala sapraes wea olketa faendemaot saed long olketa animal long disfala mek-20 century. Kam kasem datfala taem, olketa savve long disfala fish from olketa fossil record nomoa . From taem olketa kasholem datfala coelacanth, olketa lukim samfala moa klosap long Mozambique and Madagascar. Staka lelebet olketa faendem moa long Comoro Islands.
Olketa mere coelacanth no savve leim egg wea savve brek for garem baby insaed long wata. Bat, hem garem nao olketa egg wea go ahed for grow and wea brek for garem baby insaed bele or stretawe bihaen egg kamaot from mami. Seventin egg olsem, wea size bilong hem olsem wanfala tennis ball, olketa tekem aot from mere wan wea olketa kasholem last year.
Olketa animal long sea olsem coelacanth mekhae long olketa difren kaen wei for designim samting and wisdom bilong Creator, Jehovah God.—Psalm 148:7.
[Footnotes]
a Datfala nem coelacanath hem kam from tufala Greek word koilos (garem hol), and akantha (bigfala bon long baksaed), wea explainim hao bigfala bon long baksaed garem hol insaed.
[Credit Line long page 30]
Photo and drawing: Ichthyology Department/NATIONAL MUSEUMS OF KENYA