Raf Fasin—Why Nao Hem Big Tumas?
LONG wanfala early morning, Frank and Gabriella wakabaot long saedsea long Oregon, U.S.A., for lukim taem sun kamap. Tufala barava no idea long samting wea klosap for happen. Tu-thri minute bihaen, samwan sutim tufala long hed. Waswe, samwan pei bak long tufala? Or jealous? Nomoa. Man wea iusim gun for sutim tufala nating savve long tufala, hem just duim samting hem bin tingim—for savve hao nao feeling for killim man dae.
“Long Sunday April 28 1996, Martin Bryant kasem bigfala hapi and semtaem mekem pipol long staka kantri seke fogud. Hem wakabaot thru long Port Arthur, long Tasmania, and sutim evriwan hem meetim. Diswan mekem hem kasem feeling for win and for garem bigfala paoa.” (A Study of Our Decline, wea Philip Atkinson raetem) And tu hem killim dae 35 pipol!
Long Canada, wanfala man wea retire finis wea hem 65 year hem raedem bicycle long early morning. Taem hem raed yet, wanfala trak bangam hem from bihaen and leavim hem for dae. Datfala trak pullim bicycle hia for samting olsem 700 meter. Firstaem, olketa tingse samwan bangam hem and ranawe, bat taem olketa police lukluk moa long hem, olketa faendaot draeva hem stealim datfala trak for draevem olabaot olsem hapitaem bilong hem. Luk olsem, for bangam man wea raedem bicycle hem part long datfala “hapitaem.”
Difren Kaen Criminal Fasin?
Criminal fasin bin stap for staka handred year, bat datkaen wea iumi just storyim hem kosim pipol for sei: “Why nao pipol duim kaen samting olsem? Hao nao eni man savve ting for duim samting olsem?” Nomata olketa criminal fasin wea savve kamap evritaem, olsem wei for steal or raverave fasin, no kasholem interest bilong pipol, wankaen criminal fasin kamap moa big distaem wea kasholem interest bilong pipol for talem nius and kosim samfala for sei, ‘Mi hard for minim kaen wei olsem! World hem hao distaem?’
Olketa criminal fasin hia difren. Staka taem olketa ova tumas and mekem pipol seke fogud. Olsem hem happen long olketa example iumi just storyim, pipol wea dae no savve long pipol wea killim olketa dae. And tu, pipol wea killkill no garem eni reason for duim diswan. Olketa krangge killkill olsem hem tumas nao.
Long April 1999 long Colorado, U.S.A., tufala student sutim dae twelvfala student and wanfala teacher then tufala sutim tufala seleva dae. Wanfala man dae long California long 1982 bihaen hem drinkim medicine wea hem peim long stoa wea samwan putim poison insaed. Long 1993, tufala boy switim James Bulger, wanfala boy wea tu year, for go aot from wanfala big stoa long Bootle, Merseyside, England, taem mami bilong hem baem meat. Tufala tekem hem go long ples bilong train and hitim hem go kasem taem hem dae.
Olketa kolem samfala criminal fasin terrorism, olsem datfala Tokyo subway poisoning long 1995. Pipol bilong Japan barava seke taem olketa member bilong wanfala cult putim poison gas long train and killim dae 12-fala pipol and staka thousand garekil. Staka hard for forgetim attak long World Trade Center long New York and Pentagon long Washington, D.C., wea killim dae 3,000 pipol, and bomb wea bosta last year long Bali, Indonesia, wea killim dae klosap 200 pipol.
Hem klia hao olketa raf fasin olsem wea ova tumas kamap big distaem. Disfala problem kamap evriwea long world, wea affectim staka kantri and difren kaen pipol.
Samfala raf fasin kamap from luk olsem pipol laek winim narawan, for trae duim raf fasin wea worse winim olketa wea happen bifor. Raf fasin againstim wankaen pipol or sekson tu kamap moa big. Kaen raf fasin olsem barava min for killim dae pipol wea “rong” bilong olketa nomoa hem kala skin, religion, or tribe olketa kam from—olsem hem happen long 1994 taem olketa killim dae samting olsem 800,000 Tutsi long Rwanda.
Evriting hia kosim staka for ask: ‘Why nao raf fasin kamap big tumas? Waswe, bifor hem olsem tu? Wanem nao maet bihaenem olketa nogud raf fasin olsem? Wanem hope nao stap for daonem or finisim raf fasin olsem?’ Next article bae deal witim olketa kwestin hia and samfala moa.
[Blurb long page 4]
Planti taem barava raf fasin hem for killim dae eniwan nomoa and wea no garem reason