Minim Narawan
Why Nao Hem No Isi?
Sapos iumi evritaem tingim tumas hao olketa narawan difren from iumi, bae iumi start for tingse iumi gud winim olketa. Taem iumi garem tingting olsem, bae hem no isi for minim olketa. Gogo, bae iumi ting daonem olketa.
Bible Principle
“Taem pipol hapi, iufala mas hapi witim olketa. Taem pipol krae, iufala mas krae witim olketa tu.”—ROME 12:15.
Wanem nao verse hia minim? Disfala principle showimaot iumi shud tingim feeling blo narawan and trae for minim hem.
Hem Gud for Trae Minim Pipol
Taem iumi savve lo samwan, bae iumi luksavve hem man nomoa olsem iumi. Staka taem pipol garem sem feeling olsem iumi abaotem samting. Hem gud for tingim nomata wanem ples iumi kam from, iumi evriwan blo wanfala big famili nomoa. Hem gud for tingim iumi semsem witim olketa narawan and datwan bae helpem iumi for no ting daonem olketa.
Taem iumi minim narawan, bae iumi respectim hem. Anne-Marie wea kam from Senegal sei lo bifor hem ting daonem samfala pipol lo kantri blo hem. Hem storyim wanem nao helpem hem. Hem sei: “Taem mi lukim pipol hia kasem hard taem, mi trae for tingim, mi bae feel hao sapos mi nao kasem datwan? Diswan mekem mi luksavve mi no spesol winim olketa hia.” Taem iumi minim hard samting wea narawan deal witim, bae iumi laek for kaen lo hem and no ting daonem hem.
Wanem for Duim
Sapos iu ting daonem samfala pipol, trae for tingim olketa samting wea iu semsem witim olketa. Olsem example, tingim hao olketa feel taem olketa
Taem iumi minim pipol, bae iumi luksavve iumi evriwan blo wanfala big famili
kaikai tugeta witim famili
kam bak lo haos bihaen olketa waka full day
spendem taem witim olketa fren
lisin lo music wea olketa laekem tumas
Nara samting, tingim sapos samting wea kasem olketa kasem iumi tu. Tingim olketa kwestin hia:
‘Hao nao bae mi feel sapos samwan mekem mi feel iusles?’
‘Hao nao bae mi feel sapos samwan ting daonem mi bat hem no savve gud lo mi?’
‘Waswe, bae mi hapi sapos olketa narawan treatim mi nogud?’