Wei for Garem Savve Abaotem God Mekem Iumi Laek for Fren Witim Hem
Creator blo iumi hem no just wanfala strong paoa nomoa. Hem wanfala man wea garem olketa gudfala wei. And hem laekem iumi for lane abaotem hem and kamap fren blo hem. (John 17:3; James 4:8) Dastawe hem laekem for iumi savve abaotem hem.
Creator blo Iumi Garem Wanfala Nem
“Lod [Jehovah], hemi gud tumas sapos olketa save dat yu nao yu God hu hemi hae tumas, an yu nao yu King ovarem evri pipol long wol.”—SAMS 83:18.
Bible teachim iumi hao Jehovah nomoa hem tru God. Hem nao creatim universe and evri samting wea laef. Hem nomoa fit for kasem worship blo iumi.—Revelation 4:11.
Jehovah Hem God wea Garem Love
“God hem love.”—1 JOHN 4:8.
Jehovah iusim Bible and olketa samting wea stap raonem iumi for helpem iumi savve lo olketa wei blo hem. Love nao hem main wei blo hem. Love nao muvim hem for duim evri samting. Taem iumi lanem moa samting abaotem Jehovah, datwan bae mekem iumi for lovem hem go moa.
Jehovah Hem God wea Savve Forgive
“Yu nao yu God wea yu save fogivim olketa pipol.”—NEHEMAEA 9:17.
Jehovah savve dat iumi no perfect. So hem evritaem redi for forgivim iumi. Taem iumi sei sorre and traem best for no duim olketa nogud samting, hem bae forgivim iumi and no mekem iumi safa bikos lo olketa sin wea iumi bin duim bifor. —Sams 103:12, 13.
Jehovah Invaetem Iumi for Prea lo Hem
“Oltaem [Jehovah] redi nomoa fo helpem eniwan hu hemi kol go long hem . . . Hemi herem tu krae blong olketa.”—SAMS 145:18, 19.
Jehovah no askem iumi for worshipim hem lo samfala spesol wei or iusim samfala samting lo worship blo iumi. Hem lisin lo olketa prea blo iumi olsem hao parents lisin lo pikinini blo olketa wea olketa barava lovem.