Jesus Hem Laef

WASWE, iu savve hu nao disfala woman and tufala man hia? Disfala woman hem Mary Magʹda·lene, wanfala fren bilong Jesus. And tufala man wea werem whitefala kaleko tufala angel. Disfala smol rum wea Mary hem luk insaed hem ples wea olketa putim body bilong Jesus bihaen hem dae. Olketa kolem diswan wanfala tomb. Bat distaem body no stap nao! Hu nao tekem?

Bihaen Jesus hem dae, olketa priest sei long Pilate: ‘Taem Jesus hem laef yet hem sei hem bae laef bak bihaen long thrifala day. So givim komand for olketa mas gardim datfala tomb mekem olketa disaepol bilong hem kanduit for stealim body and sei hem laef bak!’ Pilate talem olketa priest for sendem olketa soldia for gardim tomb.

Bat long early morning long mek-thri day bihaen Jesus hem dae, wanfala angel bilong Jehovah hem kam. Hem aotem ston wea satem datfala tomb. From olketa soldia barava fraet fogud olketa no savve muv. Gogo, taem olketa luk insaed long datfala tomb, body hem no stap nao! Samfala soldia go and talem diswan long olketa priest. Waswe, iu savve wanem nao olketa nogud priest duim? Olketa peim olketa soldia for talem laea samting. Olketa priest sei: ‘Iufala mas sei olketa disaepol bilong hem kam long naet, taem iufala sleep, and stealim body.’

Long datfala taem, samfala woman wea fren bilong Jesus visitim tomb. Olketa barava sapraes for faendem hem emti! Seknomoa, tufala angel stap wea werem braet kaleko. Olketa ask: ‘Why nao iufala lukaotem Jesus long hia? Hem laef bak finis. Go kwiktaem and talem olketa disaepol bilong hem.’ Olketa woman hia kwiktaem go! Bat taem olketa gogo wanfala man hem stopem olketa. Waswe, iu savve hu nao hem? Hem Jesus nao! Hem sei: ‘Go and talem olketa disaepol bilong mi.’

Taem olketa woman hia talem olketa disaepol hao Jesus hem laef and olketa lukim hem finis, olketa disaepol hard for bilivim. Peter and John ran go long tomb for lukluk seleva, bat tomb hia hem emti! Taem Peter and John go, Mary Magʹda·lene hem stap yet. Hem nao taem wea hem luk insaed and lukim tufala angel hia.

Waswe, iu savve wanem nao happen long body bilong Jesus? God nao tekem. God no mekem Jesus for laef bak and garem body olsem man. Hem givim Jesus niufala spirit body, olsem olketa angel long heven. Bat for showim olketa disaepol hao hem laef bak, Jesus savve garem wanfala body wea pipol savve lukim. Bae iumi lane abaotem diswan bihaen.