Givim Gudfala Pruv

TAEM iu talem samting, hem fitim for olketa wea lisin for ask: “Why nao datwan hem tru? Wanem nao pruv wea showimaot mi shud acceptim samting wea speaker hem talem?” Olsem wanfala teacher, iu mas ansarem kaen kwestin olsem or helpem olketa wea lisin for faendem olketa ansa. Sapos datfala point hem barava saportim samting wea iu laek pruvim, mek sure iu givim olketa wea lisin olketa strongfala reason for acceptim. Diswan bae help for mekem samting iu talem muvim tingting bilong pipol.

Aposol Paul iusim wei for muvim tingting bilong pipol. Long wei for iusim gudfala pruv, stretfala wei for story raonem samting, and long wei for muvim olketa, hem trae for changem tingting bilong olketa wea hem story witim. Hem nambawan example for iumi. (Acts 18:4; 19:8) Bat samfala savveman for toktok iusim wei for muvim pipol for giamanim olketa. (Matt. 27:20; Acts 14:19; Col. 2:4) Olketa maet start witim rong idea, iusim information wea teksaed, talem point wea no really pruvim eniting, no lisin long olketa tru samting wea no agree witim tingting bilong olketa, or trae for switim feeling bilong pipol winim wei for muvim tingting. Iumi mas careful for stap klia long olketa kaen wei olsem.

Garem Strongfala Faondeson Long Word Bilong God. Samting iumi teachim mas no kam from tingting bilong iumiseleva. Iumi trae for sharem witim nara pipol samting wea iumi lanem finis from Bible. For duim olsem iumi kasem bigfala help from olketa pablikeson wea faithful and wise slave provaedem. Olketa pablikeson hia encouragem iumi for lukluk gud long olketa Scripture. And then, iumi leadim nara pipol long Bible, no witim goal for pruvim iumi nao stret, bat long hambol wei iumi laekem olketa wanwan for luksavve long samting wea Bible talem. Iumi agree witim Jesus Christ, wea sei long prea long Dadi bilong hem: “Word bilong iu nao truth.” (John 17:17) No eniwan garem position wea hae winim Jehovah God, Creator bilong heven and earth. Pruv bilong iumi bae stret sapos faondeson bilong datwan nao Word bilong God.

Samfala taem maet iu story witim pipol wea no savve long Bible or wea no acceptim olsem Word bilong God. Iu mas iusim fasin for luksavve for disaedem wanem taem and wanem wei nao for iusim olketa Bible scripture. Bat long first chance wea iu garem iu shud point go long Bible olsem information wea iumi fit for trustim.

Waswe, wei for talem toktok bilong wanfala scripture wea fitim, hem inaf pruv? Maet nomoa. Maet iu need for iusim olketa verse wea stap raonem datwan for showim hao datfala scripture hem barava saportim samting wea iu talem. Sapos iu storyim wanfala principle insaed wanfala scripture and olketa verse wea stap raonem no storyim datfala subject, maet iu needim moa pruv. Maet iu need for iusim olketa nara scripture wea join witim datwan for mekem audience satisfae hao samting wea iu talem hem garem strong faondeson long Bible.

Stap klia long wei for extram pruv bilong wanfala scripture. Readim long careful wei. Maet hem deal witim subject wea iu storyim. Bat, for muvim tingting bilong man wea lisin, hem mas luksavve hao datwan pruvim point bilong iu.

Extra Pruv wea Saportim. Samfala taem maet hem gud for iusim nara pruv wea no insaed Bible for helpem pipol luksavve hao samting Bible talem hem balance.

Olsem example, maet iu storyim universe for pruvim Creator hem stap. Maet iu mekhae long olketa law bilong nature, olsem gravity, and storyim hao wei wea kaen law olsem stap minim wanfala Man for Givim Law mas stap tu. Wei wea iu story raonem datwan bae stret sapos hem fitim samting wea Word bilong God talem. (Job 38:31-33; Ps. 19:1; 104:24; Rom. 1:20) Kaen pruv olsem hem helpem man bikos hem showimaot hao samting wea Bible talem hem semsem witim trufala samting wea pipol savve lukim.

Waswe, iu trae for helpem samwan luksavve hao Bible hem barava Word bilong God? Maet iu talem toktok bilong samfala savveman wea saportim datwan, bat waswe, hem pruvim datwan? Kaen toktok olsem maet helpem nomoa pipol wea respectim olketa savveman hia. Waswe, iu savve iusim science for pruvim Bible hem tru? Sapos iu talem tingting bilong olketa scientist wea no perfect olsem pruv bilong iu, hem no strongfala faondeson. Long narasaed, sapos iu start witim Word bilong God and then storyim samfala samting long science wea showimaot hao Bible hem stret, pruv bilong iu bae garem strongfala faondeson.

For evri samting wea iu trae for pruvim, mek sure iu givim inaf pruv. Haomas pruv iu need for givim bae depend long audience bilong iu. Olsem example, sapos iu storyim olketa last day wea 2 Timothy 3:1-5 hem tok abaotem, maet iu storyim wanfala nius report wea planti pipol savve long hem wea showimaot hao olketa man distaem “no garem love.” Wanfala example olsem maet inaf for pruvim hao datfala part bilong saen bilong olketa last day hem fulfill distaem.

Planti taem hem gud for markem wei wea samting hem semsem witim nara samting. Datwan seleva bae no pruvim samting; for luksavve sapos hem tru iu mas markem witim wanem Bible talem. Bat wei for markem samting witim nara samting maet helpem man for lukim hao wanfala idea hem balance. Example, maet iu duim datwan taem iu minim long samwan hao Kingdom bilong God hem wanfala gavman. Maet iu talem hao olsem olketa gavman bilong man, Kingdom bilong God garem olketa wea rul, olketa wea stap anda, olketa law, kot system, and education system.

Hem gud for iusim olketa experience for showimaot wei wea hem wise for followim kaonsel bilong Bible. Iu savve iusim olketa experience bilong iuseleva tu for saportim samting wea iu talem. Olsem example, taem iu storyim wei wea hem important for readim and studyim Bible, maet iu storyim hao wei for duim olsem hem mekem laef bilong iu moabeta. For encouragem olketa brata bilong hem, aposol Peter storyim datfala taem wea Jesus hem change and kasem glory, wea Peter nao lukim. (2 Pet. 1:16-18) Paul tu storyim olketa experience bilong hemseleva. (2 Cor. 1:8-10; 12:7-9) Bat, no ova tumas for iusim olketa experience bilong iuseleva, nogud iu pullim interest long iuseleva nomoa.

From evriwan garem difren living and tingting, pruv wea wanfala man acceptim maet no satisfaem narawan. So, tingim tingting bilong olketa wea lisin taem iu disaedem wanem pruv for iusim and hao for storyim datwan. Proverbs 16:23 sei: “Heart bilong wise man mekem mouth bilong hem showimaot fasin for luksavve, and mekem lips bilong hem savve muvim man.”