Lastfala Samting for Storyim Witim Olketa wea Bae Baptaes
Olketa baptism savve kamap lo olketa assembly and convention blo Olketa Jehovah’s Witness. Lo end blo baptism tok, speaker bae askem olketa wea redi for baptaes for standap and tok big taem olketa ansarem tufala kwestin hia:
1. Waswe, iu repent from olketa sin blo iu, dedicatem iuseleva lo Jehovah, and luksavve God iusim Jesus Christ for sevem iumi?
2. Waswe, iu savve taem iu baptaes datwan showimaot iu wanfala lo Olketa Jehovah’s Witness and distaem iu insaed lo organization blo Jehovah?
Taem olketa wea bae baptaes sei yes lo tufala kwestin hia datwan hem wanfala wei wea olketa “talemaot” olketa garem faith lo ransom and olketa dedicate lo Jehovah. (Rome 10:9, 10) So, olketa wea laek baptaes shud ting raonem tufala kwestin hia firstaem and prea abaotem bifor lo datfala day wea olketa bae baptaes, mekem olketa savve givim ansa wea kam from heart blo olketa.
Waswe, iu talem finis prea for dedicatem iuseleva lo Jehovah, and for promisim hem iu bae worshipim hem nomoa and duim wanem hem laekem olsem first samting lo laef blo iu?
Waswe, iu barava sure iu redi nao for baptaes?
Wanem kaen kaleko nao hem fitim for man werem taem hem baptaes? (1 Tim. 2:9, 10; John 15:19; Phil. 1:10)
Iumi shud werem kaleko wea “showimaot respect and gudfala tingting” for showimaot iumi “worshipim God.” So, olketa wea bae baptaes shud no werem kaleko for swim wea showim body or kaleko wea garem raeting lo hem. Olketa bae werem kaleko wea luk naes, wea klin, wea fitim Christian, and wea showimaot respect for disfala spesol day.
Wanem nao hem fitim for man duim lo taem wea hem baptaes? (Luke 3:21, 22)
Baptism blo Jesus hem example for olketa Christian wea baptaes distaem. Jesus luksavve wei for baptaes hem barava serious samting wea man disaed for duim, and diswan showaot lo tingting blo hem and samting wea hem duim taem hem baptaes. So hem bae no fitim for man wea baptaes mek fani, plei, swim, or duim eni nara samting wea bae no showimaot respect lo disfala spesol taem. And tu, hem no fitim for wanfala niu Christian act olsem hem barava win nao. Hem fitim for man hapi taem hem baptaes, nomata olsem, hem mas showimaot datfala hapi lo wei wea showimaot respect.
Hao nao wei for evritaem attendim meeting and associate witim kongregeson bae helpem iu for keepim promis blo iu for dedicate lo Jehovah?
Bihaen iu baptaes, why nao hem barava important for iu gohed followim gudfala schedule for duim study seleva and for share evritaem lo ministry?
INSTRUCTION FOR OLKETA ELDER LO KONGREGESON
Taem wanfala anbaptaes pablisa sei hem laek for baptaes, plis encouragem hem for studyim gud “Olketa Kwestin for Olketa wea Laek for Baptaes,” wea stap lo page 12-49 lo disfala buk. Talem hem for readim tu datfala “Message for Anbaptaes Pablisa,” wea start lo page 7, wea storyim wanem hem savve duim for prepare for storyim olketa baptism kwestin witim olketa elder. Olsem datfala message talem, taem hem story witim olketa elder hem savve iusim olketa note blo hemseleva and hem savve lukluk lo disfala buk tu. Nomata olsem, no eni need stap for samwan reviewim olketa kwestin hia witim hem bifor hem meet witim olketa elder.
Eniwan wea laek for baptaes shud storyim datwan lo coordinator blo olketa elder. Bihaen pablisa wea laek baptaes hem readim “Olketa Kwestin for Olketa wea Laek for Baptaes,” coordinator blo olketa elder bae askem hem sapos hem talem finis prea for dedicatem hemseleva lo Jehovah for duim wanem Hem laekem. Sapos hem dedicatem hemseleva finis, coordinator blo olketa elder bae arrange for tufala elder storyim “Olketa Kwestin for Olketa wea Laek for Baptaes” witim hem. Iu shud markem difren elder for duim each wan lo tufala part. Iufala no need for weitim olketa for announcem wanfala assembly or convention bifor iufala savve storyim olketa kwestin hia witim pablisa wea laek baptaes.
Each wan lo tufala meeting wea iu bae arrangem for storyim tufala part shud samting olsem wan hour, bat hem olraet tu for iusim winim wan hour sapos iu need for duim datwan. Hem gud for startim and finisim each meeting witim prea. Pablisa wea laek baptaes and olketa elder tu shud no feel olsem olketa mas hariap for finis taem olketa storyim olketa kwestin. Olketa elder wea kasem assignment for story witim pablisa wea laek baptaes shud no delay for duim datwan.
Staka taem, best samting hem for reviewim olketa kwestin witim man wanwan, no witim grup blo olketa wea laek baptaes. Taem man wea laek baptaes ansarem evri kwestin, datwan bae helpem olketa elder for luksavve sapos hem minim gud olketa Bible truth, and sapos hem fit for baptaes. And tu, diswan savve helpem pablisa wea laek baptaes for feel free for story. Hasband and waef savve meet tugeta witim elder for storyim olketa kwestin.
Sapos pablisa wea laek baptaes hem wanfala sista, elder shud story witim hem lo ples wea olketa narawan savve lukim tufala bat no herem story blo tufala. Sapos iu mas askem narawan for stap witim iu taem iu story lo pablisa, hem shud wanfala elder or ministerial servant, fitim sekson wea iufala bae storyim, olsem next paragraf talem.
Lo olketa kongregeson wea no garem staka elder, olketa ministerial servant wea showimaot olketa garem gudfala tingting savve storyim olketa kwestin for baptism lo “Part 1: Wanem Olketa Christian Bilivim” witim pablisa wea laek baptaes. Olketa elder nomoa shud storyim “Part 2: Laef blo Christian,” witim pablisa wea laek baptaes. Sapos kongregeson no garem inaf brata wea fit for duim disfala waka, iufala savve askem circuit overseer sapos samfala elder lo nara kongregeson wea klosap savve help.
Taem pablisa wea laek baptaes hem pikinini (minor; anda 18 years), sapos mami or dadi blo hem Witness olketa tu shud stap taem elder storyim olketa kwestin witim pikinini. Sapos dadi or mami no savve attendim datfala meeting, then tufala elder (or wanfala elder and wanfala ministerial servant, fitim sekson wea olketa bae reviewim) shud storyim olketa kwestin witim datfala pikinini.
Olketa elder bae no expectim pablisa wea laek baptaes for mas garem bigfala savve, bat hem mas minim gud olketa main Bible teaching. And tu, olketa bae laek for savve sapos hem barava tinghae lo truth and hem showimaot respect for organization blo Jehovah. Sapos pablisa no minim olketa main Bible teaching, olketa elder bae arrange for hem kasem help mekem hem savve kamap fit for baptaes lo narataem. Maet samfala needim moa taem for showimaot olketa luksavve preaching waka hem barava important, or for showimaot olketa barava stap anda lo organization blo Jehovah. Olketa elder mas disaedem best wei for iusim datfala wan hour, or maet winim wan hour, wea olketa story witim pablisa for helpem olketa luksavve sapos pablisa hem redi for baptaes. Olketa elder maet disaed for spendem moa taem lo samfala kwestin and lelebet taem nomoa lo olketa nara kwestin. Nomata olsem, iu mas storyim evri kwestin witim datfala pablisa.
Olketa elder wea kasem assignment for storyim olketa baptism kwestin witim samwan bae meet tugeta bihaen mek-tu part hem finis for disaedem sapos datfala pablisa hem fit for baptaes or nomoa. Taem tufala elder hia disaedem datwan, olketa shud tingim education blo datfala pablisa, savve blo hem, and eni nara samting wea bae affectim wanem hem fit for duim. Samting wea tufala elder bae laek for savve nao hem sapos datfala pablisa fren gud witim Jehovah and hem minim olketa main Bible truth. Help wea iufala givim lo olketa wea laek baptaes bae mekem olketa redi for duim important assignment blo olketa for preachim gud nius.
Bihaen datwan, wanfala lo tufala elder hia, or tufala evriwan, shud meet witim datfala pablisa wea laek baptaes and talem hem sapos hem fit for baptaes or nomoa. Sapos hem fit for baptaes, olketa elder shud storyim “Lastfala Samting for Storyim Witim Olketa wea Bae Baptaes” witim hem, wea stap lo page 51-53. Sapos hem no finisim yet study blo hem lo buk Enjoyim Laef for Olowe!, olketa elder shud encouragem hem for finisim study lo datfala buk bihaen hem baptaes. Talem hem olketa elder bae raetem date wea hem baptaes insaed Kongregeson Pablisa Record card blo hem. Remindim hem olketa elder kasem disfala information from hem mekem organization savve gohed for lukaftarem waka wea Olketa Jehovah’s Witness duim raonem world, and mekem hem savve share lo waka blo kongregeson and kasem sapot from olketa elder. And tu, olketa elder shud remindim olketa niu pablisa eni information wea iumi kasem abaotem olketa iumi iusim followim disfala Global Data Protection Policy of Jehovah’s Witnesses wea stap lo jw.org. Disfala last meeting witim pablisa wea bae baptaes no need for winim tenfala minute.
Wanfala year bihaen datfala pablisa hem baptaes, tufala elder shud meet witim hem for encouragem hem and storyim samfala idea for helpem hem. Wanfala lo tufala elder hia shud grup overseer blo datfala pablisa. Sapos pablisa hia hem wanfala pikinini (anda 18 years), dadi and mami blo hem wea Witness shud stap tu taem tufala elder meet witim hem. Tufala elder shud story lo kaenfala wei and encouragem datfala pablisa. Storyim wanem hem duim finis for gohed gud lo spiritual wei, and talem samfala idea wea bae helpem hem for followim gudfala schedule for duim study seleva and readim Bible evri day, duim famili worship evri week, attendim and tekpart lo olketa meeting evritaem, and duim preaching waka evri week. (Eph. 5:15, 16) Sapos hem no finisim yet study blo hem lo buk Enjoyim Laef for Olowe!, olketa elder shud markem samwan for helpem hem finisim study lo datfala buk. Tufala elder bae laek for encouragem and praisem datfala pablisa. Staka taem, hem inaf nao for storyim wan or tufala point for datfala pablisa waka lo hem.