‘Mifala Laekem Kingdom blo Iu for Kam’

Jehovah promis olsem: ‘No eniwan bae krae, feelim pain, sik, or dae. Mi bae draem evri tias from eye blo olketa. Evri nogud samting wea happen bifor bae nomoa nao.’

Jehovah putim Adam and Eve lo garden blo Eden for stap lo peace and hapi. Tufala bae worshipim Dadi blo tufala lo heven and garem pikinini and fulimap earth. Bat Adam and Eve disobeyim Jehovah, nomata olsem plan blo hem no change. Lo disfala buk iumi lanem hao evriting wea God promisim hem fulfill. Kingdom blo hem bae givim staka naes blessing for pipol lo earth, olsem hem promisim lo Abraham.

Klosap nao Satan, olketa demon blo hem and evri nogud pipol bae finis. Evriwan wea stap laef bae worshipim Jehovah. Iumi bae no sik or dae. Bat evriday iumi wekap, bae iumi strong and hapi for gohed stap laef. Earth bae kamap paradaes. Evriwan bae garem olketa healthy kaikai and stap sef. And pipol bae no raf or treatim nogud narawan, bat olketa bae kaen. Olketa wild animal bae no fraetem iumi, and iumi tu bae no fraetem olketa.

Bae hem hapi samting taem Jehovah start for resurrectim pipol. Iumi bae welkamim bak olketa pipol from bifor, olsem Abel, Noah, Abraham, Sarah, Moses, Ruth, Esther and David. Olketa hia bae waka tugeta witim iumi for mekem earth hem paradaes. Iumi bae garem staka interesting waka for duim.

Jehovah laekem iu for stap lo there. Iu bae savve gud lo hem winim enitaem bifor. So iumi laek duim samting evriday for strongim wei wea iumi fren gud witim Jehovah, distaem and for olowe!