STUDY 4

Gud Wei for Lead Go Long Scripture

Matthew 22:41-45

WANEM FOR DUIM: Redyim mind bilong olketa wea lisin for herem scripture wea iu bae readim.

Savve long reason iu bae readim datfala scripture. Bifor iu readim scripture talem samting wea bae helpem audience for luksavve long main point wea iu laek mekhae long hem long datfala verse.

Savve long wanem olketa nara verse raonem datfala verse storyim. Sapos iu talem audience hu nao story long verse, or hu nao raetem Bible buk, mek sure iu talem stret samting.
Mekhae long Bible. Taem iu readim scripture long pipol wea bilivim God hem stap, iu savve sei iu laek readim toktok bilong God. Taem iumi duim olsem iumi mekhae long wei wea advaes long Bible hem kam from God.
Mekem man interest for herem scripture. Askem kwestin wea scripture bae ansarem, storyim wanfala problem wea scripture savve help for stretem, or talem wanfala Bible principle then readim scripture wea bae sapotim datwan.

Tingim wanem audience bilong iu savve finis abaotem datfala subject and scripture wea iu storyim. Nomata olketa wea lisin long iu savve gud long scripture wea iu bae readim, talem samting wea bae mekem olketa interest for lukim moa datfala scripture.