Mi Promis for Lukim Hem Moa

MI TALEM wanfala barava important promis. Mi wanfala mami and mi laek storyim why nao mi talem datfala promis.

Taem mi smol pikinini, famili bilong mifala no stap gud. Famili bilong mifala sorre fogud taem smol brata bilong mi dae long wanfala accident taem hem foa year nomoa. Narafala samting tu, olketa nogud wei bilong dadi bilong mi mekem mami bilong mi no mas hapi long marit bilong tufala. Nomata olsem, mami hem gohed for lanem mi and big brata bilong mi for garem olketa gudfala wei.

Gogo brata bilong mi hem marit, and mi tu marit. No longtaem bihaen, mami bilong mi hem kasem cancer and gogo hem dae. Bat bifor hem dae, hem givim wanfala spesol samting long mifala.

Wanfala woman wea savve long mami hem storyim hope bilong resurrection long hem, and mami laek for studyim Bible. Taem mami hem klosap dae, datfala hope insaed Bible strongim hem and mekem hem hapi.

Taem mi and brata bilong mi lukim gudfala samting wea mami kasem from wanem hem lanem long Bible, mitufala start for studyim Bible tu. Mi baptaes taem mi babule eit month long mek-tu pikinini bilong mi. Mi bornem naesfala gele wea mifala nemim hem Lucía.

Datfala day wea mi baptaes hem barava important long mi. Hem bikos taem mi dedicate long Jehovah mi bilong hem nao, and mi savve worshipim hem for olowe. Nara samting tu, mi savve storyim wanem mi bilivim long boy and gele bilong mi.

Bat gogo wanfala samting hem kasem gele bilong mi wea mekem mi sorre tumas. Taem Lucía hem foa year, bele bilong hem savve soa fogud. Bihaen olketa mekem x-ray long hem, doctor hem sei wanfala samting hem grow long liver bilong hem wea hem big olsem wanfala orange. Doctor sei Lucía garem wanfala neuroblastoma, wea hem wankaen cancer wea savve grow big kwiktaem. So for sevenfala year, Lucía hem stap plande taem long hospital for kasem treatment for sik bilong hem.

Hem Tingim Narawan Evritaem

Long olketa year hia wea no isi, plande taem Lucía nao hem encouragem mi. Hem savve holem mi and kissim mi. Olketa wea waka long hospital tu barava sapraes long wei wea hem feisim sik bilong hem. Hem laek tumas for waka witim olketa nurse for givim yogurt, juice, and olketa nara samting long olketa pikinini wea stap tu long hospital. Olketa nurse givim Lucía tu wanfala white coat and wanfala badge for hem werem wea sei “nurse aid.”

Wanfala woman wea waka long hospital sei: “Mi laekem tumas wei bilong Lucía. Hem pikinini wea no sidaon nating nomoa, bat hem savve laek duim olketa niu samting, and for paintim olketa piksa. Hem savve story tumas and hem olsem big gele.”

Bible hem strongim Lucía and mekem hem no wari. (Heb. 4:​12) Hem barava bilivim promis long Bible hao long niu world, “dae bae nomoa, sorre and singaot and pain bae nomoa tu.” (Rev. 21:4) Hem interest long nara pipol and hem savve story evritaem long olketa abaotem Bible. From Lucía biliv strong long resurrection, datwan helpem hem for hapi and kontrolem feeling bilong hem nomata hem bae no kamap gud moa from sik bilong hem. (Isa. 25:8) Hem gohed olsem go kasem day wea hem dae from sik hia.

Long datfala day nao mi talem datfala barava important promis long hem. Nomata for openem eye bilong hem bat hem hard tu long Lucía. Dadi bilong hem holem wanfala hand bilong hem and mi holem narawan. Mi sei long hem: “Iu no wari, bae mi no lusim iu. Iu brith isisi nomoa. Taem iu wekap, bae iu gud nao. Bae iu no feelim pain moa, and bae mi stap witim iu.”

Mi mas duim wanem mi promisim. Go kasem taem wea hem laef bak, mi savve bae hem no isi for mi. Bat nomata olsem, sapos mi patient and trustim Jehovah and faithful long hem, bae mi stap taem hem laef bak.

Samting wea Lucía Lanem Mifala

Example wea Lucía showimaot for no fraet, and tu, wei wea olketa long kongregeson sapotim mifala, hem barava kasem heart bilong hasband bilong mi wea hem no wanfala Witness. Long day wea Lucía dae, hasband bilong mi talem mi hem mas tingting gud moa long wanem hem bae duim long laef bilong hem. Tu-thri week bihaen, hem askem wanfala elder long kongregeson for study witim hem. No longtaem bihaen, hasband bilong mi start for kam long evri meeting. From Jehovah helpem hem, hem lusim smoke wea bifor diswan hem samting wea hem no isi for hem.

Kam kasem distaem, mi sorre yet from Lucía hem dae. Nomata olsem, mi thankiu tumas long Jehovah for samting wea Lucía lanem mifala. Mi and hasband bilong mi story abaotem resurrection for strongim mifala and taem wea mifala bae lukim Lucía moa witim tufala big eye bilong hem and naesfala smile bilong hem.

Sorre samting wea kasem gele bilong mi hem affectim tu wanfala woman wea stap klosap long mifala. Long wanfala Saturday morning taem hem rain, wanfala woman wea boy bilong hem go long sem skul witim Lucía hem kam long haos bilong mifala. Narafala boy bilong hem wea 11 year hem dae tu from sem sik wea kasem Lucía. Taem hem herem Lucía hem dae, hem kam faendem mifala. Hem laek for savve wanem nao mi duim for feisim diswan and hem sei mitufala shud startim wanfala grup for helpem olketa nara mami wea kasem sem samting olsem mifala.

Mi talem long hem hao olketa promis long Bible nao barava strongim mi, wea winim eni samting wea man savve duim. Hem barava sapraes taem mi readim toktok bilong Jesus long John 5:​28, 29. Hem laek studyim Bible and no longtaem bihaen hem kasem “peace bilong God wea winim savve bilong man.” (Phil. 4:7) Taem mifala studyim Bible, staka taem mitufala story abaotem niu world taem mifala bae welkamim olketa long famili wea bae laef bak.

Tru tumas, nomata Lucía hem dae taem hem smol gele nomoa, hem lanem mifala olketa samting wea bae helpem mifala for olowe. Faith bilong hem helpem famili bilong mifala for worshipim God tugeta, and hem strongim mi for stap faithful. Tru nao, sapos eniwan long famili bilong iumi hem dae, iumi garem important promis for keepim, hem nao for lukim olketa moa taem olketa laef bak.

[Piksa long page 20]

Piksa bilong paradaes wea Lucía hem drawim