Waswe, Iu Stanbae for Storyim Biliv Bilong Iu?
WASWE, enitaem wanfala samting happen wea mekem iu mas storyim biliv bilong iu long pipol? Tingim samting wea kasem Susana, wanfala sista long Paraguay wea hem 16 year. Long skul bilong hem, samfala pikinini talem long class Olketa Jehovah’s Witness no bilivim “Old Testament,” Jesus Christ, and Mary. Olketa talem tu olketa Witness ova tumas from taem olketa sik, olketa les for tekem samfala kaen treatment nomata sapos olketa bae dae. Sapos iu nao Susana, waswe, bae iu kwaet nomoa or bae iu storyim biliv bilong iu?
Susana prea long Jehovah then hem hansap. From class klosap finis, hem askem teacher bilong hem, hem laek storyim biliv bilong hem from hem wanfala Jehovah’s Witness. Teacher letem hem. Susana tekem tufala week for redyim story bilong hem from disfala buk Jehovah’s Witnesses—Who Are They? What Do They Believe?
Then hem taem nao for hem story long class. Susana storyim long olketa why nao iumi garem disfala nem Olketa Jehovah’s Witness. Hem storyim tu hope bilong iumi for future and why nao iumi no tekem blood. Bihaen hem askem class sapos olketa garem eni kwestin. Staka student nao hansap. Teacher barava sapraes taem Susana ansarem olketa kwestin bilong olketa from Bible.
Wanfala boy long class hem sei: “Wantaem mi go long Kingdom Hall, bat mi nating lukim eni idol long there.” Teacher hem laek savve why nao no eni idol stap long Kingdom Hall. Susana readim nao Psalm 115:4-8 and Exodus 20:4. Teacher sapraes tumas and hem sei: “So why nao olketa church bilong mifala garem staka idol nomata Bible talem hem rong for worshipim idol?”
Olketa student askem staka kwestin and olketa story for 40 minute. Susana askem olketa sapos olketa laek lukim disfala video No Blood—Medicine Meets the Challenge, and evri student laekem. So teacher talem olketa savve gohed moa long disfala story long day bihaen. Bihaen olketa lukim datfala video, Susana storyim samfala treatment wea samfala Jehovah’s Witness tekem wea no garem blood. Taem teacher herem diswan hem sei: “Mi nating savve staka nara treatment stap for man tekem, and mi nating luksavve tu treatment wea no garem blood savve barava helpem man. Waswe, Olketa Jehovah’s Witness nomoa savve tekem olketa treatment hia?” Susana sei eniwan nomoa savve tekem. Then teacher talem: “Sapos eni Jehovah’s Witness kam long haos bilong mi, bae mi mas story witim olketa nao.”
Story wea Susana redyim hem for 20 minute nomoa, bat gogo hem kasem thri hour nao. Bihaen wanfala week, olketa nara student storyim biliv bilong olketa tu. Staka student askem kwestin long olketa bat olketa hia no savve ansarem. Teacher askem olketa: “Hao nao student wea Jehovah’s Witness savve storyim biliv bilong hem bat iufala nomoa?”
Olketa sei: “Hem from olketa nao studyim Bible bat mifala nomoa.”
So teacher sei long Susana: “Iu savve tumas long Bible and iu followim tu toktok bilong hem. Fitim mifala for praisem iu.”
Susana no stap kwaet bat hem storyim biliv bilong hem. Hem olsem datfala smol Israelite gele wea olketa bilong Syria tekem for waka olsem slave. Smol gele hia stap long haos bilong Naaman, wanfala bigman bilong army bilong Syria wea garem sik leprosy. Datfala Israelite gele no fraet for talem olsem long waef bilong Naaman: “Bae hem gud tumas for lord bilong mi go lukim profet wea stap long Samaria! Sapos hem go, bae hem healim hem from leprosy bilong hem.” Gele hia no stap kwaet bat hem story nao abaotem trufala God. Gogo, boss bilong hem Naaman worshipim Jehovah tu.—2 Ki. 5:3, 17.
Susana tu no stap kwaet bat hem story abaotem Jehovah and pipol wea worshipim hem. From Susana stanbae for storyim biliv bilong hem, hem followim disfala toktok long Bible: “Iufala mas luksavve Christ nao hem Lord and hem holy. Taem eniwan askem iufala why nao iufala garem datfala hope, iufala mas stanbae evritaem for givim ansa, bat iufala mas duim long hambol wei and wea showimaot respect.” (1 Pet. 3:15) So taem wanfala samting happen, waswe, iu stanbae for storyim biliv bilong iu?
[Piksa long page 17]
Buk and video hia savve helpem iu for storyim biliv bilong iu