Kwestin From Reader

Aposol Paul talem ‘God bae sevem evri Israelite.’ (Rom. 11:26) Waswe, hem minim bae gogo evri Jew kamap Christian?

Nomoa, Paul no minim datwan. Olketa Israelite wea kam from laen bilong Abraham no laek luksavve Jesus nao Messiah. And plande year bihaen Jesus dae, staka Jew no kamap Christian tu. Nomata olsem, Paul tok tru taem hem talem ‘God bae sevem evri Israelite.’ Hao nao olsem?

Jesus tok olsem long olketa bigman bilong Jew religion: “God bae aotem datfala kingdom from iufala and givim long pipol wea showimaot olketa fit for kasem datwan.” (Matt. 21:43) From olketa Israelite les long Jesus, Jehovah chusim nara pipol moa, wea hem nao pipol wea Hem anointim witim spirit bilong hem. Paul sei pipol hia nao hem “Israel bilong God.”​—Gal. 6:​16.

Samfala nara scripture long Christian Greek Scripture showimaot 144,000 anointed Christian nao disfala “Israel bilong God.” (Rom. 8:​15-​17; Rev. 7:4) Revelation 5:​9, 10 talem samfala man wea no Jew tu bae insaed long disfala namba, from hem talem olketa anointed Christian kam from “evri tribe and languis and pipol and nation.” God chusim olketa hia for kamap “wanfala kingdom and olketa priest . . . , and olketa bae kamap king and rulim earth.” Nomata long datfala taem Jehovah no ting moa long olketa Israelite olsem pipol bilong hem, samfala Israelite savve fren bak witim hem. Hem nao samting wea olketa aposol and staka nara Christian bifor duim. Nomata olsem, God mas baem olketa Jew hia and iumi tu witim blood bilong Jesus Christ.​—1 Tim. 2:​5, 6; Heb. 2:9; 1 Pet. 1:​17-​19.

Nomata staka Jew long first century lusim chance for rul witim Jesus, datwan nating spoelem plan bilong God. Hard tumas for eni samting spoelem plan bilong God bikos Jehovah talem finis long profet bilong hem: “Samting wea mi talem bae hem kamap tru. Mi no talem samting nating bat bae mi duim samting wea mi laekem, and samting wea mi talem hem nao samting wea bae happen.”​—Isa. 55:11.

Plan bilong God for 144,000 rul long heven witim Son bilong hem bae kamap tru tu. Bible talem God bae anointim evriwan long 144,000 hia!​—Rev. 14:​1-5.

So taem Paul talem ‘God bae sevem evri Israelite,’ hem no minim bae evri Jew kamap Christian. Bat hem minim plan bilong God for 144,000 anointed Christian wea bae rul long heven witim Son bilong Hem, Jesus Christ, bae datwan kamap tru. Long taem wea God markem, hem bae sevem ‘evri Israelite’ hia, and gogo olketa bae king and priest long Kingdom bilong Messiah.​—Eph. 2:8.

[Piksa long page 28]

Olketa anointed Christian kam from “evri tribe and languis and pipol and nation”