Gudfala Religion Mekhae Long Wei for Showimaot Love Long Olketa Narawan

BIBLE talem olsem: “Man wea no showimaot love hem no savve long God, bikos God hem love.” (1 John 4:​8, New Catholic Edition of the Holy Bible) Dastawe, gudfala religion shud mekhae long wei for showimaot love long olketa narawan.

Plande religion duim samfala gud samting for helpem olketa wea sik, olo, and olketa wea poor. Olketa talem olketa long religion bilong olketa for followim wanem aposol John raetem wea sei: “Sapos man wea garem samting hem lukim brata bilong hem short long eni samting and hem nating sorre long hem and hem no helpem hem, datwan showimaot man olsem hem no lovem God. Olketa pikinini bilong mi, iumi mas showimaot love, no long toktok or samting iumi talem nomoa, bat long samting wea iumi duim and long wei wea hem tru.”​—⁠1 John 3:​17, 18, New Century Version.

Wanem nao happen taem olketa difren kantri faet long war? Waswe, disfala komand bilong God for “lovem neiba bilong iu olsem iuseleva” hem for taem bilong peace nomoa? Bat waswe taem leader long kantri bilong iu talem iu for faetem nara kantri, bae iu followim datfala komand bilong God?​—⁠Matthew 22:​39, King James Version.

Jesus hem sei: “Sapos iufala lovem iufala evriwan, pipol bae luksavve iufala olketa disaepol bilong mi.” (John 13:​35, New International Version) Taem iu ansarem olketa kwestin hia, askem iuseleva olsem, ‘Waswe, olketa long religion hia evritaem showimaot love long evriwan, no long toktok nomoa bat long samting wea olketa duim tu?’

TOPIC: War.

WANEM BIBLE TALEM: Jesus talem olketa disaepol bilong hem olsem: “Mi talem iufala distaem for gohed lovem olketa enemy bilong iufala and duim gud samting long olketa wea heitim iufala.”​—⁠Matthew 5:​44, NCE.

Taem olketa soldia kam for kasholem Jesus, aposol Peter hem aotem naef for protectim Jesus. Bat Jesus hem sei: “Leavim naef ia. Eniwan wea iusim naef for killim dae narawan, bae olketa iusim naef for killim hem dae tu.”​—⁠Matthew 26:​52, NCV.

Aposol John raet olsem: “Iu savve luksavve long olketa pikinini bilong God and olketa pikinini bilong devil, bikos olketa pikinini bilong devil no laek for duim stret samting and no lovem narawan. Iufala herem finis iumi mas showimaot love long olketa narawan. No olsem Cain, wea hem kam from datfala wicked wan and killim dae brata bilong hem.”​—⁠1 John 3:​10-​12, Contemporary English Version.

KWESTIN: Waswe, religion hia talem pipol bilong hem for tekpart long war?

TOPIC: Politik.

WANEM BIBLE TALEM: Taem olketa lukim Jesus duim olketa mirakol, samfala laekem hem for joinim gavman bilong olketa. Wanem nao hem duim? “From Jesus savve bae olketa kam holem hem for mekem hem king, hem go bak moa long datfala maunten seleva.”​—⁠John 6:​15, NIV.

Taem olketa arrestim Jesus and laea for sei hem againstim gavman bilong olketa, Jesus hem sei: “Kingdom bilong mi hem no bilong disfala world. Sapos hem bilong disfala world, hard for olketa disaepol bilong mi letem olketa Jew kam tekem mi. Bat kingdom bilong mi hem no bilong disfala world.”​—⁠John 18:​36, English Standard Version.

Taem Jesus prea long God for olketa disaepol bilong hem, hem sei: “Mi talem toktok bilong iu long olketa, bat pipol long world heitim olketa bikos olketa no olsem pipol long world, olsem mi tu no olsem pipol long world.”​—⁠John 17:​14, New Revised Standard Version.

KWESTIN: Waswe, religion hia followim example bilong Jesus and no join long politik, nomata samfala bigman long politik againstim olketa?

TOPIC: Ting daonem narawan.

WANEM BIBLE TALEM: Taem olketa firstfala pipol wea no Jew wea no circumcise kamap Christian, aposol Peter sei: “Distaem mi barava luksavve God hem no favorim eniwan. Long evri kantri long world, sapos man worshipim God and duim samting wea stret, God bae hapi long hem.”​—⁠Acts 10:​34, 35, Holman Christian Standard Bible.

James sei olsem taem hem raet long olketa Christian long first century: “Olketa fren bilong mi, sapos iufala garem faith long Lord Jesus Christ, iufala bae no favorim man winim narawan. Tingim sapos wanfala rich man wea garem gold ring long finger bilong hem and werem barava naesfala kaleko hem kam insaed long wanfala meeting bilong iufala, bat wanfala poor man wea werem dirty kaleko tu hem kam insaed. Iufala mas no favorim man wea werem barava naesfala kaleko and talem man wea poor for standap long saed or sidaon long graon. Sapos iufala duim olsem, hem olsem iu sei samfala pipol olketa gud winim narawan, and iufala bae olsem wanfala wicked man wea judge.”​—⁠James 2:​1-4, CEV.

KWESTIN: Waswe, religion hia teachim pipol hao evriwan olketa semsem nomoa long tingting bilong God and olketa long datfala religion no ting daonem eniwan bikos hem kam from difren kantri or kala skin?