Hao War and Violent Conflict Bae Finis

GOD BAE FINISIM GAVMAN BLO MAN

God bae finisim olketa gavman blo man lo war wea Bible kolem Armageddon.a (Revelation 16:16) Lo datfala taem, “olketa king evriwea lo earth” bae hipap tugeta for datfala “war wea hem bigfala day blo God, datfala Olmaeti.” (Revelation 16:14) Armageddon hem war blo God for finisim evri war.

God bae replacem olketa gavman blo man witim Kingdom, or gavman blo hem wea bae rul from heven and bae no enitaem distroe. (Daniel 2:44) God chusim finis Son blo hem, Jesus Christ, for King blo datfala Kingdom. (Isaiah 9:​6, 7; Matthew 28:18) Disfala gavman nao hem Kingdomb wea Jesus teachim olketa follower blo hem for prea for datfala Kingdom. (Matthew 6:​9, 10) Evriwan bae stap anda lo wanfala gavman wea rulim full earth wea Jesus nao hem Ruler.

Jesus no olsem olketa man wea rul, hem no iusim paoa blo hem for own interest blo hem. From hem treatim evriwan semsem and no fevarem eniwan, no eniwan bae wari nogud hem forgetim olketa bikos lo race, nationality, or ethnic baekgraon. (Isaiah 11:​3, 4) And pipol bae no need for faet for raet blo olketa. Why? Bikos Jesus bae tingim wat each person needim. “Hem bae rescuem olketa wea poor, wea krae for help, witim tu olketa wea pipol ting daonem, and olketa wea no garem eniwan for helpem olketa. . . . Hem bae rescuem olketa from violence and from wei for safa.”—Psalm 72:​12-14.

Kingdom blo God bae aotem olketa deadly weapon from disfala earth. (Micah 4:3) Hem bae aotem tu wicked pipol wea no laek stop for faet or wea spoelem peace blo olketa narawan. (Psalm 37:​9, 10) Evri man, woman, and pikinini bae feel sef lo eni ples wea olketa go lo hem lo earth.—Ezekiel 34:28.

Pipol bae enjoyim gud laef anda lo gavman blo God. Hem bae finisim olketa problem wea kosim pipol for faet, olsem wei for poor, short lo kaikai, and no garem haos for stap. Evriwan bae garem staka naes kaikai and bae enjoyim comfortable ples for stap.—Psalm 72:16; Isaiah 65:​21-23.

Anda lo Kingdom blo God, olketa nogud samting wea war kosim bae hem finis. Diswan includim tu wei wea pipol garekil, safa lo tingting and feeling bikos lo olketa nogud samting wea war kosim. Even olketa wea dae finis bae resurrect moa for laef lo earth. (Isaiah 25:8; 26:19; 35:​5, 6) Olketa famili bae reunite and bae no tingim moa olketa nogud memory blo war, bikos “olketa samting wea happen bifor hem finis nao.”—Revelation 21:4.

GOD BAE FINISIM SIN

Kingdom blo God bae unitem pipol for worshipim datfala only tru God, Jehovahc, “God blo love and peace.” (2 Corinthians 13:11) Pipol bae lanem hao for stap tugeta lo peace. (Isaiah 2:​3, 4; 11:9) Evriwan wea applyim wat olketa lanem bae free from effect blo sin.—Romans 8:​20, 21.

GOD BAE FINISIM SATAN AND OLKETA DEMON BLO HEM

Kingdom blo God bae finisim Satan and olketa demon blo hem, wea olketa nao influencim pipol for startim war. (Revelation 20:​1-3, 10) From olketa bae no stap for influencim pipol, “peace bae stap evriwea.”—Psalm 72:7.

Iu savve trustim dat promis blo God for finisim war and violent conflict bae kamap tru. Hem garem paoa and barava laek for finisim war.

• God garem wisdom and paoa for finisim war and violence. (Job 9:4) No eniting hem impossible lo hem.—Job 42:2.

• God no laek for lukim taem pipol safa. (Isaiah 63:9) And tu, hem “heitim eniwan wea laekem raf fasin.”—Psalm 11:5.

• God evritaem keepim promis blo hem. Hem no savve laea.—Isaiah 55:​10, 11; Titus 1:2.