Smol Box wea Helpem Pipol Strongim Faith blo Olketa

Olketa Jehovah’s Witness kasem staka spiritual kaikai lo olketa digital pablikeson winim enitaem bifor. Bat lo plande ples lo world olketa brata and sista blo iumi no garem inaf selen for peim Internet. Olketa narawan stap lo area wea plande taem Internet no savve waka, hem slow tumas, or Internet no stap lo datfala ples.

Nomata olsem, plande brata and sista blo iumi savve daonlodim olketa digital pablikeson nomata olketa no garem Internet! Hao nao olsem?

JW Box hem wanfala smol samting wea olketa kongregeson savve kasem sapos olketa stap lo ples wea no garem gudfala Internet. Datfala JW Box hem garem wanfala router device insaed wea mifala peim from wanfala company, then Computer Department lo Bethel mekem software for hem and putim olketa digital pablikeson from jw.org lo hem. Hem savve kostim samting olsem $75 U.S. for each box.

Taem olketa brata and sista stap lo Kingdom Hall olketa savve connect lo wifi lo datfala JW Box and daonlodim olketa pablikeson and video. Nomata olketa wea garem cheap or old device savve connect lo datfala box. Bat sapos kongregeson no garem Internet, hao nao olketa savve putim olketa niu pablikeson and video lo datfala JW Box? Branch bae gohed sendem olketa USB memory stik lo olketa kongregeson olsem and olketa savve daonlodim olketa niu pablikeson and video from USB hia go lo datfala box. Hem savve kostim samting olsem $4 U.S. for each USB memory stik.

Hao nao datfala JW Box helpem olketa brata and sista? Nathan Adruandra wea hem wanfala dadi wea stap lo Democratic Republic of Congo hem sei: “Plande taem mi trae for daonlodim tufala drama ‘Jehovah, . . . Iu Nao Mi Trustim’ and No Forgetim Waef Bilong Lot. Bat mi no savve daonlodim tufala drama hia and hem mekem mi feel wikdaon. Bat distaem mi savve daonlodim olketa video hia lo mobile phone blo mi and hem savve helpem mifala parents for teachim pikinini blo mifala.”

Wanfala brata wea help for setimap JW Box for olketa kongregeson lo Nigeria sei: “Olketa brata and sista ting lo datfala JW Box olsem wanfala spesol present from Jehovah. Olketa barava hapi distaem bikos hem isi for olketa daonlodim olketa pablikeson and video lo Teaching Toolbox.”

Mifala sendem winim 1,700 JW Box lo olketa brata and sista lo Africa, Oceania, and South America, and mifala plan for sendem lo plande kongregeson moa. Hu nao peim kost for olketa box hia? Hem kam from olketa donation for waka raonem world, and plande lo olketa donation hia mifala kasem from olketa wea iusim donate.jw.org. Thankiu for wei wea iufala givim donation.