Daʼ ʼuo soʼ huétep letʼádaic, qanaʼchi ¿naeʼsauaʼ ỹátaqta naquiáxateguet ñiʼ Dios?

Soʼ noloxoʼte soʼ Noé jalcote naʼ siỹaxadipi ỹaʼuo naʼ sa nóʼin (Génesis 6:5).

Soʼ Adán qataxa jasoʼ Eva huoʼoi sauaʼ lecʼóqoʼte, qanaʼchi huáʼa daʼ nichígueegue soʼ siỹaxadipi jenʼ ʼaléua. Qanaʼchi huoʼoi saaʼ piỹem laseʼ laqáỹaʼ nepʼaguéeʼteʼ ñiʼ Dios ỹadénaxat soʼ Satanás.

Saaʼme necʼáchiña jenʼ ʼaléua ʼenáʼam daʼ lʼóiỹaxac naʼ siỹaxaua, souáxaʼchi sétaaque ʼuooteguet janʼ ỹauodipi. Huoʼoi saaʼ lecʼóqoʼte qalhuaxaiqa qataxa ỹágueegue daʼ lʼañaxac napacalégue jenʼ siỹaxadipi laỹi.

Jenʼ ʼaléua saqatelégue caʼlioʼ naʼ siỹaxadipi qalhuaxaicpi. Janʼ Biblia ỹʼaxat naʼ laqalhuaxa soʼ siỹaxadipi ỹágueegue jenʼ ʼaléua qataxa soʼ siỹaxadipi ỹisamaq daʼ leenataxac daʼ ỹaʼuo naʼ sa nóʼin.

Soʼ Noé ỹalaxaguet ñiʼ Dios qanaʼchi ỹaʼuo jasoʼ arca. (Génesis 6:13, 14, 18, 19, 22).

Soʼ Noé siỹaxaua ʼónaxaicaloic. Ñiʼ Jehová ʼenaac daʼ sétaaque noláxachiñi naʼ siỹaxadipi qalhuaxaicpi ỹidolégue gaʼ huétep letʼádaic qáʼa ʼen damolíñi jenʼ ʼaléua.

ʼEnapéga daʼ ỹíʼet gaʼ latʼédai nenótaxaqui chiỹaqaiỹi naʼ ʼepaq ʼen ỹiset daʼ naỹóoseguem. Jasoʼ nenótaxaqui qoỹimatáʼac nearca soʼ Noé. Daʼ ỹanáaue soʼ lecʼóqoʼtepi qataxa ỹima naʼ ỹodetʼaʼt síiỹacpi.

Soʼ Noé dʼaqtaxanem soʼ siỹaxadipi laỹi daʼ ʼuo qomle gaʼ Huétep Letʼádaic, qaláxasa sa qonaquiaxanguet. ʼUo naʼ ỹiuéʼen qataxa ʼuo naʼ ỹáche dalemataiʼ.

Daʼ ỹimat jasoʼ arca soʼ Noé, qanaʼchi ỹanáaue naʼ síiỹacpi.