¿In̈kɨan̈kodaytyoʼoba iñityi Jehová kun ityumpɨy iñanmaj?

1, 2. ¿Tyi tan̈wadyiñ wiñtyi iga tachin̈iñ?

EN YƗʼPYAJ cinco amtyɨy, maaj de tuum millón chin̈neyaj juʼuts Jehová itestigo. Jaʼyan̈yaj ikuyujkaneyaj jeʼm Dios In̈maatyi dende ixutyujom, juʼutstyim nas kun Timoteo (2 Tim. 3:​14, 15). Tun̈gakyaj iixpɨkyaj Jehová jesɨk jaʼamoyñeyajum o tsaamiyajam. Dyanam pekaʼ tuum yoomoʼ iga ikuyujkaʼaba jeʼm Biblia kun jeʼm Testigojyaj chin̈ jesɨk 97 idyɨk iamtyɨy.

² ¿Sɨʼ in̈kuyujkaʼ jeʼm Biblia? ¿O iñjaatun̈yaj Testigojyaj y jeʼam sɨʼ min̈kejayyaj? Wɨapsɨ iga sɨʼbam iñjɨɨs iga michin̈ba. ¡Impɨkneʼ tuum wɨbɨk jɨɨxi! Pero wiñtyi iga michin̈iñ nasuntaap iga in̈kɨan̈kodaʼyiñ iñityi Jehová. Yɨʼp kuyuuji in̈matpa tyiapaʼap jeʼm kɨan̈kodoʼoyi. In̈matpatyim tyiʼiga odoy mikɨʼɨn̈iñ iga in̈kɨan̈kotpa iñityi y michin̈ba siiga miityum listo.

¿TYIAPAʼAP JEʼM KƗAN̈KODOʼOYI?

3. An̈maatɨ ityam ikɨan̈kodayyaj iityi Jehová de tuum manera especial.

³ Jesɨk jeʼm Biblia ipɨkpa jeʼm an̈maatyi kɨan̈kodoʼoyi nɨmtoʼoba iga algun i natsɨʼyñeta iga ikuyooxaiñ Dios. Jehová ikupin̈neʼ idyɨk jeʼm tɨgan̈juj Israel iga ikuyooxaiñ. Pero tun̈gakyaj ikuyooxayajpa idyɨk de tuum manera especial. Juʼuts akwiñkejoʼoyi, Jehová ikupin̈ Aarón iga tsɨʼyiñ juʼuts kobakpɨk panij. Jeʼyukmɨ iwiñjom jeʼm ikobak an̈monkuyyuk iniity idyɨk tuum placa de oro y yɨʼbam ikwiñkejpa idyɨk iga kupin̈neta (Lev. 8:9). Jeʼm nazareos ipɨkneyajtyim idyɨk ijɨɨxi iga ikuyooxayajpa Jehová de tuum manera especial. Jeʼm an̈maatyi nazareo miñba de jeʼm an̈matyiimɨ hebreo nazír, y nɨmtoʼoba iga algun i natsɨʼyñeta o nakɨan̈kotneta. Jeʼm Moisés In̈kiʼmayoʼoyi nɨmpa iga jeʼeyaj ikkupakyajiñ idyɨk weeñi an̈kiʼmayoʼoyi (Núm. 6:​2-8).

4. a) ¿Tyiapaʼap jeʼm kɨan̈kodoʼoyi para taɨchtyam? b) ¿Tyi nɨmtoʼoba iga tantsakpa iga tan̈watpa jempɨk tan̈kusuʼnɨʼyba? (Aʼmɨtyim jeʼm dibujo).

⁴ Para taɨchtyam jeʼm kɨan̈kodoʼoyi nɨmtoʼoba jesɨk tampɨkpa tanjɨɨxi iga tantun̈ɨʼyba Jesús y maaj tanteguedaap tañityijom iga tan̈watpa jempɨk Dios ixunba. ¿Juutypɨk tan̈watpa? Jesús nɨm: «Siiga i̱ atúŋɨyt́ooba, wɨ̱ iga ichaguiñ iga iwatpa juuts je ixunpa» (Mat. 16:24). Jeʼm an̈maatyi griega iga tanan̈matyiimɨ nɨmtoʼoba «ichaguiñ iga iwatpa juuts je ixunpa», nɨmtoʼobatyim iga dyam iwatpa juʼuts jeʼ ikusuʼnɨʼyba. Jesɨk in̈kɨan̈kodaʼyba iñityi Jehová nasuntaap iga iñchaguiñ iga in̈watpa jempɨk jeʼ ijooyixpa (2 Cor. 5:​14, 15). Tɨgɨykuʼmpatyim jeʼm tan̈kayaj sexuales (Gál. 5:​19-21; 1 Cor. 6:18). ¿Tan̈kasɨ tan̈wat jempɨk Jehová ikusuʼnɨʼyba? Dyaʼ, siiga iñtyoyba y in̈kupɨkpa iga jeʼm ian̈kiʼmayoʼoyiyaj juchixkej miwɨwadaʼyba (Sal. 119:97; Is. 48:​17, 18). Tuum tɨɨwɨ iñɨɨyipɨk Nicholas nɨmpa: «Wɨap iñaʼm jeʼm Jehová ian̈kiʼmayoʼoyiyaj juʼuts jeʼm rejas de tuum celda iga dyaʼ miaʼmchiʼiba in̈wat jempɨk mich in̈kusuʼnɨʼyba, o juʼuts jeʼm rejas de tuum zoológico iga mikupujpa iga odoy mikɨʼɨxiñ jeʼm tenatyaj».

5. a) ¿Juutypɨk tan̈kɨan̈kodaʼyba tañityi Jehová? b) ¿Tyiʼiga dyaʼ tumtyi jeʼm kɨan̈kodoʼoyi kun jeʼm akchin̈oʼoyi? (Aʼmɨtyim jeʼm imagenyaj).

⁵ ¿Juutypɨk in̈kɨan̈kodaʼyba iñityi Jehová? Jesɨk in̈watpa tuum an̈wejpadoʼoyi juuty iñjɨykamaʼyba iga numaaj jeʼ in̈kuyooxaap y maaj iñteguedaap iga in̈watpa jempɨk jeʼ ixunba. Yɨʼp nɨmtoʼoba iga sɨʼ iñjɨykamay Jehová iga juchixkej iñtyoyba kun ityumpɨy iñanmaj, immɨjtaay, iñjɨɨxi y kun ityumpɨy impɨɨmi (Mar. 12:30). Jesɨk in̈watpa jeʼm an̈wejpadoʼoyi dyaʼ i miaʼmpa; pero jesɨk michin̈ba ityumpɨyyaj iaʼmyajpa, jeempɨgam ikutɨʼɨyɨyyajpa iga in̈kɨan̈kodayñeum iñityi Jehová. Yɨʼp dyaʼ jeʼ juʼptyin̈kej jɨɨxi, jeʼyukmɨ inikkupaktoʼoba y Jehová ixunba iga jeempɨgam in̈wadyiñ (Ecl. 5:​4, 5).

¿TYI MIYOOXPAʼTPA IGA IN̈KƗAN̈KODAʼYIÑ IÑITYI JEHOVÁ?

6. ¿Tyi miyooxpaʼtpa iga in̈kɨan̈kodaʼyiñ iñityi Jehová?

⁶ Siiga iñtyoyba Jehová in̈kɨan̈kodaʼyiñ iñityi. Y iñtyoyba iga ustam ustam iñixpɨkneʼ ininɨk y majtyim in̈kutɨʼɨyɨyñeʼ jeʼm In̈maatyi (Col. 1:9). Yɨʼbam miyooxpaʼtneʼ in̈kupɨk iga 1) Jehová nunta ity, 2) kun jeʼm iespíritu santo iyooxpaʼt jempɨk ijayyaj jeʼm Biblia y 3) iniity tuum organización y ipɨkpa iga ikkupaguiñ jempɨk jeʼ ixunba.

7. ¿Tyi nasuntaap iga iwadyiñ jempɨk ikɨan̈kodaytyoʼoba iityi Jehová?

⁷ Siiga algun i ikɨan̈kodaʼyba iityi Jehová, nasuntaap iga iixpɨguiñam jeʼm an̈kejayoʼoyiyaj dyapɨk tan̈kaʼ itywɨʼɨp Bibliajom, sɨʼbam ikkupak jeʼm Dios ian̈kiʼmayoʼoyiyaj y sɨʼbam in̈maday tun̈gakyaj jempɨk ikuyujkaneʼ (Mat. 28:​19, 20). Y pɨɨmi ityoyba Jehová y numaaj jeʼ ikuyooxatoʼoba kun ityumpɨy ianmaj. ¿Jeʼam sɨʼ in̈wat? Siiga pɨɨmi iñtyoyba Jehová dyaʼ in̈kɨan̈kodaʼyba iñityi y michin̈ba numaaj iga immaymaywattoʼoba jempɨk sɨʼ mikkuyuj. Siiga mimañiñam dyaʼ in̈watpa yɨʼɨmpɨk numaaj iga iñjaatun̈yaj maymayayajiñ o iga jeʼm iñamigojyaj chin̈neyajum.

8. ¿Juʼp jɨɨxi tampɨkpa siiga tantsoowaixpa ityumpɨy jempɨk Jehová iwatneʼ por taɨch? (Salmo 116:​12-14).

⁸ Siiga in̈kujɨɨspa ityumpɨy jempɨk Jehová iwatneʼ por mimich yɨʼp miyooxpaʼtpa iga in̈kɨan̈kodaʼyiñ jeʼm iñityi (maayɨʼ Salmo 116:​12-14).a Jeʼm Biblia nɨmpa iga «jém wɨ̱tampɨc xaja» tachiʼiba Jehová (Sant. 1:17). Jeʼm maaj wɨbɨk xaaja iga tachiʼiñeʼ jeʼ iga ikɨan̈kot por taɨchtyam jeʼm iMaanɨk Jesús. Jeʼyukmɨ mich wɨap iñamigoja Dios y wɨap iñity juchixkej (1 Juan 4:​9, 10, 19). Jesɨk in̈kɨan̈kodaʼyba jeʼm iñityi inikwiñkejpa iga iñchoowaixpa juutypɨk miyooxpaʼtneʼ y juʼtspɨy mityoyba (Deut. 16:17; 2 Cor. 5:15). Yɨʼbam in̈matpa jeʼm libro Maymayaajɨ, en jeʼm an̈kejayoʼoyi 46 punto 4, juuty kejpa tuum video jaʼypaʼap tres minuto iga iñɨɨyi Jempɨk wɨap tanchiʼityaʼm Dios.

¿MIITYUM LISTO IGA IN̈KƗAN̈KODAʼYBA IÑITYI JEHOVÁ Y MICHIN̈BA?

9. ¿Tyiʼiga ni i odoy nateguedɨytyaiñ iga ikɨan̈kodaʼyiñam iityi Jehová?

⁹ Wɨapsɨ iñjɨɨs iga dyanam miity listo iga in̈kɨan̈kodaʼyba iñityi y michin̈ba. Wɨap iga maaj in̈kukagaʼyiñ iñityi o nasuntaap iga majnam impɨɨmchiʼiñ iñfe (Col. 2:​6, 7). Kujɨɨsɨ iga dyaʼ ityumpɨy jeʼm kuyujkɨʼɨwiñyaj jespɨytyim ityoyyajpa Jehová. Y dyaʼ ityumpɨy jeʼm traytyipɨxiñtyam y wooñyomtam jesɨktyim mɨjayajpa espiritualmente. Jeʼyukmɨ kɨʼpin̈ɨ tyityam sɨʼ iññaskaʼ y juʼuts jeʼm iñityi, y odoy nakukiʼpstaajɨ kun tun̈gakyaj (Gál. 6:​4, 5).

10. ¿Tyi wɨap in̈wat siiga dyanam miity listo iga in̈kɨan̈kodaʼyba iñityi Jehová y michin̈ba? (Aʼmɨtyim jeʼm recuadro «Siiga iñjaatun̈yaj Testigojyaj»).

¹⁰ Siiga iñjɨɨspa iga dyanam miity listo iga in̈kɨan̈kodaʼyba iñityi Jehová, odoy tsaakɨ iga inikkupakpa yɨʼp meta. Waʼgaʼayɨ iga miyooxpaʼdyiñ in̈kukak iñityi (Filip. 2:13; 3:16). Wɨap in̈kupɨk iga jeʼ ikumaton̈ba jeʼm inin̈wejpadoʼoyiyaj y mikutson̈ba (1 Juan 5:14).

TYIʼIGA WEEÑIYAJ TAN̈KAʼ IPƗKYAJ IJƗƗXI

11. ¿Juutypɨk tayooxpaʼtpa Jehová iga juchixkej takupɨgoʼyiñ?

¹¹ Weeñiyaj ityyajum listo iga ikɨan̈kodayyajpa iityi Jehová y chin̈yajpa, pero dyanam ipɨkneyaj ijɨɨxi. Wɨapsɨ iga kɨɨn̈yajpa iga iwatyajpa tuum mɨjpɨk tan̈kaʼ y putyajpa expulsado. Jeʼm Biblia nɨmpa iga Jehová iyooxpaʼtpa jeʼm iyooxakɨʼɨwiñyaj iga iwatyajiñ «jém wɨ̱tampɨc cosa», juʼuts jeʼ «iwɨ̱aŋja̱m» (Col. 1:10). Jeʼyukmɨ wɨap in̈kupɨk iga jeʼ miyooxpaʼtpa iga in̈wɨwadyiñ. Jeempɨgam iwatneʼ kun jeʼm iyooxakɨʼɨwiñyaj (1 Cor. 10:13). Jeʼyukmɨ dyaʼ waatyiyaj putyajpa expulsado. Kun jeʼm Jehová iyooxpadoʼoyi wɨap tan̈kupɨgoytyaʼm.

12. ¿Tyi tayooxpaʼtpa iga odoy tan̈wadyiñ tuum mɨjpɨk tan̈kaʼ?

¹² Iga tatan̈kaɨykɨʼɨwiñtyam tanan̈teeñkamoktaʼmpa jeʼm kutɨʼɨchi iga tammalwattoʼoba (Sant. 1:14). Pero, jesɨk inin̈an̈kamokpa yɨkxpɨk jɨɨxi mich in̈kupin̈ba siiga in̈wɨwatpa o dyaʼ. Weeñiyaj nɨmyajpa iga dyaʼ wɨap tanan̈jakta, pero dyaʼ jesaneʼ. Wɨap tan̈kuyujkaʼ tanan̈jak jempɨk tanjaampa y tyityam tan̈watpa. Y tayooxpaʼtpa siiga tumtum jaama tanan̈wejpaʼtpa Jehová, tanaitypa tuum programa iga tawɨkuyujpa tanyaʼak, tanɨkpa jeʼm an̈tuʼumaajiyaj y taputpa jeʼm an̈matkuyjom. Yɨʼpyaj tayooxpaʼtpatyim tanakkupak tankɨan̈kodoʼoyi. Tanjɨɨskupakneiñ iga dyaʼ taitytyaʼm tan̈kutyum; Jehová tayooxpaʼttaʼmpa (Gál. 5:16).

13. ¿Juʼp wɨbɨk akwiñkejoʼoyi tatsagay José?

¹³ Siiga dende wiñtyi tan̈kujɨɨsneʼeba tyi tan̈watpa jesɨk tannaskaʼaba tuum kutɨʼɨchi, maaj dyaʼ tan̈kaʼap tan̈kupɨk Jehová. Jeʼm Biblia in̈matpa iga waatyiyaj kupɨgoyyaj mex iga tan̈kaɨyyajtyim idyɨk. Tan̈kujɨɨstaʼmiñ José. Jeʼm Potifar iyoomoʼ watykɨy in̈wɨʼɨytyɨʼp. Pero jeʼ ijoodon̈am idyɨk juutypɨk ikutson̈ba. Jeʼm Biblia nɨmpa iga «jeʼ dyaʼ nachiʼitya» y iñɨʼmay: «¿Jutsaap ɨch ammalwat y antan̈kawat Dios iwiñjom?» (Gén. 39:​8-10). Wɨkejpa iga José ikujɨɨsneum idyɨk tyi iwatpa wiñtyi iga jeʼm Potifar iyoomoʼ in̈wɨʼɨyiñ, jeʼyukmɨ dyaʼ imalwat.

14. ¿Tyi tayooxpaʼtpa iga odoy tan̈wadyiñ jempɨk Jehová ijooyixpa?

¹⁴ ¿Juutypɨk wɨap tan̈watkiʼps José y juchixkej takupɨgoʼyiñ? Tan̈kujɨɨsneiñ dende sɨɨ tyi tan̈watpa jesɨk tanan̈teeñkamokpa tuum kutɨʼɨchi. Jobitytyi tanaktogoʼyiñ jeʼm malojpɨk jɨɨxiyaj y tanjooyixiñ ityumpɨy jempɨk Jehová ijooyixpa (Sal. 97:10; 119:165). Yɨʼp tayooxpaʼtpa iga odoy tan̈wadyiñ tuum mɨjpɨk tan̈kaʼ. Y jesɨk tanan̈an̈kamokpa tuum kutɨʼɨchi, tanjoodon̈am tyi tan̈watpa.

15. ¿Juutypɨk inikwiñkejpa iga sɨʼ in̈kunuʼk Jehová? (Hebreos 11:6).

¹⁵ Wɨap iga iñjoodon̈am iga impaʼtneum jeʼm nuntapɨk an̈kejayoʼoyi y in̈kuyooxatoʼoba Jehová kun ityumpɨy iñanmaj. Pero ¿tyi dyaʼ sɨʼ miaʼmchiʼ iga in̈kɨan̈kodaʼyiñ iñityi Jehová y michin̈iñ? Waatɨ juʼuts jeʼm rey David, an̈wejpaʼatɨ Jehová y nɨʼmaʼayɨ: «Awɨkɨʼpin̈ɨ, oh Dios, y ixpɨɨkɨ ananmaj. Awɨkɨʼpin̈ɨ y ixpɨɨkɨ jeʼm anjɨɨxiyaj an̈yaʼkwatyajpaʼap. Aʼmɨ siiga anaity tuum malojpɨk jɨɨxi, y ananɨkɨ jeʼm tun̈jom itypaʼap juchixkej» (Sal. 139:​23, 24). Jesɨk iñtyeguedaap iga in̈kɨan̈kodaʼyba iñityi y michin̈ba, inikwiñkejpa iga sɨʼ in̈kunuʼk Jehová. Jeʼm Biblia nɨmpa iga jeʼ ikumayketpa jempɨk iwatyajpa yɨʼɨmpɨk (maayɨʼ Hebreos 11:6).

SEGUIDO KUNUʼUKƗ JEHOVÁ

16, 17. ¿Juutypɨk inimiñba Jehová ikumunjom jeʼm Testigojyaj imanɨktam? (Juan 6:44).

¹⁶ Jesús nɨm iga Jehová jempɨk tanamiñba ikumunjom (maayɨʼ Juan 6:44). ¡Yɨʼpyaj an̈matyiyaj tsaam tamaymaywatpa! ¿Tyiʼiga? Iga jesɨk Jehová inimiñba algun i jeʼm ikumunjom iaʼmpa jeʼm wɨtampɨk jɨɨxiyaj iniitywɨʼɨp. Jeʼ tsaam ichoowaixpa tumtum jeʼm iyooxakɨʼɨwiñyaj (Deut. 7:6). Y michoowaixpatyim.

¹⁷ Siiga jeʼm iñjaatun̈yaj sɨʼ min̈kejayyaj jeʼm Dios In̈maatyi, wɨapsɨ iñjaam iga in̈kuyooxaap Jehová numaaj iga jeʼeyaj iwatyajpa jeempɨk y dyaʼ iga jeʼ minimiñ ikumunjom. Pero aʼmɨ jempɨk nɨmpa jeʼm Biblia: «Cunúctaamɨ Dios, jesɨc micunúcpat́im» (Sant. 4:8; 1 Crón. 28:9). Yɨʼp nɨmtoʼoba iga siiga mich mojpa in̈kunuʼk jeʼ mikunuʼkpatyim. Jehová inimiñ tumtum por tumtum jempɨk ityyaj jeʼm ikumunjom y jeʼtyim iwatpa kun jeʼm Testigojyaj imanɨktam. Jesɨk algun i mojpa ikunuʼk Jehová jeʼ ikunuʼkpatyim juʼuts nɨmpa Santiago 4:8 (aʼmɨtyim 2 Tesalonicenses 2:13).

18. ¿Tyi tan̈kɨʼpin̈taʼmpa jeʼm tun̈gak kuyujijom? (Salmo 40:8).

¹⁸ Jesɨk Jesús chin̈, nakwiñkejta iJaatun̈ iwiñjom iga iwatpa ityumpɨy jempɨk jeʼ ixunba (maayɨʼ Salmo 40:8;b Heb. 10:7). Jesɨk mich in̈kɨan̈kodaʼyba iñityi Jehová y michin̈ba, sɨʼ in̈watkiʼps Jesús. Jeʼm tun̈gak kuyuuji miyooxpaʼtpa iga seguido in̈kuyooxaiñ Jehová jesɨk michin̈um.