Seguido tun̈ɨʼɨyɨ Jesús jesɨk michin̈um

1, 2. ¿Juʼptam kumaykedoʼoyiyaj ipɨktson̈ba jesɨk algun i chin̈ba?

JESƗK algun i chin̈ba tɨgɨyba jeʼm Jehová ifamiliajom. ¡Tsaam tamaymaytyam! Jempɨk iniityyaj tuum wɨbɨk nanɨgoʼoyi kun Jehová jeextyim in̈jaamyaj juʼuts David, jeʼ nɨm: «Maymay jeʼm pɨɨxiñ jempɨk mich [Jehová] in̈kupin̈ba y inimiñba juuty miity iga idyiñ jeʼm iñan̈kɨʼɨm» (Sal. 65:4).

² ¿Ityam wɨap ityɨgɨyyaj jeʼm Jehová ifamiliajom? Juʼuts tanaʼmtaʼm jeʼm kuyuuji naswɨʼɨp, jeʼ ikunuʼkpa jempɨk ikwiñkejyajpa iga iamigojayajtoʼoba (Sant. 4:8). Jesɨk ikɨan̈kodayyajpa jeʼm iityi y chin̈yajpa iniityyajpa tuum wɨbɨk nanɨgoʼoyi kun jeʼ. Jehová ijɨykamayñeʼ: «Iñaʼmtaʼmpa iga […] manchiʼityaʼmpa jaʼyan̈ kumaykedoʼoyiyaj iga odoy tyi mityogoyaytyaʼmiñ» (Mal. 3:10; Jer. 17:​7, 8).

3. ¿Tyi tan̈wattaʼmiñ tantumpɨytyam jempɨk tan̈kɨan̈kodayñetaʼm tañityi Jehová y tachin̈netaʼmum? (Eclesiastés 5:​4, 5).

³ Jesɨk tachin̈ba, yaguiñ tanaktsukumpa iga tan̈kuyooxaap Jehová. Tantumpɨytyam tanakkupaktamtoʼoba jempɨk tanjɨykamaytyaʼm, dyaʼ tyi ijoo siiga tanan̈an̈kamoktaʼmpa kutɨʼɨchiyaj (maayɨʼ Eclesiastés 5:​4, 5).a Tan̈watkiʼpxiñtyim Jesús y tan̈kupɨguiñ jeʼm ian̈kiʼmayoʼoyiyaj (Mat. 28:​19, 20; 1 Ped. 2:21). Yɨʼp kuyuuji tayooxpaʼtpa iga tanakkupaguiñ.

SEGUIDO TUN̈ƗʼƗYƗ JESÚS MEX IGA IÑÑASKAʼABA PROBLEMAS Y KUTƗʼƗCHIYAJ

4. ¿Tyi iñaskayajpa idyɨk jempɨk ityun̈ɨyyajpa Jesús? (Lucas 9:23).

⁴ Odoy jɨɨsɨ iga jesɨk michin̈um dyam iniitypa yaʼachaajiyaj. Tan̈kujɨɨstaʼmiñ iga Jesús nɨm «yaachɨɨyɨ cuando miyaachwatta̱p» yɨʼp nɨmtoʼoba iga yaʼachayajpatyim ityumpɨy jempɨk ityun̈ɨyyajpa (maayɨʼ Lucas 9:23). ¿Nɨmtoʼoba idyɨk Jesús iga juchixkej yaʼachayajpa? Dyaʼ. Mex iga ipɨktson̈yajpa kumaykedoʼoyiyaj iñaskayajpatyim idyɨk weeñi yaʼachaajiyaj (2 Tim. 3:12).

5. ¿Juʼptam kumaykedoʼoyiyaj nɨm Jesús iga ipɨktson̈yajpa jempɨk ityeguedayajpa iga ikuyooxayajpa Dios?

⁵ Iga maaj iñtyeguedaap iga in̈kuyooxaap Jehová wɨapsɨ iga jeʼm iñfamiliaryaj dyaʼ ikusuʼnɨyyajpa o wɨapsɨ iga in̈watneʼ jeʼm sacrificio iga dyaʼ iniitypa tyidyin̈kej (Mat. 6:33). Siiga jesaneum, kupɨɨkɨ iga Jehová ijoodon̈ ityumpɨy jempɨk sɨʼ in̈wat (Heb. 6:10). Iñaʼmneʼ juutypɨk kupakneʼ jeʼm an̈matyiyaj nɨmwɨʼɨp Jesús: «Siiga i̱ ichacpa it́ɨc, it́ɨ̱wɨtam, ia̱pa, ija̱tuŋ, iyo̱mo, ichɨ̱xt́am, o iñas ɨch aŋcuyucmɨ iga iŋmatpa jém wɨbɨc aŋma̱t́i, jesɨc Dios iwɨ̱yojpa [ . . . ] icseedáypa más jáyaŋ cosa que jém ichacneyajwɨɨp jém it́ɨc, it́ɨ̱wɨtam, ia̱pa, ichɨ̱xt́am, o iñas. Pero tsa̱m yaachwatta̱pt́im» Y nɨmtyim iga ipɨktson̈ba «jém vida jém d́apɨc cuyajpa» (Mar. 10:​29, 30). Impɨktson̈neʼ maaj jaʼyan̈ kumaykedoʼoyiyaj que jeʼm sacrificios in̈watnewɨʼɨp (Sal. 37:4).

6. ¿Tyiʼiga seguido inin̈an̈kamokpa jeʼm malojpɨk kusuʼnɨyoʼoyiyaj mex iga michin̈neum?

⁶ Iga mityan̈kaɨykɨʼɨwiñ, seguido inin̈an̈kamokpa jeʼm malojpɨk kusuʼnɨyoʼoyiyaj mex iga michin̈neum (1 Juan 2:16). Wɨapsɨ iga a veces jeextyim inin̈jaam juʼuts jeʼm apóstol Pablo, jeʼ nɨm: «Anjo̱doŋ [ananmajom] iga tsa̱m wɨ̱ jém Dios iŋquímayooyi. Pero [ . . . ] anait́ [ananmajom] tuŋgac jɨ̱xi juuts tu̱m malopɨc aŋquímayooyi. [ . . . ] D́a iwɨ̱aŋja̱m iga aŋwɨ̱watpa. Jém malopɨc jɨ̱xi, jém anait́wɨɨp ammɨjta̱yyucmɨ, atsenne juuts tu̱m preso» (Rom. 7:​22, 23). Wɨapsɨ iga min̈yaʼkpa iga iniitypa jeʼm malojpɨk kusuʼnɨyoʼoyiyaj. Pero jesɨk in̈kujɨɨspa jempɨk iñjɨykamay Jehová jesɨgam in̈kɨan̈koday iñityi, miyooxpaʼtpa iga wɨaiñ iñyaʼachɨy jesɨk inin̈an̈kamokpa tuum kutɨʼɨchi. ¿Tyiʼiga tanɨmpa jeempɨk?

7. Iga tan̈kɨan̈kodayñeum tañityi Jehová, ¿juutypɨk tayooxpaʼtpa iga takupɨgoʼyiñ?

⁷ Jesɨk algun i ikɨan̈kodaʼyba iityi Jehová, dyam iwatpa juʼuts jeʼ ikusuʼnɨʼyba. Yɨʼp nɨmtoʼoba iga ichakpa jeʼm kusuʼnɨyoʼoyiyaj y jɨɨxiyaj iga Jehová dyaʼ iwɨixpa (Mat. 16:24). Jeʼyukmɨ, jesɨk tanan̈an̈kamokpa tuum kutɨʼɨchi dyaʼ tanjɨɨsjɨsneʼeba tyi tan̈watpa. Tanjoodon̈am juʼp jɨɨxi tampɨkpa: tan̈kupɨkpa Jehová. Y jesɨk tan̈kɨan̈koday tañityi tannɨʼmay iga juchixkej tan̈wattoʼoba jempɨk jeʼ ikusuʼnɨʼyba. Tan̈wadyiñ juʼuts Job, mex iga agui yaʼacha, jeʼ nɨm: «Dyaʼ antsakpa iga awɨsɨsɨoʼyba» (Job 27:5).

8. Jesɨk tan̈kujɨɨspa iga tan̈kɨan̈kodayñeʼ tañityi Jehová, ¿juutypɨk tayooxpaʼtpa tanan̈an̈kamok jeʼm kutɨʼɨchiyaj?

⁸ Jesɨk tan̈kujɨɨspa jempɨk tanjɨykamayñeʼ Jehová iga tan̈watpa juʼuts jeʼ ikusuʼnɨʼyba, tayooxpaʼtpa tanyaʼachɨy juʼptyin̈kej kutɨʼɨchi. Juʼuts akwiñkejoʼoyi, ¿tanakwiñkejaʼyba iga tan̈kusuʼnɨyñeʼ algun i iga an̈koʼmɨyñeum? Dyaʼ. Jesɨgam tan̈kɨan̈koday tañityi Jehová, tampɨk tanjɨɨxi iga dyaʼ tan̈watpa jempɨk jeʼ dyaʼ ikusuʼnɨʼyba. Siiga dende wiñtyityim dyaʼ tanaʼmchiʼiba iga mɨjaiñ jeʼm malojpɨk kusuʼnɨyoʼoyiyaj tananmajom, okmɨ dyaʼ tayaʼachaap iga tanaktogoytyoʼoba. Dyaʼ tanɨkpa jeʼm «malojpɨkyaj ixotytyun̈jom» (Prov. 4:​14, 15).

9. Jesɨk tan̈kujɨɨspa iga tan̈kɨan̈kodayñeʼ tañityi Jehová, ¿juutypɨk tayooxpaʼtpa iga majnam tanteguedaiñ tan̈kuyooxa?

⁹ ¿Y siiga tan̈kejaytyaap tuum yooxakuy iga dyaʼ taaʼmchiʼiba tannɨk jeʼm an̈tuʼumaajiyaj? Tanjoodon̈am tyi tan̈watpa. Wiñtyi iga tan̈kejaytyaiñ yɨʼp yooxakuy tampɨkneum tanjɨɨxi iga dyaʼ tampɨktson̈ba. Dyaʼ jesɨk tampɨktson̈neum, jesɨknam mojpa tan̈kujɨɨs tyi tan̈watpa iga wɨaiñ tan̈kuyooxa Jehová. Jeʼm Jesús iakwiñkejoʼoyi wɨap tayooxpaʼttaʼm. Jeʼ iwɨpɨkneʼ idyɨk ijɨɨxi iga iwatpa jempɨk iJaatun̈ ikusuʼnɨʼyba, y taɨchtyam iga tan̈kɨan̈kodayñetaʼm tañityi jeexpɨktyim jɨɨxi tanaitytyaʼmiñ (Mat. 4:10; Juan 8:29).

10. ¿Juutypɨk tayooxpaʼtpa Jehová iga seguido tantun̈ɨʼyiñ Jesús jesɨk tachin̈neum?

¹⁰ Jeʼm problemas y jeʼm kutɨʼɨchiyaj taaʼmchiʼiba tanakwiñkej siiga seguido tantun̈ɨytyoʼoba Jesús. Y tanjoodon̈tam iga Jehová tayooxpaʼttaʼmpa. Jeʼm Biblia nɨmpa: «TanJa̱tuŋ Dios siempre iwatpa juuts tajɨycámayñe. D́a [iaʼmchiʼiba] iga más pɨ̱mi micutɨ́tsta̱p hasta d́a wɨa̱p iñyaachɨ́y. [ . . . ] Micupujpa jém tanJa̱tuŋ Dios. Miyo̱xpátpa iga wɨa̱iñ iñyaachɨyt́a» (1 Cor. 10:13).

TYI WƗAP IN̈WAT IGA SEGUIDO IÑTYUÑƗʼYIÑ JESÚS

11. ¿Tyi miyooxpaʼtpa iga seguido iñtyun̈ɨʼyiñ Jesús? (Aʼmɨtyim jeʼm imagenyaj).

¹¹ Jesús ikuyooxa Jehová kun ityumpɨy ianmaj, y jeʼm an̈wejpadoʼoyi iyooxpaʼt iga odoy ijagan̈tsaguiñ (Luc. 6:12). Iga seguido iñtyun̈ɨʼyiñ Jesús jesɨk michin̈neum, waatɨ tyityam miyooxpaʼtpa iga majnam in̈kunuʼguiñ Jehová. Jeʼm Biblia nɨmpa: «Seguido taŋwattámiñ de acuerdo con jém jɨ̱xi jém tampɨctsoŋnewɨɨp» (Filip. 3:16). A veces in̈kumaton̈ba iga weeñi tɨwɨtam ipɨkyaj ijɨɨxi iga majnam ikuyooxayajpa Jehová. Wɨapsɨ iga oyyaj en jeʼm Escuela para Evangelizadores del Reino o nɨkyaj yooxpadoʼoyiyaj jeʼm an̈matkuyjom tun̈gak an̈eymɨ. Siiga jeʼm iñityi miaʼmchiʼiba in̈wat yɨʼɨmpɨk, yɨʼp jeʼ tuum wɨbɨk meta. Jeʼm Jehová iyooxakɨʼɨwiñyaj tsaam ikusuʼnɨyyajpa iyooxpadoyyaj jeʼm an̈matkuyjom (Hech. 16:9). Pero ¿siiga dyaʼ wɨap in̈wat jeempɨk? Odoy jɨɨsɨ iga dyaʼ tyi mikumeskuy, jempɨk maaj importante en jeʼm carrera cristiana jeʼ iga iñyaʼachɨʼyiñ (Mat. 10:22). Odoy kujaʼamaʼayɨ iga Jehová tsaam maymay siiga mich in̈watpa juʼtspɨyam miwɨap iga in̈kuyooxaap. Yɨʼɨmpɨgam dyaʼ iñchakpa iga iñtyun̈ɨʼyba Jesús jesɨk michin̈um (Sal. 26:1).

12, 13. ¿Tyi wɨap in̈wat siiga dyam jespɨy mimaymay? (1 Corintios 9:​16, 17; aʼmɨtyim jeʼm recuadro «Tyi wɨap in̈wat iga odoy iñchaguiñ jeʼm carrera»).

¹² ¿Tyi wɨap in̈wat siiga iñjaampa iga dyam sɨʼ inin̈wejpaʼt Jehová kun ityumpɨy iñanmaj, o siiga dyam mimaymay juʼuts wiñtyi jesɨk miputpa jeʼm an̈matkuyjom y jesɨk immayba jeʼm Biblia? Siiga iññaskaʼaba yɨʼɨmpɨk jesɨk michin̈neum, odoy jɨɨsɨ iga Jehová dyam sɨʼ michiʼ jeʼm iespíritu. Iga tatan̈kaɨykɨʼɨwiñtyam ity jaamayaj iga jeexam tanan̈jaam. Siiga dyam jespɨy mimaymay juʼuts wiñtyityim, kujɨɨsɨ jeʼm apóstol Pablo iakwiñkejoʼoyi. Mex iga jeʼ tsaam idyɨk ityeguedaap iga iwatkiʼpspa Jesús, ijoodon̈ idyɨk iga a veces dyaʼ iniitypa jeʼm pɨɨmi iga iwɨwatpa (maayɨʼ 1 Corintios 9:​16, 17, TNM).b Nɨm: «Pero mex siiga an̈watpa pɨɨmimɨ, jeʼam jeʼm yooxakuy iga achiʼiñeta». Yɨʼp nɨmtoʼoba iga Pablo ipɨkneʼ idyɨk ijɨɨxi iga ikkupakpa jeʼm an̈matkuy dyaʼ tyi ijoo tyityam sɨʼ idyɨk iñaskaʼ.

¹³ Jeʼyukmɨ jesɨk impɨkpa iñjɨɨxi odoy aʼmchiɨʼ iga jempɨk iñjaampa mipɨʼɨmɨʼyiñ tyi in̈watpa. Pɨɨkɨ iñjɨɨxi iga in̈wɨwatpa mex iga a veces iñanmajom dyaʼ in̈wattoʼoba. Siiga in̈watpa yɨʼɨmpɨk, miyooxpaʼtpa iga in̈kaguiñ jempɨk iniity iñanmajom. Jesɨk miwɨkuyujpa iñyaʼak, in̈watpa an̈wejpadoʼoyiyaj, miñɨkpa jeʼm an̈tuʼumaajiyaj y miputpa jeʼm an̈matkuy, miyooxpaʼtpa iga seguido iñtyun̈ɨʼyiñ Jesús y wɨaptyim iñanmajan̈chiʼ jeʼm tɨwɨtam kun tyityam in̈watpa (1 Tes. 5:11).

«NACƗƗPIŊTA̱JƗ»

14. ¿Tyi wɨɨ iga in̈kɨʼpin̈iñ a veces, y tyiʼiga? (2 Corintios 13:5).

¹⁴ Jesɨk michin̈um, wɨɨ iga a veces in̈kɨʼpin̈iñ tyityam sɨʼ in̈wat (maayɨʼ 2 Corintios 13:5). Juʼuts akwiñkejoʼoyi, aʼmɨ siiga tumtum jaama sɨʼ in̈wat an̈wejpadoʼoyi, immayba y in̈kuyujkaʼaba jeʼm Biblia, miñɨkpa jeʼm an̈tuʼumaajiyaj y miputpa jeʼm an̈matkuy. Aʼmɨ juutypɨk miyooxpaʼtpa iñityijom. Nakwaʼktaajɨ: «¿An̈kutɨʼɨyɨʼyba anan̈mat jeʼm an̈kejayoʼoyiyaj dyapɨk tan̈kaʼ iga ityyaj jeʼm Bibliajom? ¿Tyiñam wɨap an̈wat iga maaj amaymayaiñ jeʼm an̈matkuyjom? ¿Anan̈madaʼyba Jehová juʼuts anan̈jaam y anakwiñkejpa iga anaidyay confianza? ¿Anteguedaap iga anɨkpa ityumpɨy jeʼm an̈tuʼumaajiyaj? ¿Tyi wɨap an̈wat iga an̈wɨkumaton̈iñ jeʼm an̈tuʼumaajiyaj y achioʼyiñ wɨtampɨk kutson̈oʼoyiyaj?».

15, 16. ¿Tyi min̈kejaʼyba jempɨk iñaskaʼ Robert?

¹⁵ Wɨɨ iga in̈kɨʼpin̈iñtyim juʼutspɨk jɨɨxiyaj wɨap miktan̈kawat. Tanaʼmtaʼmiñ tuum akwiñkejoʼoyi iga tan̈kejaʼyba tyiʼiga tsaam importante. Tuum tɨɨwɨ iga iñɨɨyi Robert nɨmpa: «Jesɨgam 20 anamtyɨy, tuum yoomoʼ an̈waganayooxapaʼap atɨʼp iga anɨguiñ ityɨkkɨʼɨm. Nɨm iga aitytyaʼmpa an̈kwɨstɨktam y wɨap an̈wattaʼm ‹tyityam an̈kusuʼnɨytyaʼmpa›. Dyaʼ an̈kutɨʼɨyɨy juutypɨk an̈kutson̈ba, pero okmɨ annɨʼmay iga dyaʼ anɨkpa y anan̈maday tyiʼiga». Robert tsaam iwɨwat iga iyaʼachɨy yɨʼp kutɨʼɨchi. Pero okmɨ ikujɨɨs iga jobitytyi idyɨk iñɨʼmay iga dyaʼ nɨkpa. Nɨmpa: «Dyaʼ jobity an̈wat juʼuts José iga ipoʼyay jeʼm Potifar iyoomoʼ (Gén. 39:​7-9). Dyaʼ an̈kujɨɨs iga tan̈kaʼap idyɨk annɨʼmay iga dyaʼ. Kun jempɨk nas an̈kutɨʼɨyɨy iga ampɨɨmchiʼiññam idyɨk jeʼm an̈wɨnanɨgoʼoyi kun Jehová».

¹⁶ Tan̈kujɨɨxiñ iga inin̈an̈kamokpa tuum kutɨʼɨchi y iñyaʼachɨʼyba. Pero ¿tyiʼiga dyaʼ in̈watpa juʼuts iwat Robert? Nakwaʼktaajɨ: «¿Tsaam tan̈kaʼa mu annɨm iga dyaʼ?». Siiga nasuntapnam iga in̈wadyiñ kukakiyaj, odoy an̈yaʼakɨ. Maaj wɨɨ siiga in̈kutɨʼɨyɨʼyum juʼptam jɨɨxiyaj wɨap miktan̈kawat. An̈madaʼayɨ Jehová y pɨɨkɨ iñjɨɨxi iga juchixkej in̈kupɨkpa (Sal. 139:​23, 24).

17. Kun jempɨk iñaskaʼ Robert, ¿juutypɨk tɨgɨykuʼmpa jeʼm Jehová iñɨɨyi kun jeʼm tan̈kupɨgoʼoyi?

¹⁷ Pero dyaʼ jeem kuyaj jempɨk iñaskaʼ Robert. Jeʼ nɨmpa: «Jesɨgam annɨʼmay jeʼm yoomoʼ an̈waganayooxapaʼap iga dyaʼ anɨkpa ityɨkkɨʼɨm, jeʼ anɨʼmay ‹Inikwiñkej iga dyaʼ mijeex›. Anakwaʼk tyiʼiga nɨm jeempɨk. Jeʼ an̈maday iga tuum iamigo —iga Testigo idyɨk— iñɨʼmayñeʼ iga ityumpɨy jeʼm Testigojyaj mañipɨkyaj dyaʼ iwɨkupɨkneyaj y siiga algun i ikutɨʼtsyajpa iga imalwadyiñ, jikskɨy iwatyajpa. Jeʼyukmɨ jeʼ iñɨʼmay iamigo iga akutɨʼtspa. ¡Tsaam amaymay iga dyaʼ antuʼudɨyay jeʼm Jehová iñɨɨyi!».

18. ¿Tyi iñjɨɨsneʼ iga in̈watpa jesɨk michin̈um? (Aʼmɨtyim jeʼm recuadro «Wɨsteen an̈kejayoʼoyiyaj miyooxpaʼtpaʼap»).

¹⁸ Jesɨk in̈kɨan̈kodaʼyba iñityi Jehová y michin̈ba, inikwiñkejpa iga naxiñ tyi naspa iñxunba iga kuaʼyñeiñ jeʼm iñɨɨyi. Y wɨap in̈kupɨk iga Jehová iaʼmpa jeʼm problemas y jeʼm kutɨʼɨchiyaj inin̈an̈kamokpaʼap. Ijoodon̈ juʼtspɨy iñtyeguedaap iga in̈kupɨkpa y mikumayketpa. Odoy kujaʼamaʼayɨ: kun jeʼm iespíritu santo miyooxpaʼtpa iga in̈wɨwadyiñ (Luc. 11:​11-13). Kun jeʼm Jehová iyooxpadoʼoyi, seguido wɨap iñtyun̈ɨy Jesús jesɨk michin̈um.