KUYUUJI 28
WAAÑI 123 Seamos leales y sumisos al orden teocrático
¿In̈kutɨʼɨyɨyñeum juʼp jeʼ jeʼm nuntapɨk an̈kejayoʼoyi?
«Pɨ̱cɨ jém nu̱mapɨc aŋma̱t́i juuts tu̱m soldado ichencámpa jém icinturón» (EFES. 6:14).
AN̈KEJAYOʼOYI
Tyi tayooxpaʼtpa tan̈kutɨʼɨyɨy iga jempɨk tan̈kejaʼyba Jehová dyaʼ jeʼ mɨgoʼoyi y juutypɨk jeʼm Wookkɨʼɨwiñ y jeʼm tanenemigojyaj tamɨgoyayyajtoʼoba.
1. ¿Juʼuts inin̈jaam iga in̈kutɨʼɨyɨyñeum jeʼm nuntapɨk an̈kejayoʼoyi?
JEMPƗK tan̈kuyooxataʼmpa Jehová tantoytyaʼmpa jeʼm an̈kejayoʼoyiyaj itywɨʼɨp In̈matyijom, yɨʼbam ipɨɨmchiʼiba tanfe (Rom. 10:17). Tan̈wɨkupɨknetaʼm iga Jehová ichak jeʼm kumun iga tan̈kejaytyaʼmpa jeʼm nuntapɨk an̈kejayoʼoyi (1 Tim. 3:15). Y tan̈kupɨktaʼmpa jempɨk tajɨɨxian̈chiʼiyajpa, jeʼeyaj tan̈kejayyajpa jempɨk nɨmpa jeʼm Biblia y tayooxpaʼtyajpa tan̈wat jempɨk Dios ikusuʼnɨʼyba (Heb. 13:17).
2. Juʼuts nɨmpa Santiago 5:19, ¿tyiʼiga tanakuixtyamtaiñ?
2 Mex iga tan̈kutɨʼɨyɨyñeum jeʼm nuntapɨk an̈kejayoʼoyi y tanjoodon̈ iga tan̈kupɨktaʼmiñ jeʼm Dios iorganización, wɨaptyim tamɨgoyaytya (maayɨʼ Santiago 5:19). Jeʼm Wookkɨʼɨwiñ ixunba iga odoy tan̈kupɨguiñ jempɨk nɨmpa jeʼm Biblia y jeʼm Jehová iorganización (Efes. 4:14).
3. ¿Tyi tan̈wattaʼmiñ iga odoy tamɨgoyaytyamtaiñ y tyiʼiga? (Efesios 6:13, 14).
3 (Maayɨʼ Efesios 6:13, 14). Dyaʼ jaʼyñeʼ jeʼm Wookkɨʼɨwiñ imɨgoyaʼyba jaʼyan̈yaj iga in̈teeñkamokyajiñ Jehová (Apoc. 16:13, 14). Y maaj ityeguedaap imɨgoyay jempɨk tan̈kuyooxataʼmpa (Apoc. 12:9). Jeʼyukmɨ tan̈kutɨʼɨyɨytyaʼmiñ juutypɨk tamɨgoyaytyoʼoba y tan̈kupɨktaʼmiñ jeʼm nuntapɨk an̈kejayoʼoyi (Rom. 6:17; 1 Ped. 1:22). Siiga tan̈watpa jeempɨk, tayooxpaʼtpa iga tanakɨakputtaiñ jesɨk itypa jeʼm mɨjpɨk yaʼachaaji.
4. ¿Tyi tan̈kɨʼpin̈taʼmpa yɨʼp kuyujijom?
4 Yɨʼp kuyujijom, tan̈kɨʼpin̈taʼmpa wɨsteen cualidades iga tayooxpaʼtyajpa tan̈kutɨʼɨyɨytyaʼm jempɨk in̈kejpa jeʼm Biblia y tyi tayooxpaʼtpa iga wɨaiñ tan̈kupɨktaʼm jeʼm jɨɨxian̈chioʼoyiyaj tachiʼipaʼap jeʼm Jehová iorganización. Tan̈kɨʼpin̈taʼmpatyim tukuteen jɨɨxiyaj iga tayooxpaʼtyajpa iga odoy tamɨgoyayyajiñ.
TYI TAYOOXPAʼTPA TAN̈KUTƗʼƗYƗY JEʼM NUNTAPƗK AN̈KEJAYOʼOYI
5. ¿Juutypɨk tayooxpaʼtpa siiga tan̈kutɨʼɨyɨyñeum jeʼm nuntapɨk an̈kejayoʼoyi y jeʼm kɨɨn̈i tanaidyaywɨʼɨp Jehová?
5 Tanaidyaʼyiñ Jehová tuum wɨbɨk kɨɨn̈i. Siiga tan̈kɨɨn̈ba Jehová, nɨmtoʼoba iga tantoyba y ni keman tan̈watpa jempɨk jeʼ dyaʼ ikusuʼnɨʼyba. Jeʼyukmɨ, siiga tansunba iga Jehová iwɨixiñ jeʼm tan̈koosteñoʼoyi tan̈kutɨʼɨyɨytyaʼmiñ jempɨk wɨɨ y dyaʼ wɨɨ tan̈wat y tan̈kutɨʼɨyɨytyaʼmiñtyim jeʼm nuntapɨk an̈kejayoʼoyi iga odoy tamɨgoyaytyamtaiñ (Prov. 2:3-6; Heb. 5:14). Maaj tantoʼyiñ Jehová y odoy tanaʼmchiʼiñ iga jesɨk tan̈kɨɨn̈ba tun̈gakyaj, tan̈wadyiñ jempɨk jeʼ dyaʼ ikusuʼnɨʼyba.
6. ¿Tyi iñaskayaj jeʼm 10 espías iga kɨɨn̈yaj?
6 Siiga maaj tan̈kɨɨn̈ba tun̈gakyaj, mojpa tan̈kujɨɨs iga Jehová tamɨgoyaytyoʼoba. Tan̈kujɨɨstaʼmiñ tyi iwatyaj jeʼm 12 espías jesɨgam nɨk ikɨʼpin̈yaj jeʼm Nas juuty Jɨykamayñeyajta idyɨk. Jeʼm 10 espías maaj ikɨɨn̈yaj jeʼm cananeos, jeʼyukmɨ nɨmyaj: «Dyaʼ wɨap nɨk tanan̈ayaj, maaj pɨɨmiɨyyaj» (Núm. 13:27-31). Jeʼm israelitajyaj numaaj iaʼmyaj juʼtspɨy pɨɨmiɨyyaj idyɨk jeʼm cananeos, y dyaʼ juʼtspɨy pɨɨmiɨy Jehová. Ikujaʼamayyaj jempɨk jeʼ ixunba iga iwatyajiñ. Meʼega jeʼeyaj ijɨɨskupakyaj juʼtspɨy yooxpaʼtneyajta, wɨap idyɨk iaʼmyaj iga jeʼm cananeos dyaʼ ikooñwɨyyajpa Jehová. Pero Josué y Caleb iniityyaj idyɨk fe y dyaʼ kɨɨn̈yaj, jeʼyukmɨ nɨmyaj: «Siiga Jehová maymay kun taɨchtyam tayooxpaʼtpa iga tan̈kooñwɨytyaʼmiñ» (Núm. 14:6-9).
7. ¿Juutypɨk tapɨɨmchiʼiba jeʼm kɨɨn̈i tanaidyaywɨʼɨp Jehová? (Aʼmɨtyim jeʼm imagen).
7 Siiga tan̈kujɨɨspa tyi ikusuʼnɨʼyba Jehová wiñtyi iga tampɨguiñ tuum jɨɨxi, tampɨɨmchiʼiba jeʼm kɨɨn̈i tanaidyaywɨʼɨp (Sal. 16:8). Jesɨk immayba tuum nasɨyoʼoyi itywɨʼɨp Bibliajom, nakwaʼktaajɨ: «¿Tyi idyɨk an̈wat meʼega aity jeem?». Kujɨɨsɨ iga sɨʼ in̈kumaton̈ jempɨk nɨmyajpa jeʼm 10 espías. ¿In̈kupɨkpa jempɨk nɨmpa ixɨʼyaj y mikɨɨn̈ba? ¿O maaj in̈kupɨkpa Jehova iga iñtyoyba? Jaʼyan̈ israelitajyaj dyaʼ ikupɨkyaj jempɨk nɨm Josué y Caleb. Jeʼyukmɨ dyaʼ aʼmchiyajta iga tɨgɨyyajiñ jeʼm Nas juuty Jɨykamayñeyajta idyɨk (Núm. 14:10, 22, 23).
¿In̈kupɨk idyɨk meʼega miity jeem? (Aʼmɨ jeʼm párrafo 7).
8. ¿Juʼutspɨk cualidad nasuntaap iga tanaidyiñ, y tyiʼiga?
8 Humildad. Jehová in̈kejaʼyba jeʼm nuntapɨk an̈kejayoʼoyi jempɨk iniity humildad (Mat. 11:25). Jesɨk moj tan̈kuyujkaʼ jeʼm Biblia tanaʼmchiʼ iga tun̈gakyaj tan̈kejayyajiñ (Hech. 8:30, 31). Pero iga odoy tanakujiʼptaiñ, nasuntaap iga tanakuixtyaiñ, odoy tan̈kujɨɨstaʼmiñ iga jempɨk tanjɨɨspa jespɨytyim wɨɨ juʼuts jeʼm an̈kiʼmayoʼoyiyaj itywɨʼɨp Bibliajom y jeʼm jɨɨxian̈chioʼoyiyaj tachiʼipaʼap jeʼm Jehová iorganización.
9. ¿Tyi tayooxpaʼtpa iga tanaidyiñ humildad?
9 ¿Tyi tayooxpaʼtpa iga tanaidyiñ humildad? Jesɨk tan̈kujɨɨspa iga Jehová dyaʼ jeex juʼuts taɨchtyam (Sal. 8:3, 4). Tanan̈wejpaʼdyiñ iga tachiʼiñ tuum wɨbɨk jɨɨxi y tanaʼmchiʼiñ iga tan̈kejaytyaiñ. Jehová tayooxpaʼtpa ikuyukmɨ jeʼm In̈maatyi y jeʼm iorganización iga odoy tanakujiʼptaiñ. Jesɨk immayba jeʼm Biblia aʼmɨ juʼtspɨy maymay Jehová siiga tanaitypa humildad y dyaʼ tanakujiʼptaap. Jeʼyukmɨ siiga impɨktson̈ba tuum yooxakuy jeʼm kumunjom, odoy nakujiʼptaajɨ, juchixkej akwiñkeejɨ humildad.
TYI TAYOOXPAʼTPA IGA ODOY TANTSAKGUIÑ JEʼM NUNTAPƗK AN̈KEJAYOʼOYI
10. ¿Juutypɨk ijɨɨxian̈chiʼiñeʼ Jehová jeʼm ikumun?
10 Naidyaʼayɨ confianza jeʼm Jehová iorganización. Jehová ijɨɨxian̈chiʼ jeʼm israelitajyaj ikuyukmɨ Moisés y Josué (Jos. 1:16, 17). Y jesɨk jeʼeyaj kupɨgoyyajpa idyɨk, iwɨnɨgayyajpa. Maaj okmɨ jesɨk tsukum jeʼm kumun cristiana, Jehová ijɨɨxian̈chiʼ ikuyukmɨ jeʼm 12 apóstol (Hech. 8:14, 15). Jɨɨxian̈chiʼiyajtatyim ikuyukmɨ jeʼm ancianojyaj ityyajwɨʼɨp idyɨk Jerusalén. Iga ikupɨkyajpa idyɨk jeʼm jɨɨxian̈chioʼoyiyaj, jeʼm kumunyaj majtyim jaʼyan̈ayaj y ipɨɨmchiyajtyim ife (Hech. 16:4, 5). Yɨʼp jaama jesɨk tan̈kupɨkpa jeʼm jɨɨxian̈chioʼoyiyaj tachiʼipaʼap ikuyukmɨ jeʼm iorganización Jehová takumayketpatyim. Kujɨɨsɨ, ¿juʼutssɨ in̈jaam Jehová siiga dyaʼ tan̈kupɨktaʼmpa jempɨk ikupin̈neʼ? Tan̈kɨʼpin̈taʼmiñ tyi iñaskayaj jeʼm israelitajyaj jesɨk tɨgɨyyajpam idyɨk jeʼm Nas juuty Jɨykamayñeyajta idyɨk.
11. ¿Tyi iñaskayaj jempɨk dyaʼ ikupɨkyaj ityam Jehová ikupin̈neʼ idyɨk iga jɨɨxɨan̈chiʼiyajtaiñ? (Aʼmɨtyim jeʼm imagen).
11 Jesɨgam jeʼm israelitajyaj nɨkiyaj idyɨk, weeñi pɨxiñtyam moj ikujɨyyaj Moisés y in̈teeñkamokyaj Jehová. Nɨmyaj: «Ityumpɨyyaj kuaʼyñeyaj [dyaʼ numaaj Moisés] y Jehová itytyim kun jeʼeyaj» (Núm. 16:1-3). Mex iga Jehová iaʼmpa iga ityumpɨyyaj kuaʼyñeyaj, jeʼ ikupin̈neʼ idyɨk numaaj Moisés iga jɨɨxian̈chiʼiyajtaiñ (Núm. 16:28). Jeʼyukmɨ jesɨgam ikujɨyyaj Moisés, sɨʼ idyɨk ikujɨyyaj Jehová. Jeʼeyaj nakujɨɨsyajta iyaʼak y dyaʼ ikujɨɨsyaj jempɨk Jehová ixunba idyɨk iga iwatyajiñ. Jeʼyukmɨ iktogoy jempɨk in̈teeñkamokyaj y jaʼyan̈ israelitajyaj kaʼayajtyim iga dyaʼ kupɨgoyyaj (Núm. 16:30-35, 41, 49). Yɨʼp jaama, Jehová dyatyim iwɨixpa jempɨk dyaʼ ikupɨkyajpa jeʼm jɨɨxian̈chioʼoyiyaj chioypaʼap jeʼm iorganización.
¿Iapaʼap in̈kupɨkpa idyɨk meʼega miity jeem? (Aʼmɨ jeʼm párrafo 11).
12. ¿Tyiʼiga tanaidyaytyaʼmiñ confianza jeʼm Jehová iorganización?
12 Wɨap tanaidyaytyaʼm confianza jeʼm Jehová iorganización. Y wɨap tan̈kupɨktaʼm iga jempɨk tajɨɨxian̈chiʼiyajpa, jobity ikukagayyajpa juutypɨk ikutɨʼɨyɨyñeyaj tuum an̈kejayoʼoyi o iwɨtsakyaj tuum yooxakuy siiga nasuntaap iga iwatyajiñ (Prov. 4:18). Jeʼeyaj iwatyajpa jempɨk Jehová ikusuʼnɨʼyba. Y jesɨk ipɨkyajpa tuum jɨɨxi, wiñtyi ikɨʼpin̈yajpa tyi ijɨɨspa Jehová jeʼm In̈matyijom. Yɨʼɨmpɨgam wɨap tan̈wattaʼm tantumpɨytyam.
13. ¿Tyiapaʼap jeʼm «nu̱mapɨc aŋma̱t́i» y tyi tan̈wattaʼmiñ?
13 «Odoy tsa̱cɨ jém nu̱mapɨc aŋma̱t́i» (2 Tim. 1:13). ¿Tyiapaʼap jeʼm «nu̱mapɨc aŋma̱t́i»? Jeʼm an̈kejayoʼoyiyaj ityyajwɨʼɨp Bibliajom (Juan 17:17). Ityumpɨy jempɨk tan̈kupɨktaʼmpa. Jeʼm Jehová iorganización tayooxpaʼtneʼ iga tan̈kupɨktaʼmiñ yɨʼpyaj an̈kejayoʼoyiyaj. Siiga juchixkej tan̈watpa yɨʼɨmpɨk tawɨnɨgaytyaʼmpa.
14. ¿Tyiʼiga weeñi cristianojyaj dyam ikupɨkyaj jeʼm «nu̱mapɨc aŋma̱t́i»?
14 ¿Tyi wɨap tannaskaʼ siiga dyam tan̈kupɨktaʼmpa jeʼm «nu̱mapɨc aŋma̱t́i»? Tanaʼmiñ jempɨk nas en jeʼm wiñtyipɨk siglo. Weeñi cristianojyaj sɨʼ idyɨk iñɨmyaj iga nuʼkneum jeʼm aktogoyoʼoyi. Y wɨapsɨ iga ipɨktson̈yaj tuum carta iga jeempɨgam in̈matpa idyɨk y weeñiyaj ijɨɨsyaj iga jeʼm apóstol Pablo ijaykunuʼkneʼ. Pero iga dyaʼ ikɨʼpin̈yaj siiga mɨgoʼoyi, weeñi cristianojyaj de Tesalónica ikupɨkyaj y mojtyim in̈madayyaj tun̈gakyaj. Meʼega ijɨɨskupakyaj jempɨk an̈kejayñeyajta, dyaʼ idyɨk mɨgoyayyajta (2 Tes. 2:1-5). Iga odoy eybɨk iñaskayajiñ jeempɨk, jeʼm apóstol Pablo ikutsat jeʼm wɨstenpɨk carta kun yɨʼpyaj an̈matyiyaj: «Ɨch aPablo. Sɨɨp manjáyáypa aŋcɨɨmɨ iga manaŋquímtámpa. Jesɨc quejpa iga ɨch mismo aŋwat yɨ́p to̱to. Yɨɨmpɨgam siempre anjaypa» (2 Tes. 3:17).
15. ¿Tyi tayooxpaʼtpa iga odoy tamɨgoyaytyamtaiñ? An̈maatɨ tuum akwiñkejoʼoyi. (Aʼmɨtyim jeʼm imagenyaj).
15 ¿Tyi tan̈kejaʼyba jempɨk ijaʼyay Pablo jeʼm tesalonicenses? Siiga takunuʼkpa o tan̈kumaton̈ba algun tyi iga dyaʼ miñba Bibliajom, odoy jobity tan̈kupɨguiñ y tan̈wɨpɨguiñ tanjɨɨxi. Pekaʼ en jeʼm Unión Soviética, jeʼm Dios ienemigojyaj, nɨmyaj iga jeʼm central mundial ikutsatneʼ tuum carta juuty nɨmpa iga jeʼm tɨwɨtam wɨap iwatyaj jempɨk jeʼeyaj ixunyajpa idyɨk. Jeʼm tɨwɨtam dyaʼ ikupɨkyaj yɨʼpyaj mɨgoʼoyiyaj, ikutɨʼɨyɨyyaj iga dyaʼ jeempɨk an̈kejayñeyajta idyɨk. Yɨʼp jaama jeʼm tanenemigojyaj ipɨkyajpa jeʼm tecnología iga tamɨgoyayyajtoʼoba. Jeʼyukmɨ iga wɨaiñ tanakuixtya, juchixkej tan̈kɨʼpin̈iñ siiga jempɨk tammayba o tan̈kumaton̈ba iniity tumtyi jɨɨxi kun jempɨk tan̈kuyujkaneʼ Bibliajom (2 Tes. 2:2; 1 Juan 4:1).
Odoy aʼmchiɨʼ iga mimɨgoyaytyaiñ. (Aʼmɨ jeʼm párrafo 15).a
16. Juʼuts nɨmpa Romanos 16:17, 18, ¿tyi tan̈wadyiñ kun jempɨk ijagan̈tsakyajpa jeʼm nuntapɨk an̈kejayoʼoyi?
16 Seguido an̈pɨʼɨtsɨ jempɨk ikupɨkyajpa Jehová. Jeʼ ixunba iga tan̈koosteñaytyaʼmiñ an̈tuumjom, y jeempɨgam wɨap tan̈wat siiga dyaʼ tantsakpa jeʼm nuntapɨk an̈kejayoʼoyi. Jeʼyukmɨ Dios tanɨʼmaʼyba iga odoy tanan̈pɨʼtsyajiñ jempɨk dyaʼ ikupɨkyajpa jeʼm nuntapɨk an̈kejayoʼoyi iga jeʼeyaj tamɨgoyayyajtoʼoba (maayɨʼ Romanos 16:17, 18).
17. ¿Juutypɨk tayooxpaʼtpa siiga dyaʼ tanjagan̈tsakpa jeʼm nuntapɨk an̈kejayoʼoyi?
17 Siiga tan̈wɨkupɨktaʼmpa jeʼm nuntapɨk an̈kejayoʼoyi y dyaʼ tanjagan̈tsakpa, wɨap tawɨitytyaʼm y tanakuixtyamta espiritualmente (Efes. 4:15, 16). Siiga dyaʼ tanaʼmchiʼiba iga jeʼm Wookkɨʼɨwiñ tamɨgoyaytyaʼmiñ, Jehová takuixpa jesɨk nuʼkpa jeʼm mɨjpɨk yaʼachaaji. Duroj tanteguedataʼmiñ jeʼm nuntapɨk an̈kejayoʼoyi y Jehová dyaʼ keman tatsakpa tan̈kutyum (Filip. 4:8, 9).
WAAÑI 122 ¡Mantengámonos firmes, inmovibles!
a JEMPƗK NASPA IXƗʼ EN JEʼM IMAGENYAJ: Akwiñkejoʼoyiyaj. Pekaʼ, en jeʼm Unión Soviética jeʼm tanenemigojyaj ikutsadayyaj tuum carta jeʼm tɨwɨtam keʼnam jesɨk jeʼm central mundial ikutsatneʼ idyɨk iga mɨgoyayyajtatoʼoba. Yɨʼp jaama jeʼm tanenemigoyaj ikuyukmɨ jeʼm internet tamɨgoyayyajtoʼoba iga odoy tan̈kupɨguiñ jeʼm Jehová iorganización.