Jehová ixunba iga tan̈wɨpɨktaʼmiñ tanjɨɨxi

1. ¿Tyi tan̈wattaʼmpa tumtum jaama y tyiʼiga uxan̈ tan̈kaʼ tan̈wat?

TUMTUM jaama tampɨktaʼmpa tanjɨɨxi. Weeñiyaj dyaʼ tan̈kaʼ tampɨk, juʼuts iga tyi tan̈kutkukejtaʼmpa o juchix hora nɨkpa tamon̈ityam y tun̈gakyaj tan̈kaʼ iga tampɨkyajpa. Juʼuts iga juutypɨk tanakuixtyamtaap, juutypɨk tamaymayataʼmpa kun jeʼm tanfamilia o iga tan̈koosteñaytyaʼmpa Dios. Tansuntaʼmpa iga jeʼm tanjɨɨxityam tawɨwadaytyaʼmiñ taɨch, jeʼm tanfamilia y iga ikusuʼnɨʼyiñtyim Jehová (Rom. 12:​1, 2).

2. ¿Tyityam miyooxpaʼtpa iga in̈wɨpɨguiñ iñjɨɨxi?

² Yɨʼp kuyujijom tan̈kɨʼpin̈taʼmpa tukuteen jɨɨxiyaj iga miyooxpaʼtpa in̈wɨpɨk iñjɨɨxi: 1) wɨjodon̈aajɨ ityumpɨy, 2) kɨʼpin̈ɨ tyi ijɨɨspa Jehová y 3) kupin̈ɨ juʼp jɨɨxi impɨkpa. Tan̈kɨʼpin̈taʼmpatyim tyi wɨap tan̈wattaʼm iga jeʼm kutɨʼɨyɨyoʼoyi tayooxpaʼttaʼmiñ tan̈wɨpɨk tanjɨɨxi (Prov. 2:11).

WƗJOODON̈AAJƗ ITYUMPƗY

3. ¿Tyiʼiga nasuntaap iga in̈wɨjoodon̈ain ityumpɨy wiñtyi iga impɨkpa iñjɨɨxi? An̈maatɨ tuum akwiñkejoʼoyi.

³ Iga in̈wɨpɨguiñ iñjɨɨxi wiñtyi wɨjoodon̈aajɨ ityumpɨy. ¿Tyiʼiga? Tan̈kujɨɨxiñ iga algun i pɨɨmi mɨmneaktɨn̈neʼ y nɨkpa iaʼm tuum Doctor, ¿iñɨʼmaʼybasɨ jeʼm Doctor juʼp tsoy wɨɨ iga ipɨguiñ mex iga dyanam ikwaʼkneʼ juʼuts in̈jaam? Dyaʼ jeempɨk iwatpa. Juʼutsyim tuum wɨbɨk Doctor, mich in̈wɨpɨkpa iñjɨɨxi siiga wiñtyi in̈wɨkɨʼpin̈ba ityumpɨy. ¿Juutypɨk wɨap in̈wat?

4. Juʼuts nɨmpa Proverbios 18:​13, ¿juutypɨk wɨap in̈wɨjoodon̈a ityumpɨy? (Aʼmɨtyim jeʼm imagen).

⁴ Siiga mikwagoʼyba miyooxpaʼtpa iga in̈wɨjoodon̈aiñ ityumpɨy. Kujɨɨsɨ iga miñɨʼmaytyaap iga miñɨguiñ tuum reunión social, ¿miñɨkpasɨ siiga dyaʼ in̈wɨixpɨkpa jempɨk iwatpa jeʼm reunión social o dyaʼ iñjoodon̈ tyityam wattaap? Wadaʼayɨ yɨʼpyaj akwagoʼoyiyaj: «¿Juuty y juchix wattaap? ¿Juʼtsan̈yaj nɨkyajpa? ¿I yooxpadoʼyba iga wɨpudyiñ ityumpɨy? ¿Ityam nɨkyajpa? ¿Tyityam wattaap y uktapsɨ alcohol?» Yɨʼpyaj akwagoʼoyiyaj ikutson̈oʼoyi miyooxpaʼtpa iga in̈wɨpɨguiñ iñjɨɨxi (maayɨʼ Proverbios 18:13).a

5. ¿Tyi wɨɨ iga in̈wadyiñ okmɨ iga iñjoodon̈am ityumpɨy?

⁵ Jesɨk in̈wɨjoodon̈am tyityam naspa jeem nakwaʼktaajɨ: «Y ¿siiga nɨkyajpa jempɨk dyaʼ ikupɨkyajpa jeʼm Biblia o uktaap alcohol? ¿Wɨapsɨ iga imalwatyajpa o tan̈kawatyajpa? (1 Ped. 4:3). Y siiga anɨkpa, ¿dyasɨ an̈togoʼyba jeʼm an̈tuʼumaaji o dyamsɨ aputpa jeʼm an̈matkuy?» Iga tan̈wɨkutɨʼɨyɨʼyiñ ityumpɨy tayooxpaʼtpa iga tan̈wɨpɨguiñ tanjɨɨxi. Okmɨ kujɨɨsɨtyim, ¿mich iñjoodon̈am tyi wɨap in̈wat?; pero ¿tyi ijɨɨspa Jehová? (Prov. 2:6).

KƗʼPIN̈Ɨ TYI IJƗƗSPA JEHOVÁ

6. Juʼuts nɨmpa Santiago 1:​5, ¿tyiʼiga tan̈waʼgaʼyiñ Jehová yooxpadoʼoyi?

⁶ Waʼgaʼayɨ Jehová iga miyooxpaʼdyiñ in̈kutɨʼɨyɨy tyi ijɨɨspa. Jeʼ mijɨykamayñeʼ iga michiʼiba joodon̈oʼoyi, «je michiiba jáyaŋ jém wɨbɨc jɨ̱xi» (maayɨʼ Santiago 1:5). Yɨʼp joodon̈oʼoyi miyooxpaʼtpa in̈kutɨʼɨyɨy siiga jeʼm jɨɨxi jempɨk impɨkpa ikusuʼnɨʼyba o dyaʼ.

7. ¿Juutypɨk wɨap iñjoodon̈a jempɨk ijɨɨspa Jehová? An̈maatɨ tuum akwiñkejoʼoyi.

⁷ Okmɨ iga inin̈wejpaʼt Jehová y in̈waʼgay yooxpadoʼoyi aʼmɨ juutypɨk ikutson̈ba. Jɨɨsɨ iga miñɨki tuum an̈eymɨ y mityogoʼyba, wɨapsɨ iga in̈waʼgaʼyba iga miyooxpaʼdyiñ algun i iga ity jeem. Pero dyaʼ miñɨknaspa wiñtyi, inin̈joʼkpa y in̈wɨkumaton̈ba iga miñɨʼɨyɨyaʼyiñ. Jeempɨktyim naspa okmɨ iga in̈waʼgaʼyba Jehová joodon̈oʼoyi. Iga in̈wɨkumaton̈ba jempɨk miñɨʼmaʼyba kuaʼmɨ an̈kiʼmayoʼoyiyaj y jɨɨxian̈chioʼoyiyaj itywɨʼɨp Bibliajom iga miyooxpaʼtpa in̈wɨpɨk iñjɨɨxi. Tanjɨɨxiñ en jeʼm reunión social. Siiga tanɨkpa o dyaʼ, wɨɨ iga tanjɨɨxiñ jempɨk nɨmpa jeʼm Biblia, ¿mojpasɨ iwatta jempɨk Jehova dyaʼ ikusuʼnɨʼyba? ¿Nɨkyajpa jempɨk dyaʼ ikuyooxayajpa Jehová? ¿An̈watpasɨ jempɨk Jehová ikusuʼnɨʼyba y dyaʼ jempɨk ɨch an̈wattoʼoba? (Mat. 6:33; Rom. 13:13; 1 Cor. 15:33).

8. ¿Tyi wɨɨ iga in̈wadyiñ siiga iñxunba iga miyooxpaʼttaiñ in̈kuaʼm información? (Aʼmɨtyim jeʼm imagen).

⁸ Wɨapsɨ iga a veces iñxunba iga miyooxpaʼttaiñ in̈kuaʼm información. Tuum tɨɨwɨ o tuum yoomtɨwɨ iga iniityyaj tuum wɨnanɨgoʼoyi kun Jehová wɨap miyooxpaʼtyaj pero nasuntaptyim iga mich in̈kɨʼpin̈iñ iñyaʼak. Tanaitytyaʼm jaʼyan̈ información juʼuts jeʼm Guía de estudio para los testigos de Jehová y jeʼm libro Textos bíblicos para la vida cristiana. Jɨɨskupakneɨ iga jeʼm jɨɨxi iga impɨkpa ikusuʼnɨʼyiñ Jehová.

9. ¿Juutypɨk wɨap tanjoodon̈ataʼm iga jeʼm jɨɨxi tampɨknewɨʼɨp ikusuʼnɨʼyba Jehová? (Efesios 5:17).

⁹ Juutypɨk wɨap tanjoodon̈a siiga jeʼm jɨɨxi jempɨk tampɨkneʼ ikusuʼnɨʼyba Jehová. Wiñtyi tan̈wɨixpɨktaʼmiñ. Proverbios 9:10 nɨmpa iga «jeʼm ixpɨgoʼoyi iniitywɨʼɨp jeʼm Santísimo jeʼ kutɨʼɨyɨyoʼoyi» yɨʼp nɨmtoʼoba iga siiga tanaitytyoʼoba nuntapɨk kutɨʼɨyɨyoʼoyi wɨɨ iga tañixpɨktaʼmiñ jeʼm Jehova icualidades, jempɨk ijɨɨsneʼ iga iwatpa, jempɨk ikusuʼnɨʼyba y jempɨk ijooyixpa. Nakwaʼktaajɨ: «Iga anjoodon̈am tyi ijɨɨspa Jehová, ¿ikusuʼnɨybasɨ jeʼm jɨɨxi iga ampɨkpa?» (maayɨʼ Efesios 5: 17).

10. ¿Tyiʼiga maaj tanteguedataʼmpa jempɨk nɨmpa jeʼm Biblia y dyaʼ jempɨk ijɨɨsyajpa tanfamilia o jempɨk ityyaj tantɨgan̈jom?

¹⁰ Jesɨk tammaymaywattoʼoba Jehová a veces tanan̈yaʼkwatyajpa tanfamilia o tanamigos. Tankujɨɨxiñ tuum jaatun̈ iga iñɨʼmaʼyba iyommaanɨk iga an̈komɨʼyiñ kun tuum pɨɨxiñ tumiñɨywɨʼɨp mex iga dyaʼ inii tuum wɨnanɨgoʼoyi kun Jehová. Jeʼeyaj dyaʼ ixunyajpa iga iyommaanɨk yaʼachaiñ. Pero, ¿iapaʼap iyooxpaʼtpa iga ipɨɨmchiʼiñ iwɨnanɨgoʼoyi kun Dios? ¿Tyi ijɨɨspa Jehova? Jeʼm kutson̈oʼoyi tampaʼttaʼmpa en Mateo 6:​33, jeem anmajan̈chiʼiyajtaap jeʼm cristianojyaj iga imeʼtsyajiñ «jém wɨ̱tampɨc cosa juuts ixunpa Dios». Mex iga tan̈kupɨktaʼmpa jeʼm tanjaatun̈yaj y tanaidyaytyaʼm respeto jempɨk ityyaj tantɨgan̈jom, jempɨk maaj tanteguedataʼmpa jeʼ iga tammaymaywattaʼmpa Jehová.

KUPIN̈Ɨ JUʼP JƗƗXI IMPƗKPA

11. Juʼuts nɨmpa Filipenses 1:​9, 10 ¿tyi miyooxpaʼtpa iga in̈kupin̈iñ juʼp jɨɨxi impɨkpa?

¹¹ Okmɨ iga in̈kɨʼpin̈ba jempɨk nɨmpa jeʼm Biblia, kupin̈ɨ juʼp jɨɨxi impɨkpa (maayɨʼ Filipenses 1:​9, 10). ¿Juutypɨk wɨap in̈wat? Jeʼm kutɨʼɨyɨyoʼoyi miyooxpaʼtpa iga in̈wɨpɨguiñ iñjɨɨxi. A veces dyaʼ tan̈kaʼ impɨk iñjɨɨxi, pero watykɨy uxan̈ tan̈kaʼ. Jeʼm kutɨʼɨyɨyoʼoyi miyooxpaʼtpa iga in̈wɨpɨguiñ iñjɨɨxi mex iga a veces dyaʼ in̈kutɨʼɨyɨʼyba tyi in̈watpa.

12, 13. ¿Juutypɨk miyooxpaʼtpa jeʼm kutɨʼɨyɨyoʼoyi iga in̈wɨpɨguin iñjɨɨxi jesɨk impɨktson̈ba tuum yooxakuy?

¹² Tanjɨɨxiñ iga sɨʼ in̈kuaʼm tuum yooxakuy iga wɨaiñ immatspak iñfamilia y impaʼtpa wɨsteen yooxakuy. In̈wɨkɨʼpin̈ba ityumpɨy, juʼutspɨk yooxakuy, juʼtsan̈ hora miyooxaap y juʼtspɨy ijuʼumɨ michɨʼyaʼyba. Ikwɨstɨk jeʼm yooxakuy wɨap impɨktson̈, wɨapsɨ iga tuum maaj in̈kusuʼnɨʼyba por tyityam in̈watpa o iga maaj miyojtaap, pero wiñtyi iga impɨkpa iñjɨɨxi wɨɨ iga in̈kɨʼpin̈iñ tun̈gak tyidyin̈kej.

¹³ Nakwaʼktaajɨ: «¿Aaʼmchiʼiba jeʼm yooxakuy iga anɨguiñ jeʼm an̈tuʼumaajiyaj? ¿Aaʼmchiʼiba iga wɨaiñ an̈kuix anfamilia física y espiritualmente?». Yɨʼbam miyooxpaʼtpa iga maaj iñteguedaiñ iga in̈koosteñaʼyba Dios y iñchiʼiñ iñfamilia tyityam ityogoyay. Jeempɨgam in̈wɨpɨkpa iñjɨɨxi y mikumayketpa Jehová.

14. ¿Juutypɨk tayooxpaʼtpa jeʼm kutɨʼɨyɨyoʼoyi y jeʼm toyoʼoyi iga odoy tanakmalwatyajiñ tun̈gakyaj?

¹⁴ Jeʼm kutɨʼɨyɨyoʼoyi miyooxpaʼtpa iga jeʼm jɨɨxi impɨkpaʼap odoy ikmalwadyiñ tun̈gakyaj (Filip. 1:10). Yɨʼp tayooxpaʼtpa iga tan̈wɨpɨguiñ tanjɨɨxi iga juutypɨk tanapuʼktugɨytyaap y juutypɨk takujetspa y ¿tyi wɨap tan̈wat siiga jeʼm tan̈kumunjom o jeʼm tantɨgan̈jom ity algun i iga dyaʼ ikusuʼnɨʼyba juutypɨk tanapuʼktugɨytyaap o juutypɨk takujestpa? Jeʼm kutɨʼɨyɨyoʼoyi tayooxpaʼtpa iga tanakwiñkejaʼyiñ respeto jempɨk sɨʼ ijaam, jeʼm toyoʼoyi tayooxpaʼtpa iga tan̈wɨwadaʼyiñ tun̈gakyaj y tanakwiñkejiñ wɨbɨk jɨɨxi (1 Cor. 10:​23, 24, 32; 1 Tim. 2:​9, 10). Jesɨk tan̈wɨpɨktaʼmpa tanjɨɨxi tanakwiñkejtaʼmpa iga tatoyoytyaʼmpa y tanaidyaytyaʼm respeto tun̈gakyaj.

15. ¿Tyi wɨɨ iga iñjɨɨskupakneiñ wiñtyi iga impɨkpa tuum wɨbɨk jɨɨxi?

¹⁵ Siiga impɨkneum tuum wɨbɨk jɨɨxi, jɨɨsɨ ityumpɨy jempɨk ityogoyay iga wɨaiñ inikkupak. Jesús in̈kej iga tanjɨɨxiñ siiga taktsɨʼyaʼyba jeʼm tumiñ (Luc. 14:28). Jeʼyukmɨ jɨɨsɨ juʼtsan̈ tiempo mininɨgaʼyba o juʼtsan̈ tumiñ ininɨkpa iga wɨaiñ inikkupak jempɨk iñjɨɨsneʼ. Nasuntaptyim iga inimuruiñ iñfamilia iga wɨaiñ miyooxpaʼtyaj, ¿tyiʼiga nasuntaap iga jeempɨk in̈wadyiñ? Yɨʼp miyooxpaʼtpa iga in̈wɨkɨʼpin̈iñ jeʼm jɨɨxi iga impɨktoʼoba o siiga nasuntaap iga in̈wadyiñ weeñi kukakiyaj. Siiga inin̈madaʼyba iñfamilia y in̈wɨkumaton̈ba jempɨk jeʼeyaj miñɨʼmayyajpa maaj miwɨnɨgaʼyba (Prov. 15:22).

PƗƗKƗ WƗTAMPƗK JƗƗXI IGA MIWƗNƗGAʼYIÑ

16. ¿Tyi wɨap in̈wat iga jeʼm jɨɨxi impɨknewɨʼɨp miwɨpudaʼyiñ? (Aʼmɨtyim jeʼm recuadro «Tyi tayooxpaʼtpa iga tan̈wɨpɨguiñ tanjɨɨxi»).

¹⁶ Siiga in̈watpa ityumpɨy jempɨk tan̈kuyujkanetaʼm wɨabam in̈wɨpɨk iñjɨɨxi. Y siiga in̈wɨjoodon̈am ityumpɨy y in̈wɨkɨʼpin̈neum jempɨk nɨmpa jeʼm Biblia, jeʼm jɨɨxi iga impɨkpa ikusuʼnɨʼyba Jehová. Sɨɨ wɨabam in̈waʼgay Jehova iga miyooxpaʼdyiñ iga miwɨnɨgaʼyiñ.

17. ¿Tyi tayooxpaʼtpa iga tan̈wɨpɨguiñ tanjɨɨxi?

¹⁷ Wɨapsɨ iga pekaʼ ityumpɨy jeʼm jɨɨxi iga impɨk miwɨpuday. Pero siiga sɨɨ impɨktoʼoba tun̈gak jɨɨxi, dyaʼ numaaj nasuntaap iga in̈kutɨʼɨyɨʼyiñ ityumpɨy, jempɨk miyooxpaʼtpa jeʼ jeʼm joodon̈oʼoyi tachiʼipaʼap Jehová. Numaaj jeʼam jempɨk wɨap michiʼ jeʼm nuntapɨk ixpɨgoʼoyi y kutɨʼɨyɨyoʼoyi (Prov. 2:​1-5). Jehová miyooxpaʼtpa iga impɨguiñ jeʼm jɨɨxiyaj iga jeʼ ikusuʼnɨʼyba (Sal. 23:​2, 3).