Rongamwahu en Madiu

13 Ni rahnohte, Sises ahpw ketila sang ni ihmwo oh ketidiong ni oaroahro. 2 Oh lapalahn pokon ehu kohpene reh, kahrehda e ketidahng nan pwoht ehu oh ketidiong powe, a pokono pwon kesikesihnen ni oaroahro.+ 3 Ih eri mahsanihong irail soahng tohto ni karasaras,+ mahsanih: “Kilang! Sounkamwarak emen kohieilahng kamwarak.+ 4 Ni eh kamwakamwarak, ekei werentuhke ko pwupwudiong ni keilen ahlo oh menpihr kei kohdo oh kangala.+ 5 Ekei pwupwudiong wasa takain, wasa me pwehlo pedeped oh re mwadangete wosada pwehki pwehlo sohte loal.+ 6 Ahpw ni ketipin eh dakada, re karakarala, oh pwehki kalewarail ko sohte loal, re mengila. 7 Ekei pwupwudiong nanpwungen dihpw tekatek ko oh dihpw tekatek ko keirda oh kasokirailla.+ 8 Ekei pil pwupwudiong nan pwelmwahu, oh re tepida wa, mehkenin pak 100 laudsang mahs, mwokenin pak 60, meteio pak 30.+ 9 Mehmen me mie salenge, a en rong.”+

10 Tohnpadahk ko eri keiong mpe oh patohwanohng: “Dahme kahrehda komw kin ketin doadoahngki karasaras ni omwi kin mahseniong irail?”+ 11 E ketin sapeng irail mahsanih: “E mweimweiong kumwail en wehwehki rir sarawi kan+ en Wehin nanleng, ahpw e sohte mweimweiong irail. 12 Pwe mehmen me ahneki mehkot, kalaudpe pil pahn kohieng oh dahme e ahneki pahn laudla sang mahs; ahpw mehmen me sohte ahneki mehkot, dahme e ahneki pil pahn kohsang.+ 13 Ih kahrepen ei kin koasoiong irail ni karasaras; pwe re kin kilang, ahpw re kin kilikilang mwahl, oh re kin rong ahpw re kin rongorong mwahl, oh pil re sohte wehwehki.+ 14 Oh kokohp en Aiseia pweida rehrail. E mahsanih: ‘Kumwail uhdahn pahn rongorong ahpw sohte douluhl wehwehki, oh kumwail uhdahn pahn kilikilang ahpw sohte douluhl kilang.+ 15 Pwe mohngiong en aramas pwukat keptakailahr, oh re rongki salengarail ahpw sohte mwekid, oh re meirpene, pwe re dehpa kilangki masarail oh rongki salengarail oh wehwehki sang mohngiongirail oh wekidekiong ie pwe I en kamwahwihirailla.’+

16 “Ahpw, meid peren masamwail kan pwehki ar kin kilang oh salengamwail kan pwehki ar kin rong.+ 17 Pwe I ndaiong kumwail ni mehlel, soukohp oh aramas pwung tohto kin inengieng kilang soahng kan me kumwail kin kilikilang ahpw re sohte kilang,+ oh kin inengieng rong soahng kan me kumwail kin rongorong ahpw re sohte rong.

18 “Eri, kumwail rong kawehwehn karasaras en ohl me kamwarak werentuhke ko.+ 19 Mehmen me kin rong mahsen en Wehio ahpw sohte wehwehki, me suwedo+ kin kohdo oh adihasang me kamweremwerdiong nan eh mohngiong; ih met me pwupwudiong ni keilen ahlo.+ 20 A me pwupwudiong nan wasa takain, iei ih me kin rong mahseno oh mwadangete perenkihda.+ 21 Ahpw mahseno sohte kin tengedi reh oh kin mihmi ahnsou kis, oh mwurin kahpwal de kalokolok eh kin pwarada pwehki mahseno, e kin mwadangete dipekelekel. 22 A me kamweremwerdiong nanpwungen dihpw tekatek ko, iei ih me kin rong mahseno, ahpw kapwunod en koasoandi en mwehi wet*+ oh manaman widing en dipwisou kan kin kasokehla mahseno, me kahrehda e sohte kin wa.+ 23 A me kin pwupwudiong nan pwelmwahu iei ih me kin rong mahseno oh wehwehki, ih me uhdahn kin wa, mehkenin kin wiahda pak 100 laudsang mahs, mwokenin pak 60, oh meteio pak 30.”+

24 E ketikihda pil apwoat karasaras ong irail, mahsanih: “Wehin nanleng rasehng ohl emen me kin kamwarak werentuhke mwahu nan eh mwaht. 25 Nindoken aramas ar memeir, eh imwintihtio kohdo oh kamwarak dihpw suwed nanpwungen wihd ko oh kohkohla. 26 Ni war mwahu ko ar wosada oh wa ko tepida pwerla, dihpw suwed ko ahpw pil pwarada. 27 Ahn soumas en ihmwo ladu ko ahpw kohla reh oh idek: ‘Maing, komw sou kamwarak werentuhke mwahu nan omw mwahto? Eri, ia duwen dihpw suwed eh miehla nan mwahto?’ 28 E ahpw ndaiong irail, ‘Ohl emen, imwintihti men, me wiahda met.’+ Ladu ko ahpw idek reh, ‘Eri, komw kupwurki sen kohla oh usadahsang?’ 29 E nda, ‘Soh, pwe kumwail de pil usadahsang wihd ko ni amwail usada dihpw suwed ko. 30 Kumwail mweidohng ira koaros en keirda lao lel ahnsoun rahk, oh ni ahnsoun rahk, I pahn ndaiong soundolung kan: Usadahsang mahs dihpw suwed ko oh pirepene ni kapakap kei pwe en isihsla; kumwail ahpw kihpene wihd ko oh kihong nan ei imwen nahk.’”+

31 E ketikihong irail pil apwoat karasaras oh mahsanih: “Wehin nanleng rasehng kisin werentuhke tikitik kis* me ohl emen ale oh padokedi nan eh mwaht.+ 32 Ni mehlel, ih me keieu tikitik nanpwungen werentuhke koaros, ahpw ni eh kin keirda, e kin wiahla me keieu laud nanpwungen tuhkehn poad* koaros, oh e kin wiahla tuhke pwoat, eri menpihr en pahnlahng kan kin pihrdo oh diar wasahn kommoal ni rah kan.”

33 E ketin padahkihong irail pil apwoat karasaras, mahsanih: “Wehin nanleng rasehng ihs me lih emen ale oh doaloahkihda lapalahn pilawa ehu,* pilawao pwon ahpw mpwosada.”+

34 Mepwukat koaros Sises ketin mahsanihong pokono ni karasaras. Ni mehlel, ihte ni karasaras me e pahn kin ketin mahseniong irail,+ 35 pwe en ketin kapwaiada dahme soukohpo nda: “I pahn kin koasoi ni karasaras; I pahn lohkiseli soahng rir kan sang mahsie.”*+

36 Mwurin eh ketin mweidala pokono en kohkohla, e ketilong nan ihmwo. Sapwellime tohnpadahk ko ahpw keiong mpe oh patohwan: “Komw kawehwehiong kiht karasaras en dihpw suwed ko nan mwahto.” 37 Ih eri ketin sapeng mahsanih: “Sounkamwarak war mwahwo iei Nein-aramas; 38 mwahto iei sampah.+ A war mwahwo iei serien Wehio, ahpw dihpw suwed ko iei nein me suwedo,+ 39 oh imwintihti me kamwereiraildio iei Tepil. Ahnsoun rahk iei imwin koasoandi en mwehi* wet, oh soundolung kan iei tohnleng kan. 40 Ihme kahrehda, duwehte dihpw suwed ko ar kohpene oh isihsla, ih pil pahn duwen imwin koasoandi en mwehi* wet.+ 41 Nein-aramas pahn poaronepeseng sapwellime tohnleng kan oh re pahn kihsang mehkoaros me kin kahrehda dipekelekel oh aramas me kin wia me suwed nan sapwellime Wehi, 42 oh re pahn keseiraillahng nan wasahn kisiniei mwehl.+ Ih wasa me re pahn sengiseng oh ngihrail kan tehtehrek. 43 Ni ahnsowo, me pwung kan pahn lingalingla duwehte ketipin+ nan Wehin Samarail. Mehmen me mie salenge, a en rong.

44 “Wehin nanleng rasehng dipwisou kesempwal ehu me ekiekla nan mwaht ehu. Ohl emen ahpw diarada oh ekihla; oh pwehki eh peren, e kohla oh netikihla mehkoaros me e ahneki oh pwainda mwahto.+

45 “Wehin nanleng pil rasehng sounnetinet men me kin seiloakseli oh raparapahki perl kaselel kan. 46 Ni eh diarada perl me kesempwahlie, e ahpw kohla oh mwadangete netikihla mehkoaros me e ahneki oh pwainda.+

47 “Wehin nanleng pil rasehng uhk pwoat me kin sehkpeseng nansed oh koledi soangen mwahmw koaros. 48 Ni eh diralahr, soused kan ahpw kin wurahdekidahng ni oaroahro, re ahpw kin mwohndi oh pilehng me mwahu ko+ nan mehn deudeu kei, a me sakanakan ko+ re kin kesehla. 49 Eri ih duwen me pahn wiawi ni imwin koasoandi en mwehi* wet. Tohnleng kan pahn kohla oh katohrehsang me suwed kan rehn me pwung kan 50 oh pahn kesepwekeiraillahng nan wasahn kisiniei mwehl. Ih wasa me re pahn sengiseng oh ngihrail kan tehtehrek.

51 “Kumwail wehwehki mepwukat koaros?” Irail ahpw patohwanohng: “Ei.” 52 Ih eri mahsanihong irail: “Ma ih duwen men, eri sounpadahk koaros me kin sukuhlki duwen Wehin nanleng kin rasehng ohl emen, me iei soumas en ihmwo me kin kapwarehda soahng kapw oh mering kan sang nan eh imwen nahk.”*

53 Ni ahnsou me Sises ketin kaimwisekala karasaras pwukat, e ahpw ketin mweselsang wasao. 54 Mwurin eh ketilahng uhdakeo,+ e ketin tepida padahk nan arail sinakoke, aramas ako eri pwuriamweikihla oh nda: “Ia wasa ohl menet alehsang ie erpit wet oh kehl en wia manaman pwukat?+ 55 Kaidehn nein kapinteo pwutako met?+ Kaidehn ine Mery oh rie kan Seims oh Sosep oh Saimon oh Sudas?+ 56 A rie lih ko, irail koaros sou kin mihmi rehtail? Eri, ia wasa e alehsang ie soahng pwukat koaros?”+ 57 Eri, re tepida dipekelekelki.+ Ahpw Sises mahsanihong irail: “Soukohp men kin waunla wasa koaros, likin uhdakeo oh rehn tohnimwe kan.”+ 58 Ih eri sohte ketin wiahda manaman tohto wasao, pwehki ar seupwoson.