Keieun Kronikel

15 Oh Depit usehlahte kauwada tehnpese kan nan Kahnimw en Depit, oh e kaunopada wasa ehu ong Kohpwahn inou lap en Koht mehlelo oh kauwada impwal ehu ong met.+ 2 Ni ahnsowo, Depit eri nda: “Sohte emen me pahn wa Kohpwahn inou lap en Koht mehlelo ihte mehn Lipai kan, pwe Siohwa ketin pilirailda ren wa Kohpwahn inou lap en Siohwa oh papah ih ahnsou koaros.”+ 3 Depit eri kapokonepene Israel pwon nan Serusalem pwe ren wahdahdo Kohpwahn inou lap en Siohwa wasa me e kaunopadahro.+

4 Depit eri kapokonepene kadaudok en Aaron kan+ oh mehn Lipai kan:+ 5 sang mehn Kohad kan, Uriel me kaun oh rie kan meh 120; 6 sang mehn Merari kan, Asaia+ me kaun oh rie kan meh 220; 7 sang mehn Kersom kan, Soel+ me kaun oh rie kan meh 130; 8 sang kadaudok en Elisapan+ kan, Semaia me kaun oh rie kan meh 200; 9 sang kadaudok en Ipron kan, Eliel me kaun oh rie kan meh 80; 10 sang kadaudok en Ussiel+ kan, Aminadap me kaun oh rie kan meh 112. 11 Oh pil Depit ekerodo samworo Sadok+ oh Apaiadar+ oh mehn Lipai kei, Uriel, Asaia, Soel, Semaia, Eliel oh Aminadap, 12 e ahpw ndaiong irail: “Kumwail kaunen peneinei en mehn Lipai kan. Kumwail kasarawihkumwailla, kumwail oh riamwail kan, oh wahdo Kohpwahn inou lap en Siohwa, Koht en Israel wasa me I kaunopadahro. 13 Pwehki kumwail sohte wa Kohpwahn inou lapo nin tapio,+ Siohwa atail Koht ketin engiengdahr pahtail,+ pwehki kitail sohte rapahki wiepe pwung en wa Kohpwahn inou lapo.”+ 14 Samworo kan oh mehn Lipai kan ahpw kasarawihala pein irail pwe ren wahdahdo Kohpwahn inou lap en Siohwa, Koht en Israel.

15 Mehn Lipai ko eri wa Kohpwahn inou lap en Koht mehlelo ni ar kapaikada tuhkehn wisik ko,+ duwehte me Moses kehkehlingki sang ni mahsen en Siohwa. 16 Depit eri ndaiong kaunen mehn Lipai kan ren idihada riarail sounkoul kan pwe ren koul ni peren, iangahki mehn keseng kan: keseng sahl kan, arp kan+ oh simpal kan.*+

17 Mehn Lipai kan eri idihada sang nan ar keinek, Eman+ nein Soel, Asap+ nein Perekaia oh Edan+ nein Kusaia sang nan peneinei en Merari. 18 Oh pil mie pwihn keriau en kisehrail kan.+ Iei Sekaraia, Pen, Saahsiel, Semiramod, Seheiel, Unni, Eliap, Penaia, Maaseaia, Mattidaia, Elipelehu oh Mikneaia oh silepen ewen kehl ko Oped-edom oh Seiel. 19 Sounkoul Eman,+ Asap+ oh Edan me kesengki simpal*+ prons kan; 20 oh Sekaraia, Aasiel, Semiramod, Seheiel, Unni, Eliap, Maaseaia oh Penaia me kesengki keseng sahl ko ni ngilen Alamod;*+ 21 oh Mattidaia,+ Elipelehu, Mikneaia, Oped-edom, Seiel oh Asasaia me kesengki arp ko ni ngilen Seminid,*+ oh wia sounpihtih keseng kan. 22 Kenanaia+ kaunen mehn Lipai ko me apwalih wisik en kohpwao, pwe ih me samanih, 23 oh Perekaia oh Elkana silepen ewen kehl kan, me kin doadoahk limwahn Kohpwahn inou lapo. 24 Samworo Sepanaiah, Sosapat, Nedanel, Amasai, Sekaraia, Penaia oh Elieser me peuk sowi ko ni ngihl laud mwohn Kohpwahn inou lap en Koht mehlelo,+ oh Oped-edom oh Sehia me pil kin papah nin duwen silepen ewen kehl, me kin sile Kohpwahn inou lapo.

25 Depit oh ohl mah kan en Israel oh kaunen meh kid kan eri iang kohla pwe ren wahsang kohpwahn inou lap en Siohwa ni imwen Oped-edom+ ni peren.+ 26 Pwehki Koht mehlelo ketin sewese mehn Lipai kan me weuwa kohpwahn inou lap en Siohwa, re ahpw meirongkihla koupwul wol isimen oh sihpw wol isimen.+ 27 Depit likawih likou reirei kaselel me sohte peh, pil duwehte mehn Lipai ko koaros me weuwa Kohpwahn inou lapo, sounkoul kan oh Kenanaia kaunen wisik kohpwao oh sounkoul kan; Depit pil likawih ihpod linen ehu.+ 28 Mehn Israel kan koaros weuwadahla kohpwahn inou lap en Siohwa ni ar weriwerki ar peren,+ iangahki ngilen mehn pepeuk,* sowi kan,+ simpal kan,* oh kesekesengki ni ngihl laud keseng sahl kan oh arp kan.+

29 Ahpw ni kohpwahn inou lap en Siohwa eh lella nan kahnimw en Depit,+ nein Sohl serepein Maikal+ ahpw usuwerieila ni wenihmwtoko oh kilangada Nanmwarki Depit eh lusulusseli oh wiewia kasarawi wet; e ahpw tepida mwamwahlkihla Depit nan eh mohngiong.+