KAPAHIEUN PWUHK
(Melkahka kan 90-106)
En Moses kapakap, ohlen Koht mehlelo.+
90 Maing Siohwa, komwi me at wasahn kousoan+ erein dih kan koaros.
2 Mwohn nahna kan ar ipwidi
De mwohn omwi ketin wiahda sampah oh sahpw pwelmwahu,+
Komwi Koht poatopoat emen.+
3 Komw kin ketin kapwurelahng aramas ni pwelpar;
Komw kin ketin mahsanih: “Kumwail aramas akan, kumwail pwurala.”+
4 Pwe mwohn silangomwi, sounpar kid duwehte aio me nekier,+
Duwehte awa kei nipwong.
5 Komw kin ketin koahkoahsang irail;+ re rasehng ouraman ehu;
Re rasehng dihpw me wosada nimenseng.+
6 Nimenseng e kin masalpeseng oh kekeirda,
Ahpw nin soutik e kin mengila.+
7 Pwe omwi engieng me kin kamwomwkitala+
Oh omwi engieng mwuledek kin kamasak kiht.
8 Komw kin ketikihdi at sapwung kan mwohn silangomwi;+
Komw kak ketin mahsanih ni sansal soahng rir kan me se kin wia.+
9 At rahn akan kin sosohrala pwehki sapwellimomwi engieng kowahlap;
Oh at sounpar kan kin imwisekla rasehng mwenginingin ehu.
10 Uwen reirei en at mour iei sounpar 70,
Ma emen uhdahn kehlail e pahn lel 80.+
Ahpw at mour kin diren kahpwal oh pahtou;
E kin mwadang sohrala oh se sohla mie.+
11 Ihs me kak wehwehki kehl en omwi engieng?
Sapwellimomwi engieng kowahlap kin laud duwehte lemmwin me kin konehng komwi.+
12 Komw ketin padahkihong kiht duwen at pahn wadek at rahn akan+
Pwe sen kak alehdi mohngiong erpit.
13 Maing Siohwa, komw ketin sapahldo!+ Ia erein met eh pahn wiawi?+
Komw ketin poakehla sapwellimomwi ladu kan.+
14 Komw ketin kadirehkinkitala sapwellimomwi limpoak loalopwoat+ nimenseng,
Pwe sen kak weriwerki peren oh pereperen+ erein at mour.
15 Komw ketin kahrehiong kiht sen pereperen duwehte uwen rahn akan me komw ketin kalokei kiht,+
Duwehte uwen tohtohn sounpar akan me se lokolongkier.+
16 Sapwellimomwi ladu kan en kilang omwi wiewia kan,
Oh neirail seri kan en kilang omwi lingan.+
17 Kupwuramwahu en at Koht Siohwa en ieiang kiht,
Komw ketin kapaiahda doadoahk en peht kat.
Ei, komw ketin kapaiahda doadoahk en peht kat.+