Esekiel
5 “A kowe, nein-aramas, ale ehu kedlahs keng pwe ken doadoahngki nin duwen nein sounseisei men reise. Sihpihsang pitenmoangomw kan oh omw alis kan, oh kowe eri ale mehn tenek kan pwehn teneki oh nehkpeseng pitenmoang kan ni mwutumwut siluh. 2 Ke pahn isikala silikis ehun met nan kahnimwo ni rahn en kapilpene kahnimwo eh imwisekla.+ Mwuri ke pahn ale pil silikis ehu oh pelehki met kedlahs kapil kahnimwo,*+ oh pil silikis ehu ke pahn kamwerepeseng nan kisinieng, oh I pahn usada kedlahs pwoat pwehn pwakihekin irail.+
3 “Ke pil pahn ale ekei pitenmoang pwukat oh kidimpene mepwukat nan omw likowen. 4 Oh pil ale ekei sang mepwukat oh keselahng nan kisinieio oh isikala. Sang met kisiniei ehu pahn kohpeseng nan wehin Israel pwon.+
5 “Iet me Kaun Wasa Lapalahpie Siohwa ketin mahsanih: ‘Serusalem met. I kihdiong ih nanwerengen wehi kan, sahpw kan me kapilpene ih. 6 Ahpw e uhwongada ei kosonned kan oh ei koasoandi kan, oh e kin wiewia soahng suwed kan laudsang wehi kan oh sahpw kan me kapilpene ih.+ Pwe irail kesehla ei kosonned kan, oh irail sohte keid nan ei koasoandi kan.’
7 “Kahrehda iet me Kaun Wasa Lapalahpie Siohwa ketin mahsanih: ‘Pwehki kumwail kahrehda kahpwal tohto laudsang wehi kan me kapilkumwailpene oh kumwail sohte keid nan ei koasoandi kan de kapwaiada ei kosonned kan, ahpw kumwail idawehn kosonned en wehi kan me kapilkumwailpene,+ 8 iet me Kaun Wasa Lapalahpie Siohwa ketin mahsanih: “Kahnimw, I kin uhwong uhk,+ oh pein ngehi me pahn kadeikuhkada mwohn mesen wehi kan.+ 9 I pahn wiahiong uhk dahme I saikinte douluhl wia mahso, oh soahng kan me I sohte pahn pwurehng wia, pwehki omw wiewia kasaut kan koaros.+
10 “‘“Eri pahpa nohno kan me mi rehmw pahn kangala neirail seri kan,+ oh seri kan pahn kangala arail pahpa nohno kan, oh I pahn kadeikuhkada oh kamwarakpeseng irail me luhwehdi rehmw wasa koaros.”’*+
11 “Kaun Wasa Lapalahpie Siohwa ketin mahsanih: ‘Kahrehda nin duwen ei ieias, pwehki ei wasa sarawio me ke kasaminehkihla omw dikedik kasaut kan koaros oh omw wiewia kasaut kan koaros,+ I pil pahn soikuhkala;* I sohte pahn poakeiukala,* oh I sohte pahn nsenohkin uhk.+ 12 Silikis ehun aramas akan pahn mehkihla soumwahu lusulus de sohrasang rehmw sang ni lehk lapalap. Pil silikis ehu pahn mehkihla kedlahs nan wasa kan me kapiluhkpene.+ Oh I pahn kamwarakpeseng pil ehu silikis wasa koaros,* oh I pahn usada kedlahs pwoat pwehn pwakihekin irail.+ 13 Eri ei engieng ahpw pahn imwisekla, oh ei engieng pahrail pahn meleileidi, oh I pahn nsenamwahula.+ Oh irail pahn anahne ese me ngehi, Siohwa, ketin mahsenier sang ni ei kupwurki irail en poadidiong ie kelehpw,+ ni ei kaimwisekala ei kadarohng irail ei engieng.
14 “‘I pahn wiahkinuhkala wasa tehn ehu oh mehkot kanamenek ehu nan wehi kan me kapiluhkpene oh mwohn mesen koaros me kin keidido limwahmw.+ 15 Ke pahn wiahla mehkot kanamenek ehu oh mwamwahlla.+ Ke pahn wiahla mehn kataman ehu oh mehkot kamasepwehk ehu ong wehi kan me kapiluhkpene, ni ahnsou me I pahn kadeingkinuhkada ei engieng kowahlap oh kalokolok mwuledek. Ngehi, Siohwa me ketin mahmahsen.
16 “‘I pahn kadarohng tohn omw wasa lehk lapalap me pahn dokeiraildi rasehng arep kan. Arep kan me I pahn kadarewei pahn kamwomwkumwailla.+ I pahn wiahiong lehk lapalapo en apwal ong kumwail ni ei pahn kauhdi mwenge me kin kohda* ong kumwail.+ 17 I pahn kadarohng kumwail lehk lapalap oh mahn lawalo keper kan,+ oh re pahn kemehla noumw seri kan. Soumwahu lusulus oh kakerehdi nta pahn kipeiukedi, oh I pahn wahdo kedlahs pwoat me pahn uhwong uhk.+ Ngehi Siohwa me ketin mahmahsen.’”