Esekiel
43 Ih eri kahreielahng ni ewen kehl me sallahng palimese.+ 2 Wasao I kilangada lingan en Koht en Israel eh kohkohdo sang palimese,+ oh kapitie duwehte ngilen ngirisek en pihl;+ oh sampah marainkihla sapwellime lingan.+ 3 Dahme I kilangada duwehte kaudiahl me I kilangehr ni ei* kohdohn kamwomwala kahnimwo* oh met mwomwen duwehte dahme I kilangehro limwahn pillap Kihpar;+ oh I poaridiong nanpwelo.
4 Lingan en Siohwa ahpw kohlongala nan tehnpas sarawio* sang nan ewen kehl me sallahng palimese.+ 5 Ngehn sarawi* eri pwekiehda oh waiehla nan wasa me kelpene masloaleo, oh I kilangada me tehnpas sarawio direkilahr lingan en Siohwa.+ 6 Ngehi eri rongada emen me koasoakoasoiong ie sang nan tehnpas sarawio oh ohlo ahpw kohdo oh kesihnenda limwahi.+ 7 E* ndaiong ie:
“Nein-aramas, ih wasaht me mwoalei kin mi ie+ oh wasa me I kin kihdi patehn nehi kat,+ wasa me I pahn kousoan nanpwungen aramas en Israel kan kohkohlahte.+ Aramas en Israel kan sohla pahn kasaminehla mwarei sarawi,+ irail oh arail nanmwarki kan, sang ni ar kin kaudokiong* koht teikan oh sang ni paliwar mehla en ar nanmwarki kan.* 8 Irail kihdi wasahn pedolong en arail imwen kaudoko limwahn wasahn pedolong en ei tehnpas sarawio oh ar uhren wenihmw limwahn ei uhren wenihmw, oh ihte dihd ehu me ireikitpeseng.+ Ni ahl wet re kasaminehla mwarei sarawi sang ni soahng kasaut kan me re wiahda, eri I kamwomwirailla sang ei engieng.+ 9 Eri met irail en tokedihsang ar kin kaudokiong* koht teikan oh kihsang* paliwar mehla en ar nanmwarki kan sang rehi, oh I pahn kousoan nanpwungarail kohkohlahte.+
10 “A kowe, nein-aramas, kawehwehiong aramas en Israel kan duwen tehnpas sarawio,+ pwe ren namenekla pwehki ar sapwung kan+ oh re pahn sukuhlki duwen pilahn en tehnpas sarawio. 11 Ma re namenengkihda mehkoaros me re wiadahr, ke pahn wiahiong irail en ese pilahn en tehnpas sarawio, koasoandi kan, wasahn pedoi oh pedolong kan.+ Kasalehiong irail pilahn oh koasoandi kan koaros en tehnpas sarawio, pilahn oh kosonned kan en tehnpas sarawio oh ntingihedi mepwukat mwohn masarail kan, pwe ren peikiong pilahn kan koaros oh kapwaiada koasoandi kan.+ 12 Ih kosonned en tehnpas sarawio met. Wasa koaros me kapilpene kadoken nahnao me keieu sarawi.+ Kilang! Ih kosonned en tehnpas sarawio met.
13 “Iet uwen laud en pei sarawio ni sosohng en kiupid+ (ehuehu kiupid sosohng en peh ehu kapatapatohng).* Poahsoanen pei sarawio ilehki kiupid ehu, oh tehlapki kiupid ehu. Mie wasa ehu me ilehda me pidakihpene ni keileo pwon me tehlapki span ehu.* Ih poahsoanen pei sarawio met. 14 Sang ni poahsoan me mi pohn tahto lel ni keilen pasapas me tikitik iei kiupid riau oh e tehlapki kiupid ehu. Sang ni keilen pasapas me tikitiko lel ni keilen pasapas me laudo iei kiupid pahieu, oh tehlapki kiupid ehu. 15 Keieu powe, wasahn isihs en pei sarawio ilehki kiupid pahieu oh kod pahieu uhdahsang ni wasahn isihs en pei sarawio.+ 16 Wasahn isihs en pei sarawio keimw pahieu, oh e reireiki kiupid 12 oh tehlapki kiupid 12.+ 17 Keimw pahieu en keilen pasapas laudo reireiki kupid 14 oh tehlapki kiupid 14; oh wasa me ilehda me kapilpene keileo ilehki elep en kiupid, oh poahsoano tehlapki kiupid ehu ni pali koaros.
“Oh kehndake ko sallahng palimese.”
18 Ih eri ndaiong ie, “Nein-aramas, iet me Kaun Wasa Lapalahpie Siohwa ketin mahsanih: ‘Iet kaweid kan me ke anahne idawehn ni ahnsou me pei sarawio wiawihda, pwe meirong me pwonte isihsla en kak meirongala oh nta en kak usupiong powe.’+
19 “Kaun Wasa Lapalahpie Siohwa ketin mahsanih, ‘Ke pahn kihong samworo mehn Lipai kan, kadaudok en Sadok+ kan me kin kohdo pwehn papah ie emen koupwul wol sang pelin kou kan nin duwen meirong en dihp.+ 20 ‘Ke pahn ale ekis ntahn kouwolo oh kihdiong pohn kod pahieu en pei sarawio, pohn keimw pahieu me mi ni keilen pasapaso, oh pohn wasa me ilehda ni keileo pwon, pwehn kamwakelehda pei sarawio sang dihp oh wiahda tomw ong met.+ 21 Mwuri, ale koupwul wolo, meirong en dihpo, pwehn isikala met nan wasa me kileldi ni tehnpas sarawio, likin wasa sarawio.+ 22 Ni keriaun rahn ke pahn meirongkihla kuht wol men me roson mwahu nin duwen meirong en dihp; oh re pahn kamwakele pei sarawio sang dihp duwehte ar kamwakelehda pei sarawio sang dihp ni ar doadoahngki ntahn koupwul wolo.’
23 “‘Ni omw kaimwisekala omw kamwakelehda met sang dihp, ke pahn meirongki emen koupwul wol me roson mwahu sang pelin kou kan oh emen sihpw wol me roson mwahu sang pelin sihpw kan. 24 Ke pahn wadohng Siohwa mepwukat, oh samworo kan pahn kamwarak soahl pohn mepwukat+ oh meirongkihong Siohwa mepwukat nin duwen meirong isihs ehu me pwonte isihsla. 25 Erein rahn isuh ke pahn meirongki kuht wol men nin duwen meirong en dihp ehuehu rahn,+ oh pil koupwul wol men sang pelin kou kan oh sihpw wol men sang pelin sihpw kan; ke pahn meirongki mahn akan me sohte sapwung kis rehrail.* 26 Erein rahn isuh re pahn wiahda tomw ong pei sarawio, oh re pahn kamwakelehda pei sarawio oh kaunopadahng doadoahk. 27 Ni ahnsou me rahn ako imwisekla, ni kawaluhn rahn+ oh mwurin mwo, samworo kan pahn meirongki amwail* meirong isihs me pwonte isihsla oh meirong en kaminimin kan pohn pei sarawio; oh I ahpw pahn kupwurperenkin kumwail,’+ Kaun Wasa Lapalahpie Siohwa me ketin mahmahsen.”