KERIAUN SAMUEL

1 Mwurin Sohl eh mehla, ni Depit eh pwurodo sang eh kalowehdi* mehn Amalek ko, Depit mihmi Siklak+ erein rahn riau. 2 Ni rahn kesiluhwo, ohl emen leledo sang nan kahnimpwal en Sohl, me eh likou teipeseng oh pwehl mi pohn moange. Ni eh kohla rehn Depit, e ahpw pwupwudiong nanpwelo oh poaridi.

3 Depit ahpw idek reh: “Ke kohsang ia?” E sapengki: “I tangasang nan kahnimpwal en Israel.” 4 Depit eri idek reh: “Dahme wiawi? Menlau ndahdo.” E ahpw sapengki: “Aramas ako tangasangehr mahweno oh me tohto pwupwudi oh mehla. Sohl oh nah pwutak Sonadan pil iang mehla.”+ 5 Depit eri idek rehn mwahnakapw me wadohng ih rohngo: “Ia duwen omw ese me Sohl oh nah pwutak Sonadan melahr?” 6 Mwahnakapwo sapengki: “I sasairki ei lelehr Nahna Kilpoa,+ a iet Sohl wie utuhtungki pein ih nah ketieuwo, oh kuruma ko oh soundak oahs ko kerendohr reh.+ 7 Ni eh sohpeido oh kilangiehda, e eker ie, I ahpw sapengki, ‘Iet ngehi, maing!’ 8 E idek rehi, ‘Ihs kowe?’ I sapengki, ‘Ngehi mehn Amalek men.’+ 9 E ahpw nda, ‘Keido mahs oh kemeiehla, pwe I mi nan weirek laud, ahpw momourte.’ 10 Ngehi eri keila mpe oh kemehla ih,+ pwe I ese me e sohte kak pitila mwurin e ohlahr oh pwupwudier. Ngehi eri ale nihn* me mi pohn moangeo oh luwou me mi ni peho, I ahpw wahdo rehn ei kaun.”

11 Depit eri kidahng peh ko ni eh likou ko oh tehrpeseng, oh ohl ako koaros reh pil iang wia met. 12 Re ahpw mwahiei oh sengiseng oh kaisihsol+ lao lel nin soutik ong Sohl, ong nah pwutak Sonadan, ong sapwellimen Siohwa aramas akan, oh ong wehin Israel,+ pwehki ar mehkihla kedlahs.

13 Depit ahpw idek rehn mwahnakapw me wadohng ih rohngo: “Mehnia men kowe?” E nda: “Ngehi nein mehn Amalek men, mehn liki men.” 14 Depit eri ndaiong ih: “Dahme kahrehda ke sohte masak en kauwada pehmwen pwehn kemehla sapwellimen Siohwa me keidio?”+ 15 Depit eri ekerodo emen mwahnakapw ko oh ndaiong: “Keido oh kemehla ih.” Manakapwo eri kemehla ih.+ 16 Depit ndaiong ih: “Kowe me pein pwukoahki omw mehla,* pwehki pein ewomwen me kedipaiukada ni omw nda, ‘Pein ngehi me kemehla sapwellimen Siohwa keidio.’”+

17 Depit eri koulki koulen kedepwidepw pwoatet* en Sohl oh nah pwutako Sonadan+ 18 oh nda me aramas en Suda kan en esehla koulen kedepwidepw me adaneki “Kesik Ketieu,” me ntingdier nan pwuhken Sasar:+

19 “Omw lingan Israel, kamakamalahr oh wonohn pohn omw wasa ile kan.+

Ia uwen laud pwupwudi en me kehlail kan!

25 Ia uwen laud pwupwudi en me kehlail kan nan mahwen!

Sonadan kamakamalahr oh wonohn pohn omw wasa ile kan!+

Omw limpoak ong ie kaselel sang limpoak en lih.+

2 Mwuri Depit kalelapak rehn Siohwa,+ patohwan: “I en patohdahla nan ehu kahnimw en Suda kan?” Siohwa eri ketin mahsanihong Depit: “Kohdahla.” Depit ahpw kalelapak: “Ia wasa I en kohla ie?” E ketin sapeng: “Ipron.”+ 2 Depit eri kohdahla wasao iangahki eh pwoud riemeno, Ahinoam+ mehn Sesreel oh Apikail,+ liohdi me pwoudiki Napal mehn Karmel mahso. 3 Depit pil kahrehda nah ohl me iangih ko,+ emenemente wahda tohnimwe oh re kousoanla nan Ipron oh kahnimw kan me kapilpene wasao. 4 Eri ohlen Suda kan ahpw kohdo, oh irail eri keiehdi Depit nin duwen nanmwarkien wehin Suda wasao.+

Irail ahpw ndaiong Depit: “Ohlen Sapes-kilead kan me sarepedi Sohl.” 5 Depit eri kadarala meninkeder kei rehn ohlen Sapes-kilead kan oh ndaiong irail: “Siohwa en ketin kapaiakumwailda, pwehki amwail kasalehda limpoak loalopwoat ong amwail kaun Sohl ni amwail sarepedi ih.+ 6 Siohwa en ketin kasalehiong kumwail limpoak loalopwoat oh lelepek. I pahn pil kasalehiong kumwail kadek pwehki amwail wia met.+ 7 Kumwail kehlail oh kommwad, pwe amwail kaun Sohl melahr, oh wehin Suda keieiehdier nin duwen nanmwarki pohrail.”

8 Ahpw Apner+ nein Ner, nein Sohl kaunen karis en sounpeio ale nein Sohl pwutak Isposed+ oh kotehla pillapo kolahng Mahanaim+ 9 oh wiahkihla ih nanmwarkien Kilead,+ mehn Aser kan, Sesreel,+ Epraim,+ Pensamin, oh Israel pwon. 10 Isposed nein Sohl pwutak, sounpar 40 ni ahnsou me e wiahla nanmwarkien Israel, oh e wie kakaunki sounpar riau. Ahpw wehin Suda kin utung Depit.+ 11 Ahnsou* me Depit wia nanmwarki nan Ipron pohn wehin Suda reireiki sounpar isuh oh sounpwong weneu.+

12 Kedekedeo Apner nein Ner oh ladu kan en Isposed nein Sohl ahpw mweselsang Mahanaim+ oh kohla Kipeon.+ 13 Sohap+ nein Seruaia+ oh nein Depit ladu ko pil kohieila oh tuhwong irail ni lepin leh en Kipeon; oh ehu pwihn mwomwohd apali leho a pwihn teio mwohd apali. 14 Apner ahpw ndaiong Sohap: “Mweidohng mwahnakapw kan ren uhda oh siai en peipene mwohta.” Sohap ahpw sapengki: “Ahn ren uhda.” 15 Eri irail uhda oh kotehla leho, meh 12 sang rehn Pensamin oh nein Sohl pwutak Isposed oh 12 sang rehn nein Depit ladu ko. 16 Irail koledi moangen emenemen oh doakoahki ni pengepengen me re uhwong ko kedlahs, irail koaros ahpw pwupwudi. Eri wasao me mi nan Kipeon kin adaneki Elkad-asurim.

17 Pei me wiawi rahno uhdahn uk, oh Apner oh nah ohlen Israel ko ahpw lohdi pahn nein Depit ladu ko. 18 Eri nein Seruaia pwutak silimeno+ mi mwo—Sohap,+ Apisai,+ oh Asahel;+ oh Asahel kin tang marahra duwehte kasel men nan mohs. 19 Asahel pwakih Apner oh e sohte wetla palimaun de palimeing ni eh pwakipwakih Apner. 20 Ni Apner eh kilengla mwuri, e idek, “Asahel, kowe men?” E ahpw sapengki, “Ei, ngehi met.” 21 Apner eri ndaiong ih: “Wetla ni palimaun de ni palimeing oh koledi emen mwahnakapw ko, oh ale ahmw dahme ke kihsang reh.” Ahpw Asahel sohte men uhdihsang pwakipwakih ih. 22 Eri Apner pil pwurehng ndaiong Asahel: “Ke dehr pwakih ie. Dahme I en pil kemehkinuhkala? Ia mwomwen ei pahn kak kilang mesen riomwo Sohap?” 23 Ahpw Asahel kahng uhdi, Apner eri doakoahki keimwen nah ketieuwo kapehdeo,+ oh ketieuwo pwerla nan tihnseweo; oh Asahel eri pwupwudihte mehla wasao. Koaros me kin kohla wasa me Asahel pwupwudi oh mehlao kin ekis uhdi wasao.

24 Sohap oh Apisai eri pwakih Apner. Ni ketipino eh kihrla, irail ahpw lella ni dohl en Amma, me sallahng Kia ni ahl me kolahng sapwtehn en Kipeon. 25 Oh mehn Pensamin kan pokonpene mwurin Apner oh wiahda pwihn ehu oh kesikesihnen pohn dohl ehu. 26 Apner ahpw likwerlahng Sohap: “Ia uwen werei kitail pahn pepeiki kedlahs? Ke sohte ese me imwilahn met pahn uhdahn kansensuwedte? Eri ia uwen werei mwohn omw pahn ndaiong aramas akan en tokedihsang ar pwakipwakih riarail kan?” 27 Sohap ahpw nda: “Duwehte Koht mehlelo eh ketin ieias, ma ke sohte lokaia, eri aramas pwukat pahn pwakipwakih riarail kan lao lel nimenseng.” 28 Sohap eri peuk mehn pepeuko* oh nah ohl ako ahpw uhdihsang ar pwakipwakih Israel, oh peio ahpw tokedi.

29 Apner oh nah ohl ako ahpw karis kotehla Arapa+ pwohngo pwon oh kotehla Sordan oh karis kotehla wahwo pwon,* re ahpw lella Mahanaim.+ 30 Mwurin Sohap eh pwurasang pwakipwakih Apner, e kihpene aramas ko koaros. Nan nein Depit ladu ko meh 19 me sohte mie, oh pil Asahel. 31 Ahpw nein Depit ladu ko kalowedier mehn Pensamin ko oh nein Apner ohl ako, oh neirail ohl 360 mehla. 32 Irail ale Asahel+ oh sarepedi ih nan en eh pahpa sousowo, me mi nan Pedleem.+ Eri Sohap oh nah ohl ako karis kohla pwongo pwon, irail eri lel Ipron+ ni eh rahnpeseng.

3 Mahwen nanpwungen peneinei en Sohl oh peneinei en Depit doudoulahte; oh Depit wie kekehlailla,+ ahpw peneinei en Sohl wie luhluwetala.+

2 Erein ahnsowo, pwutak kei ipwidiong Depit nan Ipron.+ Nah mesenih iei Amnon+ me ipwisang rehn Ahinoam+ mehn Sesreel. 3 Nah me keriemeno iei Kileap me ipwisang rehn Apikail+ liohdi me pwoudiki Napal mehn Karmel mahso; oh me kesilimeno iei Apsalom+ nein Maaka, nein Talmai+ nanmwarkien Kesur nah serepein. 4 Me kapahmeno iei Adonaisa+ nein Akkid, me kelimmeno iei Sepataia nein Apital. 5 Me kewenemeno iei Idream me ipwisang rehn en Depit pwoud Ekla. Irail pwukat me ipwidiong Depit nan Ipron.

6 Nindoken mahweno eh doudoulahte nanpwungen peneinei en Sohl oh peneinei en Depit, Apner+ kalakalaudehla eh manaman nanpwungen peneinei en Sohl. 7 Eri mie en Sohl eh pekehi men me ede Rispa,+ nein Aiah serepein. Mwuhr Isposed+ ahpw ndaiong Apner: “Dahme kahrehda ke wendi rehn en ei papaho eh pekehio?”+ 8 Apner uhdahn lingeringerkihda en Isposed koasoio oh nda: “Ngehi kidi men* sang Suda? Leledo rahnwet, I kin kasalehiong peneinei en omw pahpa Sohl, rie kan oh kompoakepah kan limpoak loalopwoat, oh I sohte panguhkalahng nan pehn Depit; ahpw rahnwet ke kedipahkin ie sapwung ehu me pid lih emen. 9 Koht en ketin kaloke Apner oh wia laudsang met ma I sohte wiahiong Depit nin duwen me Siohwa ketin kahukihong ih:+ 10 en ketikihsang wehio nan peneinei en Sohl oh ketin kauwada mwoalen Depit pohn Israel oh Suda, sang Dan lel Peersipa.”+ 11 E sohte kak sapengki Apner ehu lokaia, pwehki e masak.+

12 Apner mwadangete kadaralahng Depit meninkeder kei oh nda: “Ihs me sapweniki sahpwet?” E pil doula oh nda: “Komw wiahiong ie ehu inou lapen, oh I pahn wia soahng sohte lipilipil me I kak wia pwe I en wekidohng Israel pwon en iangala omwi pali.”+ 13 Depit ahpw sapengki: “Mwahu! I pahn wiahiong uhk ehu inou lap. Ihte I pahn peki rehmw ken dehr song en kilang meseie lao ke wahdo mahs Maikal+ nein Sohl serepein, ni ahnsou me ke pahn kohdo tuhwong ie.” 14 Depit eri kadaralahng rehn Isposed+ nein Sohl meninkeder kei oh nda: “Kidohng ie Maikal ei pwouden, me I alehkihda kilin imwin nein mehn Pilisdia kan dipwisoun kaparapar 100 pwe en wiahla ei pwoud.”+ 15 Isposed eri ilekla pwe Maikal en wisiksang rehn eh pwoud Paltiel+ nein Lais. 16 Ahpw, eh pwoudo Paltiel iang ih alialu kohla, wie sengiseng ni eh ideidawehn ih lao lel Pahurim.+ Apner eri ndaiong Paltiel: “Pwurala!” Ih eri pwurala.

17 Erein ahnsowo, Apner ileklahng rehn ohl mah kan en Israel, nda: “Ahnsou reirei kumwail men Depit en wiahla amwail nanmwarki. 18 Nna kumwail mwekid, pwehki Siohwa ketin mahsanihong Depit: ‘Sang ni pehn ei ladu Depit,+ I pahn doarehla Israel nei aramas akan sang nan pehn mehn Pilisdia kan oh sang nan pehn arail imwintihti kan koaros.’” 19 Apner eri koasoiong mehn Pensamin kan.+ Apner pil kohla Ipron oh kelehpwla rehn Depit pwe en ndaiong ih dahme Israel oh kadaudok en Pensamin pwon pwungkidahr.

20 Ni Apner eh lella rehn Depit nan Ipron iangahki ohl 20 ko, Depit ahpw wiahiong Apner oh ohl ako me iangih kamadipw ehu. 21 Apner eri ndaiong Depit: “Komw mweidohng ie I en patohla oh kaminiminihpene Israel pwon ong ei kaun nanmwarki, pwe ren wiahda ehu inou lap rehmwi, oh komw pahn wiahla nanmwarkien koarosuhsie me komw kupwurki.” Depit eri kadarala Apner, e ahpw kohkohla ni popohl.

22 Mwurinte mwo, nein Depit ladu ko oh Sohap pwurodohsang ar mahwen, oh wahdo kiden dipwisou lohdi kan. Apner solahr mi rehn Depit nan Ipron, pwe e kadaralahr ih ni popohl. 23 Ni Sohap+ oh karis en sounpei ko koaros me iang ih ar leledo, mie me ndaiong Sohap met: “Apner+ nein Ner+ kohdo rehn nanmwarkio, oh e kadaralahr ih, oh e kohkohla ni popohl.” 24 Eri Sohap ahpw kohla rehn nanmwarkio oh nda: “Dahme komw wiadahr? Apner patohdo rehmwi wasaht. Dahme kahrehda komw kadarala ih pwe en kak pitila? 25 Komw mwahngih duwen Apner nein Ner! E patohdo wasaht pwe en pitihkomwihdi oh kilang omwi mwekid kan koaros pwehn esehda soahng koaros me komw kin ketin wia.”

26 Sohap eri kohkohsang rehn Depit oh e kadarala meninkeder kei rehn Apner, re ahpw kapwurehdo ih sang ni pwoaren nahk pihl en Siraho; ahpw Depit sohte ese duwen met. 27 Ni Apner eh pwurala Ipron,+ Sohap ahpw kahrehla loaleo ni ewen kehlo pwehn kelehpwkihla oh koasoiong ih. Ahpw, e uhd doakoahdi kapehdeo wasao, ih eri mehla;+ e wia met pwehki eh kemehla* rieo Asahel.+ 28 Mwuhr ni Depit eh rongada duwen met, e nda: “Ngehi oh ei wehi pahn mwakelekel kohkohlahte mwohn silangin Siohwa sang pwukoahkihdi dipen kamalahn+ Apner nein Ner. 29 Met en uhd kohdiong pohn Sohap+ oh peneinei en eh pahpao pwon. En kin mie ohl emen sang nan en Sohap peneinei me pahn ahneki soumwahu en dipwisoun kaparapar+ de emen me tokutok+ de ohl emen me kin doadoahngki tuhkehn dereht tikitik* de emen me mehkihla kedlahs de emen me sohte pahn kin mie kene mwenge!”+ 30 Eri Sohap oh rie Apisai+ kemehla Apner+ pwehki eh kemehla riara Asahel nan mahwen+ nan Kipeon.

31 Depit eri ndaiong Sohap oh aramas koaros me iang ih: “Kumwail tehrpeseng amwail likou kan oh pwuhriong nan likoun nsensuwed* oh mwahieiki Apner.” Pein nanmwarki Depit alu mwurin mehn wisik en me mehlao. 32 Re sarepedi Apner nan Ipron; oh nanmwarkio sengiseng laud ni ahn Apner sousowo, oh aramas ko koaros tepida sengiseng. 33 Nanmwarkio ahpw koulki koulen kedepwidepw wet ong Apner oh nda:

“Dahme Apner mehkihla duwehte aramas salamalam men?

Ke pwupwudi duwehte emen me kin pwupwudi mwohn loallap suwed kan.”*+

Pwehki met aramas ako koaros ahpw pwurehng sengisengki ih.

35 Mwurin mwo aramas ako koaros ahpw kohla rehn Depit pwehn kihong ih pilawa en kansenamwahwih* ni eh wie rarahnte, ahpw Depit kahukihla: “Koht en ketin kaloke ie oh pil wia laudsang ma I tungoale pilawa de mehkot sohte lipilipil mwohn ketipino pahn kihrla!”+ 36 Aramas ako koaros ahpw esehda met oh re perenkihda. Aramas ako koaros perenkihda met duwehte ar perenkihda soahng koaros me nanmwarkio kin wia. 37 Eri rahno, aramas koaros oh Israel pwon eseier me nanmwarkio sohte pwukoahki kamakamalahn Apner nein Ner.+ 38 Eri nanmwarkio ndaiong nah ladu ko: “Kumwail sohte ese me kaun oh ohl lapalap men melahr rahnwet nan Israel?+ 39 Rahnwet I luwet mehnda ma I keidi nin duwen nanmwarki men,+ oh ohl pwukat, nein Seruaia,+ me nohn lemei ong ie.+ Siohwa en ketin dupukohng sounwia me suwed dahme konehng pein eh suwed.”+

4 Ni ahnsou me nein Sohl pwutak Isposed*+ rongada me Apner mehla nan Ipron,+ e masepwehkada oh Israel pwon uhdahn pwunodkihda. 2 Mie ohl riemen me kin kaunda pwihnen aramas loallap kei me nein Sohl pwutako naineki: emen ira adaneki Paanah oh meteio Rekap. Ira nein Rimmon mehn Peerod me kohsang keinek en Pensamin. (Pwe mahs Peerod+ kin pil wadawadohng kisehn keinek en Pensamin. 3 Mehn Peerod kan tangala Kittaim,+ oh irail wiahla mehn liki kei wasao leledo rahnwet.)

4 Eri, nein Sohl pwutak Sonadan+ naineki pwutak emen me sohte kak aluhki mwahu neh ko koaros.*+ E sounpar limau ahnsou me rohng duwen Sohl oh Sonadan leledo sang Sesreel,+ oh me kin apwahpwaliho pwekadahte ih oh tangahki, ahpw ni eh masepwehkada tangatangala, serio pwupwudi oh sohla kak aluhki mwahu neh ko. Ede Mepiposed.+

5 Nein Rimmon mehn Peerod pwutak ko, Rekap oh Paanah, kohla ni imwen Isposedo ni ahnsou me rahno uhdahn karakar, ni eh wie komkommoal en souwas. 6 Ira pedolong nan ihmwo mwomwehda me ira pahn ale wihd, oh ira doakoahdi kapehdeo; Rekap oh rie pwutak Paanah+ eri tang. 7 Ni ara pedolong nan ihmwo, Isposed wie wonohn pohn eh pehto nan eh perehn meiro, ira eri doakoahdi oh kemehla, mwuri ira pelehsang moangeo. Ira eri wahda moangeo oh alialu pwohngo pwon nan ahl me kolahng Arapa. 8 Oh ira wahla moangen Isposedo+ rehn Depit nan Ipron oh ira ndaiong nanmwarkio: “Iet moangen Isposed nein Sohl, omw imwintihti+ me song en kemeikomwihla.+ Rahnwet Siohwa ketikihong ei kaun nanmwarki en ikih Sohl oh kadaudoke kan.”

9 Ahpw, Depit sapengala Rekap oh rie Paanah nein Rimmon mehn Peerodo, oh ndaiong ira: “Nin duwen Siohwa eh ketin ieias, me ketin doareiehla nan ei kahpwal kan koaros,+ 10 ni lahp emen eh pakairkihong ie, ‘Sohl melahr,’+ oh e wiahki me e wadohng ie rohng mwahu ehu, I koledi oh kemehla+ nan Siklak. Met iei keting en meninkeder me e ale sang ie! 11 Ia uwen eh pahn laudsang ni ohl suwed kan ar kemehla ohl pwung emen nan pein imwe pohn eh peht! I sou pahn kapwukoahkin kumwa ntahn ohl menet+ oh koahkoa kumwa sang sampah?” 12 Depit eri ruwese mwahnakapw ko ren kemehla ira.+ Irail pelehsang pehra ko oh nehra ko oh langahda ira+ ni lepin leho nan Ipron. Ahpw re ale moangen Isposedo oh sarepedi wasa me Apner seridi ie nan Ipron.

5 Kedekedeo, keinek en Israel koaros ahpw kohdo rehn Depit nan Ipron+ oh nda: “Kilang! Kiht iei kisehn tihmw kan oh udukomw.*+ 2 Mahso ni ahnsou me Sohl wia atail nanmwarki, komwi me kin kahluwa Israel nan eh mahwen kan.*+ Oh Siohwa ketin mahsanihong komwi: ‘Kowe me pahn apwalih nei aramas en Israel kan, oh kowe me pahn kaunda Israel.’”+ 3 Eri ohl mah en Israel koaros ahpw kohdo rehn nanmwarkio nan Ipron, oh Nanmwarki Depit wiahda inou lap ehu rehrail+ nan Ipron mwohn silangin Siohwa. Irail eri keiehdi Depit nin duwen nanmwarkien Israel.+

4 Depit sounpar 30 ni eh wiahla nanmwarki, oh e kakaun erein sounpar 40.+ 5 Nan Ipron e kakaunki Suda sounpar 7 oh sounpwong 6, oh nan Serusalem+ e kakaunki Israel pwon oh Suda erein sounpar 33. 6 Nanmwarkio oh nah ohl ako ahpw kolahng Serusalem pwehn mahweniong mehn Sepus kan+ me wie koukousoan nan sahpwo. Re kin kepitki Depit, nda: “Ke sohte pahn kak kohdo wasaht! Lella me maskun oh me dangepel kan pahn kasareiukala.” Irail kin medemedewe, ‘Depit sohte mwahn pahn kohdo wasaht.’+ 7 Ahpw, Depit kalowehdi wasahn ruk kehlail en Saion, me ahnsou wet wialahr Kahnimw en Depit.+ 8 Eri rahno Depit ahpw nda: “Irail me mahweniong mehn Sepus kan anahne keid nan pwoaren paip en pihlo pwehn kemehla koaros ‘me dangepel oh me maskun kan,’ me kin kailongki Depit!” Ihme kahrehda re kin nda: “Me maskun oh me dangepel kan sohte pahn pedolong nan ihmwo.” 9 Depit eri kousoanla nan wasahn ruk kehlailo, oh wasao adanekihla* Kahnimw en Depit; oh Depit ahpw tepida kauwada dihd kan oh ihmw teikan pohn Dohlo*+ oh pil wasa teikan nan kahnimwo.+ 10 Depit eri kin wie kekehlailla,+ oh Siohwa, Koht en kaunen karis en sounpei, kin ketin ieiang ih.+

11 Nanmwarki Airam+ en Dair ahpw kadarala meninkeder kei rehn Depit, oh pil tuhke sidar,+ deiksang kan, oh sounwia takai ong kokoudahn dihd kan, oh re tepida kauwada tehnpas ehu ong Depit.+ 12 Oh Depit ese me Siohwa ketin katengehdi ih teng nin duwen nanmwarkien Israel+ oh kasapwiladahr eh wehi+ pwehki sapwellime aramas en Israel kan.+

13 Depit katohtohwehla eh pekehi+ oh eh pwoud kan nan Serusalem mwurin eh kohdohsang Ipron, oh pil nein Depit pwutak oh serepein kan me ipwidiong ih pil tohtohla.+ 14 Iet eden irail kan me ipwidiong ih nan Serusalem: Samua, Sohpap, Nadan,+ Solomon,+ 15 Ipar, Elisua, Nepek, Sapia, 16 Elisama, Eliada, oh Elipelet.

17 Ni mehn Pilisdia kan ar rongada me Depit keidier nin duwen nanmwarkien Israel,+ mehn Pilisdia kan koaros eri kohdahdo rapahki Depit.+ Ni Depit eh rongada duwen met, e ahpw kohdihla ni wasahn ruk kehlailo.+ 18 Eri mehn Pilisdia ko ahpw kohdo oh kohpeseng nan Wahun* Repaim.+ 19 Depit eri kalelapek rehn Siohwa,+ patohwan: “I en patohdahla rehn mehn Pilisdia ko? Komw pahn ketikihong irail nan pehiet?” Siohwa eri ketin mahsanihong Depit: “Kohdahla, pwe I uhdahn pahn kihong mehn Pilisdia kan nan pehmwen.”+ 20 Depit eri kohla Paal-perasim, oh Depit kaloweiraildi wasao. Depit eri nda: “Siohwa ketin kauwehla ei imwintihti kan+ mwohi rasehng dihd ehu me pihl kamwerehdi.” Ihme kahrehda e kahdaneki wasao Paal-perasim.*+ 21 Mehn Pilisdia ko kesehdi neirail dikedik kan wasao, oh Depit oh nah ohl ako eri wahsang.

22 Mwuhr mehn Pilisdia kan pil pwurehng pwurodo oh kohpeseng nan Wahun* Repaim.+ 23 Depit eri kalelapek rehn Siohwa, ahpw E ketin mahsanih: “Ke dehr inendahla rehrail, ahpw pidekla mwurirail oh mahweniong irail mwohn tuhke peika kan. 24 Oh ni omw pahn rongada ngilen karis kohkohwei pohn tuhke peika ko, eri mwekid ni soh pweiek, pwe Siohwa pahn ketin tiengla mwohmw pwe en ketin kemehla karis en sounpei en mehn Pilisdia kan.” 25 Depit eri kapwaiada soahng koaros me Siohwa ketin ruwesehki ih, oh e kemehla mehn Pilisdia ko+ sang Kepa+ kohlahtehieu lel Keser.+

6 Depit eri pwurehng kihpene pwihn en sounpei koaros me keieu koahiek nan Israel, ohl 30,000. 2 Eri Depit oh ohl koaros me iang ih ahpw mwesel kohla Paale-suda pwe ren wahdahdo sang wasao Kohpwahn inou lap en Koht mehlelo,+ me aramas ako kin likweriong mwaren Siohwa kaunen karis en sounpei mwowe,+ me kin ketiket nan mwoale pohnangin* kerup ko.+ 3 Ahpw, re kihdiong Kohpwahn inou lap en Koht mehlelo pohn kuruma kapw ehu+ pwe ren wahsang ni imwen Apinadap,+ me mi pohn dohlo; oh nein Apinadap pwutak ko Ussah oh Ahio me kakahluwa kuruma kapwo.

4 Irail eri wahda sang ni imwen Apinadap me mi pohn dohlo, Kohpwahn inou lap en Koht mehlelo, oh Ahio me alu mwohn Kohpwao. 5 Depit oh mehn Israel ko koaros wiewia kasarawi mwohn silangin Siohwa ni ar doadoahngki soangsoangen mehn keseng koaros me wiawihkihda tuhke suniper, arp, keseng sahl teikan,+ dampwurin,+ simpal,*+ oh mehn keseng teikan. 6 Ahpw ni ar lellahng ni wasahn kihsang kilin krein* nan Nakon, Ussah ahpw poaralahng Kohpwahn inou lap en Koht mehlelo oh koledi,+ pwe kou ko kereniong kesehdi. 7 Siohwa eri ketin engiengda pahn Ussah, oh Koht mehlelo ketin kemehla ih+ wasao pwehki eh sohte wauneki sapwellimen Koht kosonned,+ oh e mehla wasao limwahn Kohpwahn inou lap en Koht mehlelo. 8 Ahpw Depit lingeringerda* pwehki Siohwa eh ketin engiengda pahn Ussah; oh wasao adanekihla Peres-ussa* leledo rahnwet. 9 Depit eri masakada Siohwa+ rahno oh nda: “Ia duwen Kohpwahn inou lap en Siohwa eh kak leledo rehi?”+ 10 Depit sohte men wahla Kohpwahn inou lap en Siohwa wasa me e kin mihmi ie nan kahnimw en Depit.+ Ahpw Depit uhd koasoanehdi en wisikla ni imwen Oped-edom,+ mehn Kahd.

11 Kohpwahn inou lap en Siohwa mihmi ni imwen Oped-edom mehn Kahd erein sounpwong siluh, oh Siohwa kin ketin kapaia Oped-edom oh tohnimweo pwon.+ 12 Pakair ahpw wiawihong Nanmwarki Depit: “Siohwa ketin kapaiadahr imwen Oped-edom oh mehkoaros me e ahneki pwehki Kohpwahn inou lap en Koht mehlelo.” Depit eri kohkohla ni peren+ pwehn wahsang Kohpwahn inou lap en Koht mehlelo ni imwen Oped-edom oh wahla nan kahnimw en Depit. 13 Ni ahnsou me irail me weuwa Kohpwahn+ inou lap en Siohwa wiadahr kahk weneu, Depit ahpw meirongkihla kouwol men oh mahn mworourou men.

14 Depit kahkahlekseli mwohn silangin Siohwa ni uwen eh kehl koaros; ahnsowo Depit likawih ihpod linen ehu.+ 15 Depit oh mehn Israel ko koaros weuwadahla Kohpwahn inou lap+ en Siohwa ni ar weriwerki ar peren+ iangahki ngilen mehn pepeuk.*+ 16 Ahpw ni Kohpwahn inou lap en Siohwa eh lella nan kahnimw en Depit, nein Sohl serepein Maikal+ ahpw usuwerieila ni wenihmwtoko oh kilangada Nanmwarki Depit eh lusulus oh kahkahlekseli mwohn silangin Siohwa; e ahpw tepida mwamwahlkihla Depit nan eh mohngiong.+ 17 Irail eri wahdo Kohpwahn inou lap en Siohwa oh pwilikihdi nan dewe nan impwal me Depit kauwadahro.+ Depit eri wiahda meirong isihs+ oh meirong en kaminimin+ mwohn silangin Siohwa.+ 18 Ni Depit eh kanekehla meirong isihs oh meirong en kaminimin ko, e ahpw kapaiahda aramas ako ni mwaren Siohwa kaunen karis en sounpei. 19 Ih eri nehkohng aramas ako koaros, ong mehn Israel ko pwon, ong emenemen ohl oh lih, ehu pilawa me mwomwen rihng, ehu keik deid,* oh ehu keik reisin. Aramas ako koaros ahpw kohkohla, emenemen ong ni imwe.

20 Ni Depit eh pwuralahng kapaiahda tohnimweo, nein Sohl serepein Maikal+ ahpw kohieila pwehn tuhwong ih. E ahpw nda: “Ia uwen nanmwarkien Israel eh kalinganahda pein ih ni eh kapwuhrasang eh likou mwohn mesen serepein lidu en nah sounpapah kan, duwehte ohl me sohte audepen moange eh kapwuhrasang eh likou!”+ 21 Depit eri ndalahng Maikal: “I wiewia kasarawi mwohn silangin Siohwa, me ketin piliehda, a kaidehn omw pahpa oh tohnimweo pwon, oh me ketin idihiehda nin duwen kaunen sapwellimen Siohwa aramas akan, Israel.+ Ihme kahrehda, I pahn kasarawi mwohn silangin Siohwa oh kawauwih, 22 oh I pahn pil aktikitikla laudsang met oh pil wiahkihla pein ngehi sohte mehkot. Ahpw I pahn linganla rehn serepein lidu ko me ke ndindahn.” 23 Eri nein Sohl serepein Maikal+ sohte naineki seri lao lel rahn me e mehla.

7 Ni ahnsou me nanmwarkio soandier nan pein tehnpese+ oh Siohwa ketin kakommoalehdi ih sang eh imwintihti kan koaros me kapilpene, 2 nanmwarkio eri ndaiong soukohp Nadan:+ “I kin koukousoan nan ihmw me wiawihkihda sidar,+ a Kohpwahn inou lap en Koht mehlelo kin mi nan ihmw likou ehu.”+ 3 Nadan ahpw sapengki nanmwarkio: “Kohwei oh wia dahme mi nan omw mohngiong pwe Siohwa kin ketin ieiang uhk.”+

4 Pwohngohte, Siohwa ketin mahsanihong Nadan: 5 “Kohwei oh ndaiong ei ladu Depit, ‘Iet me Siohwa ketin mahsanihen: “Ke anahne kauwada ehu tehnpas ong ie pwe I en kousoan loale?+ 6 Pwe I sohte kin kousoan nan tehnpas ehu sangete rahn me I kahluwahdo aramas en Israel kan sang Isip lel rahnwet,+ ahpw I kin seiseiloakseli* nan impwal ehu oh nan impwal sarawi ehu.+ 7 Erein ahnsowo pwon me I kin ieiang mehn Israel kan* koaros, mie pak me I ndahla mehkot ong kaunen keinek en Israel kan me I idihadahr ren apwalih nei aramas en Israel kan, oh nda: ‘Dahme kumwail sohte kauwekidahng ie ehu tehnpas me wiawihkihda sidar?’” 8 Eri ndaiong ei ladu Depit met, ‘Iet me Siohwa kaunen karis en sounpei ketin mahsanih: “I ketikihsang uhk nan mohs akan, sang omw kin apwahpwalih pelinmen kan,+ pwe ken wiahla kaunen nei aramas en Israel kan.+ 9 Oh I pahn ieiang uhk wasa koaros me ke pahn kohla ie,+ oh I pahn kasohrehsang* omw imwintihti kan koaros mwohmw,+ oh I pahn kahrehiong edomwen en lapalapala+ duwehte eden aramas lapalap kan en sampah. 10 I pahn pilada ehu wasa ong nei aramas en Israel kan oh koasoaneiraildi, oh re pahn kousoanla mwo oh sohla me pahn lidere irail; oh aramas suwed kan sohla pahn pwurehng kaloke irail duwehte me re kin wia mahso,+ 11 sang ni rahn me I idihada sounkopwung kan+ ong nei aramas en Israel kan. Oh I pahn kihong uhk meleilei ni ei pahn irehsang uhk omw imwintihti kan koaros.+

“‘“Oh Siohwa pil ketin mahsanihonguhkehr me Siohwa pahn ketin wiahiong omw peneinei en wiahla peneinei en nanmwarki ehu.+ 12 Ni omw rahn akan eh pahn imwisekla+ oh ke pahn kommoaldi rehn semomw mehn mahs ako, I ahpw pahn kihda kadaudokomw men me pahn kohdo mwurimw, pein noumw pwutak, oh I pahn kauwada oh katengehdi eh wehi.+ 13 Ih me pahn kauwada tehnpas ehu ong mwareiet,+ oh I pahn kauwada teng mwoalen eh wehio kohkohlahte.+ 14 I pahn wiahla seme oh e pahn wiahla nei pwutak.+ Ni eh pahn wiahda sapwung, I pahn kapwungala ih, oh I pahn panawiheki wowoki nin duwen me aramas* kin wia.+ 15 Ei limpoak loalopwoat sohte pahn pehdsang reh duwehte ei kihsangehr rehn Sohl,+ me I sikenlahsang mwohmw. 16 Omw peneinei oh omw wehi pahn tengeteng mwohmw kohkohlahte; mwoalomwi pahn kokouda teng kohkohlahte.”’”+

17 Nadan eri ndaiong Depit mahsen pwukat koaros oh kasansal wet pwon.+

18 Nanmwarki Depit eri patohla oh patohdi mwohn silangin Siohwa oh patohwan: “Ihs ngehi, Maing Kaun Wasa Lapalahpie Siohwa? Oh dahkot ei peneinei me komw ketin wiahkihong ie mepwukat koaros?+ 19 Mwomwen me met sohte itar, Maing Kaun Wasa Lapalahpie Siohwa, komwi pil ketin mahsanih duwen kadaudok en omwi laduet lellahng ni ahnsou reirei ehu me kohkohdo; oh met iei kaweid* ong aramas koaros, Maing Kaun Wasa Lapalahpie Siohwa. 20 Dahme omwi laduet Depit pil kak patohwanohng komwi, ni omwi uhdahn mwahngih ie,+ Maing Kaun Wasa Lapalahpie Siohwa? 21 Pwehki omwi mahsen oh nin duwen kupwuromwien,* komw ketin wiadahr soahng kapwuriamwei pwukat koaros oh ketin kasalehiongehr omwi laduet.+ 22 Ihme kahrehda komwi uhdahn lapalap,+ Maing Kaun Wasa Lapalahpie Siohwa. Sohte emen me duwehte komwi,+ oh sohte Koht emen likin komwi;+ soahng koaros me se rongkiher salengat ka kadehdedahr met. 23 Oh mehnia wehi nin sampah me duwehte sapwellimomwi aramas en Israel kan?+ Koht ketila oh ketin kasaledekirailla* nin duwen sapwellime aramas,+ oh ketin kahrehiong mware en ndandla+ sang ni eh ketin wiahda soahng kan me manaman oh inenen kapwuriamwei ong irail.+ Komw ketin pwakihasang wehi kan oh arail koht kan pwehki sapwellimomwi aramas akan me komw ketin kasaledekala* ong komwi sang Isip. 24 Komw ketin koasoanedier mehn Israel kan nin duwen sapwellimomwi aramas kohkohlahte;+ oh komwi, Maing Siohwa, ketin wialahr arail Koht.+

25 “Eri, Maing Siohwa Koht, komw ketin kapwaiada inou me komw ketin wiadahr me pid sapwellimomwi laduet oh kadaudoke kohkohlahte, oh komwi en ketin wia duwehte me komw ketin inoukidahr.+ 26 Mwaromwi en lapalapala kohkohlahte,+ pwe aramas akan en patohwan, ‘Siohwa kaunen karis en sounpei iei Koht en Israel,’ oh kadaudok en sapwellimomwi ladu Depit en kokouda teng kohkohlahte mwohn silangomwi.+ 27 Komwi, Siohwa kaunen karis en sounpei, Koht en Israel, ketin kasalehiongehr sapwellimomwi laduet ni omwi ketin mahsanih, ‘I pahn wiahiong omw peneinei en wiahla peneinei en nanmwarki.’+ Ihme kahrehda sapwellimomwi laduet eh eimah* en wia kapakap wet ong komwi. 28 Eri met, Maing Kaun Wasa Lapalahpie Siohwa, komwi me Koht mehlel,+ oh sapwellimomwi mahsen iei me mehlel, oh komw ketin inoukihongehr sapwellimomwi ladu soahng mwahu pwukat. 29 Eri, komw kupwurkalahngan oh ketin kapaiahda kadaudok en sapwellimomwi laduet, oh en mihmi kohkohlahte mwohn silangomwi;+ pwe komwi, Maing Kaun Wasa Lapalahpie Siohwa, ketin inoukidahr, oh sapwellimomwi kapai en kin ieiang kadaudok en sapwellimomwi laduet kohkohlahte.”+

8 Ahnsou ehu mwuhr, Depit kalowehdi+ douluhl mehn Pilisdia kan,+ oh Depit kihsang nan pehn mehn Pilisdia kan Medek-amma.

2 E kalowehdi mehn Mohap kan+ oh kauneiraildiong nanpwel oh sohngkiniraildi sahl pwoat. E sohngkiniraildi uwen reirei en sahl riapwoat ong me pahn kamakamala, a uwen reirei en sahl apwoat ong me pahn momour.+ Oh mehn Mohap kan wiahla nein Depit ladu oh kin wadohng ih kisakis kan.+

3 Depit kalowehdi Adadeser nein Rehop, nanmwarkien Sohpa+ ni eh kohkolahng pwurehng ale eh manaman ni Pillap Iupreitis.+ 4 Depit kalowehdi soundak oahs 1,700 oh sounpei alu 20,000. Depit eri kauwehla nehn oahs en kuruma koaros likin meh 100.+

5 Ni ahnsou me mehn Siria kan sang Damaskus+ kohla pwe ren sewese Nanmwarki Adadeser en Sohpa, Depit ahpw kemehla mehn Siria 22,000.+ 6 Depit eri koasoanehdi pwihn en sounpei kan nan Damaskus en Siria, oh mehn Siria kan wiahla nein Depit ladu oh kin wadohng kisakis kan. Siohwa kin ketikihong Depit kana* wasa koaros me e kin kohla ie.+ 7 Depit pil kihsang mehn sansar kohl me pwonopwon ko rehn nein Adadeser ladu kan oh wahla Serusalem.+ 8 Nanmwarki Depit alehsang Peda oh Peroda, kahnimw kan en Adadeser, uwen prons me inenen laud.

9 Nanmwarki Toi en Amad+ ahpw rongada me Depit kalowedier karis en sounpei koaros en Adadeser.+ 10 Toi eri kadarala nah pwutak Soram rehn Nanmwarki Depit pwehn esehda ia ire oh kapingahki eh mahweniong oh kalowehdi Adadeser (pwe Adadeser kin kalapw mahweniong Toi), oh Soram wa kohla dipwisou me wiawihkihda silper, kohl oh prons. 11 Nanmwarki Depit kasarawihong Siohwa mepwukat iangahki silper oh kohl kan me e kasarawialahr me kohsang wehi kan koaros me e kalowedier:+ 12 sang Siria oh Mohap,+ sang mehn Ammon kan, mehn Pilisdia kan,+ mehn Amalek kan,+ oh dipwisou lohdi kan sang rehn Adadeser,+ nein Rehop nanmwarkien Sohpa. 13 Depit pil ndandla ni ahnsou me e pwurodo sang eh kemehla mehn Edom 18,000 nan Wahun Soahl.+ 14 E koasoanehdi pwihn en sounpei kan nan Edom. E wiahda pwihnen sounpei kan nan Edom pwon, oh mehn Edom kan koaros wiahla nein Depit ladu kan.+ Siohwa ketikihong Depit kana* wasa koaros me e kin kohla ie.+

15 Depit kin kakaun Israel pwon,+ oh Depit kin wia kopwung ni pwung pahrek oh kaunda ni pwung+ nah aramas akan koaros.+ 16 Sohap+ nein Seruaia me wia kaunen karis en sounpei ko, oh Seosopat+ nein Ahilud me wia sounnting. 17 Sadok+ nein Ahidup oh Ahimelek nein Apaiadar me wia samworo, oh Seraia me wia sekteri. 18 Penaia+ nein Sehoiada me kaunen mehn Kered kan oh mehn Peled kan.+ Oh nein Depit pwutak kan wiahla kaun lapalap kei.*

9 Depit eri nda: “Miehte peneinei en Sohl me luwehdi me I kak kasalehiong limpoak loalopwoat pwehki Sonadan?”+ 2 Mie ladu men nan peneinei en Sohl me ede Saipa.+ Irail eri ekerodo rehn Depit, oh nanmwarkio ahpw idek reh: “Ih kowe Saipa?” E ahpw sapengki: “Ngehi noumw ladu.” 3 Nanmwarkio eri doula: “Miehte peneinei en Sohl me luwehdi me I kak kasalehiong sapwellimen Koht limpoak loalopwoat? Saipa eri sapengki nanmwarkio: “Mie emen nein Sonadan pwutak; e sohte kak aluhki mwahu neh ko koaros.*”+ 4 Nanmwarkio ahpw idek reh: “A ia ih?” Saipa ahpw sapengki nanmwarkio: “E kin mihmi nan imwen Makir+ nein Ammiel, nan Lodepar.”

5 Nanmwarki Depit ahpw mwadangete ileklahng ih oh wahsang ih nan imwen Makir nein Ammiel nan Lodepar. 6 Ni Mepiposed, nein Sonadan me nein Sohl, eh leledo rehn Depit, e ahpw mwadangete kelepwikihdi oh lukupoardiong nanpwel. Depit ahpw nda: “Mepiposed!” A e sapengki: “Iet sapwellimomwi laduen.” 7 Depit ahpw ndaiong ih: “Dehr masak, pwe I pahn uhdahn kasalehiong uhk limpoak loalopwoat+ pwehki omw pahpa Sonadan, oh I pahn kapwurehwei sahpw koaros me Sohl omw pahpa kahlapo sapweniki, oh ke pahn kin iang tungoal* ni ei tehpel ahnsou koaros.”+

8 Ih eri lukupoardi oh nda: “Dahmen sapwellimomwi laduet, pwe komwi en ketin tehk* ie me duwehte kidi mehla men?”+ 9 Nanmwarkio eri ileklahng Saipa, nein Sohl sounpapaho, oh ndaiong ih: “Soahng koaros me ahn Sohl oh soahng koaros nan imwe I pahn kihong nein nein omw soumaso nah pwutak.+ 10 Ke pahn koadoahkihada sahpwo ong ih—kowe oh noumw pwutak kan oh omw ladu kan—oh ke pahn kihpene wahnsahpwo kenen irail kan me kisehn nein nein omw soumaso pwutak. Ahpw Mepiposed, nein nein omw soumaso pwutak, pahn iang tungoal ni ei tehpelo ahnsou koaros.”+

Eri Saipa naineki pwutak 15 oh ladu 20.+ 11 Saipa eri sapengki nanmwarkio: “Sapwellimomwi laduet pahn kapwaiada mehkoaros me ei kaun nanmwarki ketin ruwesehki sapwellime laduet en wia.” Mepiposed eri kin tungoal ni en Depit* tehpel duwehte ma ih emen nein nanmwarkio pwutak. 12 Eri Mepiposed pil naineki pwutak pwulopwul men me adaneki Maika;+ oh irail koaros me kin kousoan nan imwen Saipa wiahla nein Mepiposed ladu kan. 13 Oh Mepiposed kin koukousoan nan Serusalem, pwehki e kin iang tungoal ni en nanmwarkio tehpel ahnsou koaros;+ oh e sohte kak aluhki mwahu neh ko koaros.+

10 Mwuri nanmwarkien Ammon+ ahpw mehla, oh nah pwutak Anun wiliandi ih wiahla nanmwarki.+ 2 Depit eri nda: “I pahn kasalehiong Anun nein Nahas limpoak loalopwoat duwehte eh pahpao eh kasalehiong ie limpoak loalopwoat.” Depit eri kadarala nah ladu kan en kansenamwahwih pwehki eh pahpao mehla. Ahpw ni ahnsou me nein Depit ladu ko lellahng nan sapwen mehn Ammon ko, 3 lapalap akan en mehn Ammon ko eri ndaiong Anun arail kaun: “Komw medewe me Depit kin kawauwih semomwio ni eh kadarodohng uhk irail kan me pahn kansenamwahwih komwi? Depit sou kadarodo nah ladu kan rehmwi pwe ren dawih kahnimw wet oh lipoahroke oh kalowehdi?” 4 Anun eri ale nein Depit ladu ko oh sihpihsang elep arail alis ko,+ oh lupukasang lukopen arail likou ko oh kadarirailla. 5 Ni Depit eh rongada met, e ahpw mwadangete kadarala ohl ekei pwehn tuhwong irail, pwehki ohl ako uhdahn namenekla douluhl; oh nanmwarkio ahpw ndaiong irail: “Kumwail mihmihte nan Seriko+ lao amwail alis kan pwurehng wosada, kumwail ahpw pwurodo.”

6 Mehn Ammon kan eri kilangada me Depit kailongkinirailla, eri mehn Ammon kan ilekla oh pwainohng mehn Siria en Pedrehop+ oh mehn Siria en Sohpa+ sounpei alu meh 20,000; oh nanmwarkien Maaka+ iangahki ohl 1,000; oh sang Istop* ohl 12,000.+ 7 Ni Depit eh rongada met, e ahpw kadarala Sohap oh karis en sounpeio pwon, iangahki nah sounpei kan me keieu kehlail.+ 8 Oh mehn Ammon kan ahpw kohieila oh koasoansoandi ni ireken mahwen ni wasahn pedolong en ewen kelen kahnimwo nindoken mehn Siria en Sohpa oh Rehop, iangahki Istop* oh Maaka ar mihmi nan mohso.

9 Ni Sohap eh kilang sounpei kan ar kohkodohng uhwong ih sang mwowe oh mwuri, e ahpw pilada ekei pwihn en sounpei me keieu koahiek nan Israel oh koasoaneiraildi ni ireken mahwen pwe ren tuhwong mehn Siria ko.+ 10 Ih eri kihdi luhwen sounpei ko pahn kaweid en* rie pwutak Apisai,+ pwehn koasoaneiraildi ni ireken mahwen pwe ren tuhwong mehn Ammon ko.+ 11 Ih eri nda: “Ma mehn Siria kan kehlailsang ie, eri ke anahne kohdo doareiehla, ahpw ma mehn Ammon kan kehlailsang uhk, I pahn kohwei oh doareiukala. 12 Kitail anahne kehlail oh kommwad+ pwehki neitail aramas akan oh pwehki kahnimw kan en atail Koht, oh Siohwa pahn ketin wia dahme mwahu mwohn silangi.”+

13 Sohap oh nah ohl akan ahpw kolahng mahweniong mehn Siria ko, oh mehn Siria ko ahpw tangdoaui.+ 14 Ni mehn Ammon kan ar kilangada mehn Siria kan ar tangdoaui, re tangasang Apisai oh pweieklahng nan kahnimwo. Mwurin mwo Sohap ahpw pwurasang eh mahweniong mehn Ammon kan oh kohdo Serusalem.

15 Ni mehn Siria ko ar kilangada me re lohdier pahn mehn Israel ko, re ahpw pwurehng kohpene.+ 16 Adadeser eri+ ileklahng mehn Siria kan me mi nan sahpw akan ni Pillapo,*+ irail ahpw kohdo Ihlam, oh Sopak, nein Adadeser kaunen karis en sounpei me kahluwa irail.

17 Ni ahnsou me rohng wet lella rehn Depit, e ahpw mwadangete kihpene mehn Israel koaros oh kotehla Sordan oh kohla Ihlam. Mehn Siria kan eri koasoaneiraildi ni ireken mahwen pwe ren tuhwong Depit oh mahweniong ih.+ 18 Ahpw mehn Siria kan tangasang mehn Israel kan; oh Depit kemehla nein mehn Siria kan soundak kuruma 700, oh soundak oahs 40,000, oh e kemehla Sopak, neirail kaunen karis en sounpei oh e mehla wasao.+ 19 Ni nanmwarki ko koaros me wia nein Adadeser ladu kan ar kilangada me irail lohdier pahn Israel, re ahpw mwadangete wiahda popohl rehn Israel oh mihla pahn arail manaman;+ oh mehn Siria ko ahpw masakala sewese mehn Ammon kan.

11 Ni tepin pahro,* ni ahnsou me nanmwarki kan kin kolahng mahwen, Depit ahpw kadarala Sohap oh nah ladu kan oh karis en sounpei en Israel pwon pwe ren kamwomwala mehn Ammon kan, oh re kapilpene Rappa,+ nindoken Depit eh mihmihte nan Serusalem.+

2 Ehu soutiko* Depit eri pwourda sang pohn eh pehto oh alialuseli pohn tehnpesen nanmwarki. Sang pohn tehnpeseo, e kilangada lih emen me wie duhdu, oh liho uhdahn kaselel. 3 Depit eri kadarala emen en kalelapak duwen liho oh e pakairkihdo: “Liho iei Padsipa+ nein Eliam,+ oh en Uraia,+ mehn Id, eh pwoud.”+ 4 Depit eri kadarala meninkeder kei pwehn wahdo liho.+ Liho eri kohdo reh, oh e wendi rehn liho.+ (Met wiawi nindoken liho eh kamwakele pein ih sang eh samin.*)+ Mwuri, liho pwurala ni imweo.

5 Liho eri liseianda, oh e pakairkilahng Depit: “I liseiandahr.” 6 Depit eri kadaralahng Sohap pakair ehu me nda: “Kadarodohng ie Uraia, mehn Ido.” Sohap eri kadaralahng Depit Uraia. 7 Ni Uraia eh lella reh, Depit kalelapak reh ia iren Sohap, ia iren pwihnen sounpei ko, oh ia iren mahweno. 8 Depit ahpw ndaiong Uraia: “Kohdihwei ni imwomwo oh kommoaldi.”* Ni Uraia eh kohkohlahsang ni tehnpesen nanmwarkio, kisakis en wahu ehu sang rehn nanmwarkio* ahpw pekederla mwuri. 9 Ahpw, Uraia pweidi ni wasahn pedolong en tehnpesen nanmwarkio rehn nein eh kauno ladu teikan koaros, oh e sohte kohdihla ni imweo. 10 Irail eri ndaiong Depit: “Uraia sohte kohdihla ni imweo.” Depit ahpw ndaiong Uraia: “Ke sou ahpwtehn pwurasang seiloak? Dahme ke sohte kohkihdihla ni imwomwo?” 11 Uraia ahpw sapengki Depit: “Kohpwao+ oh Israel oh Suda mi nan pelien ihmw kei, oh ei kaun Sohap oh nein ei kauno ladu kan kauwada imwarail impwal nan mohso. Eri ia mwomwen ei pahn kohla ni imweio pwehn mwenge oh nim oh wendi rehn ei pwoudo?+ Nin duwen omwi ieias oh esiesingek, I sohte pahn wia soahng wet!”

12 Depit eri ndaiong Uraia: “Nna mihmihte wasaht rahnwet, a lakapw I pahn kadaruhkala.” Uraia eri mihmi nan Serusalem rahno oh pil rahn mwurio. 13 Depit eri ileklahng en kohdo iang ih mwenge oh niminim oh e kasakawihala ih. Ahpw nin soutiko, e kohla meir pohn eh pehto rehn nein eh kauno ladu kan, oh e sohte kohdihla ni imweo. 14 Nimenseng Depit ntingihada kisinlikou kis ong Sohap oh kihong Uraia en wa kohla. 15 E ntingihedi nan kisinlikowo: “Kihdiong Uraia mwohn karis en sounpeio wasa me mahweno keieu kehlail ie. Kumwail ahpw pweiekdo sang pwe en lellel oh mehla.”+

16 Sohap kin tetehk mwahu kahnimwo, oh e kihdiong Uraia wasa me e ese sounpei kehlail kan mi ie. 17 Ni ohlen kahnimwo ar kohieido oh peiong Sohap, ekei nein Depit ladu kan mehla, oh Uraia mehn Ido pil iang irail ko me mehla.+ 18 Sohap eri pakairkihong Depit duwen rongen mahweno koaros. 19 E padahkihong meninkedero: “Ni omw pahn kaimwisekala omw koasoiaiong nanmwarkio rohng koaros duwen mahweno, 20 ele nanmwarkio pahn lingeringerda oh ndaiong uhk, ‘Dahme kumwail nohn kohla karaniheki kahnimwo pwehn pei? Kumwail sehse me re pahn kesik sang pohn kelen kahnimwo? 21 Ihs me kemehla Apimelek+ nein Seruppesedo?+ Kaidehn lih emen me kesehdiong takain ngidar pilawa ehu* powe sang pohn kelen kahnimwo, kahrehda eh mehla nan Depes? Ia kahrepen amwail nohn kohla karanih kehlo?’ Kowe eri nda, ‘Sapwellimomwi ladu Uraia mehn Ido pil iang mehla.’”

22 Meninkedero eri mwesel kohla oh padahkihong Depit mehkoaros me Sohap kadarala ih en nda. 23 Meninkedero eri ndaiong Depit: “Neirail ohl ako kehlail sang kiht, oh re kohieido oh mahweniong kiht nan mohso; ahpw se kapweiekiraillahng ni wasahn pedolong en ewen kelen kahnimwo. 24 Oh sounkesik ketieu ko kasikih sapwellimomwi ladu ko sang pohn kelen kahnimwo, a ekei sapwellimen nanmwarki ladu ko mehla; sapwellimomwi ladu Uraia mehn Ido pil iang mehla.”+ 25 Depit eri ndaiong meninkedero: “Ndaiong Sohap met: ‘Dehr mweidohng ire wet en kapwunodeiuk, pwe kedlahs sohte kin lipilipilki ihs me e pahn kemehla. Kakehlailihala omw mahweniong kahnimwo oh kalowehdi.’+ Oh kangoange ih.”

26 Ni en Uraia eh pwoudo rongada me eh pwoud Uraia melahr, e ahpw tepida mwahieiki eh pwoudo. 27 Mwurinte ahnsoun mwahiei eh erala, Depit ahpw ileklahng oh wahdo liho nan imweo, oh e wiahla eh pwoud+ oh naitikihong pwutak emen. Ahpw dahme Depit wiadahro inenen kansensuwedihada* Siohwa.+

12 Siohwa eri ketin poaronehla Nadan+ rehn Depit. E ahpw kohla+ oh ndaiong ih: “Mie ohl riemen nan kahnimw ehu, emen kepwehpwe, a emen semwehmwe. 2 Ohl kepwehpweo naineki sihpw oh kou me inenen tohto;+ 3 a ohl me semwehmweo sohte ah mehkot, pwe kisin sihmpwul lih tehmen me e pwainda.+ E kin apwahpwalih, oh e kin kekeirda rehn ohlo oh nah pwutak ko. E kin iang kang kenen ohlo kisin mwenge oh nim sang nan nah kep oh kin meir pahnadio. Ong ih, sihmpwulo duwehla nah serepein men. 4 Mwuhr aramas emen ahpw mwemweitdo rehn ohl kepwehpweo, ahpw e sohte ale pein nah sihpw oh kou pwehn wiakihda kisin mwenge ong me seiloakodo reho. Ahpw, e ale nein ohl semwehmweo sihmpwulo oh kaunopadahng ohl me kohdo reho.”+

5 Depit uhdahn lingeringerda pahn ohlo oh ndaiong Nadan: “Nin duwen Siohwa eh ketin ieias,+ ohl me wiadahr met konehng mehla! 6 Oh e anahne pwain sihmpwulo pahn pak pahieu,+ pwehki eh wiahda met oh sohte poakehla ohl semwehmweo.”

7 Nadan eri ndaiong Depit: “Kowe me ohlo! Iet me Siohwa, Koht en Israel ketin mahsanihen: ‘Pein ngehi me keieiukedi nin duwen nanmwarkien Israel,+ oh I doareiukala sang nan pehn Sohl.+ 8 I kupwurki kihong uhk imwen omw soumaso+ oh kihong uhk en omw soumaso pwoud kan,+ oh I kihong uhk kaundahn Israel oh Suda.+ Oh ma met sohte itar, I pahn kupwurki wia mehkot me laudsang met ong uhk.+ 9 Dahme ke mwamwahlikihki mahsen en Siohwa ni omw wiahda me suwed mwohn silangi? Ke kemehkihla Uraia mehn Id kedlahs!+ Kowe eri kihsang eh pwoud oh wiakihla omw pwoud+ mwurin omw kemehkihla ih nein mehn Ammon kan kedlahs.+ 10 Eri met kedlahs pwoat sohte pahn kohkohsang nan omw peneinei,+ pwehki omw mwamwahlikin ie ni omw kihsang en Uraia mehn Id eh pwoudo oh wiakihla omw pwoud.’ 11 Iet me Siohwa ketin mahsanihen: ‘I pahn wadohng uhk kahpwal sang nan omw peneinei;+ oh I pahn kihsang omw pwoud kan oh kihong emen ohl tohrohr* mwohn mesomwen,+ oh e pahn wendi rehn omw pwoud kan mwohn aramas koaros.+ 12 Mendahki omw wiadahr met ni rir,+ I pahn wia met mwohn Israel pwon pwe irail koaros en kilang.’”*

13 Depit eri ndaiong Nadan: “I dipadahr ong Siohwa.”+ Nadan ahpw sapengki Depit: “Eri Siohwa pahn ketin mahkohng dipomw.+ Ke sohte pahn mehla.+ 14 Ahpw pwehki omw uhdahn mwamwahliki Siohwa nan irair wet, noumw pwutak me ahpwtehn ipwidiong uhko pahn uhdahn mehla.”

15 Nadan eri kohkohla ni imweo.

Oh Siohwa ketin kahrehiong seri me en Uraia pwoudo naitikihong Depito en soumwahuda. 16 Depit kin pekipeki rehn Koht mehlelo pwe pwutako en mwahula. Depit ahpw kaisihsol oh kin pedolongala oh wendi pohn tahto nipwong.+ 17 Eri ohl mah kan en imweo kin kesihnen reh oh songosong en kapwourada ih sang nan tahto, ahpw e kahng oh sohte kin iang irail mwenge. 18 Ni keisuhwen rahn, serio mehla, ahpw nein Depit ladu ko masak ndaiong ih me serio melahr. Re nda: “Ni serio eh momour, kitail kin lokaiaiong ahpw e sohte kin rong kitail. Eri ia duwen atail kak ndaiong ih me serio melahr? E kakete wiahda mehkot suwed.”

19 A ni Depit eh tehkada me nah ladu ko mwengmwengininginpene, e ahpw wehwehkihda me serio melahr. Depit eri idek rehn nah ladu ko: “Serio melahr?” A re sapengki: “E melahr.” 20 Depit eri pwourda sang nan tahto. E duhduhla, kei lehla,+ wilianda eh likou ko, oh kohla ni tehnpesen+ Siohwa oh kaudok. Mwurin mwo, e kohla ni tehnpeseo oh peki ren wadohng ih mwenge, e ahpw mwengehla. 21 Nah ladu ko ahpw idekda reh: “Dahme komw wiahki soahng wet? Ni serio eh wie momour, komw kin ketin kaikaisihsol oh kin wie tentenihr; ahpw ni ahnsowohte me serio mehla, komw ketida oh konokonot.” 22 Depit ahpw sapengki: “Ni ahnsou me serio momour, I kaisihsol+ oh wie sengiseng pwehki I kin pein ndaiong ie, ‘Ihs me ese ma Siohwa sou pahn ketin kupwuramwahwih ie oh mweidohng serio en mourla?’+ 23 Ahpw met ni eh melahr, dahme I pahn kaisihsolki? I kak kapwurehdo?+ I pahn kohla reh,+ ahpw e sohte pahn pwurodo rehi.”+

24 Depit eri kansenamwahwih eh pwoud Padsipa.+ E kohla oh wendi reh. Mwuhr liho naitikihda pwutak emen, oh e adaneki Solomon.*+ Oh Siohwa kin ketin poakohng ih,+ 25 oh e ketin poaronehla soukohp Nadan+ en kihong ede Sedidaia,* pwehki Siohwa.

26 Sohap ahpw usehlahte mahmahweniong Rappa,+ kahnimw en mehn Ammon kan,+ oh e kalowehdi kahnimw en nanmwarkio.*+ 27 Sohap eri kadarala meninkeder kei rehn Depit oh nda: “I mahweniongehr Rappa,+ oh I kalowedier kahnimw en pihl akan.* 28 Eri komw ketikipene luhwen pwihn en sounpei kan oh kauwada imwamwail impwal pwehn mahweniong kahnimwo oh kalowehdi. Pwe ma soh, ngehi me pahn kalowehdi kahnimwo oh ale kapingpe.”*

29 Depit eri kihpene pwihnen sounpei ko koaros oh kohla Rappa oh mahweniong oh kalowehdi. 30 Ih eri kihsang nihno ni moangen Malkamo. Uwen toutou en nihno iei dalend* en kohl ehu, iangahki takai kesempwal kan, oh nihno ahpw kodahng pohn moangen Depit. E pil alehda dipwisou lohdi tohto+ sang nan kahnimwo.+ 31 Oh e ale aramas akan me mi nan kahnimwo oh kihong irail en wia doadoahk en resehdi takai, oh doadoahngki mete keng kan oh sile mete kan, oh wiahda prik kan.* Ih met me e wiahiong kahnimw en mehn Ammon kan koaros. Depit oh pwihnen sounpei kan koaros eri pwurala Serusalem.

13 Eri nein Depit pwutak Apsalom rianki serepein kaselel men me adaneki Damar,+ oh nein Depit pwutak Amnon+ mwahukihda serepeino. 2 Uwen Amnon eh tihwohla me kahrehda e soumwahukihda rie serepein Damar, pwe serepeino meipwon men oh e mwomwen apwal ong Amnon en wiahiong ih mehkot. 3 Mie iengen Amnon men me adaneki Sehonadap,+ nein Simeah,+ rien Depit pwutak; oh Sehonadap ohl emen me inenen loalokong. 4 Sehonadap eri ndaiong Amnon: “Sapwellimen nanmwarki pwutak kowe, a dahme ke nohn kin nsensuwedki nimenseng koaros? Ke sou ndahdo?” Amnon sapeng ih nda: “I mwahuki Damar, rien riei pwutak Apsalom serepeino.”+ 5 Sehonadap eri sapengki ih: “Wendi pohn omw pehten oh mwomwehda me ke soumwahu. Ni omw pahpao eh pahn kohdo pwehn kilang uhk, ndaiong ih, ‘Menlau, mweidohng riei serepein Damar en kohdo oh kihong ie ekis kisin mwenge. Ma e pahn kaunopada mwohn meseie kisin mwenge ong me soumwahu,* I pahn mwenge sang nan peh.’”

6 Amnon eri wendi oh mwomwehda me e soumwahu, oh nanmwarkio pedolong pwehn kilang ih. Amnon eri ndaiong nanmwarkio. “Komw kupwurkalahngan mweidohng riei serepein Damar en kohdo oh umwunda keik riau me mwomwen mohngiong mwohn meseiet pwe I en kak mwenge sang nan peh.” 7 Depit eri ileklahng Damar ni ihmwo, nda: “Menlau kohla ni imwen riomw pwutak Amnon oh kaunopadahng ih kene mwenge.”* 8 Damar eri kohla ni imwen rie pwutak Amnon, wasa me e wonohn ieo. E ahpw ale pilawao oh kapalada oh kukihada keik ko mwohn mesen Amnon. 9 E ahpw ale delen uhmwo oh kihdiong pwe en tungoale. Ahpw Amnon kahng tungoale oh e nda: “Koaros en kohkohlahsang ie!” Koaros eri kohkohla.

10 Amnon eri ndaiong Damar: “Wahlongodo mwengehn* nan perehn meiret, pwe I en tungoale sang nan pehmwen.” Damar eri ale keik mwomwen mohngiong ko me e wiahda oh walahng rehn rie pwutak Amnon nan perehn meiro. 11 Ni serepeino eh walahng keik ko pwehn tungoale, Amnon ahpw poarehng oh nda: “Kohdo, wendi rehi, riei serepein.” 12 Ahpw serepeino ndaiong ih: “Soh, riei pwutak! Ke dehr kanamenekihiehla, pwe soahng wet sohte kin wiawi nan Israel.+ Ke dehr wia soahng kanamenek wet!+ 13 Ia duwen ei pahn kakohng soangen kanamenek wet? Oh aramas pahn wiahkinuhkala emen ohl kanamenek nan Israel. Eri menlau lokaiaiong nanmwarkio, pwe e sohte pahn koliehdi sang uhk.” 14 Ahpw e kahng rong ih, oh nan eh kehlailsang serepeino, e kanamenekihala ni eh angkehlailiong. 15 Amnon ahpw tepida ahneki kailok laud ong ih, kahrehda eh kailongki ih laudsang pepehm en limpoak me e ahneki ong ih. Amnon ahpw ndaiong ih: “Pwourda; kohkohla!” 16 Serepeino ahpw ndaiong ih: “Soh, riei pwutak, pwe omw kausiehla met suwed sang dahme ke wiahiong ieo!” Ahpw e kahng rong ih.

17 E ahpw ekerodo nah sounpapah pwulopwulo oh nda: “Wahwei sang mahs aramas menet mwohi, oh loakehdi wenihmwen mwurin e pahn pedoi.” 18 (Eri serepeino likawih soangen likou reirei tohrohr* ehu, pwe soangen likou pwukat iei me nein nanmwarki serepein meipwon kan kin likawih.) Nah sounpapaho eri kahrehla serepeino likio, oh e loakehdi wenihmwo mwurin e pedoi. 19 Damar ahpw kidahng pehs pohn moangeo,+ oh e tehrpeseng likou kaselel reirei me e likawiho; oh e kolehng peh ko pohn moangeo oh kohkohla wie sengiseng.

20 Rie pwutak Apsalom+ eri idek reh: “Riomw pwutak Amnon me mihmi rehmwo? Eri ke dehr mweseiseiki met, riei serepein. Ih riomw pwutak.+ Dehr mweidohng omw mohngiong en kadakadaur duwen ire wet.” Damar ahpw kin kelekelehpw nan imwen rie pwutak Apsalom. 21 Ni ahnsou me Nanmwarki Depit rongada duwen mepwukat koaros, e ahpw uhdahn lingeringerda.+ Ahpw e sohte men kamedekihala pepehm en nah pwutak Amnon, pwehki eh poakohng, pwe ih me nah mesenih. 22 Oh Apsalom soh mwahn ndaiong Amnon mehkot, ma pil suwed de mwahu; pwe Apsalom kailongki+ Amnon pwehki eh kanamenekihala rie serepeino Damar.+

23 Sounpar riau mwuri, nein Apsalom sounsehk wunen sihpw ko mihmi Paal-asor, karanih Epraim,+ oh Apsalom luke nein nanmwarkio pwutak kan koaros.+ 24 Apsalom eri kohdo rehn nanmwarkio oh nda: “Sapwellimomwi laduet pahn sehk nah sihpw kan. Nanmwarki en ketin kalahngan iang ie ketila iangahki sapwellime ladu kan.” 25 Ahpw nanmwarkio ndaiong Apsalom: “Soh, nei pwutak. Ma kiht koaros pahn kohla, se pahn wia wisik toutou ehu ong uhk.” Mendahki Apsalom wie pekipeki reh, nanmwarkio sohte kohla, ahpw e kapaiahda ih. 26 Apsalom eri nda: “Ma kaidehn komwi, a komw kupwurkalahngan oh mweidohng riei pwutak Amnon en iang kiht patohla.”+ Nanmwarkio sapengki: “Ia kahrepen eh pahn iang uhk patohla?” 27 Ahpw Apsalom wie pekipekihte reh, kahrehda nanmwarkio kadarala Amnon oh nein nanmwarki pwutak kan koaros pwe ren iang ih.

28 Apsalom eri ruwesehki nah sounpapah ko: “Kumwail tetehk, oh ni ahnsou me mohngiongen Amnon pereperen pwehki wain, I pahn ndaiong kumwail, ‘Kemehla Amnon!’ Kumwail eri pahn kemehla ih. Kumwail dehr masak. Kaidehn ngehi me ruwesei kumwail? Kumwail kehlail oh kommwad.” 29 Nein Apsalom sounpapah ko eri wiahiong Amnon duwehte me Apsalom ruwesehkin irail; nein nanmwarkio pwutak teikan koaros ahpw uhda oh emenemen irail karadahng pohn wararail dongki ko oh tangdoaui. 30 Nindoken arail tangatang kohla, rohngo ahpw lellahng Depit: “Apsalom kemelahr sapwellimen nanmwarki pwutak kan koaros, oh sohte mehmen rehrail pitila.” 31 Nanmwarkio eri uhda oh tehrpeseng eh likou ko oh wendiong pohn tahto, oh nah ladu kan koaros kesikesihnen limwah, arail likou kan pil teiteipeseng.

32 Ahpw Sehonadap+ nein Simeah+ me rien Depito ahpw nda: “Ei kaun en dehr ketin medewe me re kemelahr sapwellimen nanmwarki pwutak pwulopwul kan koaros, pwe Amnon kelehpw me melahr.+ Ruwes en Apsalom met, me koasoanedier en wia met+ sangete rahn me Amnon kanamenekihala Damar+ rie serepeino.+ 33 Eri ei kaun nanmwarki en dehr ketin tehk* rohng wet me nda, ‘Sapwellimen nanmwarki pwutak kan koaros melahr’; Amnon kelehpw me mehla.”

34 Erein ahnsowo, Apsalom tangdoaui.+ Mwuhr silepen kahnimwo kilengla oh kilangada aramas tohto kohkohdo sang ahl me mi mwurin silepeo limwahn nahnao. 35 Sehonadap eri+ ndaiong nanmwarkio: “Kilang! Sapwellimen nanmwarki pwutak kan sapahldohr. E duwehte dahme sapwellimomwi laduet patohwanehr.” 36 Ni eh kaimwisekala eh koasoio, nein nanmwarkio pwutak kan pa leledo, wie sengiseng ni ngihl laud; nanmwarkio oh nah ladu kan koaros pil sengiseng kowahlap. 37 Ahpw Apsalom tangdoaui oh kohla rehn Talmai,+ nein Ammihud nanmwarkien Kesur. Depit mwahieiki nah pwutako erein rahn tohto. 38 Mwurin Apsalom tangdoaui oh kohla Kesur,+ e mihmihki wasao sounpar siluh.

39 Kedekedeo Depit ahpw men tuhwong Apsalom, pwe e pwurehng nsenamwahula sang ni mehlahn Amnon.

14 Eri Sohap nein Seruaia+ ahpw esehda me nanmwarkio men tuhwong Apsalom.+ 2 Sohap eri ilekla Tekoa+ oh ekerodo lih loalokong men sang wasao oh ndaiong ih: “Menlau mwomwehda me ke mwahmwahiei, oh pwuhriong nan likoun nsensuwed, oh dehr kei leh.+ Mwomwehda me kowe lih emen me wie mwahmwahieiki aramas emen me melahr ahnsou reirei. 3 Eri kohlongala oh koasoiong nanmwarkio duwehte met.” Sohap ahpw ndaiong ih dahme e pahn nda.*

4 Lihen Tekoao ahpw kohla rehn nanmwarkio oh poaridiong nanpwelo oh lukupoardi oh nda: “Maing nanmwarki, komw ketin sewese ie!” 5 Nanmwarkio sapengki liho: “Dahme sapwung?” Liho ahpw nda: “Ni mehlelo ngehi liohdi men; ei pwoud melahr. 6 Oh ngehi, sapwellimomwi lidu, naineki pwutak riemen, oh ira peipene nan mwahto. Sohte aramas emen wasao pwehn kihpeseng ira, oh emen ira ahpw kemehla emen. 7 Eri peneineio pwon uhwongiedahr, sapwellimomwi liduet, oh re kin ndinda: ‘Kidohng kiht me kemehla rie pwutako, pwe sen kemehla pwehki mour* en rie pwutak me e kemelahr,+ mehnda ma met wehwehki kasohralahn serien sohso!’ Irail pahn kakunla mwoalus okohk kis me luhluhwe* rehi oh sohte luwehkihdi ahd ehu ong ei pwoudo de pil kadaudoke* pohn sampah wet.”

8 Nanmwarkio ahpw ndaiong liho: “Kohkohla ni imwomwo, oh I pahn wiahiong uhk ehu koasoandi.” 9 Lihen Tekoao eri ndaiong nanmwarkio: “Maing ei kaun nanmwarki, mweidohng ngehi oh peneinei en ei pahpao en pwukoahki sapwung wet, a nanmwarkio oh mwoale en saledek sang sapwung wet.” 10 Nanmwarkio ahpw nda: “Ma mehmen pil pwurehng lokaiaiong uhk, wadohng ie, oh e sohla pahn pwurehng kihong uhk kahpwal.” 11 Liho eri nda: “Nanmwarki en ketin kalahngan oh tamataman Siohwa omwi Koht, pwe aramas me pahn ikih me melahro*+ en dehr wahdo kahpwal oh kamwomwala nei pwutako.” E ahpw nda: “Nin duwen Siohwa eh ketin ieias,+ sohte ehu pitenmoangen noumw pwutako pahn pwupwudiong nanpwel.” 12 Liho eri nda: “Komw kupwurkalahngan mweidohng sapwellimomwi liduet en patohong ei kaun nanmwarki.” Ih eri nda: “Nna pato!”

13 Liho ahpw nda: “Dahme komw kupwurehkihda wia soahng wet ong sapwellimen Koht aramas akan?+ Ni nanmwarki eh ketin mahsen ni mwohmw wet, e ketin kahrehiong pein ih en dipikihda, pwehki nanmwarki sohte ketin kasapahldo sapwellime pwutak me kalipilipalahro.+ 14 Kitail uhdahn pahn mehla oh pahn duwehla pihl me kin wudekdiong nanpwel, me sohte pahn kak kapwurpwurdo. Ahpw Koht sohte pahn ketikihsang mour* ehu, oh e kin ketin tetehk kahrepe kan me emen me kalipilipala pahn kak pwurekihdo reh. 15 I patohdo pwehn patohwanohng ei kaun nanmwarki met pwehki aramas akan kamasakiehdahr. Eri sapwellimomwi lidu menet patohwan, ‘Komw kupwurkalahngan mweidohng ie en patohong nanmwarkio. Mweinele nanmwarkio pahn ketin kapwaiada en sapwellime lidu menet pekipek. 16 Nanmwarkio ele pahn karonge oh doarehla sapwellime lidu menet sang nan pehn aramas me raparapahki en kamwomwala ngehi oh nei pwutak iehros sang sohso me Koht ketikihong kiht.’+ 17 Sapwellimomwi lidu menet eri patohwan, ‘Mahsen en ei kaun nanmwarkio en ketin kansenamwahwihiehla,’ pwe ei kaun nanmwarkio rasehng tohnleng en Koht mehlelo ni eh kin ketin katohrehsang dahme mwahu sang dahme suwed. Siohwa omwi Koht en ketiket rehmwi.”

18 Nanmwarkio eri sapengki liho: “Menlau dehr ekihsang ie mehkot sohte lipilipil me I pahn idek rehmw.” Liho eri sapengki: “Ei kaun nanmwarki en ketin kalahngan oh mahsen.” 19 Nanmwarkio eri idek: “Sohap me padahkihong uhk en wia soahng pwukat koaros?”+ Liho eri sapengki: “Nin duwen omwi ketin ieias, Maing ei nanmwarki, e pwung dahme* ei kaun nanmwarki mahsanih, pwe iei sapwellimomwi ladu Sohap me kaweid ie oh patohwanohng sapwellimomwi lidu menet dahme e pahn patohwan.* 20 Sapwellimomwi ladu Sohap me wiadahr met pwehn wekidala mwomwen soahng kan, ahpw ei kaun sapwellimanki erpit duwehte tohnleng en Koht mehlelo oh mwahngih soahng koaros me kin wiawi nan sahpwet.”

21 Nanmwarkio eri ndaiong Sohap: “Nna mwahu, I pahn wia met.+ Kohla oh kapwurehdo mwahnakapw Apsalom.”+ 22 Sohap eri poaridi oh lukupoardi oh kapinga nanmwarkio. Sohap eri nda: “Maing ei kaun nanmwarki, rahnwet sapwellimomwi laduet patohwan eseier me komw ketin kupwure, pwehki nanmwarkio ketin kapwaiada en sapwellime laduet pekipek.” 23 Sohap eri uhda oh kohkohla Kesur+ oh kapwurehdo Apsalom Serusalem. 24 Nanmwarkio ahpw nda: “En pwurala nan pein imwe, ahpw e sohte pahn kilang meseiet.” Apsalom eri pwurala nan pein imweo oh sohte kilang mesen nanmwarkio.

25 Eri nan Israel pwon, sohte ohl emen me ale kapingpen eh masamwahu oh paliwaramwahu duwehte Apsalom. Sang ni patehn neh leldahla ni moange, sohte suwed kis reh. 26 Ni eh kin sihpih moange—e kin anahne sihpih ni imwin pahr koaros pwehki eh inenen toutou ong ih—pitenmoange toutouki sekel 200* sang ni nein nanmwarki mehntenek takai.* 27 Pwutak silimen me ipwidiong Apsalom,+ oh serepein emen me adaneki Damar. Lih inenen masamwahu men ih.

28 Oh Apsalom koukousoanki Serusalem erein sounpar riau, ahpw e sohte kin kilang mesen nanmwarkio.+ 29 Apsalom eri ekerodo Sohap pwehn kadarala ih rehn nanmwarkio, ahpw Sohap sohte men kohdo reh. Eri e pil pwurehng ileklahng ih keriapak, a e pil kahngete kohdo. 30 Eri, Apsalom ndaiong nah ladu ko: “Sapwen Sohap pelien sahpwo mihte limwahn sapweio, oh mie parli wasao. Kumwail kohla oh isikada.” Nein Apsalom ladu ko eri kohla oh isikada pelien sahpwo. 31 Sohap eri uhda kohla ni imwen Apsalomo oh ndaiong ih: “Dahme omw ladu ko isikkihda sapwei pelien sahpwo?” 32 Apsalom eri sapengki Sohap: “Kilang! I kadarewohng uhk pakair wet, ‘Kohdo oh I pahn kadaruhkala rehn nanmwarkio pwehn kalelapak: “Dahme I kohkihdo sang Kesur?+ E pahn mwahu ong ie ma I mihmihte mwo. Mweidohng ie I en kilang mesen nanmwarkio, oh ma I dipada, eri en ketin kemeiehla.”’”

33 Sohap eri kohla rehn nanmwarkio oh ndaiong ih. Nanmwarkio eri ekerodo Apsalom, ih eri kohdo reh oh lukupoardiong nanpwelo mwohn nanmwarkio. Nanmwarkio ahpw metik Apsalom.+

15 Mwurin mepwukat koaros, Apsalom alehiong pein ih kuruma pwoat, oahs kan oh ohl 50 pwe ren kin tang mwowe.+ 2 Apsalom kin sangkenei pwourda oh kesikesihnen ni keilen ahl me kolahng ewen kelen kahnimwo.+ Ni ahnsou me aramas emen kin wia eh repenpwung me pahn kin wisikdohng rehn nanmwarkio pwehn kopwungada,+ Apsalom kin ekerodo ih oh ndaiong: “Mehnia kahnimw me ke kohsang ie?” oh e pahn kin nda: “Omw laduet kohsang nan ehu keinek en Israel kan.” 3 Apsalom kin ndaiong ih: “Kilang, omw koasoi kan me pwung oh konehng, ahpw sohte emen sang rehn nanmwarkio pahn rong omw iren kopwungen.” 4 Apsalom kin nda: “Ma ngehi me idihdida pwehn wia sounkopwung en sahpwet! Eri aramas koaros me mie eh repenpwung de iren kopwung pahn kohdo rehi, oh I pahn tetehk pwe en alehdi pwung pahrek.”

5 Oh ni ahnsou me aramas emen kin keiong mpe pwehn poaridiong, Apsalom kin kapahla peho, koledi ih oh metik.+ 6 Apsalom kin wia met ong mehn Israel koaros me kin kohdo rehn nanmwarki pwehn wia kopwung; eri Apsalom kin widinge mohngiong en mehn Israel kan pwe ren iangala ih.*+

7 Ni imwin sounpar pahieu,* Apsalom ahpw ndaiong nanmwarkio: “Komw kupwurkalahngan oh ketin mweidohng ie I en patohla Ipron+ pwe I en kapwaiada ei inou me I kahukihong Siohwa. 8 Pwe sapwellimomwi laduet kahukilahr inou wet+ ni eh patopatohte Kesur+ nan Siria: ‘Ma Siohwa pahn ketin kapwureiehdo Serusalem, I pahn wiahda meirong ehu ong* Siohwa.’” 9 Nanmwarkio eri ndaiong ih: “Kohkohwei ni popohl.” E ahpw uhda oh kohkohla Ipron.

10 Apsalom eri kadarpeseng lipoarok kei nan keinek en Israel koaros, oh nda: “Ni ahnsowohte me kumwail pahn rong ngilen mehn pepeuko,* kumwail pakairkihwei, ‘Apsalom wialahr nanmwarki nan Ipron!’”+ 11 Eri ohl 200 sang Serusalem me iang Apsalom kohla mwo; re lukalahng oh re kohla ni ar sasairki, sohte ese dahme wiawi. 12 Oh pil ni ahnsou me Apsalom wiahda meirong ko, e ahpw ileklahng Ahidopel+ mehn Kailo, nein Depit sounkaweid+ sang nan eh kahnimw Kailo.+ Mwekid en uhwong nanmwarkio ahpw kin kehkehlailla, oh aramas akan me utung Apsalom kin wie tohtohla.+

13 Eri meninkeder men ahpw kohla rehn Depit oh ndaiong: “Mohngiong en mehn Israel kan iangalahr Apsalom.” 14 Ni ahnsowohte Depit ahpw ndaiong nah ladu kan koaros me mihmi reh Serusalem: “Kumwail kohdo! Kitail tang,+ pwe sohte emen kitail pahn pitsang Apsalom! Mwadang, pwe e de mwadangete koanoaikitaildi oh wahdo kahpwal ong kitail oh kemehkihla kedlahs tohn kahnimw wet!”+ 15 Nein nanmwarkio ladu kan eri sapengki nanmwarkio: “Dahme at kaun nanmwarki pahn ketin pilada, sapwellimomwi ladu kat onopadahr en kapwaiada.”+ 16 Eri Nanmwarkio ahpw mweselda oh tohnimweo pwon idawehnla ih, ahpw nanmwarkio pwilikihdi pekehi ehk+ pwehn apwahpwalih tehnpaso. 17 Nanmwarkio eri kohkohla iangahki aramas koaros me ideidawehn, re ahpw uhdi Ped-merak.

18 Nah ladu ko koaros me iang ih mweselda* oh koaros mehn Kered kan, mehn Peled kan+ oh mehn Kahd+ 600 me idawehnla ih sang Kahd,+ ahpw keid mwohn nanmwarkio ni eh kin kasakasawih irail. 19 Nanmwarkio eri ndaiong Itai+ mehn Kahd: “Dahme ke pahn pil iangkin kiht kohla? Pwurala oh mihmi rehn nanmwarki kapwo, pwe kowe mehn liki men oh ke pil kalipilipala sang omw wasa. 20 Ke kohdo aio, a rahnwet I pahn kahrehiong uhk ken iang kiht kohkohseli, pwehn mwesel ahnsou me I pahn mwesel oh kohla wasa me I pahn kohla ie? Pwurala oh kahrehda riomw kan, Siohwa en ketin kasalehiong uhk limpoak loalopwoat oh lelepek!”+ 21 Itai ahpw sapengki nanmwarkio: “Nin duwen Siohwa eh ketin ieias oh nin duwen ei kaun nanmwarki eh ketin ieias, wasa koaros me ei kaun nanmwarki pahn ketiket ie, ih wasa me sapwellimomwi laduet pahn pil mi ie,+ mehnda ma ong mehla de mour!” 22 Depit eri ndaiong Itai:+ “Kohwei oh kotehla wahuwen.” Itai mehn Kahdo eri kotehla, iangahki nah aramas ako koaros oh seri ko.

23 Koaros me mi nan sahpwo wie sengiseng laud nindoken aramas pwukat koaros ar kotekotehla wahwo, oh nanmwarkio wie kesikesihnen ni Wahun Kidron;+ aramas ako koaros kotekote wahwo kohkolahng ni ahl me kolahng sapwtehno. 24 Sadok+ pil mi mwo oh me iang ih iei mehn Lipai kan koaros+ me weuwa kohpwahn+ inou lap en Koht mehlelo;+ irail eri pwilikihdi Kohpwahn inou lap en Koht mehlelo; oh Apaiadar+ kohdahla ni aramas akan koaros ar kotelahr wahwo sang nan kahnimwo. 25 Ahpw nanmwarkio ndaiong Sadok: “Kapwurehla Kohpwahn inou lap en Koht mehlelo nan kahnimwo.+ Ma Siohwa pahn ketin kupwure ie, e pahn ketin kapwureiehla oh ketin mweidohng ie en kilang kohpwao oh wasa e kin mi ie.+ 26 Ahpw ma e pahn ketin mahsanih, ‘I sohte kupwurperenkin uhk,’ eri mweidohng en ketin wiahiong ie dahme pahn mwahu mwohn silangi.” 27 Nanmwarkio ahpw ndaiong samworo Sadok: “Kaidehn kowe sounkilang kaudiahl?+ Kumwa pwurala nan kahnimwo ni popohl, oh kahrehda noumwa pwutak riemenen ren iang kumwa, pein noumw pwutak Ahimas oh Sonadan+ nein Apaiadar pwutak. 28 Kilang, I pahn mihmi ni wasahn kotehla Sordan kan nan sapwtehno, lao rohng leledo rehi sang rehmwa.”+ 29 Sadok oh Apaiadar eri kapwurehla Kohpwahn inou lap en Koht mehlelo nan Serusalem oh ira mihmihte mwo.

30 Ni Depit eh kohkohdahla ni Nahnahn* Olip,+ e wie sengiseng ni eh kohkohdahla; moange pweipweidi, oh e adasihte alialu. Irail koaros me iang ih moangarail pil pweipweidi oh wie sengiseng ni ar kohkohdahla. 31 Depit eri alehdi pakair wet: “Ahidopel iang irail kan me+ iang Apsalom+ uhwong.” Depit eri nda: “Maing Siohwa,+ komw ketin kalahngan wekidala en Ahidopel kaweid en wiahla mehkot pweipwei!”+

32 Ni Depit eh leldahla pohn kadoken dohlo, wasa me aramas akan kin poaridiong Koht, Usai+ mehn Arko+ miher mwo pwehn tuhwong ih, eh likou reireio teipeseng oh pwehlte pohn moange. 33 Ahpw, Depit ndaiong ih: “Ma ke iang ie kohla palio, ke pahn wia katoutou ehu ong ie. 34 Ahpw ma ke pwurala ni kahnimwo oh ndaiong Apsalom, ‘Maing nanmwarki, ngehi omwi ladu. Ngehi me wia sapwellimen omwi pahpa ladu mahso, ahpw met ngehi sapwellimomwi ladu,’+ eri ke pahn kak sewese ie oh kasapwungehla kaweid en Ahidopel.+ 35 Samworo Sadok oh Apaiadar sou pahn iang uhk mi mwo? Ke uhdahn pahn ndaiong samworo Sadok oh Apaiadar mehkoaros me ke kin rong sang ni imwen nanmwarkio.+ 36 Kilang! Neira pwutak riemeno mihmi rehra mwo, Ahimas+ nein Sadok oh Sonadan+ nein Apaiadar, oh soahng koaros me ke kin rong, padahkihong ira pwe ira en pakairkihdo.” 37 Eri, Usai kompoakepahn* Depito+ ahpw kohla nan kahnimwo ni Apsalom eh pil lella nan Serusalem.

16 Ni Depit eh ekiste daulihala kadoken dohlo,+ nein Mepiposed sounpapah+ Saipa+ miher mwo pwehn tuhwong ih iangahki dongki riemen me kaunopadahr, oh pohn dongki ko lopwon en pilawa 200, keik reisin 100, keik pik oh deid 100, oh lapalahn sah en wain ehu.+ 2 Nanmwarkio eri ndaiong Saipa: “Dahme ke wahkihdo ape pwukat?” Saipa ahpw sapengki: “Dongki kan iei dakepen tohnimwen nanmwarkio, pilawa oh wahntuhke kan kenen mwahnakapw akan, oh wainet ong irail kan me pwangadahr nan sapwtehno ren nim.”+ 3 Nanmwarkio eri nda: “A ia nein omw soumas pwutako?”*+ Saipa ahpw ndaiong nanmwarkio: “E patopato Serusalem, pwe e patohwan, ‘Rahnwet wehin Israel pahn kapwuredohng ie en ei pahpao kaundahn nanmwarki.’”+ 4 Nanmwarkio eri ndaiong Saipa: “Kilang! Ke pahn ahnekihla mehkoaros me ahn Mepiposed.”+ Saipa ahpw sapengki: “I poaridiong mwohmwi. Komw ketin kupwure ie, ei kaun nanmwarki.”+

5 Ni ahnsou me nanmwarki Depit lella Pahurim, ohl emen sang peneinei en Sohl me ede Simei,+ nein Kera, ahpw kohieila weriwerki keria kan ni eh kohkolahng rehn Depit.+ 6 E katekatehki takai Depit oh pil nein nanmwarki Depit ladu ko koaros, oh aramas koaros oh pil ohl kehlail kan ni palimaun oh palimeing en Depit. 7 Simei eri nda ni eh kin kerikeria: “Pwulupwulahkewei, pwulupwulahkewei, kowe sounkam aramas emen!* Kowe ohl soh katepe men! 8 Siohwa ketin dupukohng uhk pwehki omw kemehla peneinei en Sohl oh kihsang wehio reh. Eri Siohwa ketikihongehr noumw pwutak Apsalom wehio. Eri met, kahpwal lelohng uhk pwehki kowe sounkam aramas men!”*+

9 Apisai nein Seruaia eri+ ndaiong nanmwarkio: “Ia kahrepen kidi mehla menet en+ keria ei kaun nanmwarki?+ Komw kupwurkalahngan oh ketin mweidohng ie I en patohla oh kihsang moangeo.”+ 10 Ahpw nanmwarkio nda: “Dahme I pahn ehukihong kumwa, kumwa nein Seruaia ?+ Mweidohng en keria ie,+ pwe Siohwa me ketin mahsanihong,+ ‘Keriahla Depit!’ Eri ihs me pahn nda, ‘Dahme ke wiahki met?’” 11 Depit eri ndaiong Apisai oh nah ladu ko koaros: “Pein nei pwutak, kisehn udukei oh ntahi, kin songosong en kemeiehla,+ a dahme I pahn kasik sang rehn mehn Pensamin men!+ Mweidala pwe en keria ie, pwe Siohwa me ketin mahsanihong en wia met! 12 Mweinele Siohwa pahn ketin mwahngihada ei lokolok,+ oh Siohwa pahn ketin kapwuredohng ie kamwahu ahpw kaidehn weriwerki lokaiahn keria kan ong ie rahnwet.”+ 13 Depit oh nah aramas akan kohkohdihlahte nan ahlo ni Simei eh kekeid limwah ni keilen nahnao, weriwerki lokaiahn keria kan,+ oh katekatehki takai oh pwehl.

14 Nanmwarkio oh aramas koaros me iangih ahpw lella wasa me re kohkolahng ie oh re pwangada, irail eri kommoaldi.

15 Ni ahnsowo, Apsalom oh mehn Israel koaros me iangih ahpw lella Serusalem, oh Ahidopel+ pil iang ih. 16 Ni ahnsou me Usai+ mehn Ark,+ kompoakepahn Depit, kohdo rehn Apsalom, Usai ahpw ndaiong Apsalom: “Nanmwarki en ketin mour werei!+ Nanmwarki en ketin mour werei!” 17 Apsalom eri ndaiong Usai: “Ih duwen omw limpoak loalopwoat ong kompoakepahmwo met? Dahme ke sohte iangki kompoakepahmwo?” 18 Usai eri ndaiong Apsalom: “Soh, I kin uhpalihki aramas me Siohwa oh aramas pwukat oh pil mehn Israel kan koaros pilada. I pahn mihmi rehmw. 19 Oh I pahn pwurehng nda, Ihs me I pahn papah? Kaidehn sapwellimeo? Nin duwen ei kin papah omwi pahpao, ih pil duwen ei pahn papah komwi.”+

20 Apsalom ahpw ndaiong Ahidopel: “Kihong ie omw kaweid.+ Dahme kitail pahn wia?” 21 Ahidopel eri sapeng Apsalom, nda: “Wendi rehn en omwi papaho pekehi kan,+ irail kan me e pwilikihdi pwehn apwalih tehnpaso.+ Eri, mehn Israel koaros ahpw pahn rongada me ke wiahkinuhkalahr mehkot pwohsuwed rehn omwi papaho, oh irail kan me kin utung komwi pahn kehlailkihda.” 22 Irail eri kauwada impwal ehu pohn ihmwo ong Apsalom,+ Apsalom eri wendi rehn en eh pahpao pekehi kan+ mwohn mesen mehn Israel koaros.+

23 Nan rahn pwuko, re kin wiahki kaweid en Ahidopel+ duwehte* mahsen en Koht mehlelo. Ih duwen Depit oh Apsalom ara kin kesempwalki kaweid en Ahidopel koaros.

17 Ahidopel eri ndaiong Apsalom: “Menlau mweidohng ie I en pilada ohl 12,000 oh mweselda oh pwakihala Depit pwohnget. 2 I pahn kohla peiong ni ahnsou me e pwangada oh sohla angi*+ oh I pahn kamasakada; oh aramas koaros me iang ih pahn tangdoaui, oh nanmwarkio kelehpw me I pahn kemehla.+ 3 Eri I pahn kapwurehdo rehmwi aramas ako koaros. Ma ohl me komw raparapahkio pahn mehla, aramas ako koaros pahn pwurodo rehmwi. Aramas koaros eri pahn meleileidi.” 4 Apsalom oh ohl mah kan koaros en Israel pwungki koasoandio.

5 Ahpw Apsalom nda: “Menlau ekerodo Usai+ mehn Arko, oh kitail pil rong dahme e pahn nda.” 6 Usai eri kohdo rehn Apsalom. Apsalom eri ndaiong ih: “Iet kaweid me Ahidopel kihdahn. Kitail pahn idawehn eh kaweid? Ma soh, a ndaiong kiht dahme kitail pahn wia.” 7 Usai eri ndaiong Apsalom: “Kaweid me Ahidopel kihda sohte mwahu ong ahnsou wet!”+

8 Usai pil doulahte nda: “Komw mwahngih me omwi pahpao oh nah ohl akan me inenen kehlail,+ oh re uhdahn lingeringer duwehte pehr men me nah kan salongalahr nan mohs.+ Patehng met, omwi pahpao sounpei men,+ oh e sohte pahn pweidi rehn aramas akan. 9 Ahnsou wet e wie rukuruk nan ehu pwoaren paip akan* de ekei wasa tohrohr;+ oh ma ih me tepin kodohng pei, irail kan me rongada met pahn nda, ‘Aramas akan me ieiang Apsalom lohdier!’ 10 Pil ohl kommwad emen me eh mohngiong duwehte laion men+ pahn uhdahn masepwehkada, pwe mehn Israel koaros ese me omwi pahpao ohl kehlail men+ oh ohl akan me kin iang ih pil kommwad. 11 Iet ei kaweiden: Mehn Israel koaros en pokonpene rehmwi, sang Dan lel Peersipa,+ me uwen tohto duwehte pihken ni oaroahr kan,+ oh komwi me pahn kahluwairaillahng ni mahweno. 12 Kitail pahn pelianda ih wasa sohte lipilipil me e dierek ie, oh kitail pahn peiong ih duwehte pwoaik me kin mwerediong pohn pwehl; oh sohte emen irail pahn pitila, kaidehn ih de pil emen ohl akan me kin ieiang ih. 13 Ma e pahn pweieklahng nan kahnimw ehu, mehn Israel koaros pahn walahng sahl ni kahnimwo, oh kitail pahn karangkedilahng nan wahwo lao sohla kisin takai ehu luwehdi.”

14 Apsalom oh ohlen Israel koaros ahpw nda: “Kaweid en Usai mehn Arko mwahusang+ kaweid en Ahidopel!” Pwe Siohwa ketin koasoanedier en kasapwungehla kaweid mwahu en Ahidopel,+ pwe Siohwa en kak ketin kahpwalihala Apsalom.+

15 Mwuri Usai ahpw ndaiong samworo Sadok oh Apaiadar:+ “Iet me Ahidopel kaweidki Apsalom oh ohl mah kan en Israel, oh pil iet ei kaweiden. 16 Eri mwadang kadaralahng Depit rohng oh patohwanohng: ‘Dehr pweiekdi pwohnget nan wasahn kotehla Sordan kan* nan sapwtehno, ahpw komw anahne ketila palio, pwe nanmwarki oh aramas koaros me iang ih de kamakamala.’”+

17 Sonadan+ oh Ahimas+ kin mihmi Enrokel;+ eri lidu serepein men ahpw kohla oh ndaiong ira, ira ahpw kolahng ndaiong Nanmwarki Depit, pwe ira sohte men emen en kilang ara pahn pedolong nan kahnimwo. 18 Ahpw, mwahnakapw men kilangirahda oh ndaiong Apsalom. Ira eri mwadangete kohkohla lel imwen ohl emen nan Pahurim+ me pwarer ehu mi wasa me imweo kelepene. Ira eri doudihla loale, 19 oh en ohlo eh pwoudo ahpw perekipeseng mehn pweipwei ehu pohn pwarero oh wudekihdiong powe krein me sukusukdi; sohte me ese duwen met. 20 Nein Apsalom ladu ko kohla rehn liho ni imweo oh idek: “Ia ih Ahimas oh Sonadan?” Liho sapengki: “Ira douluhlla ni pihlo.”+ Ohl ako eri rapahkin ira ahpw sohte diar ira, irail eri pwurala Serusalem.

21 Mwurin ohl ako ar kohkohlahr, ira ahpw doudahsang nan pwarero oh kohla oh kairehki Nanmwarki Depit. Ira ahpw ndaiong ih: “Komw ketida oh mwadang kotehla pillapo, pwe iet ahn Ahidopel kaweid me uhwong komwien.”+ 22 Ni ahnsowohte Depit oh aramas koaros me iang ih ahpw uhda oh kotehla Sordan. Ni eh marainpeseng, sohte emen me luwehdi me saikinte kotehla Sordan.

23 Ni Ahidopel eh kilangada me eh kaweido sohte pweida, e ahpw kaunopada dongki men oh kohkohla ni imweo nan eh wasa.+ Mwurin eh kihong tohnimweo koasoandi kan,+ e ahpw lusiamala.*+ Eri e mehla oh seridi nan wasahn seridi en seme mehn mahs ako.

24 Ni ahnsowo, Depit samwalahr Mahanaim,+ a Apsalom kotehla Sordan iangahki ohlen Israel koaros. 25 Apsalom ahpw kihong Amasa+ en wiliandi Sohap+ oh wia kaunen karis en sounpei; Amasa iei nein ohlen Israel men me adaneki Idra, me wendi rehn nein Nahas serepein Apikail+ rien Seruaia, inen Sohapo. 26 Mehn Israel ko oh Apsalom kauwada imwarail impwal nan sapwen Kilead.+

27 Ni ahnsou me Depit lella Mahanaim, Sopi nein Nahas me kohsang Rappa+ nan sapwen mehn Ammon kan, Makir+ nein Ammiel me kohsang Lodepar, oh Parsilai+ mehn Kilead me kohsang Rokelim 28 ahpw wahdo lohs, peisin, sah pwehl, wihd, parli, pilawa amas, krein inihn, soangen pihns kei,* lendil, krein peleng, 29 sukehn loangalap, pwete, sihpw oh sihs. Irail wadohng Depit oh aramas ako me iang ih mepwukat koaros pwe irail en tungoale,+ pwehki re nda: “Aramas akan duhpeklahr, pwangadahr oh men nimpildahr nan sapwtehno.”+

18 Depit eri wadekedi ohl ako me iang ih oh kihong kaunen meh kid oh kaunen meh epwiki.+ 2 Oh Depit kadarpeseng aramas ako me iang ih ni pwihn siluh, silikis ehun pwihno mi pahn kaweid en Sohap,+ silikis ehu pahn kaweid en Apisai rien Sohap,+ nein Seruaia,+ oh silikis ehu pahn kaweid en Itai+ mehn Kahd. Nanmwarkio eri ndaiong aramas ako: “I pahn pil iang kumwail kohwei.” 3 Irail ahpw nda: “Komw dehr ketieila,+ pwe ma se pahn tang, re sohte pahn nsenohkin kiht; oh ma elep en kiht pahn mehla, re sohte pahn pil nsenohki, pwehki komwi pahrekiong kiht meh 10,000.+ Ihme kahrehda e pahn mwahu ma komw pahn kadarohng kiht sawas sang nan kahnimwo.” 4 Nanmwarkio eri ndaiong irail: “Dahme kumwail medewe me keieu mwahu, ih me I pahn wia.” Nanmwarkio eri uh limwahn wenihmw en kelen kahnimwo, oh ohl ako koaros ahpw kohkohieila wad epwiki oh kid. 5 Nanmwarkio eri ruwesehki Sohap oh Apisai oh Itai kaweid wet: “Dehr wiakauwe mwahnakapw Apsalom pwehki ngehi.”+ Aramas ako koaros rong ni nanmwarkio eh ruwese kaun akan koaros me pid duwen Apsalom.

6 Ohl ako eri kohieila nan mohso pwe ren tuhwong mehn Israel ko, oh mahweno wiawi nanwel en Epraim.+ 7 Aramas en Israel ko+ lohdier pahn nein Depit ladu ko,+ oh diren aramas kamakamala rahno—aramas 20,000. 8 Mahweno kohpeseng nan sahpwo pwon. Patehng met, aramas me mehkihla keper en nanwelo tohtohsang me mehkihla kedlahs rahno.

9 Apsalom eri tuhwong nein Depit ladu ko. Apsalom dakedake dongki men, dongkio ahpw tangala pahn lapalahn tuhke rarahn pwoat, oh moangeo tengala ni lapalahn tuhkeo, ih eri langalang nan wehwe* nindoken dongki me e dakeo tangatangte kohla. 10 Eri mie me kilangada met oh padahkihong Sohap:+ “Kilang! I kilangada Apsalom eh wie langalang ni lapalahn tuhke pwoat.” 11 Sohap eri sapengki ohl me padahkihong iho: “Ma ke kilang met, a dahme ke sou kemekihlahte wasao oh mweidohng en pwupwudiong nanpwelo? Eri I ahpw pahn perenki kihwei mwohni silper eisek oh ehu katengen.” 12 Ahpw ohlo ndaiong Sohap: “Mehnda ma I pil pahn alehkihdi* mwohni silper 1,000, I sohte kak ngapapadahng nein nanmwarkio pwutako, pwe kitail rongehr nanmwarkio eh ruwesehkin komwi oh Apisai oh Itai. ‘Sohte lipilipil ihs kowe, tetehk mwahnakapw Apsalom.’+ 13 Ma I sapeikiong oh kihsang eh mour, met sohte pahn kak rirsang nanmwarkio, oh ke sohte pahn doareiehla.” 14 Sohap eri nda: “I sohte pahn kauwehla mwahl ahnsou rehmw!” Ih eri ale ketieu silipwoat oh doakoahki mohngiong en Apsalom pwar ni eh wie momourte ni lapalahn tuhkeo. 15 Eri sounpapah ehk me weuwa nein Sohap dipwisoun mahwen ko ahpw kohdo oh doakoahki Apsalom neirail dipwisoun mahwen ko lao e mehla.+ 16 Sohap eri peuk mehn pepeuko,* ohl ako ahpw pwurodo sang ar pwakipwakih mehn Israel ko; Sohap eri likwerlahng irail en uhdi. 17 Irail ale Apsalom oh kesedilahng nan lapalahn pwoahr ehu nanwelo oh koasokehda lapalahn koasoakoasoak en takai ehu powe.+ Oh mehn Israel ko koaros ahpw tangalahng nan imwarail ko.

18 Eri ni ahnsou me Apsalom wie momourte, e kauwadahng pein ih uhr pwoat nan Wahu* en Nanmwarki,+ pwehki e nda: “Sohte nei pwutak me pahn kadakadaur edei.”+ Ih eri kihong uhro pein edeo, oh uhro adanekihla Uhr en Katamanpen Apsalom leledo rahnwet.

19 Nein Sadok pwutak Ahimas+ ahpw nda: “Menlau mweidohng ie mahs I en tangala oh kairehki nanmwarkio rohng wet, pwe Siohwa ketikihongehr ih pwung pahrek ni eh ketin kasaledekihala sang eh imwintihti kan.”+ 20 Ahpw Sohap ndaiong ih: “Ke sohte pahn wia sounkair rahnwet. Ke kak kairehki ih ehu rahn tohrohr, ahpw rahnwet, ke sohte pahn kairehki ih rohngo, pwehki sapwellimen nanmwarki pwutako me pwoulahr.”+ 21 Sohap eri ndaiong mehn Kus men:+ “Kohla ndaiong nanmwarkio dahme ke kilangehr.” Mehn Kuso eri poaridiong Sohap oh tangatangala. 22 Nein Sadok pwutak Ahimas pil pwurehng ndaiong Sohap: “Sohte lipilipil dahme pahn wiawi, menlau mweidohng ie I en pil pwakihala mehn Kuso.” Ahpw, Sohap nda: “Ia kahrepen omw pahn tangala, nei pwutak, ni eh sohte rohng me ke pahn pakairkihla?” 23 Ahimas pil pwurehng nda: “Sohte lipilipil dahme pahn wiawi, mweidohng ie I en kohla.” Sohap eri ndaiong ih: “Tang!” Ahimas eri tang nan ahl me kotehla sapwen Sordan, e ahpw daulihala mehn Kuso.

24 Ahnsowo Depit wie mwomwohd nanpwungen ewen kelen kahnimw riauo,+ oh sounsilasilo+ ahpw kodahlahng pohn ewen kehlo. Ih eri kilengla oh kilangada ohl emen me kelehpw tangatang kohdo. 25 Sounsilasilo eri werkidihla oh ndaiong nanmwarkio. Nanmwarkio ahpw nda: “Ma e kelehpw, mie rohng me e pahn pakairki.” Ni eh kerekerendohr, 26 sounsilasilo kilangada pil emen ohl wie tangatang kohdo. Sounsilasilo eri likwerlahng sounsilepen wenihmwo: “Kilang! Pil emen ohl tangatang kohdo!” Nanmwarkio eri nda: “Memenet pil pahn pakairkihdo rohng.” 27 Sounsilasilo eri nda: “I kak kilang me ohl me tiengo tangatang en Ahimas,+ nein Sadok.” Nanmwarkio eri nda: “Ohl mwahu men ih, oh e pahn wahdo rohng mwahu.” 28 Ahimas eri likwerkilahng nanmwarkio: “Mehkoaros mwahu!” Ih eri poaridiong nanpwelo mwohn nanmwarkio. Mwuri e nda: “Kaping en kohwong Siohwa omwi Koht, me ketikihdiong nin limwomwi aramas akan me uhwongada* ei kaun nanmwarki!”+

29 Nanmwarkio ahpw nda: “Mehkoaros mwahu rehn mwahnakapw Apsalom?” Ahimas eri nda: “I kilangada lapalahn mwoarong ni Sohap eh kadarodo sapwellimen nanmwarkio ladu oh sapwellimomwi laduet, ahpw I sohte ese dahkot mwo.”+ 30 Nanmwarkio eri ndaiong: “Keila, kesihnenda wasahn.” Ih eri keila oh kesihnenda wasao.

31 Mehn Kuso ahpw leledo,+ oh mehn Kuso ahpw nda: “Ei kaun nanmwarki en ketin karonge rohng pwoatet: Rahnwet Siohwa ketikidahr pwung pahrek sang ni eh ketin kasaledekkomwihala sang nan pehn irail akan koaros me uhwongadahr komwi.”+ 32 Nanmwarkio ahpw ndaiong mehn Kuso: “Mehkoaros mwahu rehn mwahnakapw Apsalom?” Mehn Kuso eri nda: “Sapwellimen ei kaun nanmwarki imwintihti kan koaros oh irail koaros me uhwongadahr komwi pwehn kauweikomwihla, en imwila duwehte mwahnakapwo!”+

33 Met uhdahn kapwunodehda nanmwarkio, oh e kohdahla nan pere laud me mi pohn ewen kehlo oh alialu sengiseng, ndinda: “Nei pwutak Apsalom, nei pwutak, nei pwutak Apsalom! Ma ngehi me mehla a kaidehn kowe, nei pwutak Apsalom, nei pwutak!”+

19 Pakair ahpw kolahng Sohap: “Nanmwarkio ketin sengisengki oh mwahmwahieiki Apsalom.”+ 2 Eri peren en kana* me wiawi rahno wekidekiong mwahiei ong aramas ako koaros, pwehki ar rongada me nanmwarkio mwahmwahieiki nah pwutako. 3 Aramas ako eri pwurala nan kahnimwo+ rahno sohte mweseisei duwehte aramas ako me namenekla pwehki arail tangasang mahwen. 4 Nanmwarkio perehla meseo oh wie sengiseng ni ngihl laud ndinda: “Nei pwutak Apsalom! Apsalom nei pwutak, nei pwutak!”+

5 Sohap eri pedolongala nan ihmwo rehn nanmwarkio oh nda: “Rahnwet komw ketin kasarowehdi sapwellimomwi ladu kan koaros me doarehla sapwellimomwi mour,* oh mouren* sapwellimomwi pwutak kan,+ sapwellimomwi serepein kan,+ sapwellimomwi likend kan, oh sapwellimomwi pekehi kan rahnwet.+ 6 Komw ketin poakohng irail kan me kin kailongkin komwi oh kailongki irail kan me kin poakohng komwi, pwe komw ketin kasaledahr ni sansal rahnwet me sapwellimomwi kaun akan oh ladu kan sohte kesempwal rehmwi, pwehki I ese ni mehlel me komwi pahn kupwurperenki ma Apsalom me momour rahnwet, a kiht koaros me mehla. 7 Eri ketida, ketieila oh kakehlahda* sapwellimomwi ladu kan, pwehki I patohwan kahukihla ni mwaren Siohwa me ma komw sohte pahn ketieila, sohte aramas emen pahn mihmihte rehmwi pwohnget. Met pahn suwediong komwi laudsang kahpwal koaros me lelohngehr komwi sang ni omwi pwulopwul leledo rahnwet.” 8 Nanmwarkio eri uhda kohla oh mwohndi ni ewen kelen kahnimwo, aramas koaros ahpw rongada: “Ahnsou wet nanmwarkio ketiket ni ewen kelen kahnimwo.” Aramas ako koaros eri pwaralahng mwohn nanmwarkio.

Ahpw mehn Israel ko tangdoaui, emenemen kolahng ni imwe.+ 9 Aramas koaros nan keinek koaros en Israel kin akahkamaipene, ndinda: “Nanmwarkio ketin doareikitailla sang atail imwintihti kan,+ oh e kapitkitailla sang mehn Pilisdia kan; a met e tangasang sahpwet pwehki Apsalom.+ 10 Oh Apsalom me kitail keiedier pwehn kaunkitailda+ melahr nan mahweno.+ Eri, dahme kumwail sohte wiahki mehkot pwehn kapwurehdo nanmwarkio met?”

11 Nanmwarki Depit kadarala rohng wet rehn samworo Sadok+ oh Apaiadar:+ “Koasoiong ohl mah kan en Suda+ oh nda, ‘Dahme kahrehda kumwail me pahn keieu mwuhr en kapwuredohng nanmwarkio nan tehnpese, ahnsou me pato en mehn Israel koaros leledohr rehn nanmwarkio nan tehnpeseo? 12 Kumwail uhdahn riei; kumwail kisehn tihkat oh udukei.* Dahme kahrehda kumwail me pahn keieu mwuhr en kapwuredohng nanmwarkio nan tehnpese?’ 13 Oh kumwa pahn ndaiong Amasa,+ ‘Kaidehn kowe kisehn tihkat oh udukei? Eri Koht en ketin kaloke ie oh pil wia laudsang met, ma ke sohte pahn wiahla nei kaunen karis en sounpei sang met kohla, wiliandi Sohap.’”+

14 Ih eri kalowehdi* mohngiong en mehn Suda koaros, oh re ileklahng nanmwarkio nda: “Komw ketin sapahldo, komwi oh sapwellimomwi ladu kan koaros.”

15 Nanmwarkio eri pwurala oh lella Sordan, oh mehn Suda kan kohdo Kilkal+ pwehn tuhwong nanmwarkio oh iang sewese kotehla Sordan. 16 Eri Simei+ nein Kera, mehn Pensamin sang Pahurim, ahpw mwadangdihla iangahki ohlen Suda kan pwehn tuhwong Nanmwarki Depit, 17 oh ohl 1,000 sang Pensamin me iangih. Pil Saipa,+ sounpapah men nan imwen Sohlo, iangahki nah pwutak 15 oh ladu 20, tiengdihla Sordan mwohn nanmwarkio. 18 E* kotehla wasahn kotehla pillapo pwehn wahdo tohnimwen nanmwarkio palio pillapo oh pil wiahda mehkoaros me nanmwarkio mwahuki. Ahpw ni nanmwarkio eh pahn kotehla Sordan, Simei nein Kera ahpw poaridi mwowe. 19 E ahpw ndaiong nanmwarkio: “Ei kaun en ketin mahkikihong ie dihp me I wiadahr, oh komw dehr tamataman sapwung me sapwellimomwi laduet wiadahr+ ni rahn me ei kaun nanmwarki ketieisang Serusalem. Nanmwarki en dehr ketin kupwukupwure, 20 pwe sapwellimomwi laduet uhdahn ese me e dipadahr; kahrehda rahnwet, nanpwungen tohnimwen Sosep pwon, ngehi me tepin patohdidohng tuhwong ei kaun nanmwarki.”

21 Eri ni ahnsowohte Apisai+ nein Seruaia+ ahpw nda: “Simei sou anahne kamakamkihla met, pwehki e keriahla sapwellimen Siohwa me keidio?”+ 22 Depit ahpw nda: “Dah amwahiong met, kumwa nein Seruaia,+ pwe kumwa en uhwong ie rahnwet? Anahne emen en kamakamala rahnwet nan Israel? Pwehda, I sehse me ngehi me nanmwarkien Israel rahnwet?” 23 Nanmwarkio eri ndaiong Simei: “Ke sohte pahn mehla.” Oh nanmwarkio kahukihong ih.+

24 Mepiposed,+ nein nein Sohl pwutak, pil kohdihla pwehn tuhwong nanmwarkio. E saikinte widenda neh ko* de sehksang eh alis de lopworada eh likou ko sang ni rahn me nanmwarkio mwesel lel rahn me e pwurodo ni popohlo. 25 Ni eh kolahng* Serusalem pwehn tuhwong nanmwarkio, nanmwarkio ahpw ndaiong ih: “Mepiposed, dahme ke sohte iangkiniehla?” 26 Ih eri sapeng nda: “Ei kaun nanmwarki, nei laduwo+ pitiehdi. Pwe sapwellimomwi laduet ndahier, ‘I pahn kaunopada nei dongkio pwe I en dakehda oh iang nanmwarkio kohla,’ pwehki sapwellimomwi laduet sohte kak aluhki mwahu neh kan.+ 27 E ahpw karaunlikamwih sapwellimomwi laduet rehn ei kaun nanmwarki.+ Ahpw ei kaun nanmwarki rasehng tohnleng en Koht mehlelo, eri komw kupwurkalahngan oh ketin wia dahme pahn mwahu ong komwi. 28 Tohnimwen ei pahpao pwon kakete kamakamala rehn ei kaun nanmwarki, ahpw komwi ketikihdi sapwellimomwi laduet nanpwungen irail kan me kin iang tungoal ni sapwellimomwi tehpel.+ Eri mie ei pwuhng en kalaudehla ei pekipek rehn nanmwarki?”

29 Nanmwarkio ahpw ndaiong ih: “Dahme ke wiewiahki soangen koasoi wet? I koasoanedier me kowe oh Saipa pahn ahnekipene mwahto.”+ 30 Mepiposed eri sapengki nanmwarkio: “Komw ketin mweidohng en ahnekihla koaros, pwehki ei kaun nanmwarki ketidohngehr ni tehnpeseo ni popohl.”

31 Parsilai+ mehn Kileado ahpw kohsang Rokelim kohdihla Sordan pwehn iang sewesehla nanmwarkio lel Sordan. 32 Parsilai inenen mahlahr, sounpar 80, oh ih me kin kihong nanmwarkio mwenge ahnsou me e kin mihmi Mahanaim,+ pwehki ih ohl emen me inenen kepwehpwe. 33 Nanmwarkio eri ndaiong Parsilai: “Iangiehda kohla palio, oh ke pahn kin iang ie mwenge nan Serusalem.”+ 34 Parsilai ahpw ndaiong nanmwarkio: “Rahn* depe luwe nan ei mour me I en iangki nanmwarkio ketidahla Serusalem? 35 Rahnwet I sounpar 80.+ I pahn kak ese wekpeseng en me mwahu oh me suwed? Sapwellimomwi laduet pahn kak songada dahme I kin tungoale oh nim? I pahn kak rongorongete ngilen sounkoul ohl oh lih akan?+ Eri, mehnda sapwellimomwi laduet en pil katautauwihala ei kaun nanmwarki? 36 E itarte sapwellimomwi laduet eh kak iang kahredohng nanmwarkio Sordan. Ia kahrepen nanmwarkio eh pahn ketin pwainkihong ie keting wet? 37 Komw kupwurkalahngan oh ketin mweidohng sapwellimomwi laduet en pwurala, oh mweidohng ie en mehla nan ei kahnimw limwahn wasahn seridi en ei pahpa oh ei nohno.+ Ahpw iet sapwellimomwi ladu Simam.+ Mweidohng en iang ei kaun nanmwarki kotehla pillapet, oh komw ketin wiahiong ih dahme komw ketin kupwurki.”

38 Nanmwarkio eri nda: “Simam pahn iang ie kotehla pillapet, oh I pahn wiahiong ih dahme pahn mwahu ong uhk; sohte lipilipil dahme ke pahn peki rehi, I pahn wiahiong uhk.” 39 Aramas ako koaros eri tepida kotehla Sordan, oh ahnsou me nanmwarkio pahn kotehla pillapo, nanmwarkio metik Parsilai+ oh kapaiahda ih; oh Parsilai pwurala ni imweo. 40 Ni ahnsou me nanmwarkio kotehla pillapo kolahng Kilkal,+ Simam pil iang ih kotehla. Aramas en Suda kan koaros oh elep en aramas en Israel kan eri walahng nanmwarkio palio pillapo.+

41 Ohlen Israel koaros eri kohla rehn nanmwarkio oh ndaiong ih: “Dahme kahrehda riat ohlen Suda kan kawaikihsang komwi oh wadohng nanmwarkio oh tohnimwe kan palio Sordan, iangahki sapwellimen Depit ohl akan koaros?”+ 42 Ohlen Suda ko koaros eri sapengki ohlen Israel ko: “Pwehki at peneinei nanmwarkio.+ Dahme kumwail lingeringerkihda? Mie mehkot se tungoalehla me nanmwarkio me ketin pwainda, de mie kisakis ehu me kohwong kiht?”

43 Ohlen Israel ko ahpw sapengki ohlen Suda ko: “Kiht keinek eisek oh se ahneki pwuhng laudsang kumwail ong Depit. Eri dahme kahrehda kumwail mwamwahlkinkitki? Kaidehn kiht me pahn tepin kasapahldo nanmwarkio?” Ahpw lokaiahn ohlen Suda ko powehdi* ahn ohlen Israel ko.

20 Eri mie ohl emen me adaneki Sipa+ nein Pikrai mehn Pensamin me kin wiahda kahpwal. E peuk mehn pepeuko*+ oh nda: “Sohte pwaisatail rehn Depit, oh sohte atail sohso rehn nein Sehsi pwutak.+ Mehn Israel kan, kumwail koaros pwuralahng amwail koht akan!”*+ 2 Ohlen Israel koaros eri sohla kin idawehn Depit pwe ren idawehnla Sipa nein Pikrai;+ ahpw ohlen Suda kan ieiangete arail nanmwarkio, sang ni Sordan lella Serusalem.+

3 Ahnsou me nanmwarki Depit lel ni tehnpeseo nan Serusalem,+ e ahpw ale pekehi ehk me e kihdi pwehn apwahpwalih tehnpeseo,+ oh kihong irail nan ihmw ehu me mie silepe. E kin kihong irail mwenge, ahpw e sohte kin wendi rehrail.+ Re pahn sensel lao lel rahn me re pahn mehla, re momour duwehte liohdi kei, mendahki mie arail pwoud emen me wie momour.

4 Nanmwarkio eri ndaiong Amasa:+ “Ekerpene ohlen Suda kan rehi, dehr pwandasang rahn siluh, oh ke pil pahn iang mi wasaht.” 5 Amasa eri kohla ekerpene mehn Suda kan, ahpw e kohdo pwandasang ahnsou me kileldiong ih. 6 Depit eri ndaiong Apisai:+ “Sipa+ nein Pikrai kakete wiahiong kitail mehkot suwed me laudsang me Apsalom wia.+ Ale nein omw kaun ladu kat oh pwakihala, pwe e de diarada kahnimw kehl kehlail kan oh pitsang kitail.” 7 Nein Sohap ohl akan,+ mehn Kered kan, mehn Peled kan,+ oh ohl kehlail koaros eri pwakihala ih; re mweselsang Serusalem pwehn pwakih Sipa nein Pikrai. 8 Ni ahnsou me re kerenlahng ni lapalahn takai ehu nan Kipeon,+ Amasa+ ahpw kohla pwehn tuhwong irail. Eri Sohap likawih eh likoun mahwen, oh mie nah kedlahs me mi nan kidipe me pirapiriong ni lukope. Ni eh kahkala mwowe, kedlahso pwupwuiei.

9 Sohap ahpw ndaiong Amasa: “Ia iromw riei?” Sohap eri kapahla peh palimaun oh koledi en Amasa aliso mwomwen me e pahn metik. 10 Amasa sohte tehk mwahu kedlahs me mi nan pehn Sohapo, oh Sohap doakoahkihdi kapehdeo,+ oh mwasahle ko widekdiong nanpwelo. E sohte anahne pwurehng doakoah; pak ehute itar en kemehla ih. Sohap oh Apisai rie pwutak, eri pwakihala Sipa nein Pikrai.

11 Emen nein Sohap mwahnakapw ko kesikesihnen limwah oh nda: “Mehmen me iang en Sohap eh pali oh mehmen me wia sapwellimen Depit, en idawehnla Sohap!” 12 Ahnsowo Amasa wonohn nan eh nta nanwerengen ahlo. Ni mwahnakapwo eh kilangada me koaros kin uhdi, e kamwakidasang Amasa nanialo oh kihlahng nan mwahto. Ih eri kesedahng likou ehu powe, pwehki e kilang me aramas ako kin uhdi ni ar lella reh. 13 Mwurin eh kamwakidasang ih nanialo, ohl ako koaros ahpw idawehnla Sohap pwe ren pwakihala Sipa+ nein Pikrai.

14 Sipa kotehla sapwen keinek en Israel kan koaros kohla Eipel en Ped-maaka.+ Mehn Pikrai ko pokonpene oh pil idawehnla ih.

15 Sohap oh nah ohl akan* lella mwo oh kapilpene Sipa nan Eipel Ped-maaka oh wiahda koasoakoasoak ehu limwahn kahnimwo, pwehki kahnimwo mi nanwerengen koasoakoasoak ehu. Oh ohl koaros me iang Sohap ahpw weweir pahn kehlo pwehn karangkehdi. 16 Lih loalokong men ahpw likwer sang ni kelen kahnimwo, nda: “Kumwail rong mahs ohl ako, kumwail rong! Menlau ndaiong Sohap, ‘Ketido wasaht, oh mweidohng ie I en patohong komwi.’” 17 Ih eri kohla reh, oh liho nda: “Komwi me Sohap?” E sapengki: “Ngehi met.” Liho eri ndaiong ih: “Komw karonge mahs pato en sapwellimomwi laduet.” Sohap ahpw nda: “I wie rongorong.” 18 Liho eri doula nda: “Mahso re kin ahnsou koaros nda, ‘Mweidohng ren kalelapak nan kahnimw en Eipel,’ oh arail kahpwalo uhdahn pahn epwella. 19 I weliwelian mehn Israel kan me kin meleilei oh lelepek. Komw kin songosong en kauwehla kahnimw ehu me rasehng nohno men nan Israel. Dahme komw pahn kauwehkihla* sapwellimen Siohwa sohso?”+ 20 Sohap eri sapengki: “I sohte kak medewehda I en kauwehla oh kamwomwala. 21 Kaidehn ih duwen men. Ahpw, mie ohl emen me adaneki Sipa,+ nein Pikrai sang wasa nahnahn Epraim+ me uhwongadahr* Nanmwarki Depit. Ma ke pahn kihong ie ohl menet, I pahn pweiekla sang kahnimw wet.” Liho eri ndaiong Sohap: “Kilang! Moangeo pahn lekdekdihwei rehmw sang pohn kehlo!”

22 Ni ahnsowohte lih loalokongo ahpw kohla rehn aramas ako koaros, oh re lupukasang moangen Sipa nein Pikrai oh kesehdihla rehn Sohap. Ih eri peuk mehn pepeuko, irail eri kohkohpeseng sang kahnimwo, emenemen kolahng ni imwe;+ a Sohap pwurala Serusalem rehn nanmwarkio.

23 Eri Sohap me kaunen karis en sounpei en Israel pwon;+ Penaia+ nein Sehoiada+ me kaunen mehn Kered oh mehn Peled kan.+ 24 Adoram+ me kaunen irail kan me ruwesiong wia doadoahk idihd kan ong nanmwarkio; Seosopat+ nein Ahilud me wia sounnting. 25 Sihpa me sekteri; a Sadok+ oh Apaiadar+ me wia samworo kan. 26 Oh Aira mehn Sair pil wiahla nein Depit kaun lapalap.*

21 Eri ni mwehin Depit lehk lapalap ehu+ ahpw wiawi sounpar siluh. Depit eri peki sawas rehn Siohwa, oh Siohwa ketin mahsanih: “Sohl oh tohnimwe pwukoahkihdi dipen kamaramas, pwehki eh kemehla mehn Kipeon ko.”+ 2 Nanmwarkio eri ekerpene mehn Kipeon kan+ oh koasoiong irail. (Eri, mehn Kipeon kan kaidehn uhdahn mehn Israel, ahpw mehn Amor kei+ me luhwehdi, oh mehn Israel kan kahukilahr me re pahn mweidohng ren mourla,+ ahpw Sohl songosong kamwomwirailla pwehki eh ngoangki sewese mehn Israel oh Suda kan.) 3 Depit ndaiong mehn Kipeon kan: “Dahme I pahn wiahiong kumwail, oh ia duwen ei kak wiahda tomw, pwe kumwail en kapaiahda sapwellimen Siohwa aramas akan?”* 4 Mehn Kipeon kan eri ndaiong ih: “Me pid Sohl oh eh peneinei, kaidehn silper de kohl me se pekipeki;+ se sohte pil kak kemehla aramas emen nan Israel.” Depit ahpw nda: “Sohte lipilipil dahme kumwail pahn nda, I pahn wiahiong kumwail.” 5 Irail eri ndaiong nanmwarkio: “Ohl me song en kemeikitala oh koasoanehdi en kamwomwkitala pwe sen dehr momour ekis wasa nan sapwen Israel+— 6 komw ketikidohng kiht nah pwutak isimeno. Se pahn langahda paliwararail mehla kan*+ mwohn silangin Siohwa nan Kipea,+ wasa me Sohl, sapwellimen Siohwa me pilipildahro kin koukousoan ie.”*+ Nanmwarkio eri nda: “I pahn kihong kumwail irail.”

7 Ahpw nanmwarkio poakehla Mepiposed,+ nein Sonadan, me nein Sohl, pwehki inou nanpwungen Depit oh Sonadan,+ nein Sohl pwutak, me ira kahukihla mwohn silangin Siohwa. 8 Nanmwarkio eri ale Armoni oh Mepiposed, pwutak riemen me Rispa+ nein Aiah serepeino wiahiong Sohl, oh pil pwutak limmen me Maikal+ nein Sohl serepeino wiahiong Adriel,+ nein Parsilai mehn Apel-mehola. 9 Ih eri kihong irail mehn Kipeon ko, oh re langahda paliwararail mehla ko pohn nahnao mwohn silangin Siohwa.+ Irail koaros me isimeno wiahkinteieu mehla; irail kamakamala ni keieun rahn en ahnsoun dolung, ni tepidahn ahnsoun dolung parli. 10 Rispa+ nein Aiah serepeino eri ale likoun nsensuwed* oh perekipeseng pohn takaio sang ni tepidahn ahnsoun dolung lao keteu mwerediong pohn paliwar ko sang nanleng; e sohte mweidohng menpihr en pahnlahng kan en sok pohrail ni rahn de pil mahn lawalo kan en nan mwahto en kohdo karanih irail nipwong.

11 Depit rongada dahme en Sohl eh pekehio Rispa, nein Aiah serepein wia. 12 Depit eri kohla oh ale tihn Sohl oh tihn nah pwutak Sonadan sang rehn kaun akan* en Sapes-kilead,+ me pirapahsang tih ko nan wasahn tuhpenehn kahnimw en Ped-san, wasa me mehn Pilisdia kan langairailda ie ni rahn me mehn Pilisdia ko kemehla Sohl nan Kilpoa.+ 13 Depit eri wahdahla tihn Sohl oh tihn nah pwutak Sonadan sang wasao, oh re pil kihpene tihn ohl akan me iang kamakamala.*+ 14 Irail eri sarepedi tihn Sohl oh tihn nah pwutak Sonadan nan sapwen Pensamin nan Sihla,+ nan sousoun seme Kis.+ Mwurin arail wiahda soahng koaros me nanmwarkio ruwesehkin irail, Koht ketin karonge arail pekipek kan ong sahpwo.+

15 Mahwen pil pwurehng wiawi nanpwungen mehn Pilisdia kan oh mehn Israel kan.+ Depit oh nah ladu ko eri kohdihla oh peiong mehn Pilisdia kan, Depit ahpw pwangada. 16 Emen kadaudok en mehn Repa+ me adaneki Ispipenop, me nah ketieu prons pwoat toutouki sekel 300*+ oh kapwatki kedlahs kapw pwoat, koasoanedier en kemehla Depit. 17 Apisai+ nein Seruaia ahpw mwadangete kohla sewese Depit,+ oh kemehla mehn Pilisdiao. Ahnsowo nein Depit ohl akan kahukihong ih inou wet: “Komw solahr pahn iang kiht kohla mahwen!+ Komw dehr kakunla lamp en Israel!”+

18 Mwurin met, mahwen pwurehng wiawihong mehn Pilisdia kan+ nan Kop. Ahnsowo Sippekai+ mehn Usao kemehla Sap, emen kadaudok en mehn Repa ko.+

19 Oh mahwen pwurehng wiawihong mehn Pilisdia ko+ nan Kop, oh Elanan, nein Saare-orekim mehn Pedleemo kemehla Kolaiad mehn Kahd. Nah ketieuwo duwehte tuhke reirei pwoat me sounpahda likou kan kin doadoahngki.+

20 Mahwen pil pwurehng wiawi nan Kahd, wasa me ohl lapala men kin mi ie. Sendin peh kan meh 6 oh sendin neh kan meh 6, patpene koaros meh 24; oh e pil wia kadaudok en mehn Repa.+ 21 E kin kepikepitki Israel.+ Sonadan nein Simei,+ rien Depito eri kemehla ih.

22 Irail meh pahmen pwukat iei kadaudok en mehn Repa nan Kahd, oh Depit oh nah ladu kan me kemeirailla.+

22 Oh Depit patohwanohng Siohwa mahsen en melkahka pwoatet+ ni rahn me Siohwa ketin kapitala ih sang nan pehn eh imwintihti kan koaros+ oh sang nan pehn Sohl.+ 2 E patohwan:

“Siohwa iei ei paipalap oh ei wasahn ruk kehlail+ oh Ih me ketin kapitiehla.+

Oh wasa me I kin tangala ie,+ ei sounkomour;+ komwi me ketin doareiehsang tiahk lemei.

11 E ketin dake kerup men+ oh ketin pipihr kohdo.

E ketin pwarodo ni eh ket pohn pehnpihr en ngehn emen.*+

13 Mwoalus okohk lullul sang ni marain me mi mwohn silangi.

E ketin wia mehn sansar ehu ong irail koaros me kin rukula reh.+

32 Pwe ihs me Koht palilahsang Siohwa?+

Oh ihs me paip likin atail Koht?+

44 Komw pahn ketin doareiehsang ei aramas akan me kin kauwe ie.+

47 Siohwa ketin ieias! Kaping ong ei Paip!+

Ei Koht, paip en komour en ketin lapalapala.+

23 Met iei kaimwiseklahn en Depit koasoi kan:+

 5 Tohn ei peneinei* sou duwehte met mwohn silangin Koht?

8 Iet akan eden nein Depit sounpei kehlail kan:+ Sosep-passeped mehn Takemon, me kaunen meh silimeno.+ Ehu ahnsowo, e kemehkihla nah ketieuwo aramas daulih 800. 9 Mwurin ih iei Eliesar+ nein Dodo,+ nein Ahoi, emen kisehn sounpei kehlail silimeno me iang Depit ni arail kepikepitki mehn Pilisdia ko. Re pokonpene ong mahweno wasao, oh ni ohlen Israel ko ar pweiekla sang irail, 10 e sokedi tengeteng oh kin kemekemehla mehn Pilisdia ko lao peho daula oh dengkihla eh kolokol kedlahso.+ Eri, Siohwa ketin kahrehiong irail en uhdahn kana* rahno,+ oh sounpei ko idawehnla ih pwehn kihsang dipwisou kan rehn me kamakamalahr ako.

11 Mwurin ih iei Sammah nein Akee mehn Arar. Mehn Pilisdia ko pokonpene nan Lihai, wasa me mie pelien sahpw ehu me diren lendil; oh sounpei ko tangdoaui pwehki mehn Pilisdia ko. 12 Ahpw e sokedi tengeteng nanwerengen mwahto oh kin doandoare, oh pil kemekemehla mehn Pilisdia ko, Siohwa eri ketin kahrehiong irail en uhdahn kana.*+

13 Meh silimen sang nanpwungen kaun 30 kohdihla rehn Depit ni pwoaren paip en Adullam ni ahnsoun dolung,+ oh mehn Pilisdia ko kauwada imwarail impwal nan Wahun* Repaim.+ 14 Ni ahnsowo Depit mi nan wasahn ruk kehlailo,+ oh kahnimpwal en mehn Pilisdia ehu mihmi nan Pedleem. 15 Depit eri kasalehda dahme e mwahuki: “I mentehno nimala ekis pilen pwoaren nahk pihl me mi ni ewen kelen Pedleem!” 16 Sounpei kehlail silimeno eri nantihlong nan kahnimpwal en mehn Pilisdia ko oh idipada pihl sang nan pwoaren nahk pihl me mi ni ewen kelen Pedleem oh wadohng rehn Depit; ahpw e sohte men nim pihlo oh wudekihla mwohn silangin Siohwa.+ 17 E ahpw nda: “Maing Siohwa, I sohte kak medewehda I en wia met! Ia duwe, I pahn nim ntahn+ ohl pwukat me kihong arail mour* nan keper?” Ih eri sohte nim pihlo. Ih mepwukat me nah sounpei kehlail silimeno wia.

18 Apisai+ rien Sohap nein Seruaia+ pil wia kaunen meh silimen; e kemehkihla nah ketieuwo aramas daulih 300, oh e ndandla duwehte meh silimeno.+ 19 Mendahki ih me keieu ndand nanpwungen irail meh silimeno oh ih me arail kaun, e sohte pahrekiong tepin meh silimeno.

20 Penaia+ nein Sehoiada iei ohl kommwad men me wiadahr soangen wiewia kommwad kei nan Kapseel.+ E kemehla nein Ariel en Mohap nah pwutak riemen oh doudihla nan pwarer ehu ni ahnsoun sinoh oh kemehla laion emen.+ 21 E pil kemehla lapalahn ohlen Isip men. Mendahki ohlen Isipo kolokol nah ketieuwo, e peikihong ih lepin tuhke pwoat oh adihasang ketieuwo nan pehn mehn Isipo oh kemehkihla ketieuwo. 22 Ih soahng pwukat me Penaia nein Sehoiada wiahda, oh e ndand duwehte sounpei kehlail silimeno. 23 Mendahki e inenen ndand sang meh siliakano, e sohte pahrekiong meh silimeno. Ahpw Depit idihada ih en kin apwahpwalih silepe ko.

24 Asahel+ rien Sohap iang kisehn meh siliakano: Elanan nein Dodo sang Pedleem,+ 25 Sammah mehn Eirod, Elika mehn Eirod, 26 Eles+ mehn Pedpelet, Aira+ nein Ikkes mehn Tekoa, 27 Apieser+ mehn Anadod,+ Mepunnai mehn Usa, 28 Sahlmon mehn Ahoi, Maharai+ mehn Netopa, 29 Elep nein Paanah mehn Netopa, Itai nein Ripai mehn Pensamin sang Kipea, 30 Penaia+ mehn Piradon, Iddai sang nan wahun Kaas kan,+ 31 Apialpon mehn Ped-arapa, Asmaped mehn Pahurim, 32 Eliapa mehn Saalpim, nein Sasen pwutak kan, Sonadan, 33 Sammah mehn Arar, Aaiam nein Sarar mehn Arar, 34 Elipelet nein Ahspai me iei nein mehn Maakad, Eliam nein Ahidopel+ mehn Kailo, 35 Esro mehn Karmel, Paarai mehn Arepia, 36 Ikal nein Nadan sang Sohpa, Pani mehn Kad, 37 Selek mehn Ammon, Naharai mehn Peerod, sounwa tehtehn mahwen ong Sohap nein Seruaia, 38 Aira mehn Idri, Karep mehn Idri,+ 39 oh Uraia+ mehn Id—koaros meh 37.

24 Siohwa ketin pwurehng engiengda pahn Israel+ ni ahnsou me emen kamwakidada Depit en uhwongirailda oh nda: “Kohwei wadekedi+ mehn Israel oh Suda.”+ 2 Eri, Nanmwarkio ahpw ndaiong Sohap,+ kaunen karis en sounpei me mihmi reho: “Menlau kohwei rehn keinek koaros en Israel, sang Dan lel Peersipa,+ oh kilelehdi aramas akan, pwe I en ese ia uwen tohtohn aramas akan.” 3 Sohap ahpw ndaiong nanmwarkio: “Siohwa omwi Koht en ketin kadirehla aramas akan pak 100, oh silangin ei kaun nanmwarki en mahsanih duwen met, ahpw dahme kahrehda ei kaun nanmwarki kupwurki wia soahng wet?”

4 Ahpw en nanmwarkio koasoi kan kehlail sang en Sohap oh kaunen karis en sounpei kan. Sohap oh kaunen karis en sounpei ko eri kohieila sang mwohn nanmwarkio pwe ren kilelehdi aramas en Israel kan.+ 5 Irail kotehla Sordan oh kauwada imwarail impwal kan nan Aroer,+ ni palimaun* en kahnimw me mi nanwerengen wahwo, oh re kohla lel sapwen Kad, oh douluhllahng Saser.+ 6 Mwurin mwo, irail kohla Kilead+ oh sapwen Tahtim-odsai oh douluhllahng Dan-saan oh pidekla Saidon.+ 7 Irail ahpw kohla lel ni ihmw laud kehl kehlailo nan Dair+ oh pil kahnimw koaros en mehn Ip+ oh mehn Kenan kan, oh me keieu mwuhr Peersipa me mi Nekep+ nan Suda.+ 8 Eri, irail kohla nan sahpwo pwon oh lella Serusalem mwurin sounpwong duwau oh rahn 20. 9 Sohap eri kihong nanmwarkio uwen tohtohn aramas me kileldier. Sounpei en Israel me kin doadoahngki kedlahs lel meh 800,000, oh ohlen Suda meh 500,000.+

10 Ahpw mohngiong en* Depit koluhla+ mwurin e wadekedier aramas ako. Depit eri patohwanohng Siohwa: “I wiadahr dihp+ laud ni ei wia met. Eri, Maing Siohwa, komw ketin kalahngan oh mahkohng dipen sapwellimomwi laduet,+ pwe I wiadahr mwekid ehu me uhdahn pweipwei.”+ 11 Ni ahnsou me Depit pwourda nimenseng, sapwellimen Siohwa mahsen kodohng soukohp Kad,+ nein Depit sounkilang kaudiahlo, mahsanih: 12 “Kohla oh ndaiong Depit, ‘Iet me Siohwa ketin mahsanihen: “I pahn kihong uhk pilipil siluh. Pilada me I pahn kihong uhk.”’”+ 13 Kad eri kohla rehn Depit oh ndaiong ih: “Ia duwe, lehk lapalap en wiawi sounpar isuh nan sapwomwien?+ De komw pahn tangatangasang omwi imwintihti erein sounpwong siluh ni arail kin pwakipwakihiuk?+ De soumwahu lusulus en wiawihki rahn siluh nan sapwomwien?+ Eri medemedewe mwahu dahme I pahn anahne patohwan sapengki Mehmeno me ketin kadariehdo.” 14 Depit eri ndaiong Kad: “Met uhdahn kansensuwed ong ie. Menlau dehr mweidohng aramas en kalokei ie;+ mweidohng Siohwa en ketin kalokei kitail+ pwehki sapwellime kadek kalahngan me mwuledek.”+

15 Siohwa eri ketin kadaridiong pohn Israel soumwahu lusulus ehu+ sang nimenseng lel ni ahnsou me kileldier, me kahrehda aramas 70,000 sang Dan lella Peersipa+ mehla.+ 16 Ni tohnlengo eh kapalahng peho Serusalem pwehn kasohrehla, Siohwa ahpw ketin koluhkihla* kahpwal wet,+ oh e mahsanihong tohnlengo me wahdo kahpwalo: “E itarehr! Kihdi pehmwen.” Sapwellimen Siohwa tohnlengo karanih en Arauna+ mehn Sepuso+ eh wasahn kihsang kilin krein.

17 Ni Depit eh kilangada tohnlengo me kemekemehla aramas ako, e ahpw patohwanohng Siohwa: “Ngehi me dipada, oh ngehi me wiahda sapwung; ahpw sihpw pwukat+—dahme re wiadahr? Komw kupwurkalahngan oh ketin mweidohng nin limomwi en uhwong ie oh peneinei en ei pahpao.”+

18 Kad eri kohla rehn Depit rahno oh ndaiong ih: “Kohdahla oh kauwada ehu pei sarawi ong Siohwa pohn en Arauna mehn Sepuso eh wasahn kihsang kilin krein.”+ 19 Depit eri kohdahla nin duwen dahme Kad ndao, duwehte me Siohwa ketin ruweseo. 20 Ni ahnsou me Arauna kilengdihla oh kilangada nanmwarkio oh nah ladu ko ar kohkohdahla reh, Arauna ahpw mwadangete kohieila oh poaridiong nanpwelo mwohn nanmwarkio. 21 Arauna eri idek: “Dahme ei kaun nanmwarki ketikihdohki rehn sapwellime laduet?” Depit eri sapengki: “Pwehn pwainsang uhk wasahn kihsang kilin kreino pwe I en kauwada ehu pei sarawi ong Siohwa, pwe kalokolok me kohwong aramas akan en kak uhdi.”+ 22 Arauna ahpw ndaiong Depit: “Ei kaun nanmwarki en ketikihda oh meirongkihla nin duwen me e ketin kupwurki.* Iet kou kan mehn wia meirong isihs oh mehn wurahdeket oh mehn wisik en kou ko mehn wia tuwi. 23 Maing nanmwarki, mepwukat koaros Arauna patohwanohng nanmwarki.” Arauna eri ndaiong nanmwarkio: “Siohwa omwi Koht en ketin kupwurei komwi.”

24 Ahpw, nanmwarkio ndaiong Arauna: “Soh, I anahne pwainsang uhk ni uwen pweipwei ehu. I sohte pahn meirongkihong Siohwa ei Koht meirong isihs me I sohte pwainda.” Depit eri pwainkihda wasahn kihsang kilin kreino oh kou kan silper sekel* 50.+ 25 Oh Depit kauwada pei sarawi ehu+ ong Siohwa wasao oh wiahda meirong isihs kan oh meirong en kaminimin kan. Siohwa eri ketin sapengala pekipek kan ong sahpwo,+ oh kalokoloko me kohwong Israel ahpw uhdi.