Kalokolok 10

KILANG kilel pwukat. Ehu ehu kilel pwukat kin kasalehda kalokolok kan me Siohwa wiaiong Isip. Nan kilel keieu ke kak kilang Aaron wetih Pillap Nail ki ah sokon. Ni ah wia met, pilen pillapo pwon wiahla inta. Mwahmw akan mehla, oh pillapo pwon pwoh suwed.

Mwuhri, Siohwa kahreong kairu kan en pwarada sang nan Pillap Nail. Re mihla wasa koaros—nan wasahn wia mwenge, nan mehn wia mwenge, nan wasahn wendi—wasa koaros. Ni en kairu pwukat mehla mehn Isip kan kihpene kasokada wasa koaros, oh sahpwo uhdahn pwoh suwedkihla ahr matala.

Aaron eri wetih pohn pwel nah sokon, oh pwel pahr wiahla kisin mahn tik. Mahn tik pwukat keikei. Mahn tik pwukat iei kasiluh en kalokolok ong sahpwen Isip.

Kalokolok pwukat kin suwed ong mehn Isip kan kelehpw, ahpw sohte lel ong mehn Israel kan. Kapahieu en kalokolok iei loahng lap me kadirehla ihmwen mehn Isip kan. Kalokolok kalimau iei ong neirail mahn kan. Neirail kou oh sihpw oh kuht kan mehlahr.

Mwuhri, Moses oh Aaron alehda ekei pehs oh kasedahla nan wewe nan kisinieng. Met kahrehda aramas oh mahn kens. Met kalokolok kawenou.

Mwehrin met Moses kaudala peh nanleng, oh Siohwa kadarodo melimel, kisinieng oh keteuki ais kekeluwak. Met ihme keieu suwed en melimel me lel Isip.

Kawaluh en kalokolok iei mahn akan me kin kangala tehn tuhke, mensiek. Saikinte sang mahs kohkohdo lel met soahngen tohto en mensiek. Re kangala soahng koaros me saikinte kasohrala.

Kaduau en kalokolok iei rotorot. Rahn siluh rotorot kipehdi sahpwo, ahpw marain kin mi rehn mehn Israel kan.

Kaimwisekelahn kalokolok, Koht mahsanih ong sapwellime aramas akan en kadingidingki inta en kuht pwul de sihmpwul ni mesen did en ihmwarail kan. Tohnleng en Koht ahpw pahn pihr pohn Isip. Ni ansou me tohnleng pahn kilang inta, e sohte pahn kamehla mesenih en me mi nan ihmwo. Ahpw ihmw kan koaros me sohte inta kadingiding pohn mesen did kan, tohnleng en Koht pahn kamehla mesenih en mahn oh aramas. Met iei kalokolok kaeisek.

Mwehrin kalokolok wet, Paroh padahkiong mehn Israel kan ren pidoi. Sapwellimen Koht aramas akan onopadahr ansouo, oh pwongohte irail tapiadahr arail sapal sang sahpwen Isip.