Moses oh Aaron Tuhong Paroh

NI EN Moses pwurohdohng Isip, e padahkiong rie ohl Aaron manaman kan koaros me e kilang. Oh ni en Moses oh Aaron kasaleong mehn Israel kan manaman pwukat, aramas kan koaros kamehlele me Siohwa mi rehra.

Moses oh Aaron eri kohla oh kilang Paroh. Ira eri padahkiong ih: ‘Siohwa Koht en Israel mahsanih, “Mweidong nai aramas kan en kohla rahn siluh, pwe irail en kak kaudokiong ie nan sahpwtehn.” ’ Ahpw Paroh sapeng: ‘I sohte kamehlele Siohwa. Oh I sohte pahn mweidong mehn Israel kan en kohla.’

Paroh mwakarada, pwehki aramas kan mwahuki kommoal sang doadoahk pwen kaudokiong Siohwa. Ih eri idingkiong irail en doadoahk laud sang mahs. Mehn Israel kan eri mwakarada ong Moses pwehki arail lokolok suwed sangehr mahs, oh Moses pahtouki met. Ahpw Siohwa mahsanih ong Moses en dehr insensuwed. ‘I pahn wiaiong Paroh soahng kei pwe en mweidala nai aramas kan en pidoi,’ Siohwa mahsanih.

Moses oh Aaron pil pwurala oh tuhong Paroh. Ansouwet ira wia manaman ehu. Aaron kasehdi nah sokon, oh e wiahla emen sineik. Ahpw pil nain Paroh ohl loalokong kan kasehdi arail sokon kan, oh sineik kan pwarada. Ahpw, kilang! Nain Aaron sineiko kin kangala sineik kan koaros me ohl loalokong kan en Isip wiahda. Pil met Paroh sohte men mweidong mehn Israel kan en kohla.

Eri ansou lelehr Siohwa en peneukiong Paroh mehn peneu kei. Ke ese dahme e wia? E wahdo kalokolok 10, de kahpwal laud ong sahpwen Isip.

Mwehrin kalokolok tohto pwukat, Paroh eri ileklahng Moses, oh inda: ‘Kauhdi kalokolok pwukat, ah I pahn mweidong mehn Israel kan en kohla.’ Ahpw ni ansou me kalokolok kan uhdi, Paroh wekidla ah lamalam. E sohte men mweidong aramas akan en kohla. Eri, kaimwisekelahn met, mwehrin kalokolok kaeisek, Paroh mweidong mehn Israel kan en kohla.

Ke ese ehu ehu kalokolok 10 pwukat? Pakala noumw pwuhk ong pali en mwuhr oh kitail sukuhliki duen kalokolok pwukat.