Kalokolok Weneu me Wiawi Mwuri

Moses oh Aaron kohla padahkihong Parao rohng pwoatet sang rehn Koht: ‘Ma ke sohte kadarala nei aramas akan, I pahn kadarodo loahng kan nan sahpwet.’ Mwuten loahng kan ahpw kadirehla imwen mehn Isip kan, koaros me kepwehpwe oh semwehmwe kan. Sahpwo pwon direkihla loahng. Ahpw sohte loahng nan sapwen Kosen, wasa me mehn Israel ko kin kousoan ie. Sang kapahieun kalokolok, mehn Isip kante me kin lokolongki. Parao peki rehn Moses: ‘Menlau peki rehn Siohwa en ketikihsang loahng pwukat oh kumwail kak kohkohla.’ Ahpw ni ahnsou me Siohwa ketikihsang loahng pwukat, Parao wekidala eh madamadau. Ia duwe, Parao pahn kak wekila pwehki dahme wiawihong ih?

Siohwa mahsanih: ‘Ma Parao sohte pahn kadarala nei aramas akan, nein mehn Isip mahn akan pahn soumwahuda oh mehla.’ Mwurin rahno, mahn akan tepida mehla. Ahpw nein mehn Israel ko mahn akan sohte mehla. Ahpw Parao pil keptakaite, oh e sohte men mweidirailla.

Mwuri Siohwa mahsanihong Moses en pwurala rehn Parao oh sipedadawohng pehs nan wehwe. Pehso ahpw wiahla pwelpar oh mwarakseli wasa koaros oh mwerediong pohn mehn Isip kan koaros. Pwelparo kahrehiong mehn Isip kan oh neirail mahn akan kens kamedek ni paliwararail kan. Mendahki met, Parao sohte men kadarala mehn Israel ko.

Siohwa pwurehng kadarala Moses rehn Parao pwehn padahkihong rohng pwoatet: ‘Ke pil kahngete kadarala nei aramas akan? Lakapw keteu aihs takai pahn mwerediong pohn sahpwet.’ Mwurin rahno, Siohwa ketin kadaridi keteu aihs takai, nansapwe, oh kisiniei. Met wia melimel me keieu suwed me lelohng Isip. Tuhke oh wahnsapw koaros ohla, ahpw me mi nan Kosen ko sohte ohla. Parao eri nda: ‘Peki rehn Siohwa en kauhdi met! Kumwail ahpw pahn kak kohkohla.’ Ahpw ni ahnsowohte me Siohwa ketin kauhdi met, Parao wekidala eh madamadau.

Moses eri nda: ‘Met loukust kan pahn kangala soangen tuhke koaros me luwehdi sang ni melimelo.’ Loukust rar kei ahpw kangala soahng koaros me luwehdi nan mwaht akan oh tuhke kan. Parao peki rehn Moses: ‘Menlau peki rehn Siohwa en ketikihsang loukust pwukat.’ Ahpw pil mwurin Siohwa eh ketikihsang loukust kan, Parao pil kepkeptakaite.

Siohwa ahpw mahsanihong Moses: ‘Kapahdawei pehmwen pahnlahng.’ Ni ahnsowohte, rotorot mosul pa tepida kipehdi wasao. Erein rahn siluh, mehn Isip kan sohte kak kilang mehkot de emen tohrohr. Mehn Israel kante me mie marain nan imwarail kan.

Parao eri ndaiong Moses: ‘Kowe oh noumw aramas akan kakehr kohkohla. Ihte kumwail kihdi noumwail mahn akan.’ Moses ahpw sapengki: ‘Se anahne wahda nait mahn akan pwe sen kak meirongkihong at Koht.’ Parao uhdahn lingeringerda. E werkihong: ‘Kohkohweisang mwohi! Ma I pwurehng kilang uhk, I pahn kemeiukala.’