Nanmwahrki Suwed Men Kaunda Isip

OHL pwukat wasaht kin idingkiong aramas akan doadoahk. Kilang ohlo me wetih tohndoadoahk men ki mehn kamakam nan peho! Tohndoadoahk pwukat kohsang ni peneinei en Seikop, oh irail adaneki mehn Israel. Oh ohl kan me idingkiong ren doadoahk iei mehn Isip kan. Mehn Israel kan wiahlahr ladu oh lidu nan Isip. Dahme met wiawihki?

Pahr tohto ahn Seikop peneinei kin kousoan ni meleilei nan Isip. Sosep, me keieu kesempwal nan Isip pahnangin Nanmwahrki Paroh, kin apwahpwali irail. Ahpw mwuhri Sosep mehla. Oh emen Paroh kapw, me sohte mwahuki mehn Israel kan, uhd kaunda Isip.

Eri Paroh suwed menet lidukihla mehn Israel kan. Oh kihong aramas lemei kan pwen idingkiong irail en doadoahk. Irail idingkiong mehn Israel kan en wia doadoahk laud en kauwada kahnihmw en Nanmwahrki Paroh. Ahpw mehn Israel kin wia tohtohla ansou koaros. Mwuhri ekis mehn Isip masakada me dene mehn Israel kan pahn tohtohla oh kehlail sang irail.

Ke ese dahme Paroh wia? E kehkehlikiong lih en kaneitik kan koaros me kin sewese lih en Israel kan neitik, oh inda: ‘Kumwail pahn kamehla seri koaros me ipwidi pwutak.’ Ahpw lih pwukat sohte men wia met, oh re sohte men kamehla seri kan.

Paroh eri kihda ehu kehkehlik ong nah aramas kan koaros: ‘Alehda seri ohl mehn Israel kan koaros oh kamehla. Ihte mweidong serepein kan me ipwidi en mour.’ Kaidehn met me mehkot uhdahn suwed en wia? Kitail kilang iaduen emen pwutak kamourala.