Iaduen Seri Moses Kamourala

KILANG kisin serio sengeseng, oh kolokol sendinpe en liho. Menet Moses. Ke ese ihs lih kasehlelo? Lih menet nain mwahrki en Isip, Paroh.

Ahn Moses nohno ekihla seri menet lel sounpwong siluh, pwehki e sohte mwahuki ren kamehla ih. Ahpw e ese me Moses pahn ehu rahn diarekda, eri iet me e wiahda pwen doarehla ih.

E ale ehu kopwou oh wiahda pwe en dehr pwilipwil. Ih eri pwilikihdi Moses loale, oh wahla kopwouo kihdi nan reh ko keilen Pillap Nail. Rien Moses serepein, Miriam, kin kesihnen limwah oh kilikilang dahme pahn wiawi.

Ansoukis mwuhri nain Paroh serepein kohdohng duhdu nan Pillap Nail. Serepeino eri kilangada kopwouo nan reh reirei ko. Ih eri likweri nah lidu ko: ‘Kohla ale kopwouo wahdohng ie.’ Ni ansou me nain nanmwahrki serepeino pahkpesang kopwouo, e kilangada seri kasehlel men loale! Serio sengeseng, oh nain nanmwahrki serepeino poakehla ih. E sohte mwahuki seri menet en kamakamala.

Ni ansouo Miriam eri keido. Ke kak kilang ih nan kilel wet. Miriam idek rehn nain Paroh serepeino: ‘Mwahu ma I kohla oh likweri emen lih en Israel pwen kadihdi serien?’

Nain nanmwahrki serepeino inda, ‘Menlau kohla.’

Miriam eri tangala oh padahkiong ah nohno. Ni ansou me ahn Moses nohno kohdo rehn nain nanwahrki serepeino, serepeino eri inda: ‘Alehda seri menet oh kadihdi ih, oh I pahn pwain uhk.’

Eri ahn Moses nohno alehda pein nah serio. Mwuhri ni ansou me Moses ekis laudla, ih eri alehda ih oh wahla rehn nain Paroh serepeino, me pwekela serio wiahkihla pein nah pwutak. Met iei duen ahn Moses ah kekeirada nan ihmwen Paroh.