OARALAP: DAHME KITAIL SUKUHLKI SANG MOSES
Ihs Moses?
Dahme ke kin medewe ahnsou me ke rong ahd wet Moses? Ke kin medewe . . .
seri me eh nohno ekihla nan kopwou ehu oh kihdi nan Pillap en Nail?
kisin pwutak me nein Parao serepeino apwalihada nan mour kepwehpwe en Isip ahpw e sohte manokehla me ih mehn Israel?
ohl me kousoan nan Midian nin duwen silepen sihpw men erein sounpar 40?
ohl me Siohwaa ketin mahseniong sang nan kisin tuhke me wie lullul?
ohl kommwad me peki rehn nanmwarki en Isip en kasaledekihala mehn Israel ko sang kalidu?
ohl me Koht ketin doadoahngki pwehn pakairki Kalokolok Eisek ko ong Isip pwehki arail nanmwarkio eh pelianda Koht mehlelo?
ohl me kahluwa mehn Israel ko ni arail mweselsang Isip?
ohl me Koht ketin doadoahngki pwehn pwalangpeseng Sehd Weitahtaho?
ohl me kihong mehn Israel ko Kosonned Eisek ko me kohsang rehn Koht?
MOSES wiahda soahng pwukat koaros oh pil soahng teikan. Ihme kahrehda Kristian kan, mehn Suhs kan oh Muslim kan kin wauneki laud ohl lelepek menet.
E sansal me Moses iei soukohp men me wiahda soahng kapwuriamwei oh kamasepwehk kan. (Deuderonomi 34:10-12) E mweidohng Koht en ketin doadoahngki ih ni ahl laud ehu. Ahpw Moses sohte weksang kitail. Duwehte soukohp Elaisa, Moses wia “aramas emen duwehte kitail.” (Seims 5:17; Madiu 17:1-9) Moses lelohng kahpwal tohto me duwehte dahme kitail kin lelohng oh e pweida ni eh powehdi kahpwal pwukat.
Ke men ese ia duwen eh wia met? Tehk irair mwahu siluh me Moses kasalehda oh dahme kitail kak sukuhlki sang eh mehn kahlemeng.
a Siohwa iei mwaren Koht me sansalda nan Paipel.