Dahme Kahrehda Moses Tangwei

KILANG Moses tangwei sang Isip. Ke kak kilang aramas ko me pwakipwakih ih? Ke ese dahme kahrehda re men kamehla Moses? Kitail pahn kilang met ma kitail kak rapahkihda kahrepe.

Moses laudla nan ihmwen Paroh, nanmwahrki en Isip. E wiahlahr emen ohl me uhdahn loalokong oh lapalap. Moses ese me kaidehn ih mehn Isip men, ahpw me uhdahn ah nohno-pahpa kisehn mehn Israel kan me lidlidu.

Ehu rahn, ni ah mahkiehr sounpahr 40, Moses kosonnedi me e pahn kohla oh kilang duen kiseh aramas ko. E diarada me irail uhdahn lokolok laud. E kilang ohl en Isip men kamkame emen mehn Israel. Moses kilang seli oh ni ah sohte kilang aramas men mwasamwasahn, e poakih ohl en Isipo, ohl en Isipo eri mehla. Moses eri ekihla paliwar en ohl menet nan piko.

Mahnda en rahn Moses pil pwurala pwen kilang kiseh aramas ko. E lemeleme me e pahn sewese irail pwe irail en maiouda. Ahpw e kilangada ohl en Israel riemen pepei, Moses eri padahkiong me sapwungo: ‘Dahme kahrehda ke pepeiong riomw?’

Ohlo inda: ‘Ihs me kasapwiluhkada aht kaun oh sounkopwung? Ke pahn kameiehla duwehte ahmw kamehla ohl en Isipo?’

Moses met masapwehkadahr. E eseiehr me aramas akan diarada dahme e wiaiong ohl en Isipo. Pil Paroh rongada met, oh e kadarala ohl kei en kamehla Moses. Ihme kahrehda Moses tang sang Isip.

Ni ansou me Moses tang sang Isip, e kohlahng ehu sahpw doh me adaneki Midian. Wasao e tuhong peneinei en Sedro, oh pwoudkihda nah serepein men me adaneki Sipporah. Moses wiahla emen silipen sihpw oh kin apwahpwali nain Sedro sihpw kan. Impan sounpahr 40 e koukousoan nan sahpwen Midian. Met e mahkiehr sounpahr 80. Ehu rahn ni en Moses kin apwahpwali nain Sedro sihpw kan, mehkot kapwuriamwei wiawi me kawekidla mour en Moses. Pakala nan pali en mwuhri, oh kitail pahn kilang dahkot me kapwuriamwei.