Tuhke Ehu Lulul

MOSES leldohngehr wasa doh nan nahna en Orep pwen rapahki reh ong nah sihpw kan. Wasaht e kilangada tuhke apwoat lulul, ah tuhkeo sohte lulda!

‘Met inenen kapwuriamwei,’ Moses medewela. ‘I pahn kohla ekis kereniong oh kilang mwahu.’ Ni ah wia met, ngihl ehu kohsang nan tuhkeo, mahsanih: ‘Dehr keido keren, pwehki wasa me ke kesihnenda ie pwel sarawi.’ Koht me mahmahsan ki tohnleng men, Moses eri pwaindi mese.

Koht mahsanih: ‘I kilangehr lokolok en nai aramas akan nan Isip. I pahn kamaioirailda, oh kowe me I pahn kadarala pwen kahluwa nai aramas sang nan Isip.’ Siohwa pahn kahluwa sapwellime aramas ong nan sahpw kasehlel en Kenaan.

Moses eri patohan ong: ‘Ngehi sohte mehkot. Iaduen I pahn kak wiahda met? Pwe ma I pahn kohla, mehn Israel pahn indaiong ie, “Ihs me kadaruhkala?” Dahme I pahn inda?’

‘Iet me ke pahn inda,’ Koht sapeng. ‘“SIOHWA Koht en Apram, Koht en Aisek oh Koht en Seikop me kadariehdohng kumwail.”’ Oh Siohwa kapataiong: ‘Iet mwarei kohkohlahte.’

‘Ahpw iaduen ma re sohte kamehlele ie ni ai inda me komwi kadariehla,’ Moses sapeng.

‘Dahme mi nan pehm?’ Koht mahsanih.

Moses sapeng: ‘Tuhke apwoat.’

‘Kasewei pohn pwel,’ Koht mahsanih. Oh ni en Moses wiahda met, tuhkeo wiahla emen sineik. Siohwa eri kasaleong Moses pil ehu manaman. Ih eri mahsanih: ‘Kapidelong pehmwen nan ahmw likou.’ Moses wiahda met, oh ni ah kapidoi peh, e pwetepwetlahr duwehte sinoh! Peho duwehla peh en aramas me ahniki soumwahu tukotuk. Mwuhri Siohwa ketikihong Moses manaman en wia manaman kasiluh. Kaimwisekela ih eri mahsanih: ‘Ni ahmw pahn wia manaman pwukat mehn Israel kan pahn kamehlele me I kadaruhkala.’

Mwehrin met Moses kohieila nan ah wasa oh padahkiong Sedro: ‘Menlau mweidong ie en kohla rehn kisehi kan nan Isip pwe I en kilang iaduen irail.’ Sedro eri kamwurala Moses, oh Moses tapiada sapallahng sahpwen Isip.