Kotehla Sehd Weitahta

KILANG dahme wiawi met! Moses kauala nah sokon pohn Sehd Weitahta. Irail kan me mihmi reh palio doarehlahr iei mehn Israel kan. Ahpw Paroh oh nah sounpei kan koaros mwopela nan pihlo. Kitail pahn kilang duen met.

Duen me kitail sukuhlikiehr, Paroh padahkiong mehn Israel kan en pidoi sang nan Isip mwehrin Koht wahdo kalokolok kaeisek ong mehn Isip kan. Impan mehn Israel 600,000 ohl, lih oh seri kan pidoi sang wasao. Pil aramas tohto teikan iangala, irail kan me pwoson Siohwa, iangala mehn Israel kan. Irail kahrehda neirail sihpw kan oh kuht kan oh kou kan.

Mwohn arail mweselwei sang Isip, mehn Israel kan peki rehn mehn Isip kan en kihong irail likou, kohl oh silper. Mehn Isip kan masapwehk ni ansouo, pwehki kaimwisekelahn kalokolok ong irail. Ihme kahrehda irail kihong mehn Israel kan soahng koaros me re peki.

Mwehrin rahn kei mehn Israel kan leldohng keilen Sehd Weitahta. Wasao re ekis kommoal. Ni ansouo, Paroh oh nah ohl kan tapiadahr pahtoukihla arail kadarala mehn Israel kan. ‘Kitail mweidongehr atail ladu kan en kohla!’ irail inda.

Paroh eri wekidla ah lamalam. Ni karuwaru e kihpene war en nan sahpw en mahwin oh nah sounpei kan. Ih eri tapiada pwakih mehn Israel kan ki mehn dakepe 600, iangahki mehn dakepe teikan.

Ni ansou me mehn Israel kan kilangada Paroh oh nah sounpei kan kohkohdo pwakpwakih irail, irail eri masapwehkada kowahlap. Re sohte kak pitila, sohte wasa re kak tangala ie. Sehd Weitahta kin mi apali irail, oh mehn Isip kan tangatangado sang apalio. Ahpw Siohwa pwilikihdi dapok ehu nanpwungen sapwellime kan oh mehn Isip kan. Mehn Isip kan eri sohte kak kilang mehn Israel kan pwen peiong irail.

Siohwa eri padahkiong Moses en kauala nah sokon pohn Sehd Weitahta. Ni ah wiahda met, Siohwa kahreong kisinieng kehlail sang pali mese en pwarada. Pihlo ahpw pwalpesang, oh wiahda ahl madakeng apwoat nan warengen pihlo.

Mehn Israel kan kak kotehla pohn wasa madakeng. Aua kei me irail aramas rar kei iangahki neirail mahn en kotehla sehd nan wasa me madakeng. Mwuhri ekis mehn Isip kan kakehr kilang mehn Israel kan. Arail ladu kan pahn pitilahr! Irail eri pwakihdiwei irail nan Sehd Weitahta pohn ahl madakeng.

Ni arail wia met, Koht kahreong neh en sariot ko en tengala. Mehn Isip kan ahpw masapwehkada oh tapiadahr werewer: ‘Siohwa me peiki mehn Israel kan pelian kitail. Kitail en mwadang tang sang met!’ Ahpw pwandalahr.

Iei ansou me Siohwa padahkiong Moses en kauala nah sokon pohn Sehd Weitahta, duen me kumwail kilang nan kilel wet. Oh ni en Moses wiahda met, pihlo pwuropene oh mehn Isip kan iangahki dakeparail koaros kihrla. Karis en sounpeio pwon me pwakihdi mehn Israel kan nan warengen pihlo tengala nan madau. Sohte emen mehn Isip pitila!

Met inenen ansou kaperen ehu ong sapwellimen Koht aramas kan me doarehla! Ohl akan kin wia melkahka en danke ong Koht Siohwa, patohanong: ‘Siohwa kana ehu mahwin lingan. E koskihla oahs oh me dake oahs ko nan sehd.’ Rien Moses lih Miriam pil alehda nah mehn kaseng, oh lih kan koaros idawehn ih poakih neirail mehn kaseng ko mwomwen drum. Ni arail kahkahlek oh pereperen, re kin koulki koulohte me ohl kan kin kokoulki: ‘Siohwa kana ni ehu mahwin. E koskihla oahs kan oh me dake irail kan nan madau.’