Manamano ni Sehd Weitahtaho

Ni ahnsowohte me Parao rongada me mehn Israel ko kohkohlahsang Isip, e wekidala eh madamadau ni eh kadariraillahr. E padahkihong nah sounpei ko: ‘Kaunopada werei kurumahn mahwen koaros, oh kitail pwakihala irail! Mehnda kitail mweidohng ren kohkohla.’ Ih oh nah sounpei ko ahpw tepida pwakihala mehn Israel ko.

Siohwa kin ketin kakahluwa sapwellime aramas akan ni eh kin ketin doadoahngki depwek ni rahn oh kisiniei nipwong. E ketin kahluwairaillahng ni Sehd Weitahtaho, oh e mahsanihong irail ren kauwada imwarail impwal ko wasao.

Mwurin mwo mehn Israel ko kilangada Parao oh nah sounpei ko arail pwakipwakih irail. Sohte wasa re kak tangala ie pwehki sehdo mi mwohrail a sounpei en Isip ko kohkohdo mwurirail. Irail eri werkihong Moses: ‘Kitail pahn mehla! Mehnda ke wahsang kiht nan Isip.’ Moses ahpw sapengkin irail: ‘Kumwail dehr masepwehk. Kumwail awih oh kilang duwen Siohwa eh pahn ketin kapitkitailla.’ Moses uhdahn kin likih Siohwa, kaidehn?

Siohwa mahsanihong mehn Israel ko ren mweselda. Nipwongo, Siohwa ketin kamwakid depweko oh pwilikihdi nanpwungen mehn Isip ko oh mehn Israel ko. Pali me mehn Isip ko mi ie rotorot. Ahpw pali me mehn Israel ko mi ie marain.

Siohwa mahsanihong Moses en kapahla peho pohn sehdo. Siohwa eri ketin kamwakid kisinieng kehlail ehu en wie ipihp nipwongo pwon. Sehdo ahpw kohpeseng wiahda pali riau, oh nanwerengeo mie wasa me re kak kotehla. Mehn Israel rar kei alu pohn pwehl madekeng, nanpwungen pali riau en pihlo, kolahng pali teio.

Nein Parao sounpei ko idawehnla mehn Israel ko nan wasa madekengo. Siohwa eri ketin kapingada sounpei ko. Daiahn wararail kuruma ko tepida pwupwusang. Sounpei ko eri weriwerki: ‘Kitail kohkohlahsang wasaht! Pwe Siohwa me pepeikinirail.’

Siohwa eri mahsanihong Moses: ‘Kapahwei pehmwen pohn sehdo.’ Ni ahnsowohte, pihlo pwurpenehng nan dewe oh kamwopwihala sounpei en Isip ko. Parao oh nah sounpei ko koaros mehla. Sohte emente irail mourla.

Palio sehdo, pokon en aramaso ahpw wie kapikapingahki Koht koul pwoatet: ‘Koulkihong Siohwa apwoat koulen, kapingpen roson lapalap en sapwellime powehdi. Pwehki e ketin kakihralahng nan kepin madau oahs akan oh soundakepahr akan.’ Ni aramas ako ar wie kokoul, lih akan wie kahkahlek oh kesekesengki dampwurin. Irail koaros uhdahn peren pwehki met re uhdahn saledeklahr.