Ehu Soahngen Mwenge Kapw

KE KAK inda dahme aramas kan rikirik sang pohn pwel? E duwehte mehkot pwetepwet. E pil mwomwen mwuterek. Ahpw e kaidehn sinoh, de ais; pwe met mehkot me aramas kin kang.

E kereniong sounpwong ehu sang ansou me mehn Israel kan pidoi sang Isip. Ansouwet irail mi nan sahpwtehn. Wasao mwenge tikitik kin kak diarek, ihme aramas kan tapida lipahned koasoaia: ‘E pahn mwahu ma Siohwa kamekihtala nan Isip. Pwe wasao mwenge koaros me se anahne se kak diar.’

Siohwa eri mahsanih: ‘I pahn kahreong mwenge en mweredi sang nanleng.’ Oh iet me Siohwa ketin wiahdahr. Mahndahn rahno mehn Israel kan kilangwei pohn pwel oh pwetepwetkihla me pwupwediehr, oh irail eri idek rehn emenemen: ‘Dahkot metet?’

Moses eri padahkiong irail: ‘Mehpwukat iei mwenge me Siohwa ketikihong kumwail en kang.’ Aramas kan eri kahdaneki soahngo MANNA. Namanam en manna kin duwehte keik me wiawikihda onih. Onih duwehte suke mem.

‘Kumwail en rikada wen me emen kak kang,’ Moses padahkiong aramas kan. Eri ni menseng koaros iet me re kin wia. Ni ansou me ketipin pahn karakarala manna me mi pohn pwelo peipesang.

Moses pil inda: ‘Sohte emen en lemehda nahkpene manna ong rahn en mwuhri.’ Ahpw ekei aramas sohte rong. Ke ese dahme wiawi? Mahnda en rahn manna me re nahkpene kan direkihla mwahs, oh pwoh suwed!

Ahpw rahn ehute nan ehu ehu wihk, me Siohwa padahkiong aramas kan en kihpene pwais en rahn riau. Met iei rahn kawenou. Oh Siohwa mahsanih me re pahn kin nahkpene met ong rahn en mwuhri, pwehki rahn en mwuhri sohte manna pahn pwupwedi, iei rahn kaisuh. Ni arail kin nahkpene manna ong rahn kaisuh, manna ko sohte kin kiteila oh sohte mwahs loale, oh pil sohte pwoh suwedla! Met pil ehu manaman!

Pahr koaros me mehn Israel kan mi nan sahpwtehn Siohwa kin kamwengekin irail manna.