Sineik Kopper

MET duwehte emen uhdahn sineik me pidipidpene tuhkeo? Soh. Sineik menet wiawikihda kopper. Siohwa mahsanih ong Moses en kihda pohn tuhkeo pwe aramas koaros me kilangwong kak mourala. Ahpw sineik teikan me mi pohn pwel uhdahn sineik. Irail kin kei aramas kan oh aramas kan soumwahukihda. Ke ese dahme kahrehda?

Pwehki mehn Israel kan tapiadahr lipahnedi Koht oh Moses. Irail kin lipilipahned: ‘Dahme kahrehda ke wah kiht sang sahpwen Isip pwen mehla nan sahpwtehn? Sohte mwenge de pihl wasaht. Oh se loksangehr manna.’

Ahpw manna uhdahn mwenge kasehlel ehu. Ki manaman Siohwa ketikihong irail. Sang ni manaman e pil ketikihong irail pihl. Ahpw aramas kan sohte kin danke ki mehkan me Koht ketin wia pwen apwalikin irail. Ihme Siohwa kadarala sineik poison pwen kaloke mehn Israel kan. Sineik kan kin kei irail, oh me tohto mehla.

Kadekadeo aramas kan eri kohdo rehn Moses oh inda: ‘Se wiahdahr dihp, pwehki se kin lipahnedi Siohwa oh kowe. Eri menlau kapakap ong Siohwa met pwen ketikihsang sineik pwukat.’

Moses eri kapakapki aramas kan. Oh Siohwa padahkiong Moses en wiahda emen sineik kopper. E mahsanih en kihong pohn apwoat tuhke oh kauwada, oh aramas men me sineik keidi en kilangwong. Moses wia duen me Koht mahsanih. Oh aramas kan me sineik keidi kilangwong sineik koppero oh kehlailada.

Met wia mehn kasukuhl mwahu ehu ong kitail. Kitail koaros kin pahrekiong mehn Israel kan me sineik keidi. Kitail koaros kin mihmi nan irair en kohkohlahng mehla. Nna, kilangseli, pwe ke pahn kilang me aramas koaros kin mahla, soumwahuda, oh mehla. Met pwehki keieun ohl oh lih, Adam oh Ewa, sohpeiwei sang Siohwa, oh kitail koaros neira seri. Ahpw Siohwa ketin wiahdahr ahl ehu me kitail koaros kak en mour kohkohlahte.

Siohwa poronehdo sapwellime Ohl, Sises Kraist, ong sampah. Sises langada pohn tuhke apwoat, pwehki aramas tohto ansouo lemeleme me ih aramas suwed men. Ahpw Siohwa ketikihda Sises pwen doarekitailla. Ma kitail pahn sohpeilahng ih, ma kitail pahn idawehn ih, eri kitail pahn ahniki mour soutuk. Ahpw kitail pahn sukuhliki met ekis mwuhr.