Emen Donkih Lokaia

KE RONGEHR mie emen donkih (mahn men duwehte oahs) lokaia? ‘Soh,’ ihme ke pahn inda. ‘Mahn sohte kak lokaia.’ Ahpw Paipel padahkiong kitail me donkih emen wia met. Kitail pahn kilang duen dahme wiawi.

Mehn Israel kan kereniongehr pidelong ong nan sahpwen Kenaan. Pelak, nanmwahrki en Moap, kin masak mehn Israel kan. Ih eri ilekilahng emen ohl loalokong me adaneki Pelaam pwen kohdo oh kariala mehn Israel kan. Pelak inoukiong Pelaam me e pahn kihong ih mwohni tohto, Pelaam eri douda pohn nah donkih oh tapiada kohla pwen tuhong Pelak.

Siohwa sohte mwahuki Pelaam en kariala Sapwellime aramas kan. Ih eri kadarala tohnleng men me naineki kedlas reirei pwoat en kesihnenda pohn ahlo oh kauhdi Pelaam. Pelaam sohte kak kilang tohnlengo, ahpw nah donkiho kak. Donkiho eri song en sohpeiwei sang tohnlengo, oh pil mwohndi nan ahlo. Pelaam mwakarada oh tapida wetih nah donkih ki apwoat tuhke.

Siohwa eri kahreong Pelaam en rong donkiho lokaia ong ih. ‘Dahme I wiaiong uhk pwe ken kame ie?’ donkiho idek.

‘Ke wiahkin ie duwehte pweipwei men,’ Pelaam sapeng. ‘Ma mie nai kedlas I pahn kameiuhkala!’

‘Mie ansoukis me I wiaiong uhk duwehte met mahs?’ donkiho idek.

‘Soh,’ Pelaam sapeng.

Siohwa eri mweidong Pelaam en kilang tohnlengo me naineki kedlas reirei keskesihnen pohn ahlo. Tohnlengo inda: ‘Dahme ke kamehki noumw donkih? I kohdo pwen irehdi sang uhk pwe ken dehr kohla oh kariala mehn Israel ko. Ma noumw donkiho sohte uhdi sang rehi, I pahn kameiuhkala, ah I sohte pahn kamehla noumw donkih.’

Pelaam eri inda: ‘I wiahdahr dihp. I sohte ese me ke keskesihnen pohn ahlo.’ Tohnlengo eri mweidong Pelaam en kohla, oh Pelaam kohla oh tuhong Pelak. E song en kariala mehn Israel ko, ahpw, Siohwa wekid oh kahreong ih en kapaiada mehn Israel kan pak siluh.