Rohs Wosada Ni Sokon en Aaron

KILANG rohs kan oh wahn almond mat kan mi ni sokon pwoatet. Sokono nain Aaron. Rohs ko oh wahn tuhke mat ko wosada sang nain Aaron sokon ni pwong tehieu! Kitail pahn kilang dahme kahrehda met.

Mehn Israel kan keikeiru seliehr nan sahpwtehn leldo met. Ekei aramas kan sohte pwungki Moses en wia arail kaun, de Aaron en wia arail samworo lapalap. Korah iei emen ohl me wia soahngen lamalam wet, pil duwehte Dedan, Apairam oh kaun 250 en irail aramas ko. Irail pwukat koaros kohdo oh indaiong Moses: ‘Dahme kahrehda ke kin wiahkin uhkala en powehdi kiht koaros?’

Moses eri padahkiong Korah oh kiseh kan: ‘Ni menseng en lakapw kumwail pahn alehda mehn kol kisiniei oh kihong mehn kapwohtik loale. Kumwail ahpw kohdohng ihmwen kaudok en Siohwa. Kitail pahn kilang ihs me Siohwa pahn pilada.’

Mahnda en rahno Korah oh ienge me 250 kohdohng ni ihmwen kaudoko. Aramas tohto teikan pil kohdo me pwungki aramas pwukat. Siohwa ahpw engiengda kowahlap. ‘Kumwail keiwei sang ihmwen aramas pwukat,’ Moses indahda. ‘Dehr doahke me arail.’ Aramas kan rong, oh keiwei sang ihmwen Korah, Dedan oh Apairam.

Moses eri inda: ‘Ki met kumwail pahn ese ihs me Siohwa piladahr. Sahpwo pahn pwalpesang oh kadalehla aramas suwed pwukat.’

Mwehrin Moses kaimwisekela ah koasokoasoai, sahpwo pwalpesang. Ihmwen Korah, ah dipwisou kan oh Dedan oh Apairam oh irail koaros me iang irail pwupwedi nan pwoahro, sahpwo pil pwurehng pirepene. Ni en aramas kan rong ngihlen irail me pwupwedi nan pwoahr en sampah, irail weriwer: ‘Tang! Pwe sampah pil pahn kadalehla kitail!’

Korah oh kiseh me 250 mihmihte limwahn ihmwen kaudoko. Siohwa eri kadarodo kisiniei, oh irail koaros lulda. Siohwa eri padahkiong nain Aaron ohl Eliasar en alehda mehn deupen kisiniei ko sang rehn me mehlahr ko oh wiakihla pwainen pehi sarawi. Mehn pwainen pehi sarawi wet pahn wia mehn peneu ong mehn Israel kan me sohte emen likin Aaron oh nah pwutak ko kak en wia samworo ong Siohwa.

Ahpw Siohwa men kasansalehda mwahu me Aaron oh nah ko me e ketin piladahr pwen wia samworo. Ih eri padahkiong Moses: ‘Kaun en ehu ehu kainok en mehn Israel kan en wahdo neirail sokon. Sang ni kainok en Lipai, Aaron en pil wahdo nah sokon. Kowe pahn alehda sokon pwukat koaros oh kihdi nan ihmwen kaudok mwohn kohpwa en inou. Sokon en ohl me I piladahr pahn mie rohs wosada sang.’

Ni en Moses pwurohdo oh kilang mahnda en rahn, nain Aaron sokon mieiehr rohs wosada iangahki almond me mat! Eri ke ese met dahme kahrehda Siohwa kahreong rohs kan en wosada sang ni sokon en Aaron?