Moses Poakih Takai

SOUNPAHR kei dower powe—sounpahr 10, sounpahr 20, sounpahr pahr 30, sounpahr 39! Oh mehn Israel kan mihmihte nan sahpwtehn. Erein sounpahr pwukat Siohwa kin apwahpwali sapwellime aramas kan. E kin kamwengekin irail manna. E kin kahluwa irail ni rahn ki uren dapok, oh ni pwong ki uren kisiniei. Erein sounpahr pwukat koaros arail likou kan sohte meringla oh nehrail kan sohte madakla.

Met keieun sounpwong en sounpahr kapaisek sang ansou me re pidoi sang Isip. Mehn Israel kan pil sapsapal pwurohdo Kades. Wasaht me irail kadarala lipahrok 12 pwen lipahroke sahpwen Kenaan sounpahr 40 mwowe. Rien Moses lih Miriam mehlahr Kades. Oh duwehte mahs, pil mie kamwoaroang pwarada wasaht.

Aramas kan sohte kak diar pihl. Irail eri lipahned ong Moses: ‘E pahn mwahu ma kiht mehla. Dahme kahrehda ke wah kiht sang Isip pwen kohdohng wasa suwed duwehte met? Sohte mehkot kin wosada met. Sohte krein, sohte pik, sohte pomekranet. Pil sohte pihl me emen en kak nim.’

Ni en Moses oh Aaron kohla ni ihmwen kaudok pwen kapakap, Siohwa padahkiong Moses: ‘Kihpene aramas kan. Eri mwohn aramas pwukat koaros ke pahn koasoai ong takaio. Pwe pihl pahn kohsang nan takaio ong aramas kan koaros oh neirail mahn kan.’

Moses eri kihpene aramas kan, oh inda: ‘Rong, kumwail me sohte liki Koht! Ngehi oh Aaron pahn kihsang pihl nan takaio ong kumwail?’ Moses eri poakih takaio pak riau oh pihl ahpw kuskusdo kehlail sang nan takaio. Itar pihl ong aramas kan koaros oh neirail mahn akan.

Ahpw Siohwa engiengda rehn Moses oh Aaron. Ke ese dahme kahrehda? Pwehki Moses oh Aaron koasoaia me ira pahn kihsang pihl nan takaio. Ahpw ni mehlel Siohwa me wiahda met. Oh pwehki Moses oh Aaron sohte koasoai mehlel, Siohwa eri kaloke ira. ‘Kumwa sohte pahn kahluwa nai aramas kan ong nan Kenaan,’ e mahsanih.

Mwuhri ekis mehn Israel kan mweselwei sang Kades. Mwehrin ansou mwotomwot re leldohng Dohl en Or. Wasaht, pohn kadoken nahnao, Aaron mehla. E mahkiehr sounpahr 123 ansou me e mehla. Mehn Israel kan pahtoula, oh erein rahn 30 aramas kan mwaieiki Aaron. Nah pwutak Eliasar uhd kasapwilda wiahla samworo lapalap en wehin Israel.